Nabasa mo bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:

Nagakaigo bala sa mga Cristiano ang cremation?

Desisyon na sang isa kon bala i-cremate ukon indi ang bangkay. Bisan pa wala sing direkta nga ginsiling ang Biblia parte sa sini, talalupangdon gid nga ang mga bangkay nanday Hari Saul kag Jonatan ginsunog kag dayon ginlubong. (1 Sam. 31:2, 8-13)—6/15, pahina 7.

Paano naton mapat-od nga wala ginapahanabo sang Dios ang malain nga mga butang?

Ang Dios matarong sa tanan niya nga dalanon. Makatarunganon sia, matutom, kag matadlong. Si Jehova mapinalanggaon man kag maluluy-on. (Deut. 32:4; Sal. 145:17; Sant. 5:11)—7/1, pahina 4.

Ano nga mga kabudlayan ang mahimo maatubang sa pagsaylo sa iban nga lugar para mag-alagad diin may mas daku nga kinahanglanon?

Ang tatlo ka kabudlayan amo ang (1) pagpasibu sa estilo sang pagkabuhi, (2) pag-atubang sa kahidlaw sa pamilya, kag (3) pagpakig-abyan sa lokal nga mga kauturan. Madamo sang nagmadinalag-on sa sini nga mga kabudlayan ang ginpakamaayo gid.—7/15, pahina 4-5.

Ngaa gindumtan si Jose sang iya mga utod?

Ang isa ka rason sini amo nga si Jacob nagpakita sing pinasahi nga pabor kay Jose, kay ginhatagan niya sia sing pinasahi nga bayo. Nahisa kay Jose ang iya mga utod kag ginbaligya sia subong ulipon.—8/1, pahina 11-13.

Ngaa ang bag-o nga mga tract epektibo gid kag mahapos gamiton?

Isa lang ang pormat sini tanan. Ang tagsa ka tract nagapahulag sa aton nga magbasa sang isa ka teksto kag magpautwas sing isa ka pamangkot sa tagbalay. Ano man ang iya sabat, mahimo naton ipakita sa iya sa sulod ang ginasiling sang Biblia. Mahimo man naton mapatalupangod ang isa ka pamangkot para sa pagduaw liwat.—8/15, pahina 13-14.

Ano ang Syriac Peshitta?

Ang Syriac, nga isa ka Aramaiko nga dialekto, lapnag nga gingamit sang ikaduha ukon ikatlo nga siglo C.E. Mahimo nga amo ini ang una nga lenguahe diin gin-translate ang mga bahin sang Cristianong Griegong Kasulatan. Ang Biblia nga Syriac gintawag sang ulihi nga Peshitta.—9/1, pahina 13-14.

Ano ang himuon sang Cristiano nga mga ginikanan para mabantayan ang ila kabataan?

Importante gid nga pamatian ang mga kabataan agod makilala sila. Panikasugi nga pakaunon sila sa espirituwal. Halimbawa, giyahi sila sing mahigugmaon kon daw nagaduhaduha sila sa pag-alagad kay Jehova.—9/15, pahina 18-21.

Sa paggahom sang Ginharian sang Dios, ano nga mga butang ang wala na?

Wala na ang problema sa panglawas, kamatayon, kakulang sing trabaho, inaway, kakulang sing pagkaon, kag kaimulon.—10/1, pahina 6-7.

Ano nga katipan sa Biblia ang nagatugot sa iban nga maggahom kaupod sang Cristo?

Pagkatapos sang katapusan nga panihapon sang Paskua upod sa mga apostoles, si Jesus naghimo sing katipan sa iya matutom nga mga disipulo nga matawag nga katipan para sa Ginharian. (Luc. 22:28-30) Nagagarantiya ini nga magagahom sila sa langit kaupod ni Jesus.—10/15, pahina 16-17.

Maghatag sing duha ka halimbawa sa Biblia nga nagapakita nga matuod si Satanas.

Ang Kasulatan nagasiling nga si Satanas nagpakighambal kay Jesus para sulayon sia. Sang panahon ni Job, si Satanas nagpakighambal man sa Dios. Ginapakita sini nga mga rekord nga matuod nga persona si Satanas.—11/1, pahina 4-5.

Suno sa Binuhatan 15:14, sin-o ang “katawhan para sa iya ngalan” nga ginsiling ni Santiago?

Sila amo ang mga Judiyo kag indi Judiyo nga mga tumuluo nga ginpili sang Dios nga mangin pinili nga rasa para “mapahayag . . . sing lapnag ang pagkahalangdon” sang Isa nga nagtawag sa ila. (1 Ped. 2:9, 10)—11/15, pahina 24-25.

Diin ang Timgad, kag ano ang panimuot sang pila ka tawo didto?

Ang Timgad isa anay ka daku nga siudad sang Roma sa Aminhan nga Aprika (Algeria karon). Para mapakita kon ano ang ginapatihan sang pila ka tawo didto, ang isa ka nakutkutan nga inskripsion nagsiling: “Pagpangayam, Pagpaligo, Paghampang, Pagkadlaw—Amo Ina ang Kabuhi!” Pareho gid ini sa pagtamod nga ginsambit sa 1 Corinto 15:32.—12/1, pahina 8-10.