1, 2. Ano ang gusto sang Dios sa iya mga sumilimba, pamatan-on man ukon indi?

PAMATAN-ON ka bala? Kon amo, saligi nga ginaapresyar ka gid subong bahin sang bug-os kalibutan nga kongregasyon ni Jehova. Sa madamo nga pungsod, mga pamatan-on ang kalabanan nga nagapabawtismo. Makapalig-on gid makita ang tuman kadamo nga pamatan-on nga nagdesisyon sa pag-alagad kay Jehova!

² Subong pamatan-on, nalipay ka bala nga makig-upod sa iban nga pamatan-on? Mahimo nga nalipay ka gid. Lain gid ang kalipay kon kaupod naton ang aton mga katubotubo. Pero pamatan-on man kita ukon indi kag bisan ano man ang aton ginhalinan, gusto sang Dios nga mahiusa kita sa pagsimba sa iya. Si apostol Pablo nagsulat nga kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” (1 Tim. 2:3, 4) Sa Bugna 7:9, ginlaragway ang mga sumilimba sang Dios nga naghalin sa “tanan nga pungsod kag tribo kag katawhan kag hambal.”

3, 4. (a) Ano nga espiritu ang lapnag sa madamo nga pamatan-on subong? (b) Ano nga panimuot ang nagahisanto sa Efeso 4:25?

³ Daku gid ang kinatuhayan sang pamatan-on nga mga alagad  ni Jehova sa mga pamatan-on sini nga kalibutan! Madamo sang mga wala nagaalagad kay Jehova ang nangin maiyaiyahon, nga ginahunahuna lamang kon ano ang ila gusto. Gintawag sila sang pila ka researcher nga “Ako Anay nga Henerasyon.” Sa ila panghambal kag pamayo, ginapakita nila nga wala nila ginarespeto ang iban, labi na ang mga mas may edad sa ila.

⁴ Ini nga espiritu makita bisan diin. Gani, ang pamatan-on nga mga alagad ni Jehova kinahanglan gid manikasog para malikawan ini kag batunon ang pagtamod sang Dios. Bisan sang unang siglo, nakita ni Pablo nga kinahanglan niya palig-unon ang iya masigkatumuluo nga likawan “ang espiritu nga nagapanghikot karon sa mga anak sang pagkadimatinumanon” nga “ginlaktan [nila] sadto.” (Basaha ang Efeso 2:1-3.) Ang mga pamatan-on nga nakahangop nga kinahanglan nila likawan ina nga espiritu kag nagapanghikot sing nahiusa upod sa tanan nila nga kauturan dapat gid hatagan sing komendasyon. Ina nga panimuot nagahisanto sa ginsiling ni Pablo nga “mga bahin kita nga natungod sa isa kag isa.” (Efe. 4:25) Samtang nagahilapit na kita sa katapusan sining daan nga kalibutan, kinahanglan pa gid naton manghikot sing nahiusa. Binagbinagon naton ang pila ka halimbawa sa Biblia nga makabulig sa aton nga mahangpan nga kinahanglan kita magpabilin nga magkaupod ukon nahiusa.

5, 6. Ano nga leksion parte sa pagpabilin nga magkaupod ang maathag nga ginpakita sa kasaysayan ni Lot kag sang iya mga anak?

⁵ Sang una, nahamuot si Jehova sa pag-amlig sa iya katawhan sang nahiusa sila nga nagbuligay sa pag-atubang sang mga kabudlayan. Ang mga alagad sang Dios karon, pamatan-on man ukon tigulang, makatuon sa mga halimbawa sa Biblia. Ang isa sini parte kay Lot.

⁶ Si Lot kag ang iya pamilya yara sa mabudlay nga kahimtangan bangod laglagon ang Sodoma, ang siudad nga ila ginaistaran. Ginhambalan si Lot sang anghel sang Dios nga maghalin kag magkadto sa mga kabukiran para maluwas, nga nagasiling: “Palagyo tungud sang inyo kabuhi!” (Gen. 19:12-22) Nagtuman si Lot, kag nagsunod sa iya ang iya duha ka anak nga babayi sa pagbiya sa siudad. Makapasubo nga ang iban nga suod sa ila wala nagtuman. Para sa bataon nga mga lalaki nga magapangasawa sa iya mga anak, ang mas may edad sa ila nga si Lot ‘daw nagalahog’ lamang. Gani, nalaglag sila. (Gen. 19:14) Si Lot lamang kag ang iya mga anak nga nag-upod sa iya ang naluwas.

