1, 2. (a) Ngaa nagdesisyon ka nga mag-alagad sa Dios? (b) Ano ang mga pamangkot parte sa aton espirituwal nga palanublion?

MINILYON sa aton ang naghimo sing maalamon nga desisyon nga mag-alagad kay Jehova nga Dios kag magsunod sing maayo kay Jesucristo. (Mat. 16:24; 1 Ped. 2:21) Wala naton ginapakadiutay ang aton dedikasyon sa Dios. Ang aton desisyon nabase, indi sa hapaw nga ihibalo sa pila ka kasulatan, kundi sa maid-id nga pagtuon sa Pulong sang Dios. Subong resulta, natun-an naton ang madamo kag makapalig-on sa pagtuo nga mga impormasyon parte sa palanublion nga ginhatag ni Jehova para sa mga ‘nagakuha sing ihibalo tuhoy sa iya kag sa iya ginpadala nga si Jesucristo.’—Juan 17:3; Roma 12:2.

² Para mahuptan ang aton tindog subong mga Cristiano, dapat kita maghimo sing mga desisyon nga magapahalipay sa aton Amay sa langit. Gani ini nga artikulo magabinagbinag sining importante nga mga pamangkot: Ano ang aton palanublion? Paano naton ini dapat tamdon? Paano naton mapat-od nga matigayon ang aton palanublion? Ano ang makabulig sa aton nga makahimo sing maalamon nga mga desisyon?

3. Ano nga palanublion ang matigayon sang (a) mga hinaplas kag (b) “iban nga mga karnero”?

³ Ang pila ka Cristiano nagalaum nga makabaton sing “di-madinulunton kag wala sing dagta kag di-maalimunaw nga palanublion”—ang hamili nga pribilehiyo nga maggahom upod kay Cristo sa langit. (1 Ped. 1:3, 4) Agod matigayon ina nga palanublion, ini nga mga indibiduwal dapat “mabun-ag liwat.” (Juan 3:1-3) Ano naman ang palanublion sang minilyon nga “iban nga mga karnero” ni Jesus, nga nagabantala sing maayong balita sang Ginharian sang Dios  upod sa hinaplas nga mga sumulunod? (Juan 10:16) Magabaton sila sing palanublion nga wala natigayon sang makasasala nga sanday Adan kag Eva—ang kabuhi nga walay katapusan sa paraiso nga duta nga wala na sing pag-antos, kamatayon, ukon paglalaw. (Bug. 21:1-4) Gani si Jesus nagsaad sa malauton nga napatay kaupod niya: “Sa pagkamatuod ginasiling ko sa imo karon nga adlaw, Mangin kaupod ko ikaw sa Paraiso.”—Luc. 23:43.

4. Ano nga mga pagpakamaayo ang natigayon naton karon?

⁴ Bisan sa karon, natigayon naton ang pila ka bahin sang aton palanublion. Bangod nagtuo kita “sa gawad nga ginbayad ni Cristo Jesus,” may kalinong kita kag suod nga kaangtanan sa Dios. (Roma 3:23-25) May maathag kita nga paghangop sa hamili nga mga saad sa Pulong sang Dios. Isa pa, nalipay gid kita nga mangin bahin sang mahigugmaon nga paghiliutod sa bug-os nga kalibutan. Kag daku gid nga pribilehiyo nga mangin isa sa mga Saksi ni Jehova. Amo nga ginapabaloran gid naton ang aton palanublion!

5. Ano ang ginatinguhaan ni Satanas nga himuon sa katawhan sang Dios, kag paano kita makatindog sing malig-on sa iya mga pahito?

⁵ Pero, agod makapanguyapot sa aton dalayawon nga palanublion, dapat magpabilin kita nga alisto sa mga padihot ni Satanas. Ginatinguhaan niya pirme nga impluwensiahan ang katawhan sang Dios sa paghimo sing mga desisyon nga makawasi sang ila palanublion. (Num. 25:1-3, 9) Bangod nahibaluan niya nga malapit na ang iya kalaglagan, ginatinguhaan pa gid niya nga patalangon kita. (Basaha ang Bugna 12:12, 17.) Agod magpabilin nga “makatindog . . . sing malig-on batok sa mga pahito sang Yawa,” dapat gid naton padayon nga pabaloran ang aton palanublion. (Efe. 6:11) Sa sini nga bahin, makatuon gid kita sing leksion kay Esau, ang anak sang patriarka nga si Isaac.

6, 7. Sin-o si Esau, kag ano nga palanublion ang nagahulat sa iya?

