1. Paano nagpahamtang si Jesus sing himpit nga halimbawa sang pagkamasinakripisyuhon?

SANG ari si Jesus sa duta, nagpahamtang sia sing himpit nga halimbawa sang pagkamasinakripisyuhon. Ginpaiway niya ang iya mga handum kag mga kasulhayan para matuman ang kabubut-on sang Dios. (Juan 5:30) Paagi sa pagpabilin nga matutom tubtob sa kamatayon sa usok sang pag-antos, ginpamatud-an niya nga wala sing limitasyon ang iya pagkamasinakripisyuhon.—Fil. 2:8.

2. Paano naton mapakita ang pagkamasinakripisyuhon, kag ngaa dapat naton ini ipakita?

² Subong mga sumulunod ni Jesus, kinahanglan man kita magpakita sing pagkamasinakripisyuhon. Ano ang buot silingon sini? Nagakahulugan ini nga ang isa handa magpaiway sang iya mga interes para buligan ang iban. Buot silingon, kabaliskaran ini sang pagkamaiyaiyahon. (Basaha ang Mateo 16:24.) Ang pagkadi-maiyaiyahon magabulig sa aton nga unahon ang mga balatyagon kag mga luyag sang iban. (Fil. 2:3, 4) Ang matuod, gintudlo ni Jesus nga ang pagkamasinakripisyuhon importante nga bahin sang aton pagsimba. Paano? Ang Cristiano nga gugma, nga isa sa nagapahulag sa aton nga magsakripisyo, tanda sang matuod nga mga disipulo ni Jesus. (Juan 13:34, 35) Kag hunahunaa ang mga pagpakamaayo nga matigayon naton bangod bahin kita sang bug-os kalibutan nga paghiliutod nga nagapakita sang pagkamasinakripisyuhon!

3. Ano ang mahimo magpaluya sang aton pagkamasinakripisyuhon?

 ³ Pero, may kaaway kita nga mahimo indi naton matalupangdan nga nagapaluya sang aton pagkamasinakripisyuhon. Ina nga kaaway amo ang aton huyog nga mangin maiyaiyahon. Dumduma kon paano ini ginpakita nanday Adan kag Eva. Luyag ni Eva nga mangin kaangay sang Dios bangod sang iya personal nga handum. Amo man ini ang nagpahulag kay Adan para pahamut-an si Eva. (Gen. 3:5, 6) Sa tapos mapatalikod sanday Adan kag Eva sa matuod nga pagsimba, padayon nga ginsulay sang Yawa ang mga tawo nga mangin maiyaiyahon. Gingamit man gani niya ini sang ginsulay niya si Jesus. (Mat. 4:1-9) Sa karon, madinalag-on nga napatalang ni Satanas ang kalabanan nga tawo, nga nagasulay sa ila nga mangin maiyaiyahon sa madamo nga paagi. Kinahanglan gid kita maghalong bangod mahimo kita maimpluwensiahan sang pagkamaiyaiyahon.—Efe. 2:2.

4. (a) Madula bala naton karon ang aton huyog nga mangin maiyaiyahon? Ipaathag. (b) Ano nga mga pamangkot ang binagbinagon naton?

⁴ Ang pagkamaiyaiyahon mapaanggid sa tuktok sa salsalon. Kon ang salsalon maulanan kag mainitan, amat-amat ini nga matuktukan. Mas delikado pa gid kon indi pagkuhaon ang tuktok, asta nga maglapta ini kag mahalitan ukon maguba ang isa ka tinukod. Sing kaanggid, bisan pa indi naton madula karon ang aton di-kahimpitan kag huyog nga mangin maiyaiyahon, dapat kita mangin alerto sa mga katalagman sini kag padayon ini nga pakigbatuan. (1 Cor. 9:26, 27) Paano naton makita ang mga tanda sang pagkamaiyaiyahon sa aton kaugalingon? Kag paano pa gid naton mapalambo ang pagkamasinakripisyuhon?

