ANG grupo sang pamatan-on nga mga Cristiano nagdesisyon nga magtan-aw sing sine. Nabalitaan nila nga madamo na sang ila mga katubotubo sa eskwelahan ang nanamian gid sini. Pag-abot nila sa sinehan nakita nila sa mga poster ang mabaskog nga mga armas kag ang daw halos wala na sing bayo nga mga babayi. Ano ang himuon nila? Masulod bala sila kag tan-awon ang pelikula?

Ini nga sitwasyon nagapakita nga nagaatubang kita sa madamo nga desisyon nga mahimo makapaayo ukon makahalit sa aton espirituwalidad kag sa aton kaangtanan kay Jehova. Kon kaisa, may gusto ka himuon, pero sang ginbinagbinag mo liwat ang imo sitwasyon, nagbag-o ang imo hunahuna. Ginapakita bala sini nga indi ka makadesisyon, ukon amo ini ang husto nga himuon?

Ang aton gugma kay Jehova nagpahulag sa aton nga idedikar ang aton kabuhi sa iya kag nagpabawtismo. Luyag gid naton nga magpabilin nga matutom sa Dios. Pero, ang aton kaaway nga si Satanas nga Yawa determinado sa pagbungkag sang aton integridad. (Bug. 12:17) Nagdesisyon kita nga alagaron si Jehova kag tumanon ang iya mga sugo. Makapasubo gid kon bag-uhon naton ang aton hunahuna parte sa aton dedikasyon kay Jehova! Nagadalahig ini sang aton kabuhi.

Sang nagligad nga sobra 26 ka siglo, si Hari Nabocodonosor sang Babilonia nagpatindog sing daku katama nga bulawan nga imahen kag nagmando sia nga ang tanan dapat magyaub sa sini kag magsimba. Ang bisan sin-o nga indi magtuman, ihaboy sa nagadabdab nga hurno. Ang tatlo ka mahinadlukon sa Dios nga mga sumilimba ni Jehova, nga sanday Sadrac, Mesac, kag Abednego, wala magtuman. Bangod wala sila nagyaub sa imahen, ginhaboy sila sa nagadabdab nga hurno. Ginluwas sila ni Jehova paagi sa milagro, pero handa nila nga irisgo ang ila kabuhi sangsa  ikompromiso ang ila desisyon nga alagaron ang Dios.—Dan. 3:1-27.

Sang ulihi, si manalagna Daniel nagpadayon sa pagpangamuyo, bisan pa ginapahog sia nga ihaboy sa lungib sang mga leon. Ginpadayon niya ang iya kinabatasan nga mangamuyo kay Jehova sing tatlo ka beses kada adlaw. Wala ginbag-o ni Daniel ang iya determinasyon nga simbahon ang matuod nga Dios. Gani, ang manalagna ginluwas “sa gahum sang mga leon.”—Dan. 6:1-27.

Ang mga alagad sang Dios subong nagatuman man sang ila dedikasyon sa iya. Sa isa ka eskwelahan sa Aprika, ang grupo sang mga estudyante nga mga Saksi ni Jehova nangindi nga mag-entra sa seremonya nga nagasimba sa isa ka simbulo sang pungsod. Ginpahog sila nga pahalinon sa eskwelahan kon indi sila mag-entra upod sa iban nga estudyante. Wala madugay pagkatapos sini, ang ministro sang edukasyon nagbisita sa banwa kag gin-istorya ang pila ka Saksi nga estudyante. Matinahuron pero wala sing kahadlok nga ginpaathag sang pamatan-on nga mga Saksi ang ila panindugan. Sugod sadto, wala na nag-utwas ini nga isyu. Ang pamatan-on nga mga kauturan makaeskwela na kag wala sila ginapilit nga ikompromiso ang ila kaangtanan kay Jehova.

