1. Ngaa masiling nga si Jehova ang panguna nga Ebanghelisador?

ANG isa ka ebanghelisador nagasugid sang maayong balita. Ang panguna nga Ebanghelisador amo si Jehova nga Dios. Sang nagrebelde ang aton una nga mga ginikanan, ginpahibalo gilayon ni Jehova ang maayong balita nga ang man-ug—si Satanas nga Yawa—pagalaglagon. (Gen. 3:15) Sa sulod sang mga siglo, gin-inspirar ni Jehova ang matutom nga mga lalaki nga isulat ang mga detalye kon paano matinluan ang iya ngalan gikan sa kahuy-anan, kon paano madula ang halit nga ginhimo ni Satanas, kag kon paano matigayon liwat sang mga tawo ang mga kahigayunan nga gindula nanday Adan kag Eva.

2. (a) Ano ang papel sang mga anghel sa hilikuton nga pag-ebanghelyo? (b) Ano nga talaksan ang ginpahamtang ni Jesus para sa mga ebanghelisador?

² Ang mga anghel mga ebanghelisador man. Nagasugid sila sing maayong balita, kag nagabulig sa iban sa pagpalapnag sini. (Luc. 1:19; 2:10; Binu. 8:26, 27, 35; Bug. 14:6) Kamusta naman ang arkanghel nga si Miguel? Sang yari sia sa duta subong si Jesus, nagpahamtang sia sing talaksan para sa tawo nga mga ebanghelisador. Ginpakita niya nga nasentro ang iya kabuhi sa pagpalapnag sang maayong balita.—Luc. 4:16-21.

3. (a) Ano ang maayong balita nga ginapalapnag naton? (b) Ano nga mga pamangkot ang makapainteres sa aton bilang mga ebanghelisador?

³ Ginsugo ni Jesus ang iya mga disipulo nga mangin mga ebanghelisador. (Mat. 28:19, 20; Binu. 1:8) Ginpalig-on ni apostol Pablo ang iya kaupod nga si Timoteo: “Himua ang hilikuton sang isa ka ebanghelisador, tumana sing bug-os ang imo ministeryo.” (2 Tim. 4:5) Ano ang maayong balita nga ginapalapnag naton bilang mga sumulunod ni Jesus? Nagalakip ini sang makapalig-on nga kamatuoran nga ginahigugma kita sang aton Amay sa langit, si Jehova. (Juan 3:16; 1 Ped. 5:7) Ginpamatud-an ni Jehova nga Dios ang iya gugma paagi sa iya Ginharian. Gani, malipayon naton nga  ginasugid sa iban nga ang tanan nga nagapasakop sa paggahom sang Ginharian, nagatuman sa Dios, kag nagahimo sang matarong mahimo mangin abyan niya. (Sal. 15:1, 2) Ang matuod, katuyuan ni Jehova nga dulaon ang tanan nga pag-antos. Dulaon man niya ang kasakit nga resulta sang malain nga mga inagihan. Isa gid ini ka maayong balita! (Isa. 65:17) Bangod mga ebanghelisador kita, binagbinagon naton ang sabat sa duha ka importante nga pamangkot: Ngaa importante nga mabatian sang mga tawo ang maayong balita karon? Kag paano naton matuman sing madinalag-on ang aton papel subong mga ebanghelisador?

4. Ano nga mga kabutigan ang ginasugid kon kaisa sang mga tawo parte sa Dios?

⁴ Ibutang ta nga may nagsugid sa imo nga ang imo amay nag-abandona sa imo kag sa inyo pamilya. Ang mga nakakilala sa iya nagsiling nga indi niya kamo palangga, may ginatago sia sa inyo, kag mapintas sia. Ang iban mahimo pa magsiling nga indi na kinahanglan nga pangitaon mo ang imo amay bangod patay na sia. Amo gid sini ang ginasugid sa madamo nga tawo parte sa Dios. Ginatudluan sila nga ang Dios misteryo, indi makilala, kag mapintas. Halimbawa, ang pila ka lider sang relihion nagasiling nga silutan sang Dios sing dayon ang malain nga mga tawo sa impierno. Ginabasol man sang iban ang Dios bangod sa mga kalamidad. Bisan pa ini nga mga hitabo nagapatay sa maayo kag malain nga mga tawo, nagasiling ang iban nga silot ini sang Dios.

5, 6. Ano ang epekto sa mga tawo sang teoriya sang ebolusyon kag sang butig nga mga doktrina?