5. (a) Sa ano nga paagi ang Biblia kaangay sang espiho? (Tan-awa ang piktyur sa umpisa sini nga artikulo.) (b) Para makita naton kon bala maiyaiyahon kita, ano ang dapat naton likawan?

⁵ Ginagamit naton ang espiho sa pag-usisa sa aton hitsura, gani magamit man naton ang Biblia sa pag-usisa sa aton pagkatawo kag tadlungon ini kon may makita kita nga depekto. (Basaha ang Santiago 1:22-25.) Pero, makabulig lamang sa aton ang espiho kon ginagamit naton ini sing husto. Halimbawa, kon mapasiplat lang kita sa espiho, mahimo nga indi naton matalupangdan ang gamay pero makahuluya nga higko. Ukon kon magtan-aw kita sa espiho sa lain nga anggulo, mahimo nga iban nga tawo ang aton makita. Sing kaanggid, agod magamit naton ang Biblia para makita ang mga depekto pareho sang pagkamaiyaiyahon, indi lang nga basahon naton ini ukon gamiton para makita ang sala sang iban.

6. Paano kita ‘makapabilin’ sa himpit nga kasuguan?

⁶ Halimbawa, bisan pa ginabasa naton ang Pulong sang Dios sing regular, ukon kada adlaw, mahimo nga indi naton gihapon makita nga nagatubo na gali sa aton ang pagkamaiyaiyahon. Ngaa? Binagbinaga ini: Sa ilustrasyon ni Santiago, ang tawo ‘nagtan-aw sa iya kaugalingon’ sa espiho. Gingamit diri ni Santiago ang Griego nga tinaga nga nagapahangop sing pagpangusisa ukon pagbinagbinag sing maayo. Gani, ano ang problema sa sini nga tawo? Si Santiago nagpadayon: “Nagahalin sia kag sa gilayon nagakalipat kon ano sia nga sahi sang tawo.” Huo, nagtalikod sia sa espiho nga wala sing ginhimo sa iya nakita. Sa kabaliskaran, ang madinalag-on nga tawo wala lamang “nagatulok sing maayo sa himpit nga kasuguan” kundi “nagapabilin [man] sa sini.” Sa baylo nga balewalaon ang himpit nga kasuguan sang Pulong sang Dios, padayon niya nga ginasunod ang mga panudlo sini. Amo man sini ang punto ni Jesus sang nagsiling sia: “Kon magpabilin kamo sa akon pulong, mga disipulo ko gid kamo.”—Juan 8:31.

7. Paano naton magamit ang Biblia para mausisa ang mga huyog sang pagkamaiyaiyahon?

⁷ Gani, para magmadinalag-on sa pagpakigbato sa mga huyog sang pagkamaiyaiyahon, dapat mo anay basahon sing maayo ang Pulong sang Dios. Paagi sa sini, mahibaluan mo kon ano ang dapat hatagan sing atension. Pero may dapat ka pa himuon. Mag-research.  Kon maathag na sa imo ang isa ka rekord sang Biblia, ibutang ang imo kaugalingon sa sina nga sitwasyon paagi sa mga pamangkot nga: ‘Ano ayhan ang himuon ko sa sini nga sitwasyon? Husto ayhan ang akon himuon?’ Labaw sa tanan, pagkatapos mo mapamalandungan ang imo ginbasa, panikasugi nga iaplikar ini. (Mat. 7:24, 25) Binagbinagon naton kon paano naton magamit ang kasaysayan nanday Hari Saul kag apostol Pedro para makapabilin kita nga masinakripisyuhon.

