1, 2. (a) Ano ang resulta kon nagahunahuna kita kag nagaistorya parte sa aton hinigugma? (Tan-awa ang piktyur sa umpisa sang artikulo.) (b) Ano nga mga pamangkot ang aton binagbinagon?

ANG paghunahuna kag pagpakig-istorya parte sa aton hinigugma nagapabakod sang aton kaangtanan sa iya. Masiling man naton ini parte sa aton kaangtanan kay Jehova nga Dios. Subong manugbantay, si David naghinguyang sing madamo nga gab-i sa pagtan-aw sa mga bituon sa langit kag sa pagpamalandong sa Manunuga nga wala sing kaanggid. Nagsulat sia: “Kon pamalandungon ko ang imo kalangitan, ang binuhatan sang imo mga tudlo, ang bulan kag ang kabitoonan nga imo ginpatuk; ano bala ang tawo nga ginasapak mo sia, kag ang anak sang tawo nga ginaduaw mo sia?” (Sal. 8:3, 4) Kag sa tapos mabinagbinag ni apostol Pablo kon paano natuman sa dalayawon nga paagi ang katuyuan ni Jehova parte sa espirituwal nga Israel, nagsiling sia: “O pagkadalom sang kamanggaran kag kaalam kag ihibalo sang Dios!”—Roma 11:17-26, 33.

² Samtang nagapakigbahin kita sa ministeryo, nagahunahuna kita kag nagaistorya parte kay Jehova. May positibo gid ini nga epekto. Napamatud-an sang madamo nga yara sa bug-os tion nga ministeryo nga ang isa ka pagpakamaayo sang dugang nga pagpakigbahin sa ministeryo amo ang pagdalum sang ila gugma sa Dios. Kon ara ka subong sa bug-os tion nga pag-alagad ukon ginatinguhaan mo nga malab-ot ini, binagbinaga ini: Paano ang bug-os tion nga ministeryo makapabakod sang imo kaangtanan kay Jehova? Kon payunir ka, pamangkuta ang imo kaugalingon, ‘Ano ang makabulig sa akon para makapadayon sa sining makapaladya nga sahi sang pag-alagad?’ Kon indi ka pa payunir, pamangkuta ang imo kaugalingon, ‘Ano nga mga pagbag-o ang puede ko himuon para makapayunir?’ Binagbinagon naton kon paano ang bug-os tion nga pag-alagad makapabakod sang aton kaangtanan sa Dios.

3. Sa ministeryo, paano makaapektar sa aton ang pagpakig-istorya parte sa mga pagpakamaayo sang Ginharian?

³ Ang pagpakig-istorya sa iban sang mga pagpakamaayo sang Ginharian nagapasuod pa gid sa aton kay Jehova. Ano nga teksto ang paborito mo nga gamiton kon nagapamalaybalay? Ang Salmo 37:10, 11 bala, Daniel 2:44, Juan 5:28, 29, ukon Bugna 21:3, 4? Sa kada tion nga ginabinagbinag naton sa iban ini nga mga saad, ginapahanumdom kita nga ang aton maalwan nga Dios amo gid ang manughatag sang “tagsa ka maayong dulot kag tagsa ka himpit nga regalo.” Nagabulig ini para magsuod pa gid kita sa iya.—Sant. 1:17.

4. Ngaa nagadalom ang aton apresasyon sa kaayo sang Dios kon makita naton ang iban nga may makaluluoy nga kahimtangan sa espirituwal?

