SANG singko anyos kami ni Gwen, nagtuon kami sing saot. Wala pa kami nagkilalahay sadto. Pero samtang nagadaku kami, luyag gid namon nga mangin ballet dancer. Sang nalab-ot na namon ang amon handum kag nangin bantog na, ginbayaan namon ini tanan. Ngaa?

David: Natawo ako sang 1945 sa Shropshire, Inglaterra. May uma si Tatay sa malinong nga kaumhan. Sa tapos sang klase, nanamian ako sa pagpamubod sang mga manok kag pagpanguha sang mga itlog sini. Nagaatipan man ako sang mga baka kag mga karnero. Kon sira-klase naman, nagabulig ako sa pagpangani, kag kon kaisa nagadrayb ako sang amon mga traktora.

Apang, nangin interesado ako sa isa pa ka butang. Natalupangdan ni Tatay nga sang bata pa ako, kon makabati gani ako sang musika nagasaot ako dayon. Gani sang singko anyos ako, ginhambalan niya si Nanay nga dalhon ako sa isa ka eskwelahan sa amon lugar para magtuon sing tap dancing. Nagsiling ang akon maestro nga may potensial ako nga mangin ballet dancer kag ginhanas man niya ako sa sini. Sang 15 anyos ako, nangin iskolar ako sa bantog nga Royal Ballet School sa London. Diri ko nakilala si Gwen, kag kami ang partner sa saot.

Gwen: Natawo ako sa isa ka masako nga siudad sang London sang 1944. Sang bata pa ako, may pagtuo na ako sa Dios. Ginbasa ko ang Biblia, pero nabudlayan ako sa paghangop sini. Antes sini, sang singko anyos pa lang ako, ginpatuon ako sing saot. Pagligad sang anom ka tuig, nagdaug ako sa isa ka kompetisyon sa bilog nga Britanya, kag bilang premyo paeskwelahon ako sa The Royal Ballet School. Didto ini sa White Lodge, nga isa ka matahom nga mansion sa Richmond Park sa gua sang London. Nag-eskwela ako didto kag ginhanas sa pagsaot sing baley sang kilala nga mga manunudlo. Sang 16 anyos ako, nag-eskwela ako sa The Royal Ballet School sa sentro na sang London, kag didto ko nakilala si David. Sa sulod sang pila ka bulan, updanay kami nga nagsaot sing baley sa mga opera sa Royal Opera House sa Covent Garden, sa London.

David: Subong sang ginsiling ni Gwen, bangod sang amon propesyon nakasaot kami sa bantog nga Royal Opera House kag sa London Festival Ballet (karon amo ang English National Ballet). Ang isa sa mga choreographer sang Royal Ballet nagtukod sang internasyonal nga kompanya sa Wuppertal, Germany, kag ginpili kami nga duha nga mangin panguna nga manugsaot. Sa sini nga tion, nagsaot kami sa mga teatro sa bug-os nga kalibutan, kag nakaupod namon sa pagsaot ang bantog nga mga tawo subong nanday Dame Margot Fonteyn kag Rudolf Nureyev. Mapabugal gid ini nga sahi sang kabuhi, gani dedikado gid kami sa amon propesyon.

 Gwen: Dedikado gid ako sa pagsaot. Pareho kami ni David nga gusto gid magmadinalag-on. Nanamian ako magpirma sing mga autograph, magbaton sing mga bulak, kag mamati sa mga palakpak sang tumalan-aw. Sa teatro, napalibutan ako sang grabe nga imoralidad, pagpanigarilyo, kag pag-inom. Pareho sa iban, nagsalig man ako sa akon mga pangpasuerte.

David: Sa tapos sang madugay nga pagsaot, ginkapoy ako sang pirme nga pagbiyahe. Bangod nagdaku ako sa uma, ginhidlaw ako sa mas simple nga kabuhi. Gani sang 1967, gin-untatan ko ang pagsaot kag nagtrabaho sa isa ka malapad nga uma malapit sa balay sang akon mga ginikanan. Ginpaarkilahan sa akon sang mangunguma ang isa ka gamay nga balay. Dayon gintawgan ko sa telepono si Gwen nga yara sa teatro kag ginhagad nga mapakasal kami. Nangin solo na sia nga manugsaot kag manami ang dalagan sang iya propesyon, gani nabudlayan sia sa pagdesisyon. Pero nagpasugot sia nga magpakasal kami kag nag-upod sia sa akon sa uma bisan pa wala sia naanad sa sini nga kabuhi.