7. Paano ginbuligan ni Jehova ang mga nagpakita sing paghiusa sang nagbiya ang mga Israelinhon sa Egipto?

⁷ Binagbinaga ang isa pa ka halimbawa. Sang nagbiya ang mga Israelinhon sa Egipto, wala sila naggrupogrupo, nga ang kada grupo makapagusto kon diin sila maagi. Kag sang “gin-untay ni Moises ang iya kamut sa ibabaw sang dagat” kag ginpihak ini ni Jehova, wala sia magtabok sa sini nga isahanon ukon nag-upod lamang sing pila ka Israelinhon. Sa baylo, paagi sa proteksion ni Jehova, nagtabok ang bilog nga pungsod. (Ex. 14:21, 22, 29, 30) Ginpakita nila ang paghiusa, kag nag-upod sa ila ang “isa ka nagasalakut nga kadam-an” nga mga indi Israelinhon nga nagdampig sa ila. (Ex. 12:38) Kabuangan gid kon ang pila ka indibiduwal, ayhan grupo sang mga pamatan-on, magpagusto kag magpili sing dalan nga para sa ila amo ang pinakamaayo. Ang maghimo sini indi gid pag-amligan ni Jehova.—1 Cor. 10:1.

8. Sang panahon ni Jehosapat, paano ginpakita sang katawhan sang Dios ang paghiusa?

⁸ Sang panahon ni Hari Jehosapat, ang katawhan sang Dios may makusog nga kaaway, nga isa ka “daku nga kadam-an” halin sa mga lugar sa ila palibot. (2 Cron. 20:1, 2) Maayo gid kay wala gintinguhaan sang mga alagad sang Dios nga lutuson ang kaaway paagi lamang sa ila kusog. Sa baylo, nagdangop sila kay Jehova. (Basaha ang 2 Cronica 20:3, 4.) Wala sila nangita sang ila kaugalingon nga  solusyon, kundi nagtipon sila sing tingob. Ang Biblia nagsiling: “Ang bug-os nga Juda nagtindug sa atubangan sang GINOO, upud sang ila mga magamay, sang ila mga asawa, kag sang ila mga anak.” (2 Cron. 20:13) Ang tanan, pamatan-on man ukon tigulang, nagsalig kay Jehova kag nagtuman sang iya paggiya, kag gin-amligan sila ni Jehova batok sa ila kaaway. (2 Cron. 20:20-27) Indi bala nga maayo gid ini nga halimbawa kon paano atubangon ang mga kabudlayan subong katawhan sang Dios?

9. Ano ang matun-an naton parte sa paghiusa base sa mga ginhimo kag panimuot sang mga Cristiano sang una?

⁹ Ang mga Cristiano sang una magkaupod man nga nagpanghikot. Halimbawa, sang nangin Cristiano ang madamo nga Judiyo kag mga proselita, “nagpadayon sila sa paghugod sa panudlo sang mga apostoles kag sa pagpaambitay, sa pagkaon sing tingob kag sa mga pangamuyo.” (Binu. 2:42) Ini nga paghiusa nakita gid sang ginhingabot sila, sang kinahanglan gid nila ang isa kag isa. (Binu. 4:23, 24) Indi bala nga sa panahon sang paghingabot, kinahanglan gid nga magpanghikot kita nga magkaupod?

10. San-o importante gid ang paghiusa?

¹⁰ Ang isa sa pinakamadulom nga tion sa kasaysayan sang tawo malapit na. Ginlaragway ini ni manalagna Joel subong “adlaw sang kadudulman kag kasubo.” (Joel 2:1, 2; Sof. 1:14) Para sa katawhan sang Dios, tion ini sang paghiusa. Dumduma ang ginsiling ni Jesus: “Ang tagsa ka ginharian nga nabahinbahin mahapay.”—Mat. 12:25.

11. Ano nga pagpaanggid sa Salmo 122:3, 4 ang maaplikar sang katawhan sang Dios karon? (Tan-awa ang piktyur sa umpisa sini nga artikulo.)

¹¹ Sa tion sang nagahilapit nga kagamo sa sini nga sistema, dapat nga nahiusa gid kita. Ang espirituwal nga paghiusa nga kinahanglan naton ipakita mapaanggid sa kon paano gintukod ang mga balay sa Jerusalem sang una. Gintukod ini nga nagatuparay, amo nga ginlaragway sang salmista ang Jerusalem subong “banwa nga nabilog sing tingub.” Paagi sini, mahimo mabuligan kag maamligan sang mga pumuluyo ang kada isa. Luwas sini, ang ila paglapitanay mahimo nga nagarepresentar gid sa espirituwal nga paghiusa sang bug-os nga pungsod sa tion nga ang tanan nga “kabikahan sang GINOO” nagatipon sa pagsimba. (Basaha ang Salmo 122:3, 4.) Sa karon kag sa mabudlay nga mga kahimtangan sa ulihi, dapat man kita magpabilin nga “nabilog sing tingub,” ukon nahiusa.

