Sa ambahanon sang pagdayaw sa Manunuga, si Hari David sang dumaan nga Israel nagsiling: “Nagakalipay ako sa paghimo sang imo kabubut-on, O Dios ko; ang imo kasogoan yari sa sulud sang akon tagiposoon.” (Sal. 40:8) Bisan pa sa iya mga kabudlayan kag mga pag-ipit, nalipay gid si David sa paghimo sang kabubut-on sang Dios. Siempre, sa mga sumilimba ni Jehova, indi lang si David ang nalipay sa pag-alagad sa matuod nga Dios.

Gingamit ni apostol Pablo ang Salmo 40:8 para ipatuhoy sa Mesias, ukon Cristo. Sia nagsulat: “Sang nag-abot [si Jesus] sa kalibutan, nagsiling sia: ‘“Indi mo luyag ang halad kag dulot, kundi nag-aman ka sang lawas para sa akon. Wala mo nahamut-an ang bug-os nga mga dulot nga sinunog kag ang dulot tungod sa sala.” Nian nagsiling ako, “Yari karon! Nag-abot ako (sa bahin sang libro nasulat ini tuhoy sa akon) sa paghimo sang imo kabubut-on, O Dios.”’”—Heb. 10:5-7.

Sang yari si Jesus sa duta, nalipay sia sa pagtan-aw sa mga tinuga, pagpakig-upod sa iya mga abyan, kag pagkaon upod sa iban. (Mat. 6:26-29; Juan 2:1, 2; 12:1, 2) Pero ang pinakaimportante kag nakahatag sa iya sing labi nga kalipay amo ang paghimo sang kabubut-on sang iya Amay sa langit. Ang matuod, si Jesus nagsiling: “Ang akon kalan-on amo ang paghimo sa kabubut-on sang nagpadala sa akon kag ang pagtapos sa iya buluhaton.” (Juan 4:34; 6:38) Paagi sa ila Agalon, natun-an sang mga disipulo ang sekreto sang matuod nga kalipay. Nalipay gid sila sa kinabubut-on kag maukod nga pagsugid sang mensahe sang Ginharian sa iban.—Luc. 10:1, 8, 9, 17.

Ginsugo ni Jesus ang iya mga sumulunod: “Lakat kamo kag maghimo sang mga disipulo sa mga tawo sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila nga tumanon ang tanan nga butang nga ginsugo ko sa inyo. Kag, yari karon! ako kaupod ninyo sa tanan nga adlaw  tubtob sa katapusan sang sistema sang mga butang.” (Mat. 28:19, 20) Ang pagtuman sini nga sugo nagalakip sang pagbantala sa mga tawo diin man sila masapwan, pagduaw liwat sa mga interesado, kag pagdumala sa ila sing pagtuon sa Biblia. Ang paghimo sini makahatag sing daku nga kalipay.

Batunon man sang mga tawo ang aton mensahe ukon indi, nagadepende sa aton panimuot ang aton kalipay sa ministeryo. Ngaa padayon naton nga ginasugid ang maayong balita bisan pa ang iban indi interesado? Bangod nahibaluan naton nga ang pagpakigbahin sa pagbantala sang Ginharian kag paghimo sing disipulo nagapakita sang aton gugma sa Dios kag sa aton isigkatawo. Kabuhi ang nadalahig—ang aton kabuhi kag ang iya sang aton isigkatawo. (Ezeq. 3:17-21; 1 Tim. 4:16) Binagbinagon naton ang pila ka punto nga nakabulig sa madamo naton nga masigkamanugpangabudlay nga mahuptan ukon mapanumbalik ang ila kakugi sa ministeryo sa mabudlay nga mga teritoryo.

Sa masami, may maayo nga mga resulta ang paggamit sing nagakaigo nga mga pamangkot sa ministeryo. Isa ka aga, nakita ni Amalia ang tawo nga nagabasa sing pamantalaan sa parke. Ginpalapitan niya ini kag ginpamangkot kon may nabasahan sia nga maayo nga balita. Sang nagsiling ang tawo nga wala, si Amalia nagsiling, “May dala ako sa imo nga maayong balita parte sa Ginharian sang Dios.” Napukaw ang interes sang tawo, kag ginbaton niya ang pagtuon sa Biblia. Ang matuod, nakasugod si Amalia sing tatlo ka pagtuon sa Biblia sa sina nga parke.

Ginhimo ni Janice nga teritoryo ang iya ulubrahan. Sang nagpakita sing interes ang guardia kag ang upod sini sa trabaho sa isa ka artikulo sa Ang Lalantawan, gintanyagan sila ni Janice nga regular sila nga hatagan sang kopya sini nga magasin. Amo man sini ang ginhimo niya sa isa niya ka upod sa obra, nga nagdayaw gid sa lainlain nga topiko nga ginabinagbinag sa Ang Lalantawan kag Magmata! Bangod sini, ang isa pa niya ka upod sa obra gusto man magkuha sing mga magasin. “Pagpakamaayo gid ini ni Jehova!” siling ni Janice. Sang ulihi, may 11 na sia ka ruta sang magasin sa iya ulubrahan.

Ang isa ka nagalakbay nga manugtatap nagrekomendar nga sa pagpamalaybalay, indi dapat pagtapuson sang mga manugbantala ang pag-istoryahanay sa tagbalay paagi lang sa pagsiling nga mabalik lang sila sa masunod nga adlaw. Sa baylo, mahimo nila pamangkuton ang tagbalay: “Gusto mo bala nga ipakita ko sa imo kon paano magtuon sing Biblia?” ukon, “Ano nga adlaw kag oras gusto mo nga magbalik ako diri para padayunon ang aton pag-istoryahanay?” Ang nagalakbay nga manugtatap nagreport nga sa sini nga paagi, ang mga kauturan sa isa ka kongregasyon nakasugod sing 44 ka pagtuon sa Biblia sa isa ka semana.

Ang pagbalik dayon—bisan pagligad lang sang pila ka adlaw—epektibo gid. Ngaa? Kay man, ginapakita  sini nga gusto gid naton buligan ang mga interesado nga mahangpan ang Biblia. Sang ginpamangkot ang isa ka babayi kon ngaa ginbaton niya ang pagtuon sa Biblia, sia nagsiling, “Nagtuon ako bangod nakita ko nga sinsero gid ang ila interes kag gugma sa akon.”

Wala madugay sa tapos makaeskwela si Madaí sa Pioneer Service School (PSS), nakadumala sia sing 15 ka pagtuon sa Biblia kag may ginhatag pa sia nga 5 sa iban nga manugbantala. Ang pila niya ka estudyante sa Biblia regular na nga nagatambong sa aton mga miting. Ano ang nakabulig kay Madaí nga makasugod sing madamo nga pagtuon? Natun-an niya sa PSS nga kinahanglan padayon nga balikan ang mga interesado. Ang isa pa ka Saksi nga nakabulig sa madamo nga makatuon sing kamatuoran sa Biblia nagsiling, “Natun-an ko nga ang padayon nga pagduaw liwat amo ang sekreto para mabuligan ang mga tawo nga gusto makakilala kay Jehova.”

Kinahanglan gid ang daku nga panikasog sa pagduaw liwat kag pagdumala sing mga pagtuon sa Biblia. Pero, mas daku pa sa sini ang padya nga aton mabaton. Paagi sa pagpakigbahin sa pagbantala, mabuligan naton ang iban nga “makadangat sa sibu nga ihibalo tuhoy sa kamatuoran,” sa amo makatigayon sila sing kaluwasan. (1 Tim. 2:3, 4) Para sa aton, magaresulta ini sa wala tupong nga kalipay.