⁵ Ang iban nagasiling nga wala sing Dios. Halimbawa, binagbinaga ang teoriya sang ebolusyon. Madamo nga sumalakdag sini ang nagasiling nga ang kabuhi nagluntad lamang nga wala sing intelihente nga nagtuga. Para sa ila, wala sing Manunuga. Ang iban nagasiling pa gani nga ang mga tawo isa lamang ka sahi sang sapat, gani indi katingalahan nga may sapatsapaton sila nga mga batasan. Nagasiling sila nga ang mga mabakod nga nagapigos sa mga maluya nagasunod lang sa ginatawag nga mga kasuguan sang kinaugali. Gani, indi na kita matingala nga madamo ang nagapati nga indi gid madula ang inhustisya. Amo nga ang mga nagapati sa ebolusyon wala sing matuod nga paglaum.

⁶ Maathag nga ang teoriya sang ebolusyon kag ang butig nga mga doktrina nangin rason sang pag-antos sang katawhan sa sining katapusan nga mga adlaw. (Roma 1:28-31; 2 Tim. 3:1-5) Ini nga mga panudlo indi gid maayong balita. Sa baylo, suno sa ginsiling ni apostol Pablo, ginpabay-an sini ang katawhan nga “nadulman . . . sa ila hunahuna, kag nahamulag sa kabuhi nga iya sang Dios.” (Efe. 4:17-19) Dugang pa, ang teoriya sang ebolusyon kag butig nga mga doktrina nag-upang sa mga tawo sa pagbaton sang maayong balita nga naggikan sa Dios.—Basaha ang Efeso 2:11-13.

7, 8. Ano ang lamang nga paagi para mabuligan ang mga tawo nga mahangpan sing bug-os ang maayong balita?

⁷ Agod makapasag-uli sa Dios, dapat anay makumbinsi ang mga tawo nga nagaluntad si Jehova kag may maayo nga mga rason sa pagpalapit sa iya. Mabuligan naton sila nga mahibaluan ina paagi sa pagpalig-on sa ila nga usisaon ang mga tinuga. Kon tun-an sang mga tawo ang mga tinuga upod ang bukas nga panghunahuna, matun-an nila ang kaalam kag gahom sang Dios. (Roma 1:19, 20) Para mabuligan sila nga magdayaw sa mga hinimuan sang aton Dakung Manunuga, mahimo naton gamiton ang duha ka brosyur nga Gintuga Bala ang Kabuhi? kag The Origin of Life—Five Questions Worth Asking. Pero, may importante nga mga pamangkot sa kabuhi nga indi masabat paagi lamang sa pagtuon sa mga tinuga, pareho sang: Ngaa ginatugutan sang Dios ang pag-antos? Ano ang katuyuan sang Dios sa duta? Nagaulikid bala ang Dios sa akon subong indibiduwal?

⁸ Ang lamang nga paagi para mahangpan sing bug-os sang mga tawo ang maayong balita  parte sa Dios kag sa iya katuyuan amo ang pagtuon sa Biblia. Pribilehiyo gid naton nga buligan ang mga tawo nga masabat ang ila mga pamangkot! Pero agod malab-ot ang ila tagipusuon, indi lamang naton sila pagtudluan sang mga katunayan, kundi dapat gid naton sila buyukon. (2 Tim. 3:14) Mahimo naton ini sing maayo paagi sa pagsunod sa halimbawa ni Jesus. Ngaa nagmadinalag-on gid sia? Ang isa ka rason amo ang paggamit niya sing epektibo nga mga pamangkot. Paano naton sia mailog?

9. Para mabuligan ang mga tawo sa espirituwal, ano ang dapat naton himuon?

⁹ Kaangay ni Jesus, ngaa dapat kita maggamit sing mga pamangkot sa aton pag-ebanghelyo? Binagbinaga ini nga sitwasyon: Nagsiling ang imo doktor nga may maayo sia nga balita. Mapaayo niya ang imo balatian kon magpaopera ka. Mahimo mo sia patihan. Pero ano abi kon ginsiling niya ini antes sia mamangkot parte sa imo panglawas? Ayhan indi ka gid magsalig sa iya. Bisan pa kon daw ano ka eksperto ang doktor, dapat gid sia mamangkot kag mamati kon ano ang imo mga ginabatyag antes sia maghatag sing bulig. Sing kaanggid, kon luyag naton nga batunon sang mga tawo ang maayong balita sang Ginharian, dapat mangin sampaton kita sa paggamit sing epektibo nga mga pamangkot. Mabuligan lamang naton sila kon mahibaluan naton sing maayo ang ila espirituwal nga kahimtangan.

10, 11. Ano ang mahimo naton kon ilugon naton ang pamaagi ni Jesus sa pagtudlo?