8. Ano sang primero ang panimuot ni Saul sa iya pagkahari, kag paano niya ini ginpakita?

⁸ Si Hari Saul sang Israel isa ka paandam sa aton nga mahimo madula ang aton pagkamasinakripisyuhon bangod sang pagkamaiyaiyahon. Sang primero, si Saul isa ka mapainubuson nga hari. (1 Sam. 9:21) Wala niya ginsilutan ang mga Israelinhon nga nagtamay sa iya pagkahari, bisan puede niya kuntani ini himuon para pangapinan ang iya posisyon nga ginhatag sang Dios. (1 Sam. 10:27) Ginbaton man ni Hari Saul ang panuytoy sang espiritu sang Dios paagi sa pagpanguna sa Israel sa ila madinalag-on nga pagpakig-away sa mga Amonhon. Pagkatapos sini, mapainubuson niya nga ginhatag kay Jehova ang kadungganan.—1 Sam. 11:6, 11-13.

9. Paano nangin maiyaiyahon si Saul?

⁹ Sang ulihi, gintugutan ni Saul nga magtubo ang pagkamaiyaiyahon kag bugal, pareho sang nagaut-ot nga tuktok. Sang nalutos niya ang mga Amaleknon sa inaway, gin-una niya ang iya mga handum sa baylo nga tumanon si Jehova. Mahamkunon niya nga gindala ang mga inagaw sa baylo nga laglagon ini suno sa sugo sang Dios. Bangod sang pagkamatinaastaason nagpatindog sia sang iya monumento. (1 Sam. 15:3, 9, 12) Sang ginsilingan sia ni manalagna Samuel nga wala nahamuot si Jehova, ginpakamatarong ni Saul ang iya kaugalingon paagi sa pagsiling nga may gintuman man sia nga sugo sang Dios, kag paagi sa pagbasol sa iban sa iya sala. (1 Sam. 15:16-21) Bangod man sa bugal, mas ginkabalak-an ni Saul nga mahuy-an sia sa mga tawo imbes nga pahamut-an ang Dios. (1 Sam. 15:30) Paano naton magamit ang kasaysayan ni Saul subong espiho para magpabilin kita nga masinakripisyuhon?

10, 11. (a) Ano ang matun-an naton sa kasaysayan ni Saul parte sa pagpabilin nga masinakripisyuhon? (b) Paano naton malikawan ang malain nga ginhimo ni Saul?

¹⁰ Una, ang eksperiensia ni Saul nagapakita nga indi kita dapat mangin kampante nga makapabilin kita nga masinakripisyuhon bangod masinakripisyuhon man kita sang una. (1 Tim. 4:10) Dumduma nga sang primero, naghimo man sing maayo si Saul kag ginkahamut-an sia sang Dios, pero wala niya matapna ang pagsugod sang iya pagkamaiyaiyahon. Sang ulihi, ginsikway ni Jehova si Saul bangod indi sia matinumanon.

¹¹ Ikaduha, mag-andam kita sa pagkonsentrar lamang sa aton maayo nga ginahimo, kag balewalaon ang mga kinahanglan pa naton bag-uhon. Daw kaangay ini sa pagpangespiho para makita ang katahom sang aton bag-o nga bayo pero ginabalewala ang higko sa aton guya. Bisan pa indi pareho kay Saul ang aton pagkamaiyaiyahon, dapat kita manikasog nga likawan ang bisan ano nga huyog nga mahimo magresulta sa iya malain nga ginhimo. Kon ginalaygayan kita, indi naton pagpakamatarungon ang aton mga ginhimo, pakadiutayon ang problema, ukon basulon ang iban. Sa baylo nga ilugon sia, mas maayo nga batunon naton ang mga laygay.—Basaha ang Salmo 141:5.