⁶ Mga 4,000 ka tuig ang nagligad, si Esau kag ang iya kapid nga si Jacob, nangin anak nanday Isaac kag Rebeca. Samtang nagadaku sila, lainlain ang ila mga kinaiya kag buluhaton. “Si Esau sampaton nga mangangayam, tawo sang latagon, samtang si Jacob tawo nga maligdong, nga nagapuyo sa mga layanglayang.” (Gen. 25:27) Ang Hebreo nga tinaga nga ginbadbad “maligdong,” suno sa translator sang Biblia nga si Robert Alter, “nagapahangop sing integridad ukon pagkainosente pa gani.”

⁷ Sang 15 anyos sanday Esau kag Jacob, napatay ang ila lolo nga si Abraham, pero nagapabilin ang saad ni Jehova sa iya. Sang ulihi, ginsulit ini ni Jehova kay Isaac, nga nagasiling nga ang tanan nga kapungsuran sang duta magapakamaayo sang ila kaugalingon paagi sa kaliwat ni Abraham. (Basaha ang Genesis 26:3-5.) Ina nga saad nagapakita nga ang Mesias—ang matutom nga “kaliwat” ukon binhi sa Genesis 3:15—magagikan sa kaliwatan ni Abraham. Subong panganay nga anak ni Isaac, si Esau ang may kinamatarong sa sina nga saad. Posible nga matigayon niya ang isa ka dalayawon nga palanublion! Gin-apresyar bala niya ini?

8, 9. (a) Ano nga desisyon ang nahimo ni Esau parte sa iya palanublion? (b) Pila ka tuig sang ulihi, ano ang narealisar ni Esau sa iya desisyon, kag ano ang iya reaksion?

⁸ Isa ka adlaw, sang nag-abot si Esau halin sa latagon, nakita niya si Jacob nga ‘nagaluto sing linaga.’ Nagsiling si Esau: “Pakaona ako sinang mapula nga linaga, kay gutum ako!” Nagsabat si Jacob: “Ibaligya anay sa akon ang imo pagkapanganay.” Ano ang ginpili ni Esau? Nagsiling sia: “Ano bala ang kapuslanan sa akon sang pagkapanganay?” Huo, ginpili ni Esau ang isa ka yahong sang linaga sangsa iya kinamatarong subong panganay! Agod masiguro ni Jacob nga ginbaylo matuod ni Esau ang iya pagkapanganay, nagsiling sia: “Sumpa ka anay sa akon.” Wala sing pagpangalag-ag nga ginbaylo ni Esau ang iya pagkapanganay. Dayon, “ginhatagan ni Jacob si Esau sing tinapay kag linaga nga mga lentejas, kag nagkaon sia kag nag-inum, kag nagtindug kag naglakat sia. Sa  amo gintamay ni Esau ang iya pagkapanganay.”—Gen. 25:29-34.

⁹ Pila ka tuig sang ulihi, sang nabatyagan ni Isaac nga malapit na lang sia mapatay, ginpat-od ni Rebeca nga si Jacob gid ang makabaton sang pagkapanganay nga ginwasi ni Esau. Sang narealisar ni Esau ang kabuangan nga iya nahimo, nakitluoy sia kay Isaac: “Pakamaayoha ako, bisan ako man, O amay ko! . . . Wala ka bala sing natigana nga pagpakamaayo sa akon?” Sang nagsiling si Isaac nga indi na niya mabag-o ang pagpakamaayo nga nahatag niya kay Jacob, “nagsinggit si Esau kag naghibi.”—Gen. 27:30-38.

10. Paano gintamod ni Jehova sanday Esau kag Jacob, kag ngaa?

¹⁰ Ano nga panimuot ni Esau ang ginpadaku sa Kasulatan? Ginpakita niya nga ang pagtigayon sang iya undanon nga mga handum mas importante sangsa mga pagpakamaayo sa palaabuton nga mahimo maghalin sa iya palanublion. Wala ginpabaloran ni Esau ang iya pagkapanganay kag maathag nga wala gid niya ginhigugma ang Dios. Dugang pa, wala niya ginpamensar ang mangin epekto sang iya ginhimo sa iya mga kaliwat. Sa pihak nga bahin, ginpabaloran gid ni Jacob ang iya palanublion. Halimbawa, ginsunod ni Jacob ang sugo sang iya mga ginikanan parte sa pagpili sing mapangasawa. (Gen. 27:46–28:3) Bangod ginhimo ni Jacob ini nga desisyon nga nagakinahanglan sing pagpailob kag pagsakripisyo, nangin katigulangan sia sang Mesias. Paano gintamod sang Dios sanday Esau kag Jacob? Paagi kay manalagna Malaquias, si Jehova nagsiling: “Ginhigugma ko si Jacob, apang si Esau gindumtan ko.”—Mal. 1:2, 3.

11. (a) Subong mga Cristiano, ano ang matun-an naton sa halimbawa ni Esau? (b) Ngaa ginsambit ni Pablo ang pagpakighilawas sang ginpatuhuyan niya ang ginhimo ni Esau?