⁴ Kon makita naton ang makaluluoy nga kahimtangan sa espirituwal sang aton mga ginabantalaan, nagadalom ang aton apresasyon sa kamatuoran. Ang mga tawo sa kalibutan wala sing masaligan nga giya para magmadinalag-on kag magmalipayon. Ang kalabanan nagakabalaka sa palaabuton kag wala sing paglaum. Ginapangita nila ang kahulugan sang kabuhi. Bisan gani ang kalabanan nga relihioso diutay lang ang nahibaluan sa Kasulatan. Pareho gid sila sa mga tawo sang Ninive sadto. (Basaha ang Jonas 4:11.) Kon dugangan naton ang aton pagpakigbahin sa ministeryo, mangin mas maathag sa aton ang kinatuhayan sa espirituwal sang aton ginabantalaan kag sang katawhan ni Jehova. (Isa. 65:13) Mapahanumdom kita sang kaayo ni Jehova kay wala lamang niya gin-aman ang aton espirituwal nga kinahanglanon, kundi ginaagda man niya ang tanan nga magbaton sing espirituwal nga kaumpawan kag matuod nga paglaum.—Bug. 22:17.

5. Paano ang pagbulig sa iban sa espirituwal makapahaganhagan sa aton mga problema?

⁵ Kon ginabuligan naton ang iban sa espirituwal, mas mahapos naton malikawan ang sobra nga kabalaka sa aton mga problema. Napamatud-an ini sang regular payunir nga si Trisha sang nagdiborsio ang iya mga ginikanan. Nagsiling sia: “Isa ini sa pinakamasakit nga hitabo sa akon kabuhi.” Isa ka adlaw, nasubuan gid sia kag gusto niya magpakuribong sa ila balay. Pero nagkadto sia sa iya tatlo ka Bible study nga kabataan nga may problemado nga pamilya. Ginbiyaan sila sang ila amay, kag ginpintasan sang ila magulang nga lalaki. Si Trisha nagsiling: “Mas grabe pa ang ila problema kag kasakit kon ipaanggid sa akon nabatyagan. Samtang nagatuon kami, makita sa ila mga mata ang paglaum kag nakakadlaw sila sa kakunyag kag kalipay. Yadto nga mga kabataan isa gid ka regalo halin kay Jehova, ilabi na sadto nga adlaw.”

6, 7. (a) Paano nagabakod ang aton pagtuo kon nagatudlo kita sang mga kamatuoran sa Biblia? (b) Kon makita naton nga nagaayo ang kabuhi sang mga ginatun-an sa Biblia sang gin-aplikar nila ang ila natun-an, ano ang epekto sini sa aton?

⁶ Ang pagtudlo sang mga kamatuoran sa Biblia nagapabakod sang aton pagtuo. Si apostol Pablo nagsulat parte sa pila ka Judiyo sang iya panahon nga napaslawan sa pag-aplikar sang ila ginabantala: “Ikaw nga nagatudlo sa iban, wala ka bala nagatudlo sa imo kaugalingon?” (Roma 2:21) Lain gid sa ila ang mga payunir subong! Madamo sila sing kahigayunan nga magtudlo sing kamatuoran sa iban kag maghiwat sing mga pagtuon sa Biblia. Para mahimo ini sing epektibo, kinahanglan nila handaan ang tagsa ka pagtuon kag ayhan mag-research para masabat ang mga pamangkot. Ang payunir nga si Janeen nagpaathag: “Sa kada may kahigayunan ako nga magtudlo sing kamatuoran sa iban, mas nagatudok sa akon hunahuna kag tagipusuon ini nga mga kamatuoran. Bangod sini, nagabakod ang akon pagtuo.”

⁷ Kon makita naton nga nagaayo ang kabuhi sang mga ginatun-an sa Biblia sang gin-aplikar nila ang mga prinsipio sa Biblia, nagadalom ang aton apresasyon sa kaalam sang Dios. (Isa. 48:17, 18) Makabulig ini sa aton nga mangin determinado pa gid sa pag-aplikar sa sini nga mga prinsipio. Ang isa pa ka payunir nga si Adrianna nagsiling: “Mangin magamo ang kabuhi sang  mga tawo kon magsalig sila sa ila kaugalingon nga kaalam. Pero kon magsalig sila sa kaalam ni Jehova, makita dayon nila ang mga benepisyo.” Si Phil nagsiling man: “Makita mo kon paano mabag-o ni Jehova ang mga tawo nga wala nagmadinalag-on sa ila kaugalingon nga pagtinguha.”