12. Paano ang pagkamasinakripisyuhon makabulig sa aton kon makahimo kita sing serioso nga sala?

¹² Pero ano abi kon nakahimo kita sing serioso nga sala? Indi gusto ni Saul nga maguba ang iya reputasyon, amo nga wala sia makapanumbalik sa espirituwal. Pero, ang pagkamasinakripisyuhon makabulig sa aton nga maatubang ang kahuy-anan kag makatigayon sing bulig. (Hulu. 28:13; Sant. 5:14-16)  Halimbawa, ang isa ka utod nagatan-aw sing pornograpiya halin sang 12 anyos pa lang sia, kag sekreto sia gihapon nga nagatan-aw sini sing sobra na isa ka dekada. Nagsiling sia: “Kabudlay gid isugid sa akon asawa kag sa mga gulang ang ginahimo ko. Pero karon nga gintu-ad ko na ini, daw nadula na ang mabug-at ko nga palas-anon. Nadismaya ang iban ko nga abyan sang nataktak ako subong ministeryal nga alagad, nga daw pareho lang nga ginpaslaw ko sila. Pero nahibaluan ko nga mas nalipay karon si Jehova sa akon pag-alagad sangsa tion nga nagatan-aw ako sing pornograpiya, kag ang iya pagtamod amo gid ang importante.”

13, 14. Paano nangin maiyaiyahon si Pedro?

¹³ Ginpakita ni apostol Pedro ang pagkamasinakripisyuhon sang ginhanas sia ni Jesus. (Luc. 5:3-11) Pero, kinahanglan niya pakigbatuan ang huyog nga mangin maiyaiyahon. Halimbawa, naakig sia sang naghimo sing paagi sanday apostol Santiago kag Juan para makatigayon sing prominente nga mga posisyon kaupod ni Jesus sa Ginharian sang Dios. Mahimo nga naghunahuna si Pedro nga dapat ihatag sa iya ang isa sina nga posisyon bangod nagsiling sadto si Jesus nga hatagan sia sing pinasahi nga katungdanan. (Mat. 16:18, 19) Ano man ang ila rason, ginpaandaman ni Jesus sanday Santiago kag Juan, subong man si Pedro kag ang tanan nga apostoles, batok sa pagtinguha nga ‘magpakaginuo’ sa ila mga kauturan.—Mar. 10:35-45.

¹⁴ Sa tapos gintadlong ni Jesus ang panghunahuna ni Pedro, padayon gihapon niya nga ginpakigbatuan ang sayop nga pagtamod sa kaugalingon. Sang ginsilingan ni Jesus ang iya mga apostoles nga magaabot ang tion nga biyaan nila sia, ginpakanubo ni Pedro ang iban kag ginpakataas ang iya kaugalingon paagi sa pagsiling nga sia lamang ang mangin mainunungon. (Mat. 26:31-33) Pero indi ini matuod, kay sa sina mismo nga gab-i napaslawan sia sa pagpakita sang pagkamasinakripisyuhon. Para proteksionan ang iya kaugalingon, tatlo ka beses nga ginpanghiwala ni Pedro si Jesus.—Mat. 26:69-75.

15. Sa kabilugan, ngaa makapalig-on ang halimbawa ni Pedro?

¹⁵ Bisan pa sini, maayo gid nga halimbawa si Pedro. Paagi sa iya panikasog kag sa bulig  sang balaan nga espiritu sang Dios, nabatuan niya ang iya kaluyahon kag nagpakita sing pagpugong sa kaugalingon kag masinakripisyuhon nga gugma. (Gal. 5:22, 23) Nabatas niya ang mga pagtilaw nga makabig nga mas mabudlay sangsa una nga mga pagtilaw diin napaslawan sia. Nangin mapainubuson sia sang ginsaway sia ni apostol Pablo sa atubangan sang mga tawo. (Gal. 2:11-14) Kag sa tapos sia ginsaway, wala naglain ang buot ni Pedro, nga nagabatyag nga ginpakahuy-an sia ni Pablo. Padayon nga ginhigugma ni Pedro si Pablo. (2 Ped. 3:15) Ang halimbawa ni Pedro makabulig sa aton nga mapalambo ang pagkamasinakripisyuhon.

