1, 2. Paano ginatamod ni Jehova ang iya mga alagad sa duta?

SAMTANG ginatan-aw sang mga ginikanan ang ila kabataan nga nagahampang, masami nga nagadayaw sila sa natural nga ikasarang sang mga bata. Amo man bala sina ang imo nabatyagan? Ang isa ka bata mahimo nga maayo sa sports, samtang ang isa naman nanamian magdrowing ukon mangutikuti. Pero ano man ang talento sang ila mga kabataan, ang mga ginikanan nalipay sa pagdiskobre sang ila ikasarang.

² Si Jehova interesado man sa iya mga anak sa duta. Ginatamod niya ang iya mga alagad karon subong “bilidhon nga mga butang sang tanan nga pungsud.” (Hag. 2:7) Hamili sila ilabi na bangod sang ila pagtuo kag debosyon. Apang mahimo natalupangdan mo nga ang imo mga kauturan may lainlain nga talento kag ikasarang. Ang pila ka utod nga lalaki maayo mamulongpulong, pero ang iban naman maayo mag-organisar. Madamo nga utod nga babayi ang madali lang makatuon sang dumuluong nga mga lenguahe kag ginagamit ini sa ministeryo, samtang ang iban dalayawon gid nga halimbawa sa pagsuporta sa mga nagakinahanglan sing pagpalig-on ukon sa pag-atipan sa nagabalatian. (Roma 16:1, 12) Ginapabaloran bala naton nga kaupod naton sa kongregasyon ini nga mga Cristiano?

3. Ano nga mga pamangkot ang aton binagbinagon sa sini nga artikulo?

³ Apang ang pila ka masigkatumuluo, lakip na ang mga pamatan-on ukon bag-o nabawtismuhan, mahimo nga wala pa makahibalo sang ila papel sa sulod sang kongregasyon. Paano naton sila mabuligan para mapakita ang ila bug-os nga ikasarang? Ngaa dapat naton tinguhaan nga makita ang maayo sa ila, nga ginatamod sila pareho sang pagtamod ni Jehova?

4, 5. Paano ang kasaysayan sa Hukom 6:11-16 nagapakita nga nakita ni Jehova ang ikasarang sang iya mga alagad?

⁴ Maathag sa pila ka kasaysayan sa Biblia nga nakita ni Jehova indi lamang ang maayo sa iya mga alagad kundi ang ila man ikasarang. Halimbawa, sang ginpili si Gideon para hilwayon ang katawhan sang Dios sa pagpamigos sang mga Midianhon, mahimo nga natingala gid sia sa pagtamyaw sang anghel sa iya: “Ang GINOO nagaupud sa imo, ikaw nga isganan nga lalaki.” Daw maathag nga sa sina nga tion wala nagabatyag si Gideon nga “isganan” sia. Nagbatyag sia nga wala sia sing ikasarang. Pero subong sang ginpakita sang ila pag-istoryahanay, mas positibo ang pagtamod ni Jehova sa iya alagad sangsa pagtamod mismo ni Gideon sa iya kaugalingon.—Basaha ang Hukom 6:11-16.

⁵ Nagsalig si Jehova nga maluwas ni ­Gideon ang Israel bangod naobserbahan Niya ang iya mga ikasarang. Isa pa, nakita sang anghel ni Jehova kon paano ginlinas ni Gideon ang trigo sa bug-os niya nga kusog. May isa pa ka butang nga natalupangdan ang anghel. Sa panahon sang Biblia, kinaandan na nga ginalinas sang mga mangunguma ang ila uyas sa wayang para mapahanginan ini. Pero patago nga ginalinas ni Gideon ang trigo sa linasan sang ubas para indi makita sang mga Midianhon ang iya gamay nga ani. Maalamon gid ini nga estratehiya! Indi katingalahan nga sa panulok ni Jehova, si Gideon indi lang mahalungon nga mangunguma, kundi maalamon man nga tawo. Huo, nakita ni Jehova ang iya ikasarang kag ginbuligan Niya sia.

6, 7. (a) Ano ang kinatuhayan sang pagtamod ni Jehova kay Amos sa pagtamod sang pila ka Israelinhon? (b) Ano ang nagapakita nga indi ignorante si Amos?

⁶ Sing kaanggid, makita naton sa kahimtangan ni manalagna Amos nga natalupangdan ni Jehova ang ikasarang sang isa sa iya mga alagad, bisan pa para sa madamo daw wala sia sing ikasarang ukon kubos. Ginlaragway ni Amos ang iya kaugalingon subong manugbantay sang karnero kag manugtatap sang sicomoro—nga ginakabig nga pagkaon sang imol. Sang gintangdo ni Jehova si Amos nga pakamalauton ang napulo ka tribo sang ginharian sang Israel bangod sang pagsimba sa idolo, ang pila ka Israelinhon mahimo nag­hunahuna nga indi husto ang pagpili sa iya.—­Basaha ang Amos 7:14, 15.