¹⁰ Nahibaluan ni Jesus nga ang napili sing maayo nga mga pamangkot wala lamang nagabulig sa manunudlo nga mahibaluan ang pagtamod sang iya estudyante kundi nagabulig man ini sa estudyante nga makigbahin sa paghambalanay. Halimbawa, sang luyag ni Jesus itudlo sa iya mga disipulo ang leksion parte sa pagkamapainubuson, nagpautwas anay sia sing makapahunahuna nga pamangkot. (Mar. 9:33) Para tudluan si Pedro kon paano mangatarungan suno sa prinsipio, naghatag si Jesus sing duha ka posible nga sabat sa isa ka pamangkot. (Mat. 17:24-26) Sang isa pa ka bes, luyag ni Jesus mahibaluan kon ano ang yara sa tagipusuon sang iya mga disipulo, gani nagpautwas sia sing makapahunahuna nga mga pamangkot. (Basaha ang Mateo 16:13-17.) Paagi sa paggamit sing mga pamangkot kag paghatag sing mga komento, wala lamang gintudlo ni Jesus ang mga katunayan. Natandog man niya ang ila tagipusuon, nga nagapalig-on sa ila nga magkabuhi suno sa maayong balita.

¹¹ Kon ilugon naton si Jesus paagi sa paggamit sing epektibo nga mga pamangkot, mahimo naton ang tatlo ka butang. Mahibaluan naton kon paano mabuligan sing dugang pa ang mga tawo, maatubang ang mga pagpamatok, kag matudluan ang mga mapainubuson kon paano sila makabenepisyo. Binagbinaga ang tatlo ka sitwasyon kon paano naton magamit sing maayo ang mga pamangkot.

12-14. Paano mo mabuligan ang isa ka bata nga makatigayon sing kompiansa sa pagpaambit sang maayong balita? Maghatag sing halimbawa.

¹² Sitwasyon 1: Subong ginikanan, ano ang imo himuon kon ang imo tin-edyer nga bata nahadlok magpangapin sang iya ginapatihan tuhoy sa pagpanuga kon nagapakig-istorya sa iya klasmeyt? Pat-od gid nga luyag mo sia buligan nga makatigayon sing kompiansa sa pagpaambit sang maayong balita. Gani, sa baylo nga akigan sia ukon laygayan gilayon, ngaa indi mo pag-ilugon ang halimbawa ni Jesus kag magpautwas sing pila ka makapahunahuna nga pamangkot? Paano mo ini himuon?

¹³ Sa tapos mabasa upod sa imo bata ang  pila ka impormasyon sa brosyur nga The Origin of Life—Five Questions Worth Asking, mahimo mo sia pamangkuton kon ano nga mga argumento ang nakita niya nga makapahunahuna gid. Palig-una sia nga maghunahuna sang iya kaugalingon nga mga rason kon ngaa nagapati gid sia nga may Manunuga kag kon ngaa luyag niya himuon ang kabubut-on sang Dios. (Roma 12:2) Ipaathag sa iya nga ang iya mga rason mahimo nga indi mangin pareho sa imo.

¹⁴ Ipaathag sa imo bata nga kon nagapakig-istorya sia sa iya klasmeyt, puede niya sundon ang halimbawa nga imo ginpakita. Buot silingon, mahimo sia magsaysay sang pila ka katunayan kag dayon magpautwas sing makapahunahuna nga mga pamangkot. Halimbawa, puede niya ipabasa sa iya klasmeyt ang kahon sa pahina 21 sang Origin of Life nga brosyur. Dayon mahimo sia mamangkot, “Matuod gid bala nga ang ikasarang sang DNA sa pagtago sang mga impormasyon indi gid matupungan bisan sang mga kompyuter sa karon?” Ang iya klasmeyt mahimo magsabat sing huo. Dayon ang imo bata mahimo mamangkot, “Kon indi ini masarangan himuon sang mga nag-imbento sang kompyuter, paano ini nahimo sang DNA kay wala man ini sing hunahuna?” Para mabuligan ang imo bata nga makatigayon sing kompiansa sa pagpakig-istorya sa iban parte sa iya ginapatihan, mahimo kamo mag-ensayo sing regular. Kon hanason mo sia sa paggamit sing epektibo nga mga pamangkot, mabuligan mo sia nga matuman ang iya papel subong ebanghelisador.