12. Ano ang makabulig sa aton para maluwas sa nagahilapit nga pagsalakay sa katawhan sang Dios?

¹² Ngaa importante gid ang aton paghiusa sa sina nga tion? Gintagna sang Ezequiel kapitulo 38 ang pagsalakay ni “Gog, sa duta sang Magog” batok sa katawhan sang Dios. Indi ina ang tion nga tugutan ang bisan ano nga magabahinbahin sa aton. Indi gid naton gusto nga magsalig sa kalibutan. Sa baylo, gusto naton nga makaupod gid ang aton mga kauturan. Matuod, indi kita maluwas bangod lamang bahin kita sang grupo. Si Jehova kag ang iya Anak magaluwas sa mga magatawag sa ngalan ni Jehova sa sinang mabudlay nga mga tion. (Joel 2:32; Mat. 28:20) Pero sa gihapon, dapat kita magpabilin nga nahiusa subong bahin sang panong sang Dios. Sa banta mo, luwason ayhan ni Jehova ang mga nagpalayo sa panong?—Miq. 2:12.

13. Ano nga mga leksion ang matun-an sang mahinadlukon sa Dios nga mga pamatan-on sa aton ginbinagbinag?

¹³ Gani, indi gid maalamon nga sundon ang pamaagi sang mga pamatan-on nga nagpain kag naghimo sang ila kaugalingon nga kalibutan. Malapit na kita katama sa tion nga kinahanglan gid naton ang isa kag isa, pamatan-on man kita ukon indi! Huo, karon na ang tion nga manghikot sing magkaupod, nga nagapalambo sang paghiusa nga importante gid sa magaabot nga mga tion.

14, 15. (a) Ngaa ginahanas ni Jehova karon ang mga pamatan-on kag mga tigulang? (b) Ano ang laygay ni Jehova nga makapalig-on sa aton nga maghiusa?

¹⁴ Si Jehova nagabulig sa aton nga makaalagad sa iya nga may “paghilisugut.” (Sof. 3:8, 9) Ginahanas niya kita nga mangin bahin sang iya dayon nga katuyuan. Ano ang nalakip sa sini? Katuyuan niya nga “tipunon liwat ang tanan nga butang kay Cristo.” (Basaha ang Efeso 1:9, 10.) Huo, gusto niya nga mahiusa ang tanan nga tinuga sa bilog nga uniberso, kag magamadinalag-on sia sa paghimo sini. Subong pamatan-on, indi bala makabulig ini sa imo nga makita nga kinahanglan mo magpanghikot sing nahiusa sa organisasyon ni Jehova?

¹⁵ Ginatudluan kita ni Jehova para matigayon ang paghiusa karon, kay gusto niya nga mahiusa kita sing walay katapusan. Sulitsulit nga ginasugid sa aton sang Kasulatan nga dapat kita “may pag-ulikid sa isa kag isa,” may “mapinalanggaon nga balatyagon sa isa kag isa,” ‘padayon nga lugpayan ang isa kag isa,’ kag ‘palig-unon ang isa kag isa.’ (1 Cor. 12:25; Roma 12:10; 1 Tes. 4:18; 5:11) Nahibaluan ni Jehova nga indi himpit ang mga Cristiano, kag bangod sini mahimo mabudlay ang paghiusa, gani kinahanglan nga manikasog kita nga ‘magpatawad sing kinabubut-on sa isa kag isa.’—Efe. 4:32.

16, 17. (a) Ano ang isa ka katuyuan sang mga miting? (b) Ano ang matun-an sang mga pamatan-on sa halimbawa ni Jesus?

¹⁶ Si Jehova nagaaman man sa aton sing Cristianong mga miting para buligan kita nga magpabilin nga magkaupod. Masami naton mabasa ang pagpalig-on sa Hebreo 10:24, 25. Ang isa ka katuyuan sini nga mga miting amo nga para ‘mahunahuna naton ang isa kag isa agod pahulagon sa gugma kag sa maayong mga buhat.’ Pero talalupangdon nga gin-aman ang mga miting agod ‘makapalig-unay kita sa isa kag isa, kag labi na gid samtang nakita naton nga malapit na ang adlaw.’

¹⁷ Subong pamatan-on, nangin maayo nga halimbawa si Jesus sa pag-apresyar sini nga kahimusan. Sang 12 anyos sia, kaupod niya ang iya mga ginikanan sa isa ka daku nga espirituwal nga pagtilipon. Isa ka bes, nadula sia pero indi bangod nag-upod sia sa iban nga kabataan. Sa baylo, nasapwan sia nanday Jose kag Maria nga nagapakigbahin sa espirituwal nga paghambalanay sang mga manunudlo sa templo.—Luc. 2:45-47.