⁷ Si Amos naghalin sa naligwin nga lugar, pero ang iya ihibalo sa kinabatasan kag sa mga manuggahom sang iya tion nagapakita nga indi sia ignorante. Mahimo nga nahibaluan gid niya ang kahimtangan sang Israel, kag may ihibalo sia parte sa kaingod nga mga pungsod bangod sa iya pagpakig-angot sa nagalakbay nga mga negosyante. (Amos 1:6, 9, 11, 13; 2:8; 6:4-6) Ang pila ka iskolar sa Biblia karon nagadayaw sa maayo nga ikasarang ni Amos sa pagsulat. Naggamit sia sing simple pero mabaskog nga mga tinaga. Ang maisugon nga sabat ni Amos sa malain nga saserdote nga si Amazias nagapamatuod nga husto ang ginpili ni Jehova, kag nagamit ang iya ikasarang nga daw indi makita sang primero.—Amos 7:12, 13, 16, 17.

8. (a) Ano ang pasalig ni Jehova kay David? (b) Ngaa ang ginsiling sang Salmo 32:8 nagapasalig sa mga indibiduwal nga mahimo wala sing kompiansa ukon ikasarang?

⁸ Huo, natalupangdan ni Jehova ang ikasarang sang tagsa niya ka alagad. Ginpasalig niya si Hari David nga giyahan niya sia pirme nga ‘ang iya mata yara sa ibabaw niya.’ ­(Basaha ang Salmo 32:8.) Nakita mo bala kon ngaa makapalig-on ini sa aton? Bisan pa mahimo nga wala kita sing kompiansa, mabuligan kita ni Jehova nga malampasan ang ginahunahuna naton nga limitasyon kag malab-ot ang mga tulumuron nga daw indi naton masarangan. Subong nga ginabantayan sing maayo sang instruktor ang indi eksperiensiado nga ­rock ­climber para tudluan sia sang pinakamaayo nga uluyatan, handa si Jehova sa paggiya sa aton samtang nagauswag kita sa espirituwal. Mahimo man gamiton ni Jehova ang aton masigkatumuluo para buligan kita nga mapakita ang aton bug-os nga ikasarang. Paano?

9. Paano naton maaplikar ang laygay ni Pablo nga ‘ituon ang mata’ sa kaayuhan sang iban?

⁹ Ginpalig-on ni Pablo ang tanan nga Cristiano nga ‘ituon ang mata’ sa kaayuhan sang ila mga masigkatumuluo. (Basaha ang Filipos 2:3, 4.) Ginapahangop sang laygay ni Pablo nga dapat naton hatagan sing atension ang mga ikasarang sang aton mga utod kag ihambal ini sa ila. Ano ang aton batyagon kon magpakita sing interes ang iban sa aton pag-uswag? Kinaandan na nga nagapalig-on ini sa aton nga maghimo sing dugang nga pag-uswag, nga himuon ang aton bug-os nga masarangan. Kon kilalahon man naton ang balor sang aton mga masigkatumuluo, ginabuligan naton sila nga magbakod kag mag-uswag sa espirituwal.

10. Sin-o ang ilabi na nga nagakinahanglan sang aton atension?

¹⁰ Sin-o ang ilabi na nga mahimo nagakinahanglan sang aton atension? Siempre, kita tanan nagakinahanglan kon kaisa sing pinasahi nga atension. Pero, ilabi na nga kinahanglan mabatyagan sang pamatan-on ukon bag-o nabawtismuhan nga nalakip sila sa mga hilikuton sa kongregasyon. Makabulig ini sa ila nga mahangpan nga importante sila nga bahin sang katawhan ni Jehova. Sa pihak nga bahin, kon indi naton ini paghimuon, mahimo ini magpugong sa ila handum nga lab-uton ang dugang nga responsibilidad nga ginapalig-on sang Pulong sang Dios nga himuon nila.—1 Tim. 3:1.

11. (a) Paano ginbuligan sang gulang ang isa ka mahuluy-on nga pamatan-on? (b) Ano ang imo matun-an sa eksperiensia ni Julien?