Binagbinaga man si Joseph, nga ang iya asawa nagbalatian sing kanser kag napatay. Nahangpan kag ginarespeto sang pamilya ni Joseph ang iya mga desisyon parte sa lubong. Pero ang pamilya sang iya asawa wala sa kamatuoran, kag gusto nila himuon ang pila ka kinabatasan sa lubong, lakip ang mga ritwal nga wala nagapahamuot sa Dios. Si Joseph nagsiling: “Bangod indi ko gusto bag-uhon ang akon desisyon, gintinguhaan nila nga impluwensiahan ang akon kabataan, pero tanan sila nagpabilin nga malig-on. Ang amon mga paryente nagtinguha man nga maghiwat sing bilasyon sa amon balay, pero ginsilingan ko sila nga kon gusto gid nila, indi lang ini paghimuon sa amon balay. Nahibaluan nila nga ang bilasyon supak sa pagtuluuhan namon nga mag-asawa, gani sa tapos sang malawig nga diskusyon ginhiwat nila ini sa iban nga lugar.

“Sa sining mabudlay nga mga tion sang paglalaw, ginpangabay ko ang bulig ni Jehova agod indi malapas sang amon pamilya ang iya mga kasuguan. Ginpamatian niya ang akon mga pangamuyo kag ginbuligan kami nga magpabilin nga malig-on bisan pa sang mga pag-ipit.” Para kay Joseph kag sa iya mga kabataan, indi gid puede nga bag-uhon nila ang ila hunahuna.

Wala madugay pagkatapos sang Paskua sang 32 C.E., ang isa ka Sirofenicia nga babayi nagpalapit kay Jesucristo sa Sidon. Sulitsulit niya nga ginpangabay si Jesus nga paguaon ang demonyo sa iya anak nga babayi. Sang primero, wala gid sia ginsabat ni Jesus. Ginsilingan niya ang iya mga disipulo: “Wala ako ginpadala para kay bisan sin-o kundi para sa nadula nga mga karnero sang panimalay sang Israel.” Sang nagpamilit ang babayi, si Jesus nagsiling: “Indi husto nga kuhaon ang tinapay sang mga anak kag ihaboy sa gamay nga mga ido.” Bangod sang daku nga pagtuo, ang babayi nagsabat: “Huo, Ginuo; apang ang gamay nga mga ido nagakaon sang mga usik nga nagakahulog halin sa lamesa sang ila mga agalon.” Nagpasugot si Jesus sa pangabay sang babayi kag gin-ayo niya ang anak sini.—Mat. 15:21-28.

Sang ginhimo ini ni Jesus, gin-ilog niya si Jehova nga handa sa pagbag-o sang iya hunahuna kon kinahanglanon. Halimbawa, tuyo sang Dios nga laglagon ang mga Israelinhon sang naghimo sila sing bulawan nga baka, pero gintugutan niya si Moises nga pangabayon Sia nga bag-uhon ang Iya desisyon.—Ex. 32:7-14.

Gin-ilog ni apostol Pablo si Jehova kag si Jesus. May panahon nga nagbatyag si Pablo nga indi nagakaigo nga updon si Juan Marcos sa ila paglakbay subong misyonero kay ginbiyaan niya sanday Pablo kag Bernabe sa ila una nga paglakbay. Pero sang ulihi, maathag nga nakita ni Pablo nga nangin hamtong na si Marcos kag makabulig gid sia sa iya. Gani ginsilingan ni Pablo si Timoteo: “Upda si Marcos, kay makabulig sia sa akon sa pag-alagad.”—2 Tim. 4:11.

Kamusta kita? Samtang ginailog naton ang aton maluluy-on, mapinasensiahon, kag mahigugmaon nga Amay, mahimo may mga tion  nga nagakaigo nga bag-uhon naton ang aton hunahuna. Halimbawa, mahimo naton bag-uhon ang aton opinyon sa iban. Indi pareho kay Jehova kag kay Jesus, indi kita mga himpit. Kon sila handa nga magbag-o, indi bala nga mahimo man naton binagbinagon ang mga kahimtangan sang iban kag bag-uhon ang aton hunahuna?

