SANG 1870, may gamay nga grupo sa Pittsburgh (Allegheny), Pennsylvania, U.S.A., nga nagsugod sa pagtuon sang Kasulatan. Ginpangunahan sila ni Charles Taze Russell sa pagtuon parte sa gawad sang Cristo, kag sang ulihi nahangpan nila nga may daku ini nga papel sa katuyuan ni Jehova. Nalipay gid sila sa paghibalo nga bangod sa gawad matigayon ang kaluwasan, bisan sang mga wala pa nakabati parte kay Jesus! Nagpasalamat gid sila kag napahulag nga saulugon ang kamatayon ni Jesus kada tuig bilang pagdumdom sa iya.—1 Cor. 11:23-26.

Si Utod Russell nagbalhag sang Zion’s Watch Tower, nga nagsakdag sa panudlo parte sa gawad subong panguna nga ekspresyon sang gugma sang Dios. Ang Watch Tower nagsiling nga ang Memoryal sang kamatayon sang Cristo “hamili gid nga panag-on” kag ginpalig-on ang mga bumalasa nga saulugon ini sing pribado sa Pittsburgh ukon sa iban nga lugar. “Bisan pa duha ukon tatlo lang ang may pareho sing hamili nga pagtuo”—ukon isa lang—kinahanglan nila “mabatyagan nga kaupod nila ang Ginuo.”

Kada tuig, nagadamo ang nagkadto sa Pittsburgh para sa Memoryal. “Nalipay gid kami sa pag-abiabi sa inyo,” ang mabasa sa imbitasyon. Ginpadayon kag ginpakaon sang lokal nga mga Estudyante sang Biblia ang ila espirituwal nga mga kauturan. Sang 1886, ginhiwat ang “Daku nga Pagtilipon” sa sulod sang pila ka adlaw sa panag-on sang Memoryal. “Kari kamo,” palig-on sang Watch Tower, “upod ang inyo tagipusuon nga nagaawas sa gugma para sa Agalon kag sa iya mga kauturan kag sa iya kamatuoran.”

Sa sulod sang pila ka tuig, ang mga Estudyante sang Biblia sa Pittsburgh nag-organisar sing mga pagtilipon para sa mga nagatuo sa gawad nga nagkadto para sa Memoryal. Samtang nagadamo ang mga Estudyante sang Biblia, nagadamo man ang nagatambong sa Memoryal sa bilog nga kalibutan. Si Ray Bopp sang Chicago ecclesia (kongregasyon) nagsiling nga sang katuigan 1910, inoras ang pagpasa sang mga emblema sa ginatos ka tumalambong kay halos tanan nagaambit.

Ano ang gingamit nga mga emblema? Bisan pa nahibaluan nga si Jesus naggamit sing alak sang Panihapon sang Ginuo, sa pila ka tion ang Watch Tower nagrekomendar nga maggamit sing duga sang preska nga ubas ukon sabaw sang ginluto nga pasas, agod indi masulay ang mga “maluya sa unod.” Pero, may alak man para sa mga nagabatyag nga “nagakaigo gid maggamit sing ginpaaslom nga alak.” Sang ulihi nahangpan sang mga Estudyante sang Biblia nga ang wala sing simbog nga pula nga alak amo ang nagakaigo nga simbulo sang dugo ni Jesus.

Ang pagdumdom sa kamatayon ni Jesus naghatag sing kahigayunan para magpamalandong. Pero sa pila ka kongregasyon, tuman kasubo sang mga kauturan, kag pagkatapos sang programa, nagpauli ang  tanan nga wala na nagaistoryahanay. Apang ang libro nga Jehovah sang 1934, nagsiling nga ang Memoryal indi dapat pagsaulugon sing “masinulub-on” bangod sa masakit nga kamatayon ni Jesus, kundi sing “malipayon” bangod sa iya paggahom subong Hari sugod sang 1914.

Sang 1935, may daku nga pagbag-o nga nakaapektar sa pagsaulog sang Memoryal. Sa sini nga tion gin-athag ang kahulugan sang “daku nga kadam-an” sa Bugna 7:9. Antes sini, ginkabig sang mga alagad ni Jehova ini nga grupo subong dedikado nga mga Cristiano nga indi gawa makugi. Karon ining daku nga kadam-an ginkilala subong matutom nga mga sumilimba nga may paglaum nga mabuhi sa paraiso sa duta. Pagkatapos sini nga paathag, ginbinagbinag ini sing maid-id ni Russell Poggensee kag nagsiling sia: “Ang langitnon nga paglaum wala ginpukaw ni Jehova sa akon paagi sa iya balaan nga espiritu.” Si Utod Poggensee—kag ang madamo nga mainunungon pareho sa iya—nag-untat sa pag-ambit sa mga emblema pero nagpadayon sila sa pagtambong sa Memoryal.

Sa sining “hamili gid nga panag-on,” ang pinasahi nga mga kampanya sa pagbantala nagahatag sa tanan sing maayo nga kahigayunan nga mapakita ang apresasyon sa gawad. Ang Bulletin sang 1932 nagpalig-on sa mga Cristiano nga indi mangin “mga santo sa Memoryal,” nga mga umalambit pero wala nagabantala sang mensahe sang kamatuoran. Sang 1934, nagpanawagan ang Bulletin sing “mga auxiliary,” nga nagapamangkot: “May 1,000 bala nga makaaplay sa panag-on sang Memoryal?” Parte sa mga hinaplas, ang Informant nagkomento: “Ang ila kalipay mabug-os lamang paagi sa pagpakigbahin sa pagpanaksi sang Ginharian.” Sang ulihi, amo man sini ang nabatyagan sang mga may dutan-on nga paglaum. *

Para sa tanan nga katawhan ni Jehova, ang Memoryal amo ang labing sagrado nga gab-i sang tuig. Ginasaulog nila ini bisan mabudlay gid ang mga kahimtangan. Sang 1930, si Pearl English kag ang iya utod nga babayi nga si Ora, naglakat sing mga 80 ka kilometro para magtambong sa Memoryal. Samtang nabartolina sa prisuhan sa China, ang misyonero nga si Harold King nagsulat sing mga binalaybay kag mga ambahanon parte sa Memoryal kag naghimo sing mga emblema nga human sa mga pasas kag bugas. Halin sa Sidlangan nga Europa asta sa Sentral nga Amerika pakadto sa Aprika, maisugon nga ginsaulog sang mga Cristiano ang kamatayon ni Jesus bisan pa sa tion sang inaway ukon pagdumili. Sa diin man kita ukon ano man ang aton kahimtangan, nagatipon kita sing tingob para padunggan si Jehova nga Dios kag si Jesucristo sa hamili nga panag-on sang Memoryal.