Gwen: Nabudlayan ako sa pangabuhi sa uma. Ang paggatas sa mga baka, pagbahog sa mga baboy, kag pagpamubod sa mga manok sa bisan ano nga tiempo tuhay gid sa akon gindak-an. Nag-eskwela si David sing siam ka bulan parte sa pagpanguma para mahibaluan ang moderno nga mga pamaagi. Nasubuan ako sa bilog nga adlaw kay gab-i na sia nagaabot. Sa sini nga tion, natawo ang amon subang nga bata nga si Gilly. Ginhambalan ako ni David nga magtuon sa pagmaneho, kag isa ka adlaw sang nagkadto ako sa banwa, nakita ko si Gael, nga nakilala ko sang nagtrabaho sia sa isa ka balaligyaan sa amon lugar.

Ginhagad ako ni Gael nga mag-inom sing tsa sa ila balay. Gintan-aw namon ang ila mga retrato sa kasal, kag nakita ko ang retrato sang isa ka grupo sa gua sang Kingdom Hall. Ginpamangkot ko sia kon ano ini nga simbahan. Sang ginsugiran niya ako nga mga Saksi ni Jehova sila sang iya bana, nalipay ako. Nadumduman ko nga may tiya ako nga Saksi. Pero, nadumduman ko man nga naugot kag akig si Tatay sa iya, kag ginahaboy ni Tatay ang iya mga literatura sa basurahan. Mainabyanon gid nga tawo si Tatay, gani natingala ako kon ngaa akig gid sia sa akon tiya kay mabuot man sia.

May kahigayunan na gid man ako nga mahibaluan kon ngaa ang pagtuluuhan sang akon tiya tuhay sa ginatudlo sang simbahan. Ginpakita sa akon ni Gael kon ano gid ang ginatudlo sang Biblia. Nakibot ako sang mahibaluan ko nga ang madamo nga doktrina, pareho sang Trinidad kag pagkadimamalatyon sang  kalag, supak sa Kasulatan. (Man. 9:5, 10; Juan 14:28; 17:3) Subong ko pa lang nakita sa Biblia ang ngalan sang Dios nga Jehova.—Ex. 6:3.

David: Ginsugiran ako ni Gwen sang iya ginatun-an. Nadumduman ko ang ginsiling ni Tatay sang bata pa ako nga dapat ko basahon ang Maayo nga Libro. Gani nagpasugot kami ni Gwen nga magtuon sa Biblia upod kay Gael kag sa iya bana nga si Derrick. Pagligad sang anom ka bulan, nagsaylo kami sa Oswestry, nga sakop man sang Shropshire, bangod nakaarkila kami didto sang gamay nga uma. Mapailubon nga ginpadayon sang isa ka Saksi didto nga si Deirdre ang pagtuon sa Biblia sa amon. Sang primero, mahinay ang amon pag-uswag. Masako kami sa pag-atipan sang amon kasapatan. Pero amat-amat nga nanggamot ang kamatuoran sa amon tagipusuon.

Gwen: Ang daku nga balagbag nga kinahanglan ko landason amo ang disparatis. Ang Isaias 65:11 nakabulig sa akon nga mahangpan ang pagtamod ni Jehova “sa mga nagahanda sing lamesa para sa dios sang Suerte.” Nagakinahanglan pa sing malawig nga tion kag pangamuyo para mahaboy ko ang tanan ko nga pangpasuerte kag anting-anting. Bangod natun-an ko nga “ang nagapakataas sang iya kaugalingon paubson, kag ang nagapaubos sang iya kaugalingon pakataason,” narealisar ko kon ano nga sahi sang tawo ang ginakahamut-an ni Jehova. (Mat. 23:12) Gusto ko alagaron ang Dios nga nagaulikid gid sa aton kag naghatag sang iya pinalangga nga Anak subong gawad. Sa sini nga tion duha na ang amon bata, kag nalipay kami sa paghibalo nga mahimo kami mabuhi sing wala katapusan sa paraiso nga duta.

