1, 2. Ngaa may simpatiya si Pablo sa maluya?

TANAN kita nagabatyag nga maluya kon kaisa. Mahimo nga magluya kita bangod sang trangkaso ukon alerdyi kag mabudlayan kita sa paghimo sang aton inadlaw nga mga buluhaton. Karon, handurawa nga nagapalangluya ka, indi lang isa ukon duha ka semana, kundi sing binulan pa. Sa sini nga sitwasyon, indi bala nga apresyahon mo kon pakitaan ka sing kaluoy sang iban?

² Nahibaluan ni apostol Pablo ang nabatyagan sang isa nga naapektuhan, ukon naluyahan pa gani, bangod sang mga kabudlayan sa sulod kag sa gua sang kongregasyon. Sobra sa isa ka beses nga naghunahuna sia nga indi na sia makapadayon. (2 Cor. 1:8; 7:5) Sa pagpamensar sang iya kabuhi kag sang madamo nga kabudlayan subong matutom nga Cristiano, si Pablo nagbaton: “Sin-o ang maluya, kag indi ako maluya?” (2 Cor. 11:29) Kag parte sa nanuhaytuhay nga miembro sang Cristianong kongregasyon, nga ginpaanggid sa mga bahin sang lawas, si Pablo nagsiling nga ang mga “daw mas maluya kinahanglanon.” (1 Cor. 12:22) Ano ang buot niya silingon? Ngaa dapat naton ilugon ang pagtamod ni Jehova sa mga indibiduwal nga daw mas maluya? Kag paano kita makabenepisyo sa paghimo sini?

3. Ano ang mahimo makaimpluwensia sa aton pagtamod sa mga nagakinahanglan sing bulig sa sulod sang kongregasyon?

³ Nagakabuhi kita sa isa ka kalibutan nga nagapaindisanay, diin masami nga ginapabaloran ang kusog kag pagkapamatan-on. Ginahimo sang madamo ang tanan para matuman ang ila gusto, nga sa masami ginatapakan ang balatyagon sang mga maluya. Wala naton ginatugutan ina nga panimuot, pero mahimo nga indi naton matalupangdan nga makapakita kita sing negatibo nga pagtamod sa mga nagakinahanglan pirme sing bulig, bisan sa sulod sang kongregasyon. Pero mahimo naton mapalambo ang mas balanse nga pagtamod, ang pagtamod sang Dios.

4, 5. (a) Paano ang ilustrasyon sa 1 Corinto 12:21-23 nagabulig sa aton nga mahangpan ang pagtamod ni Jehova sa kaluyahon sang mga tawo? (b) Paano kita makabenepisyo sa pagbulig sa mga maluya?

⁴ Mahangpan naton ang pagtamod ni Jehova sa kaluyahon sang mga tawo sa ilustrasyon ni Pablo sa iya una nga sulat sa mga ­taga-­Corin­to. Sa kapitulo 12, ginapahanumdom sa aton ni Pablo nga bisan ang daw indi makagalanyat ukon pinakamaluya nga bahin sang lawas sang tawo may kapuslanan. (Basaha ang 1 Corinto 12:12, 18, 21-23.) Ang mga aspekto sini nga ideya parte sa lawas sang tawo ginkuwestion sang pila ka ebolusyonista. Apang base sa mga nasapwan sa pagtuon sa anatomiya, ang mga bahin sang lawas nga ginakabig sadto nga wala sing pulos may importante nga mga papel. * Halimbawa, ginduhaduhaan sang iban kon may pulos gid man ang gamay nga tudlo sa tiil; pero, ginabaton na karon nga may pulos ini para magbalanse ang bilog nga lawas.

⁵ Ang ilustrasyon ni Pablo nagapadaku nga ang tanan nga miembro sang Cristianong kongregasyon mapuslanon. Indi pareho kay Satanas, nga ginakuhaan sing dignidad ang mga tawo, ginatamod ni Jehova ang tanan niya nga mga alagad, lakip na yadtong daw mga maluya, subong “kinahanglanon.” (Job 4:18, 19) Ini nga panghunahuna dapat magbulig sa kada isa sa aton nga magkalipay sa aton papel sa aton kongregasyon kag subong bahin sang kongregasyon sang katawhan sang Dios sa bilog nga duta. Halimbawa, hunahunaa ang tion sang ginadapit mo ang isa ka tigulang nga nagakinahanglan sing bulig. Ayhan kinahanglan nga hinayon mo ang imo paglakat. Indi bala nga ang pagbulig mapuslanon gid kag nagapabatyag sa imo sing kalipay? Huo, kon ginabuligan naton ang iban, mangin malipayon kita sa pag-atipan sa ila, kag magalambo ang aton pagpailob, gugma, kag pagkahamtong. (Efe. 4:15, 16) Ang aton mahigugmaon nga Amay nakahibalo nga ang kongregasyon nga nagapabalor sang tanan nga miembro sini, bisan pa sang ila mga limitasyon, nagapakita sing pagkabalanse kag gugma.