8. Ano ang epekto sang pagministeryo upod sa mga kauturan?

⁸ Ang pagministeryo upod sa aton mga kauturan makapabakod sang aton espirituwalidad. (Hulu. 13:20) Daku nga tion ang ginahinguyang sang kalabanan nga payunir sa ministeryo upod sa mga kauturan. Nangin kahigayunan ini para sa “pagbayluhanay sing pagpalig-on.” (Roma 1:12; basaha ang Hulubaton 27:17.) Ang payunir nga si Lisa nagsiling: “Sa trabaho, masami nga may kompetisyon kag hisaay. Adlaw-adlaw ka makabati sing kutsokutso kag malain nga hambalanon. Ang tanan gusto mangibabaw ano man ang matabo. Kon kaisa, ginayaguta ka ukon ginayaoyao bangod sa imo Cristianong paggawi. Pero, ang pagministeryo upod sa mga masigka-Cristiano makapabakod gid. Pagpauli ko sa hapon, kanami sang akon pamatyag bisan pa kapoy gid ako.”

9. Kon ang mag-asawa magpayunir, ano ang epekto sini sa ila pag-asawahay?

⁹ Ang pagpayunir upod sa aton tiayon nagapabakod sang aton tatlo sing dupli nga pag-asawahay. (Man. 4:12) Si Madeline, nga nagapayunir upod sa iya bana nagpaathag: “Nagaistoryahanay kami sang akon bana parte sa amon pagministeryo sa sina nga adlaw ukon sa mga punto nga amon nabasahan sa Biblia nga mahimo maaplikar sa amon ministeryo. Pagligad sang kada tuig nga nagapayunir kami, nagasuod pa gid kami.” Si Trisha man nagsiling: “Nagatinguha kami nga duha nga indi magpangutang, gani wala kami nagabaisay parte sa kuarta. Pareho ang amon iskedyul sa ministeryo, gani nagaupdanay kami pirme sa amon mga pagbalik duaw kag pagtuon sa Biblia.”  Nakabulig ini para mangin mas malig-on ang ila pag-asawahay.

10. Kon unahon naton ang Ginharian kag mabatyagan ang pagsakdag sang Dios, ano ang epekto sini sa aton pagsalig kay Jehova?

¹⁰ Ang aton pagsalig kay Jehova nagabakod samtang ginauna naton ang intereses sang Ginharian, mabatyagan ang iya pagsakdag, kag maeksperiensiahan nga ginasabat niya ang aton mga pangamuyo. Matuod ini sa tanan nga matutom nga Cristiano. Apang nakita sang mga nagaalagad sing bug-os tion nga ang pagsalig kay Jehova makabulig sa ila nga makapadayon sa pagpayunir. (Basaha ang Mateo 6:30-34.) Si Curt, nga isa ka payunir kag tal-us nga manugtatap sang sirkito, nagpasugot nga bisitahan ang kongregasyon nga mga duha ka oras kag tunga ang biyahe halin sa ila. Ang iya asawa payunir man, kag ang ila gasolina haluson pa makaigo pakadto, kag sa sunod pa nga semana ang iya sueldo. Si Curt nagsiling, “Nagduhaduha ako kon husto bala ang akon desisyon.” Pagkatapos mangamuyo, nagsalig sila nga mahimo nila ang asaynment, nga nagapati nga ihatag sang Dios ang ila mga kinahanglanon. Sang manuglakat na sila, nagtawag ang isa ka sister kag nagsiling nga may iregalo sia sa ila. Hustuhan gid ini nga kuarta asta makapauli sila. Si Curt nagsiling, “Kon pirme ka makaeksperiensia sing pareho sini, madali mo mabatyagan ang pag-ulikid ni Jehova.”