¹¹ Si Ludovic, nga isa ka gulang nga ginpakitaan sing amo sini nga interes sang pamatan-on sia, nagsiling: “Kon pakitaan ko sing sinsero nga interes ang isa ka utod, madasig ang iya pag-uswag.” Parte kay Julien, nga isa ka pamatan-on nga lalaki nga mahuluy-on, si Ludovic nagsiling: “Kon kaisa si Julien daw balik-awot pahulagon, gani indi normal ang iya paggawi. Pero nakita ko nga kaayo gid sa iya kag gusto gid niya buligan ang iban sa kongregasyon. Gani, imbes nga duhaduhaan ang iya motibo, nagkonsentrar ako sa maayo niya nga mga kinaiya, kag nagtinguha nga palig-unon sia.” Sang ulihi, nakalipikar si Julien subong ministeryal nga alagad, kag karon regular payunir na.

12. Ano nga kinaiya ang kinahanglan para mabuligan ang iban nga mapakita ang ila bug-os nga ikasarang? Maghatag sing halimbawa.

¹² Siempre pa, para mabuligan naton ang iban nga mapakita ang ila bug-os nga ikasarang, kinahanglan nga mangin mahinantupon kita. Subong sang ginapakita sa eksperiensia ni Julien, mahimo nga indi naton pagtan-awon ang mga kaluyahon sang isa ka tawo para makita naton ang iya maayo nga mga kinaiya kag ikasarang nga mahimo mapauswag. Amo man sini ang pagtamod ni Jesus kay apostol Pedro. Bisan pa kon kaisa maluya si Pedro, gintagna ni Jesus nga mangin mabakod sia subong sang igang.—Juan 1:42.

13, 14. (a) Paano si Bernabe nagpakita sing paghantop sa pamatan-on nga si Marcos? (b) Paano nakabenepisyo ang isa ka pamatan-on sa bulig nga pareho sang nabaton ni Marcos? (Tan-awa ang piktyur sa umpisa sini nga artikulo.)

¹³ Amo man sini ang ginpakita ni Bernabe kay Juan, nga may Romanong ngalan nga Marcos. (Binu. 12:25) Sa una nga paglakbay nanday Pablo kag Bernabe subong misyonero, si Marcos amo ang ila “alagad,” ayhan nagatatap sang ila pisikal nga mga kinahanglanon. Pero, sang nakaabot sila sa Pamfilia, hinali lang nga ginbiyaan sila ni Marcos. Kinahanglan nila maglakbay pa aminhan nga wala sia kag mag-agi sa lugar nga madamo sing tulisan. (Binu. 13:5, 13) Ayhan, ginpalampas ni Bernabe ining indi maayo nga batasan ni Marcos kag sang ulihi ginhanas pa gid niya ini. (Binu. 15:37-39) Nakabulig ini sa pamatan-on nga mangin hamtong nga alagad ni Jehova. Talalupangdon nga si Marcos ara sa Roma kaupod ni Pablo, nga napriso sa sina nga tion, kag nagpadala man sang panamyaw sa mga Cristiano sa kongregasyon sang Colosas, kag maayo ang ginsiling ni Pablo parte sa iya. (Col. 4:10) Handurawa ang kalipay ni Bernabe sang nangabay si Pablo nga buligan sia ni Marcos.—2 Tim. 4:11.

¹⁴ Si Alexandre, nga ­bag-o lang natangdo subong gulang, nagsugid kon paano sia nakabenepisyo sa maalamon nga paagi sang isa ka utod nga lalaki: “Sang pamatan-on ako, nabudlayan gid ako mangamuyo sa publiko. Ginpakita sa akon sang isa ka gulang kon paano maghanda kag mangin mas relaks. Imbes nga indi na ako pagpadumalahon sing pangamuyo, ginhatagan niya ako sing pribilehiyo nga regular nga mangamuyo sa mga miting para sa pag-alagad sa latagon. Sang ulihi, mas may kompiansa na ako.”

15. Paano ginpabutyag ni Pablo ang iya apresasyon sa iya mga kauturan?

¹⁵ Kon matalupangdan naton ang maayo nga kinaiya sang iban nga Cristiano, ginapabutyag bala naton sa ila nga ginapabaloran gid naton ini? Sa Roma kapitulo 16, ginsambit ni Pablo ang sobra sa 20 ka masigkatumuluo bangod sang ila maayo nga mga kinaiya. (Roma 16:3-7, 13) Halimbawa, ginbaton ni Pablo nga sanday Andronico kag Junia mas madugay na nga nagaalagad kay Cristo sangsa iya, nga ginapadaku ang ila pagbatas subong Cristiano. Maayo man ang ginsiling ni Pablo sa iloy ni Rufo, ayhan ginapatuhuyan ang pagtatap sini sa iya sang una.