6. Paano gingamit ni Pablo ang tinaga nga “maluya” kag “makusog”?

⁶ Talalupangdon nga sang nagsulat si Pablo sa mga taga-Corinto, gingamit niya ang tinaga nga “maluya” kag “kaluyahon” sa pagpatuhoy kon paano ginkabig sang mga indi tumuluo ang mga Cristiano sang unang siglo kag sa pagpatuhoy man sa iya pagtamod sa iya kaugalingon. (1 Cor. 1:26, 27; 2:3) Sang ginsambit ni Pablo ang mga “mabakod,” indi niya tuyo nga magbatyag ang pila ka Cristiano nga mas labaw sila. (Roma 15:1) Sa baylo, nagsiling sia nga ang mga Cristiano nga mas eksperiensiado dapat nga magpailob sa mga wala pa nakapanggamot sing mabakod sa kamatuoran.

7. Ano ang mahimo nga rason nga indi naton gusto buligan ang mga nagakinahanglan?

⁷ Kon ginabuligan naton ang mga “maluya,” wala lamang naton ginailog si Jehova kundi matigayon man naton ang iya kahamuot. (Sal. 41:1; Efe. 5:1) Pero ang negatibo nga pagtamod sa mga nagakinahanglan sing bulig mahimo nga amo ang rason kon kaisa nga indi kita magbulig sa ila. Ukon bangod wala kita makahibalo kon ano ang dapat naton ihambal, mahimo nga mahuya kita kag indi na magbulig sa mga nabudlayan. Ang utod nga si Cynthia, * nga ginbiyaan sang iya bana, nagsiling: “Masakit gid kon likawan ka sang mga utod ukon wala nila ginahimo ang ginapaabot mo nga himuon nila bilang suod nga mga abyan. Kon nagabatas ka sang mga pagtilaw, kinahanglan nga may maistorya ka.” Nahibaluan ni David sadto ang nabatyagan sang isa nga ginalikawan.—Sal. 31:12.

8. Ano ang makabulig sa aton para mas makabatyag kita sing kaluoy?

⁸ Mas makabatyag kita sing kaluoy kon dumdumon naton nga ang pila sa aton pinalangga nga kauturan nagluya bangod sang malain nga mga kahimtangan—balatian, may indi tumuluo nga pamilya, ukon depresyon. Mahimo nga amo man sini ang aton kahimtangan pila ka adlaw. Antes magsulod sa Ginsaad nga Duta, ang mga Israelinhon, nga mga imol kag maluya sa duta sang Egipto, ginpahanumdom nga indi nila dapat “pagpatig-ahon ang [ila] tagiposoon” sa ila nabudlayan nga mga utod. Ginapaabot ni Jehova nga hatagan nila sing konsiderasyon ang imol subong takus buligan.—Deut. 15:7, 11; Lev. 25:35-38.

9. Ano dapat ang aton prioridad kon nagabulig sa mga nabudlayan? Iilustrar.

⁹ Imbes nga hukman sila ukon duhaduhaan, dapat naton lugpayan sa espirituwal ang mga nagaatubang sang indi maayo nga mga kahimtangan. (Job 33:6, 7; Mat. 7:1) Sa pag-ilustrar: Kon ang nagamotor nga nasamaran sa isa ka aksidente maabot sa ospital, usisaon pa bala sang mga doktor kon sia ang may sala sa aksidente? Indi, kundi gilayon nga bulngon nila sia. Sing kaanggid, kon ang masigkatumuluo nagluya bangod sang personal nga mga problema, dapat mangin prioridad naton nga buligan sia sa espirituwal.—Basaha ang 1 Tesalonica 5:14.