¹¹ May matun-an bala ang mga Cristiano sa karon sa ginsiling sang Biblia tuhoy kay Esau? Huo. Ginpaandaman ni apostol Pablo ang iya masigkatumuluo nga maghalong nga “wala sing makihilawason ukon bisan sin-o nga wala nagaapresyar sa sagrado nga mga butang, kaangay ni Esau, nga kabaylo sang isa ka pagkaon ginhatag niya ang iya mga kinamatarong subong panganay.” (Heb. 12:16) Ini nga paandam maaplikar gihapon sa mga Cristiano. Dapat padayon naton nga apresyahon ang sagrado nga mga butang agod indi kita madaug sang aton undanon nga mga handum kag madula ang aton espirituwal nga palanublion. Pero, ngaa ginsambit ni Pablo ang pagpakighilawas sang ginpatuhuyan niya ang ginhimo ni Esau? Bangod kon ilugon sang isa ang undanon nga disposisyon ni Esau, mahimo ibaylo niya ang sagrado nga mga butang para sa indi nagakaigo nga pagpangalipay, subong sang pagpakighilawas.

12. (a) Paano kita ginasulay ni Satanas? (b) Maghatag sing mga halimbawa sa Biblia nga makabulig sa aton kon ginasulay kita nga maghimo sing malain.

¹² Subong mga alagad ni Jehova, ginalikawan  naton ang mga sitwasyon nga mahimo magdul-ong sa seksuwal nga imoralidad. Nagapangamuyo kita kay Jehova nga Dios nga indi niya kita pagtugutan nga madala kon sulayon kita sang iban nga lapason Sia. (Mat. 6:13) Pero ginapanikasugan pirme ni Satanas nga paluyahon ang aton espirituwalidad samtang ginatinguhaan naton nga huptan ang aton integridad sa sining malaut nga kalibutan. (Efe. 6:12) Subong dios sining sistema sang mga butang, nahibaluan sang Yawa kon paano pukawon ang aton di-himpit nga mga kailigbon paagi sa mga pagsulay nga kinaandan sa di-himpit nga mga tawo. (1 Cor. 10:8, 13) Halimbawa, ibutang ta nga ginasulay ka nga busgon ang imo imoral nga kailigbon. Ano ang imo pilion? Ilugon mo bala si Esau kag magsiling: ‘Dalia! Ihatag ina sa akon!’ Ukon pamatukan mo bala ang pagsulay kag magpalayo sa sini, subong sang ginhimo sang anak ni Jacob nga si Jose, sang gintentar sia sang asawa ni Potifar?—Basaha ang Genesis 39:10-12.

13. (a) Paano ang madamo sa karon nag-ilog kay Jose, pero paano ang pila nangin kaangay ni Esau? (b) Ano ang dapat naton himuon para indi mangin kaangay sang mga nag-ilog kay Esau?

¹³ Madamo sa aton kauturan ang nakaatubang sing mga sitwasyon diin kinahanglan nila magpili kon bala ilugon nila si Esau ukon si Jose. Ang kalabanan nangin maalamon kag ginpahalipay ang tagipusuon ni Jehova. (Hulu. 27:11) Pero ang pila sang aton masigkatumuluo nagpili nga ilugon si Esau sang ginsulay sila, amo nga nabutang sa katalagman ang ila espirituwal nga palanublion. Ang matuod, madamo ang ginasaway kag ginadisfellowship kada tuig bangod sa seksuwal nga imoralidad. Gani importante gid nga ihanda ang aton tagipusuon karon—antes pa kita mabutang sa sitwasyon nga matilawan ang aton integridad! (Sal. 78:8) Puede naton mahimo ang duha ka tikang para maproteksionan kita batok sa pagsulay kag mabuligan nga makahimo sing maalamon nga mga desisyon.

14. Ano nga mga pamangkot ang aton pamalandungan para mabuligan kita nga ‘kangil-aran ang malaut’ kag “magpanguyapot sing malig-on sa maayo”?