Mahimo nga kinahanglan man naton bag-uhon ang aton hunahuna parte sa teokratiko nga mga tulumuron. Ang pila nga nagatuon sing Biblia kag nagatambong na sa mga miting mahimo nga wala pa nagapamensar nga magpabawtismo. Ukon ang iban nga utod mahimo nagaduhaduha sa pagpayunir, bisan pa ara na sila sa kahimtangan nga pasangkaron ang ila ministeryo sa sini nga paagi. Kag ang iban nga utod daw indi pa gusto magtinguha sing mga responsibilidad sa kongregasyon. (1 Tim. 3:1) Amo man bala sini ang imo nabatyagan? Si Jehova mahigugmaon nga nagaagda sa imo sa sini nga mga pribilehiyo. Kon amo, ngaa indi mo bag-uhon ang imo hunahuna kag magkalipay sa paghatag sang imo kaugalingon sa Dios kag sa iban?

Si Ella nagsiling parte sa iya pag-alagad sa sanga talatapan sang mga Saksi ni Jehova sa Aprika: “Pag-abot ko sa Bethel, wala ko kabalo kon bala magadugay ako diri. Handum ko nga alagaron sing bug-os-kalag si Jehova, pero suod gid ako sa akon pamilya. Sang primero, nahidlaw gid ako sa ila! Pero ginpalig-on ako sang kaupod ko sa kuarto, gani nagdesisyon ako nga magpabilin. Pagligad sang napulo ka tuig sa Bethel, nabatyagan ko nga gusto ko ipadayon tubtob posible ang akon pag-alagad sa akon mga kauturan paagi sa pagpabilin sa akon asaynment sa Bethel.”

Nadumduman mo bala ang natabo kay Cain sang nahisa sia sa iya utod kag nagsingkal ang iya kaakig? Ginsilingan sang Dios  ining akig nga tawo nga kahamut-an niya sia kon likawan niya ang paghimo sing malain. Ginlaygayan sang Dios si Cain nga kontrolon niya ang sala nga “nagapuut sa gawang.” Dapat kuntani bag-uhon ni Cain ang iya panimuot kag hunahuna, pero ginbalewala niya ang laygay sang Dios. Makapasubo nga ginpatay ni Cain ang iya utod kag nangin una nga tawo nga manugpatay!—Gen. 4:2-8.

Binagbinaga man si Hari Uzias. Sang primero, ginhimo niya ang matarong sa panulok ni Jehova kag may maayo nga kaangtanan sa Dios. Pero makapasubo nga ginguba ni Uzias ang iya maayo nga rekord bangod nangin bugalon gid sia. Bisan indi sia saserdote, nagsulod sia sa templo para maghalad sing incienso. Sang ginpaandaman sia sang mga saserdote nga indi paghimuon ining makahas nga buhat, ginbag-o bala niya ang iya hunahuna? Wala. Si Uzias “nagsingkal” kag ginbalewala niya ang ila paandam. Gani, ginpatubuan sia ni Jehova sing aro.—2 Cron. 26:3-5, 16-20.

Huo, may mga tion nga dapat gid naton bag-uhon ang aton hunahuna. Binagbinaga ini nga eksperiensia. Si Joachim nabawtismuhan sang 1955, pero sang 1978, na-disfellowship sia. Pagligad sang 20 ka tuig, nangin mahinulsulon sia kag nakapanumbalik subong isa sa mga Saksi ni Jehova. Sining karon lang, ginpamangkot sia sang isa ka gulang kon ngaa madugay pa antes sia nagdesisyon nga manumbalik. Si Joachim nagsabat: “Akig ako kag bugalon. Naghinulsol ako nga nagpadugay pa ako. Sang disfellowship ako, nahibaluan ko nga ginatudlo sang mga Saksi ni Jehova ang kamatuoran.” Kinahanglan niya bag-uhon ang iya panimuot kag maghinulsol.

Mahimo may mga sitwasyon nga kinahanglan naton bag-uhon ang aton hunahuna kag buhat. Kabay pa nga handa kita nga himuon ini para mahamuot sa aton si Jehova.—Sal. 34:8.