NATABO ini sang Agosto 1936, sa Swaziland Royal Kraal. Bag-o lang ginpatokar nanday Robert kag George Nisbet sa de-trompa nga salakyan ang mga narekord nga musika nga ginsundan sang mga pamulongpulong ni Utod J. F. Rutherford. Nalipay si Hari Sobhuza II. “Nahuya gid kami,” paathag ni George, “kay gusto niya baklon ang player, mga rekording, kag ang trompa nga ginagamit sa pag-anunsio sang mensahe sang Ginharian!”

Nangayo sing pasaylo sa iya si Robert kay ini nga mga butang wala ginabaligya. Ngaa? Bangod may nagapanag-iya na sini. Luyag mahibaluan sang Hari kon sin-o ang tag-iya.

Si Robert nagsabat, “Iya ini sang isa man ka Hari.” Dayon namangkot si Sobhuza kon sin-o ina nga Hari. “Si Jesucristo, ang Hari sang Ginharian sang Dios,” siling ni Robert.

“A, maayo gid sia nga Hari,” matinahuron nga sabat ni Sobhuza. “Indi ko gusto kuhaon ang bisan ano nga butang nga iya ginapanag-iyahan.”

Si Robert nagsulat: ‘Nagdayaw gid ako sa panimuot ni Hari Sobhuza. Maayo gid sia mag-Ingles pero wala nagapahambog ukon nagapabugal. Prangka sia pero madali palapitan. Nagpungko ako sa iya opisina sing mga 45 minutos, samtang nagapatokar si George sing musika sa gua.

‘Sang ulihi sina nga adlaw,’ padayon ni Robert, ‘nagkadto kami sa The Swazi National School kag didto natabo ang amon pinakamakalilipay nga eksperiensia. Nagpanaksi kami sa prinsipal, kag namati sia sing maayo. Sang ginsambit namon ang parte sa player kag nagtanyag nga ipabati sa bilog nga eskwelahan ang mga rekording, nalipay sia kag ginsugo ang halos isa ka gatos nga estudyante nga magpungko sa hilamon para magpamati. Ginsugiran kami nga ang hayskul nagatudlo sa mga lalaki sing agrikultura, pagpananom, pagpamanday, pagpanukod, Ingles, kag aritmetika; ang mga babayi naman ginatudluan sing pagtatap sa mga nagamasakit, buluhaton sa balay, kag iban pa nga mapuslanon nga obra.’ Ang lola sang hari amo ang nagtukod sang eskwelahan. *

Sang mga 1933, malipayon nga ginpamatian ni Hari Sobhuza ang mga payunir nga nagbisita sa Royal Kraal. Isa ka bes, gintipon pa gani niya ang iya mga bodyguard nga ginatapuan sang 100 ka soldado para magpamati sa narekord nga mga mensahe  sang Ginharian. Nag-subscribe sia sang aton mga magasin kag nagbaton sing mga literatura. Wala madugay, halos may kopya na ang Hari sang tanan naton nga publikasyon! Isa pa, gintago gid niya ini bisan pa gindumilian sang gobierno nga sakop sang Britanya ang aton mga literatura sang Bug-os Kalibutan nga Inaway II.

Padayon nga gin-abiabi ni Hari Sobhuza II ang mga Saksi sa Royal Kraal sa Lobamba, kag gin-agda pa gani niya ang mga klerigo nga mamati sa ila mga pamulongpulong sa Biblia. Samtang ginabinagbinag sang isa ka Saksi nga si Helvie Mashazi ang Mateo kapitulo 23, ang isa ka grupo sang mga klerigo akig nga nagsal-ot kag ginpilit sia nga magpungko. Pero nagpasilabot ang Hari, kag ginsilingan si Utod Mashazi nga magpadayon. Ginsilingan man sang Hari ang mga tumalambong nga isulat ang tanan nga teksto nga ginsambit sa pamulongpulong!

Sa isa pa ka bes, pagkatapos mapamatian ang pamulongpulong sang isa ka payunir, ang apat ka klerigo nagsiling: “Subong, indi na kami mga klerigo kundi mga Saksi ni Jehova na.” Dayon ginpamangkot nila ang payunir kon may mga libro sia nga pareho sang mga libro sang Hari.

Halin sang katuigan 1930 asta sa iya kamatayon sang 1982, gintahod sang Hari ang mga Saksi ni Jehova kag wala niya gintugutan nga hingabuton sila bangod wala nila ginhimo ang mga ritwal sang mga Swazi. Gani, may maayo gid nga rason ang mga Saksi sa pagpasalamat sa iya, kag nagkasubo gid sila sang napatay sia.

Sa panugod sang 2013, sobra na sa 3,000 ang manugbantala sang Ginharian sa Swaziland. Kapin sa isa ka milyon lamang ang populasyon sini nga pungsod, gani may 1 ka manugbantala sa kada 384 ka pumuluyo. Sobra 260 ka mapisan nga payunir ang nagaalagad sa 90 ka kongregasyon, kag 7,496 ang nagtambong sa Memoryal sang 2012. Ginapakita sini nga may daku pa nga potensial para sa pag-uswag. Kag maathag nga ang mabakod nga pundasyon nagsugod sa mga pagduaw sadto sa Swaziland sang katuigan 1930—Halin sa amon archive sa South Africa.