11. Ano ang pila ka pagpakamaayo nga naeksperiensiahan sang mga payunir?

¹¹ Masami nga nakita sang mga payunir nga samtang ginagamit nila ang ila kaugalingon sa pag-alagad kay Jehova kag makigsuod sa iya, “magalambut” sa ila ang daw nagailig lang nga mga pagpakamaayo. (Deut. 28:2) Pero may mga kabudlayan man ang pagpayunir. Wala sing alagad sang Dios ang luwas sa mga problema bangod sa pagrebelde ni Adan. Bisan pa nagahunahuna ang pila ka payunir nga kinahanglan nila mag-untat sing makadali, ang ila mga problema masami nga masolusyunan ukon malikawan. Ano ang mahimo makabulig sa mga payunir nga makapadayon sa ila pribilehiyo?

12, 13. (a) Ano ang dapat himuon sang isa ka payunir kon nabudlayan sia maglab-ot sang iya oras? (b) Ngaa importante gid ang pag-iskedyul sang pagbasa sing Biblia kada adlaw, personal nga pagtuon, kag pagpamalandong?

¹² Masako katama ang kalabanan nga payunir. Kadamo sang dapat tapuson nga mga buluhaton, gani importante gid ang maayo nga pag-organisar. (1 Cor. 14:33, 40) Kon nabudlayan ang isa ka payunir sa paglab-ot sang iya oras, mahimo kinahanglan niya usisaon kon paano niya ginagamit ang iya tion. (Efe. 5:15, 16) Mahimo sia mamangkot: ‘Daw ano kadaku nga tion ang akon ginagamit sa mga paglingawlingaw? Kinahanglan ko pa gid bala disiplinahon ang akon kaugalingon? Ma-adjust ko bala ang akon iskedyul sa trabaho?’ Tanan kita nagapati nga kahapos lang sal-utan sang iban nga butang ang aton iskedyul. Gani mahimo ini usisaon sing regular sang mga yara sa bug-os tion nga pag-alagad kag maghimo sing mga pagbag-o kon kinahanglan.

¹³ Ang pagbasa sing Biblia, personal nga pagtuon, kag pagpamalandong dapat ilakip sang payunir sa iya iskedyul. Para mahimo ini, dapat sia mangin disiplinado agod indi matabunan sang indi tanto ka importante nga mga butang ang tion nga iya gin-iskedyul para sa importante nga mga butang. (Fil. 1:10) Halimbawa, ibutang ta nga nagpauli sia pagkatapos sang bilog nga adlaw nga pagministeryo. Plano niya nga maghanda sa miting sa sina nga gab-i. Pero ginbasa niya anay ang iya mga sulat. Dayon ginpaandar niya ang kompyuter kag ginbasa kag ginsabat ang mga e-mail. Samtang naga-Internet sia, ginkadtuan niya ang isa ka Web site para hibaluon kon bala nagbarato na ang isa ka butang nga gusto niya baklon. Wala niya madiparahan nga halos duha ka oras na gali ang nagligad kag wala pa niya masugdan ang pagtuon nga ginaplano niya sa sina nga gab-i. Ngaa problema gid ini? Halimbawa, kinahanglan atipanon sang propesyonal nga mga atleta ang ila lawas kon gusto nila magdugay sa ila propesyon. Kinahanglan  man sang mga payunir ang maayo nga rutina sang personal nga pagtuon agod magbalik ang ila kusog sa espirituwal kag makapadayon sa ila bug-os tion nga ministeryo.—1 Tim. 4:16.

14, 15. (a) Ngaa dapat pasimplehon sang mga payunir ang ila kabuhi? (b) Kon makaeksperiensia sing mga kabudlayan ang isa ka payunir, ano ang dapat niya himuon?