16. Paano naton mapakita ang pagkamasinakripisyuhon sa mabudlay nga mga kahimtangan?

¹⁶ Hunahunaa kon ano ang imo reaksion sa mabudlay nga mga kahimtangan. Sang ginpriso si Pedro kag ang mga apostoles kag dayon ginbunal bangod sa ila pagbantala, nagkalipay sila ‘bangod ginkabig sila nga takus pakahuy-an tungod sa ngalan ni Jesus.’ (Binu. 5:41) Mahimo mo man kabigon ang paghingabot subong kahigayunan para mailog si Pedro kag masunod ang mga tikang ni Jesus paagi sa pagpakita sing pagkamasinakripisyuhon. (Basaha ang 1 Pedro 2:20, 21.) Ini nga panimuot mahimo pa gani makabulig sa imo kon nakabaton ka sing disiplina gikan sa mga gulang. Sa baylo nga maakig, sunda ang halimbawa ni Pedro.—Man. 7:9.

17, 18. (a) Ano ang mahimo naton ipamangkot sa aton kaugalingon parte sa aton espirituwal nga mga tulumuron? (b) Ano ang himuon naton kon may makita kita nga huyog sang pagkamaiyaiyahon sa aton tagipusuon?

¹⁷ Makabenepisyo ka man sa halimbawa ni Pedro kon parte sa espirituwal nga mga tulumuron. Malab-ot mo ina nga mga tulumuron paagi sa pagkamasinakripisyuhon. Pero maghalong, basi ginalab-ot mo ini bangod gusto mo mangin prominente. Pamangkuta ang imo kaugalingon, ‘Nagahandum bala ako nga pauswagon ukon dugangan ang akon pag-alagad kay Jehova bangod gusto ko nga may awtoridad ako ukon dayawon sang iban, pareho sang posible nga panimuot nanday Santiago kag Juan sang may ginpangabay sila kay Jesus?’

¹⁸ Kon may makita ka nga huyog sang pagkamaiyaiyahon sa imo tagipusuon, mangabay kay Jehova nga buligan ka nga tadlungon ang imo panimuot kag balatyagon; dayon panikasugi nga unahon ang iya kahimayaan sa baylo sangsa imo. (Sal. 86:11) Mahimo mo man tinguhaan ang mga tulumuron nga wala nagahatag sa imo sing kabantugan. Halimbawa, mahimo mo palambuon pa gid ang nabudlayan mo ipakita nga aspekto sang bunga sang espiritu. Ukon kon nagapreparar ka gid sa imo mga bahin sa miting pero daw indi mo luyag magtinlo sang Kingdom Hall, mahimo mo tinguhaan nga iaplikar ang laygay sa Roma 12:16.—Basaha.

19. Ano ang himuon naton para indi kita maluyahan sa aton makita sa espiho sang Pulong sang Dios?

¹⁹ Kon magtan-aw kita sing maayo sa espiho sang Pulong sang Dios kag makakita sing mga depekto, ukon pagkamaiyaiyahon, mahimo kita maluyahan. Kon amo sini ang imo nabatyagan, hunahunaa sing maayo ang madinalag-on nga tawo sa ilustrasyon ni Santiago. Wala ginpadaku ni Santiago kon daw ano kadasig nasolbar sang tawo ang iya nakit-an nga mga problema ukon kon masarangan niya kuhaon ang tanan nga higko, kundi nagsiling sia nga ‘nagpadayon ang tawo sa himpit nga kasuguan.’ (Sant. 1:25) Nadumduman niya ang iya nakita sa espiho kag padayon nga nagtinguha sa pagkuha ukon pagtadlong sini. Huo, padayon nga mangin positibo sa imo kaugalingon kag mangin balanse sa imo pagtamod sa imo di-kahimpitan. (Basaha ang Manugwali 7:20.) Magpadayon sa pagtulok sa himpit nga kasuguan, kag panikasugi nga mahuptan ang pagkamasinakripisyuhon. Handa si Jehova sa pagbulig sa imo, pareho sang pagbulig niya sa madamo mo nga kauturan, nga bisan indi sila himpit, natigayon nila ang kahamuot kag pagpakamaayo sang Dios.