¹⁴ Ang una nga tikang amo ang pagpamalandong sa mga resulta sang aton mga ginahimo. Ang kadalumon sang aton apresasyon sa aton espirituwal nga palanublion nagadepende gid sa kadalumon sang aton gugma kay Jehova, ang Manughatag sina nga palanublion. Kay man, kon ginahigugma naton ang isa ka persona, indi naton luyag nga masakitan sia. Kundi, ginatinguhaan naton nga matigayon ang iya kahamuot. Gani, dapat kita magpain sing tion sa pagpamalandong kon ano ang mangin epekto sa aton kag sa iban sang pagpadala sa undanon nga mga kailigbon. Dapat naton pamangkuton ang aton kaugalingon: ‘Ano ang mangin epekto sang akon maiyaiyahon nga buhat sa akon kaangtanan kay Jehova? Ano ang mangin epekto sang akon malain nga buhat sa akon pamilya? Ano ang mangin epekto sini sa akon mga kauturan sa kongregasyon? Masandad bala sa sini ang iban?’ (Fil. 1:10) Mahimo man kita mamangkot: ‘Madula bala sang makadali nga pagpangalipay ang kasakit nga mangin resulta sa ulihi? Gusto ko bala mangin kaangay ni Esau, nga maghibi sing mapait kon makamarasmas na ako sa akon ginhimo?’ (Heb. 12:17) Ang pagpamalandong sa sini nga mga pamangkot makabulig sa aton nga ‘kangil-aran ang malaut’ kag “magpanguyapot sing malig-on sa maayo.” (Roma 12:9) Kon ginahigugma naton si Jehova, tinguhaan gid naton nga amligan ang aton palanublion.—Sal. 73:28.

15. Ano ang magapabakod sang aton mga depensa batok sa mga butang nga magahalit sa aton espirituwalidad?

¹⁵ Ang ikaduha nga tikang amo ang pagpabakod sang aton mga depensa. Si Jehova nagaaman sing madamo nga probisyon sa aton para mapabakod ang aton mga depensa batok sa mga butang sa kalibutan nga makahalit sa aton espirituwalidad. Nalakip sa sini ang pagtuon sa Biblia, Cristiano nga mga miting,  pagministeryo, kag pangamuyo. (1 Cor. 15:58) Sa kada tion nga nagapabutyag kita kay Jehova paagi sa pangamuyo kag nagapakigbahin sing bug-os sa Cristianong ministeryo, pareho lang nga ginapabakod naton ang aton proteksion batok sa mga pagsulay. (Basaha ang 1 Timoteo 6:12, 19.) Mangin mabaskog ang aton depensa kon panikasugan naton nga pabakuron ini. (Gal. 6:7) Ginapadaku ini sa ikaduha nga kapitulo sang Hulubaton.

16, 17. Paano kita mangin madinalag-on sa pagtigayon sang ikasarang sa paghimo sing maalamon nga mga desisyon?

¹⁶ Ang Hulubaton kapitulo 2 nagapalig-on sa aton nga magtigayon sing kaalam kag ikasarang sa paghunahuna. Magabulig ini sa aton nga makilala ang maayo kag ang malain, kag ang kinatuhayan sang disiplina sa kaugalingon kag sang pagpatuyang sa kaugalingon. Pero mangin madinalag-on kita kon magpanikasog kita. Ang Biblia nagasiling: “Anak ko, kon batonon mo ang akon mga polong kag tipigan ang akon mga sogo sa imo, sa paglingig sang imo idulungug sa kaalam kag sa pagpahamtang sang imo tagiposoon sa paghangup; hoo, kon magtuaw ka sono sa paghantup kag magbayaw sang imo tingug tungud sa paghangup, kon pangitaon mo sia subong sang pilak kag mag-usisa sa iya subong sang mga bahandi nga natago; niyan mahangup mo ang kahadluk sa GINOO kag makita mo ang ihibalo sang Dios. Kay ang GINOO nagahatag sing kaalam; gikan sa iya baba nagagowa ang ihibalo kag paghangup.”—Hulu. 2:1-6.

¹⁷ Gani maathag nga mangin madinalag-on lang kita sa pagtigayon sang ikasarang sa paghimo sing maalamon nga mga desisyon kon himuon naton ang ginasiling sa Hulubaton. Mangin madinalag-on kita sa pagtindog sing malig-on batok sa mga pagsulay kon tugutan naton ang mga pinamulong ni Jehova nga magdihon sa aton pagkatawo, kon padayon kita nga mangamuyo sa panuytoy sang Dios, kag kon padayon naton nga pangitaon ang ihibalo sang Dios pareho sang natago nga mga bahandi.

18. Ano ang determinado mo nga himuon, kag ngaa?

¹⁸ Si Jehova nagahatag sing ihibalo, paghangop, paghantop, kag kaalam sa mga nagapanikasog sa pagpangita sini. Kon padayon naton ini nga pangitaon kag gamiton, magasuod kita sa Manughatag sini, si Jehova nga Dios. Sa amo, ang aton suod nga kaangtanan sa iya magaamlig sa aton kon ginasulay kita. Ang pagpabilin nga suod kay Jehova kag ang kahadlok sa iya magaamlig sa aton sa paghimo sing sala. (Sal. 25:14; Sant. 4:8) Kabay nga ang aton kalipay sa pagpakig-abyan kay Jehova kag ang pag-aplikar sa diosnon nga kaalam magapahulag sa aton tanan nga padayon nga maghimo sing husto nga mga desisyon nga nagapahalipay sa tagipusuon ni Jehova kag nagaamlig sa aton palanublion.