10. Paano mahimo nga ang pila nga daw maluya “manggaranon sa pagtuo”?

¹⁰ Ang pila ka kauturan mahimo nga daw may kaluyahon. Pero kon hunahunaon naton sing maayo ang ila kahimtangan, mahimo naton makita nga indi sila maluya. Hunahunaa ang mga utod nga babayi nga tinuig na nga nagabatas sa pagpamatok sang pamilya. Ang pila mahimo nga kubos tulukon kag maluya, pero indi bala nga nagapakita sila sing dalayawon nga pagtuo kag kabakod? Kon makita mo ang isa ka nagasolo nga iloy nga regular nga nagatambong sa mga miting upod sa iya bata ukon kabataan, wala ka bala nagadayaw sa iya pagtuo kag determinasyon? Kag kamusta ang mga tin-­edyer nga nanindugan sa kamatuoran bisan pa sang malain nga mga impluwensia sa eskwelahan? Dapat naton batunon nga inang daw mga maluya mahimo nga “manggaranon sa pagtuo” pareho sang iban sa aton nga may mas maayo nga mga kahimtangan.—Sant. 2:5.

11, 12. (a) Ano ang makabulig para mapasibu ang aton pagtamod parte sa kaluyahon sang mga tawo? (b) Ano ang aton matun-an sa pagpakig-angot ni Jehova kay Aaron?

¹¹ Mabuligan kita nga mapasibu ang aton pagtamod sa kaluyahon sang mga tawo sa pagtamod ni Jehova paagi sa pagbinagbinag kon paano niya ginhusay ang mga butang parte sa pila niya ka alagad. (Basaha ang Salmo 130:3.) Halimbawa, kon updanay kamo ni Moises sang naghimo si Aaron sing bulawan nga tinday nga baka, paano mo tamdon ang maluya nga rason ni Aaron? (Ex. 32:21-24) Ukon paano mo tamdon ang panimuot ni Aaron sang gin-impluwensiahan sia sang iya utod nga si Miriam nga pakalainon si Moises bangod sang pagpangasawa sini sang dumuluong nga babayi? (Num. 12:1, 2) Ano ang imo reaksion sang napaslawan sanday Aaron kag Moises sa pagpadungog kay Jehova sang milagruso Sia nga nag-aman sang tubig sa Meriba?—Num. 20:10-13.

¹² Sa sini tanan nga sitwasyon, mahimo kuntani silutan gilayon ni Jehova si Aaron. Pero nahantop Niya nga indi malaut si Aaron ukon sia ang daku nga balasulon. Daw gintugutan ni Aaron ang mga kahimtangan ukon ang impluwensia sang iban nga magpalayo sa iya sa matarong nga dalanon. Pero sang ginpatalupangod sa iya ang iya mga sala, gilayon nga gin-aku niya ini kag ginsakdag ang mga paghukom ni Jehova. (Ex. 32:26; Num. 12:11; 20:23-27) Nagkonsentrar si Jehova sa pagtuo kag paghinulsol ni Aaron. Ginatos ka tuig sang ulihi, si Aaron kag ang iya mga kaliwat gindumdom gihapon nga mga mahinadlukon kay Jehova.—Sal. 115:10-12; 135:19, 20.

13. Ano nga pag-usisa ang aton himuon parte sa aton pagtamod sa kaluyahon sang tawo?

¹³ Agod mapasibu ang aton panghunahuna sa panghunahuna ni Jehova, dapat naton analisahon ang aton pagtamod sa daw mga maluya. (1 Sam. 16:7) Halimbawa, ano ang reaksion naton kon ang isa ka tin-edyer indi mahalungon sa pagpili sing mga kalingawan ukon padasudaso? Imbes nga pakalainon sia, ngaa indi naton pamalandungan kon ano ang mahimo naton para mag-uswag sia sa pagkahamtong? Mahimo kita magmatumato sa pagbulig sa isa nga nagakinahanglan sing bulig, kag sa paghimo sini, magatubo kita sa paghangop kag gugma.

14, 15. (a) Ano ang pagtamod ni Jehova sa temporaryo nga pagkadula sang kaisog ni Elias? (b) Ano ang aton matun-an sa eksperiensia ni Elias?

¹⁴ Mabuligan man kita nga magsangkad ang aton pagtamod sa iban paagi sa pagpaanggid sang aton panghunahuna sa reaksion ni Jehova sang naluyahan sing buot ang pila niya ka alagad. Isa sa ila amo si Elias. Bisan pa wala sing kahadlok nga ginhangkat niya ang 450 ka manalagna ni Baal, nalagyo si Elias gikan kay Rayna Jezebel sang nahibaluan niya nga nagabuko ini sa pagpatay sa iya. Sa tapos sang 150 ka kilometro nga paglakbay pa Beer-seba, nakalab-ot sia sa tunga sang kamingawan. Bangod sa kakapoy sa paglakbay sa nagatagiti nga init sang adlaw, ang manalagna nagpungko sa idalom sang kahoy kag “nagpangabay . . . nga mapatay sia.”—1 Hari 18:19; 19:1-4.