¹⁴ Ginatinguhaan sang madinalag-on nga mga payunir nga pasimplehon ang ila kabuhi. Ginpalig-on ni Jesus ang iya mga disipulo nga pasimplehon ang ila mata. (Mat. 6:22) Ginpasimple niya ang iya kabuhi para matuman ang iya ministeryo nga wala sing sablag. Nagsiling sia: “Ang talunon nga mga ido may mga lungib kag ang mga pispis sa langit may mga hulunan, apang ang Anak sang tawo wala gid sing maunlan sang iya ulo.” (Mat. 8:20) Kon handum sang payunir nga ilugon si Jesus, dapat niya dumdumon nga kon mas madamo ang iya pagkabutang, mas madamo man ang iya mentinahon, kay-uhon, ukon bag-uhon.

¹⁵ Narealisar sang mga payunir nga ang ila pribilehiyo indi resulta sang ila pinasahi nga mga hinimuan. Sa baylo, ang bisan ano nga regalo ukon pribilehiyo nga aton matigayon resulta sang wala tupong nga kaayo sang Dios. Gani, agod makapadayon sa pagpayunir, ang kada isa dapat magsalig kay Jehova. (Fil. 4:13) May mga problema gid kag mga kabudlayan. (Sal. 34:19) Kon matabo ini, dapat pangabayon sang mga payunir ang panuytoy ni Jehova kag hatagan sia sing kahigayunan nga magbulig, sa baylo nga mag-untat dayon sa ila pribilehiyo. (Basaha ang Salmo 37:5.) Samtang naeksperiensiahan nila ang mahigugmaon nga bulig sang Dios, magasuod pa gid sila sa iya subong ila Amay sa langit.—Isa. 41:10.

16. Kon gusto mo magpayunir, ano ang dapat mo himuon?

¹⁶ Kon luyag mo maeksperiensiahan ang mga pagpakamaayo sang mga yara sa bug-os tion nga pag-alagad, ipahibalo ini kay Jehova. (1 Juan 5:14, 15) Makig-istorya sa mga payunir. Maghimo sing mga tulumuron nga makabulig sa imo nga magpayunir. Amo sini ang ginhimo nanday Keith kag Erika. Nagatrabaho sila sing full-time, kag pareho sa madamo nga mag-asawa nga kaedad nila, nakabakal sila sing balay kag bag-o nga salakyan wala madugay pagkatapos sang ila kasal. Nagsiling sila: “Abi namon mangin malipayon na kami kon matigayon namon ina nga mga butang, pero indi gali.” Sang nadulaan sing obra si Keith, nag-auxiliary payunir sia. Nagsiling sia: “Ang pagpayunir nagpahanumdom sa akon nga may daku gid nga kalipay sa pagministeryo.” Nangin abyan nila ang payunir nga mag-asawa nga nagbulig sa ila nga maapresyar ang kalipay sang simple nga kabuhi kag pagpayunir. Ano ang ginhimo nanday Keith kag Erika? “Ginlista namon ang amon espirituwal nga mga tulumuron, ginpatapik ini sa repredyeritor, kag ginatsekan ang kada isa kon malab-ot na namon ini.” Sang ulihi, nakapayunir gid sila.

17. Ngaa maalamon gid nga binagbinagon kon bala puede mo mabag-o ang imo iskedyul ukon pagkabuhi para makapayunir?

¹⁷ Makasulod ka bala sa ranggo sang mga payunir? Kon daw indi pa ini posible sa imo subong, himua ang tanan para magsuod ka pa gid kay Jehova paagi sa pagpakigbahin sing bug-os sa ministeryo. Pagkatapos mo ini mapangamuyuan kag mabinagbinag sing maayo, mahimo marealisar mo nga puede mo mabag-o ang imo iskedyul ukon pagkabuhi para makapayunir. Kon payunir ka na, ang kalipay nga imo matigayon sobra pa sa imo mga sakripisyo. Mangin mas malipayon ka bangod gin-una mo ang mga intereses sang Ginharian sa baylo sang imo luyag. (Mat. 6:33) Magadugang man ang imo kalipay bangod nagahatag ka sa iban. Luwas sini, may madamo ka nga kahigayunan nga maghunahuna kag mag-istorya parte kay Jehova, nga makabulig sa imo para magdalom ang imo gugma sa iya kag mapahamut-an sia.