18. Paano ang aton mga pangamuyo makabulig para sa paghiusa?

¹⁸ Luwas sa pagpalambo sang gugma sa  isa kag isa kag pagtambong sa mga miting para pabakuron ang paghiusa, mahimo man naton ipangamuyo ang isa kag isa. Kon espesipiko kita sa aton mga pangabay kay Jehova para sa aton mga kauturan, nagapahanumdom ini sa aton nga ginaulikdan naton ang isa kag isa. Indi lamang ini buluhaton sang adulto nga mga Cristiano. Kon pamatan-on ka, ginakalitan mo bala ini nga mga kahigayunan para makapalambo sing suod nga kaangtanan sa imo espirituwal nga pamilya? Ang paghimo sini makabulig sa imo para mapat-od nga indi ka bahin sining daan nga kalibutan kon laglagon na ini.

19-21. (a) Sa anong talalupangdon nga paagi ginapakita naton nga “mga bahin kita nga natungod sa isa kag isa”? Maghatag sing mga halimbawa. (b) Ano nga leksion ang imo matun-an parte sa pagbulig sang pila ka kauturan sa tion sang mga kalamidad?

¹⁹ Ang katawhan ni Jehova nagakabuhi nahisuno sa prinsipio sa Roma 12:5: “Mga bahin [kita] nga ang kada isa natungod sa isa kag isa.” Makita naton ang pamatuod sini kon may mga kalamidad. Sang Disiembre 2011, ginbaha ang Mindanao sa Pilipinas bangod sang bagyo. Sa isa ka gab-i, sobra sa 40,000 ka balay ang nabahaan, lakip ang madamo nga balay sang aton mga kauturan. Pero, ang sanga talatapan nagreport nga “antes pa nagpanghikot ang mga relief committee, ang mga kauturan halin sa iban nga lugar nagpadala na sing bulig.”

²⁰ Sing kaanggid, sang natabo ang mabaskog nga linog sa nasidlangan nga Japan nga nagresulta sing tsunami, madamo nga kauturan ang grabe nga nahalitan. Ang pila halos wala gid sing nabilin sa ila pagkabutang. Si Yoshiko, nga nagaistar sing mga 40 kilometros halin sa Kingdom Hall, nadulaan sing balay. Nagsiling sia: “Sang ulihi, nakibot kami sang nahibaluan namon pagkaaga sa tapos sang linog nga ginapangita kami sang manugtatap sang sirkito kag sang isa pa ka utod.” Nagayuhum gid sia nga nagsiling pa: “Ginaapresyar gid namon nga ginahatag sing bugana ang amon espirituwal nga mga kinahanglanon paagi sa kongregasyon. Luwas sina, nakabaton kami sing mga coat, sapatos, bag, kag mga padyama.” Ang miembro sang relief committee nagsiling: “Ang mga kauturan sa bilog nga Japan naghiusa, nga nagatinguha sa pagbulig sa isa kag isa. May nag-abot pa gani nga mga utod halin sa Estados Unidos para magbulig. Sang ginpamangkot sila kon ngaa nagkadto sila bisan malayo ang ila ginhalinan, nagsiling sila, ‘Nahiusa kami sa amon mga utod sa Japan, kag kinahanglan nila ang bulig.’” Ginapabugal mo bala nga bahin ka sang isa ka organisasyon nga nagaulikid gid sa mga miembro sini? Makasalig ka nga nalipay gid si Jehova nga makita ini nga paghiusa.

²¹ Kon amo sini ang aton panimuot subong, mabuligan kita nga atubangon ang mga kabudlayan sa ulihi nga may paghiusa bisan pa indi kita makakomunikar sa aton mga utod sa pila ka lugar sa kalibutan. Ang matuod, ini nga panimuot nagahanas sa aton para sa mga kabudlayan nga mahimo gid naton maatubang samtang nagakapukan ining daan nga sistema. Si Fumiko, nga biktima sang bagyo sa Japan, nagsiling: “Malapit na gid ang katapusan. Dapat naton padayon nga buligan ang aton mga masigkatumuluo samtang ginapaabot naton ang tion nga wala na sing mga kalamidad.”

22. Ano ang dayon nga benepisyo sang Cristiano nga paghiusa?

²² Ang mga pamatan-on kag tigulang nga nagatinguha nga maghiusa karon nagahanda na para maluwas sa katapusan sining malaut kag wala sing paghiusa nga kalibutan. Pareho sang una, luwason sang aton Dios ang iya katawhan. (Isa. 52:9, 10) Dumduma pirme nga mahimo ka malakip sa mga maluwas kon panikasugan mo nga mangin bahin sang nahiusa nga katawhan sang Dios. Ang isa pa nga makabulig amo ang dugang nga apresasyon sa mga butang nga nabaton na naton. Binagbinagon ini sa masunod nga artikulo.