¹⁵ Ano ang ginbatyag ni Jehova sang nakita niya gikan sa langit nga naluyahan ang iya matutom nga manalagna? Ginsikway bala niya ang iya alagad bangod temporaryo ini nga naluyahan kag nadulaan sing kaisog? Wala gid! Ginhatagan sing konsiderasyon ni Jehova ang mga limitasyon ni Elias kag nagpadala sang anghel sa iya. Duha ka beses nga ginpalig-on sang anghel si Elias nga magkaon. Gani ang masunod nga paglakbay indi na “tama pa kalawig sa [iya].” (Basaha ang 1 Hari 19:5-8.) Huo, bisan antes pa si Jehova maghatag sing panuytoy, ginpamatian niya ang iya manalagna kag naghimo sing praktikal nga bulig para sa iya.

16, 17. Paano naton mailog ang pag-ulikid ni Jehova kay Elias?

¹⁶ Paano naton mailog ang aton mainulikdon nga Dios? Indi kita dapat magpadasudaso sa paghatag sing laygay. (Hulu. 18:13) Mas maayo kon magpakita kita anay sing empatiya sa mga nagahunahuna nga “indi [sila] tuman ka dungganon” bangod sang ila mga kahimtangan. (1 Cor. 12:23) Dayon mahibaluan naton kon ano gid ang iya kinahanglanon kag mabuligan naton sia.

¹⁷ Halimbawa, hunahunaa si Cynthia nga ginsambit kaina. Sia kag ang iya duha ka bata nga babayi ginbiyaan sang iya bana. Nasubuan gid sila. Paano sila ginbuligan sang pila ka Saksi? Nagsiling sia: “Sa tapos namon sila gintawgan parte sa natabo, ara na sila sa balay pagligad sang 45 minutos. Nagahibi sila. Wala nila kami ginhalinan sa una nga duha ukon tatlo ka adlaw. Bangod wala kami sing gana magkaon kag nasubuan gid, ginsapupo nila anay kami.” Ini nga eksperiensia nagapahanumdom sa aton sang ginsulat ni Santiago: “Kon ang isa ka utod nga lalaki ukon isa ka utod nga babayi hubo kag wala sing bastante nga kalan-on para sa amo nga adlaw, apang may isa sa inyo nga nagasiling sa ila: ‘Lakat kamo sa paghidait, magpainit-init kag magpakabusog,’ apang wala ninyo sila ginahatagan sang mga kinahanglanon para sa ila lawas, ano ang kapuslanan sini? Gani, amo man ang pagtuo, kon wala ini sing mga buhat, patay ini.” (Sant. 2:15-17) Bangod sa suno sa tion nga bulig sang mga kauturan, si Cynthia kag ang iya kabataan nakabaton sing kusog sa pag-alagad subong auxiliary payunir sing anom ka bulan sa tapos sang ila masubo nga eksperiensia.—2 Cor. 12:10.

18, 19. (a) Paano naton mabuligan ang mga temporaryo nga nagluya? (b) Sin-o ang nakabenepisyo kon buligan naton ang mga naluyahan?

¹⁸ Ayhan nahibaluan mo base sa imo eksperiensia nga madugay mag-ayo sa isa ka malubha nga balatian. Sing kaanggid, ang isa ka Cristiano nga nagluya bangod sang mga kabudlayan mahimo nagakinahanglan sing tion para magbalik ang iya espirituwal nga kabakod. Matuod, kinahanglan pabakuron sang aton masigkatumuluo ang iya pagtuo paagi sa personal nga pagtuon, pangamuyo, kag iban pa nga Cristianong hilikuton. Pero mapakita ayhan naton ang pagpailob tubtob mangin balanse sia liwat? Kag samtang nagabalik ang iya kusog, padayon bala nga mapakita naton ang gugma? Manikasog bala kita nga ipabatyag sa mga temporaryo nga nagluya nga may balor sila kag palangga naton sila?—2 Cor. 8:8.

¹⁹ Indi pagkalimti nga samtang ginabuligan naton ang aton kauturan, mabatyagan naton ang kalipay nga maeksperiensiahan lamang paagi sa paghatag. Mapalambo man naton ang ikasarang sa pagpakita sing kaluoy kag pagpailob. Isa pa, ang kongregasyon sa kabilugan nagauswag sa pagpalangga kag gugma. Labaw sa tanan, ginailog naton si Jehova, nga ginakabig nga hamili ang tagsa ka indibiduwal. Huo, may maayo gid kita nga mga rason sa pagtuman sa pagpalig-on nga “buligan ang mga maluya.”—Binu. 20:35.