16. Ano ang mahimo nga resulta kon hatagan sing komendasyon ang isa ka pamatan-on?

¹⁶ Mahimo nga may maayo nga mga resulta kon magpakita kita sing sinsero nga komendasyon. Binagbinaga ang natabo kay Rico, nga pamatan-on sa Pransia. Naluyahan sia bangod ang iya amay, nga indi tumuluo, indi magpasugot nga magpabawtismo sia. Naghunahuna si Rico nga kinahanglan niya maghulat asta nga makaabot sia sa legal nga edad para maalagad sing bug-os si Jehova. Nasubuan man sia kay ginayaguta sia sa eskwelahan. Ang gulang nga si Frédéric, nga amo ang nagatuon sa iya, nagsaysay: “Ginahatagan ko sing komendasyon si Rico bangod ini nga pagpamatok nagapakita nga may kaisog sia sa pagpabutyag sang iya pagtuo.” Napalig-on gid sini ang determinasyon ni Rico nga magpabilin nga huwaran kag nagbulig ini sa iya nga makigsuod pa sa iya amay. Nabawtismuhan si Rico sa edad nga 12 anyos.

17. (a) Paano naton mabuligan ang aton kauturan nga mag-uswag? (b) Ano nga personal nga interes ang ginpakita sang isa ka misyonero sa pamatan-on nga mga utod, kag ano ang resulta?

¹⁷ Sa tagsa ka tion nga ginapabutyag naton ang aton apresasyon sa maayo nga pagdumala sing mga asaynment ukon sa dalayawon nga mga panikasog, ginapalig-on naton ang aton mga masigkatumuluo nga alagaron si ­Jehova sing labi pa. Si Sylvie, * nga nagaalagad sa Bethel sa Pransia sa sulod sang mga tinuig, nagkomento nga ang mga utod nga babayi makahatag man sing komendasyon sa mga utod nga lalaki. Nagsiling sia nga ang mga babayi mahimo makaapresyar sa lain nga mga detalye ukon mga panikasog nga ila naobserbahan. Gani ang ila “ginasiling nga makapalig-on mahimo magdugang sa ginasiling sang eksperiensiado nga mga utod nga lalaki.” Nagsiling pa sia: “Para sa akon, ang paghatag sing komendasyon isa ka obligasyon.” (Hulu. 3:27) Si Jérôme, nga isa ka misyonero sa ­French ­Guiana, nakabulig sa madamo nga pamatan-on nga lalaki nga makalipikar subong misyonero. Nagsiling sia: “Natalupangdan ko nga kon ginapasalamatan ko ang pamatan-on nga lalaki sa espesipiko nga mga bahin sa ila ministeryo ukon sa paghatag nila sing makapalig-on nga komento, nagadugang ang ila kompiansa. Subong resulta, mas napauswag nila ang ila mga ikasarang.”

18. Ngaa may benepisyo ang pagpanghikot upod sa mga pamatan-on?

¹⁸ Mapahulag man naton ang aton mga masigkatumuluo nga mag-uswag sa espirituwal paagi sa pagpanghikot upod sa ila. Mahimo pangabayon sang gulang ang isa ka pamatan-on nga maayo sa kompyuter nga mag-imprinta sang pila ka impormasyon halin sa jw.org nga makapalig-on sa mga tigulang nga wala sing kompyuter. Ukon kon may ulubrahon ka sa Kingdom Hall, mahimo mo pangabayon ang isa ka pamatan-on nga buligan ka. Sa sini nga paagi, may kahigayunan ka nga maobserbahan ang mga pamatan-on kag makahatag sing komendasyon kag makita ang mga resulta.—Hulu. 15:23.

19, 20. Ngaa dapat naton buligan ang iban nga mag-uswag?

¹⁹ Sang gintangdo ni Jehova si Josue nga pangunahan ang mga Israelinhon, ginsugo man Niya si Moises nga ‘pabakuron kag palig-unon’ si Josue. (Basaha ang Deuteronomio 3:28.) Nagadamo na gid ang nagabuylog sa aton sa pagsimba kay Jehova. Ang tanan nga eksperiensiado nga Cristiano—indi lamang mga gulang—makabulig sa mga pamatan-on kag bag-uhan para mapakita ang ila bug-os nga ikasarang. Sa amo, madamo pa ang magasulod sa bug-os tion nga ministeryo, kag magadamo pa ang mangin “kalipikado man sa pagpanudlo sa iban.”—2 Tim. 2:2.

²⁰ Nagapakig-upod man kita sa daku nga kongregasyon ukon sa gamay nga grupo nga nagauswag nga mangin kongregasyon, handaan naton ang palaabuton. Ang sekreto amo ang pag-ilog kay Jehova, nga pirme ginatan-aw ang maayo sa iya mga alagad.