15. Paano naton magamit ang mga pamangkot para mabuligan ang isa ka atiesta?

¹⁵ Sitwasyon 2: Sa aton pagbantala, mahimo makaistorya kita sang mga tawo nga nagaduhaduha kon may Dios. Halimbawa, mahimo magsiling ang isa nga atiesta sia. Sa baylo nga untaton ang paghambalanay, mahimo kita mamangkot sing matinahuron kon daw ano na sia kadugay nga atiesta kag ngaa amo sina ang iya pagtamod. Sa tapos mapamatian ang iya sabat kag mapasalamatan sia, mahimo naton  sia pamangkuton kon bala indi man malain nga magbasa sia sing mga materyal nga nagapamatuod nga gintuga ang kabuhi. Kon bukas ang iya hunahuna, ayhan masiling sia nga wala man sing malain kon basahon niya ina nga pamatuod. Dayon, mahimo naton itanyag sa iya ang brosyur nga Gintuga Bala ang Kabuhi? ukon ang The Origin of Life—Five Questions Worth Asking. Ang mataktikanhon kag mainayuhon nga mga pamangkot mahimo mangin paagi para mabuksan ang tagipusuon sang isa ka tawo sa maayong balita.

16. Ngaa indi kita dapat makontento nga basahon lang sang aton mga ginatun-an sa Biblia ang sabat sa publikasyon?

¹⁶ Sitwasyon 3: Kon nagadumala sing pagtuon sa Biblia, mahimo ipabasa lang naton sa estudyante ang sabat sa publikasyon nga ginatun-an. Pero kon amo sini, mahimo nga indi sia magtubo sa espirituwal. Ngaa? Bangod ang estudyante nga nagabasa lang sang iya sabat kag wala nagapamalandong sa sini, mahimo indi makapanggamot sa espirituwal. Mangin kaangay sia sang isa ka tanom nga nagakalaya kon masilakan sing grabe nga init sang pagpamatok. (Mat. 13:20, 21) Agod malikawan ini, kinahanglan pamangkuton naton ang estudyante kon ano ang iya ginabatyag sa iya ginatun-an. Hibalua kon bala nagaugyon sia sa mga punto nga ginatun-an. Labaw sa tanan, pamangkuta sia sang rason kon ngaa nagaugyon sia ukon wala. Dayon buligi sia nga mangatarungan base sa Kasulatan para makahimo sia sing husto nga konklusion. (Heb. 5:14) Kon gamiton naton sing epektibo ang mga pamangkot, ang aton mga ginatun-an mas makapanggamot sing mabakod sa pagtuo kag makatindog sa mga nagapamatok ukon nagapatalang sa ila. (Col. 2:6-8) Ano pa ang aton mahimo para matuman ang aton papel subong mga ebanghelisador?

17, 18. Kon ginaupdan ang iban sa ministeryo, paano kita makabulig?

¹⁷ Ginpadala ni Jesus ang iya mga disipulo sing tigduhaduha para magbantala. (Mar. 6:7; Luc. 10:1) Sang ulihi ginsambit ni apostol Pablo ang “masigkamanugpangabudlay” nga “nagpangabudlay upod sa [iya] sa maayong balita.” (Fil. 4:3) Bilang pagsunod sa Kasulatan, sang 1953, ginsugdan sang mga manugbantala sang Ginharian ang programa sang paghanas sa iban sa ministeryo.

¹⁸ Kon ginaupdan naton ang isa ka Cristiano sa ministeryo, paano kita makabulig? (Basaha ang 1 Corinto 3:6-9.) Tan-awa sa imo Biblia ang teksto nga ginabasa sang imo partner. Pamatii ang iya ginasiling kag ang komento sang tagbalay. Pamatii sing maayo ang ila paghambalanay para makabulig ka sa imo partner kon may mag-utwas nga pagpamatok. (Man. 4:12) Pero bilang paandam: Likawi nga magsaligbat kon ang imo partner nagagamit sing epektibo nga pangatarungan kay mahimo madula ang iya kalangkag kag maligban ang tagbalay. Kon kaisa, maayo man nga mag-entra sa paghambalanay. Pero mahimo ini limitahan sa isa ukon duha lang ka malip-ot nga komento, dayon tugutan naton nga ipadayon ini sang aton partner.

19. Ano ang dapat naton dumdumon, kag ngaa?

¹⁹ Paano kamo makabuligay sang imo partner samtang nagalakat padulong sa masunod nga balay? Ngaa indi ninyo gamiton ini nga tion para hambalan kon paano mapauswag ang inyo presentasyon? Maghalong nga indi maghambal sing negatibo parte sa mga tawo sa inyo teritoryo. Likawi man nga istoryahan pirme ang indi maayo nga mga kinaiya sang kaupod nga mga ebanghelisador. (Hulu. 18:24) Dumdumon naton nga daga kita nga mga suludlan. Si Jehova nagpakita sa aton sing tumalagsahon nga kaayo paagi sa pagtugyan sa aton sing bahandi sang ministeryo sang maayong balita. (Basaha ang 2 Corinto 4:1, 7.) Gani, ipakita naton ang aton apresasyon sa sini nga bahandi paagi sa paghimo sang aton bug-os nga masarangan para matuman ang aton papel subong mga ebanghelisador.