David: Sang nahangpan ko ang talalupangdon nga katumanan sang mga tagna sang Biblia, pareho sang mabasa sa Mateo kapitulo 24 kag sa libro sang Daniel, nakumbinsi ako nga amo ini ang kamatuoran. Nahangpan ko nga wala sa sini nga sistema sang mga butang ang makalabaw sa maayo nga kaangtanan kay Jehova. Gani sa pagligad sang tion, indi na ako tanto ka ambisyuso. Narealisar ko nga importante ang akon asawa kag kabataan. Ang Filipos 2:4 nagkumbinsi sa akon nga indi ko dapat isentro ang akon hunahuna sa akon kag sa akon handum nga makatigayon sing mas daku nga uma. Sa baylo, dapat ko unahon ang pag-alagad kay Jehova. Nag-untat ako sa pagpanigarilyo. Pero mabudlay gid sa amon ang pagtambong sa mga miting sa Sabado sang gab-i, kay 10 ka kilometro ang kalayuon sini kag kinahanglan namon gatasan ang baka sa sini man nga oras. Apang, sa bulig ni Gwen natambungan namon ang tanan nga miting. Ginaupod man namon pirme ang amon mga bata sa pagministeryo kada Domingo sang aga, sa tapos magatasan ang mga baka.

Wala nalipay ang amon pamilya sa amon pagbag-o. Anom ka tuig nga wala ginbugno si Gwen sang iya amay. Gintinguhaan man sang akon mga ginikanan nga pauntaton kami sa pagpakig-upod sa mga Saksi.

Gwen: Ginbuligan kami ni Jehova nga mabatas ini nga mga kabudlayan. Kag pagligad sang tion, ang mga kauturan sa Kongregasyon sang Oswestry daw  nangin pamilya na namon kag mahigugmaon nila kami nga ginbuligan sa amon mga kabudlayan. (Luc. 18:29, 30) Gindedikar namon ang amon kabuhi kay Jehova kag nagpabawtismo kami sang 1972. Luyag ko gid buligan ang madamo nga tawo nga makatuon sang kamatuoran, gani nagpayunir ako.

David: Makapoy ang tinuig nga pagtrabaho sa amon uma, pero gintinguhaan gid namon nga mangin huwaran sa amon mga bata nga babayi sa pagsimba kay Jehova. Sang ulihi, bangod nabuhinan ang bulig sang gobierno sa amon, nag-untat kami sa pagpanguma. Bangod wala kami sing balay kag palangabuhian kag isa pa lang ka tuig ang amon ikatlo nga bata nga babayi, nangamuyo kami kay Jehova nga buligan niya kami kag giyahan. Nagdesisyon kami nga gamiton ang amon talento kag nagbukas kami sing dance studio para masuportahan ang amon pamilya. Ang amon panikasog nga unahon ang pagsimba kay Jehova may maayo nga resulta. Nalipay gid kami kay ang tatlo namon ka bata nagpayunir sang nakatapos sila sa pag-eskwela. Nagpayunir man si Gwen, gani adlaw-adlaw niya nga maupdan ang amon kabataan.

Sang namana ang amon duha ka magulang nga bata nga sanday Gilly kag Denise, ginsira namon ang amon estudyo. Nagsulat kami sa sanga talatapan para mahibaluan kon diin kami puede magbulig. Gintudlo nila kami sa mga banwa sa bagatnan-sidlangan sang Inglaterra. Bangod si Debbie na lang ang bata nga upod namon sa balay, nagpayunir man ako. Pagligad sang lima ka tuig, ginpangabay kami nga magbulig sa iban nga kongregasyon sa aminhan. Sang nakapamana si Debbie, nakapribilehiyo kami nga makigbahin sa internasyonal nga proyekto sang pagpanukod sa Zimbabwe, Moldova, Hungary, kag Côte d’Ivoire sa sulod sang napulo ka tuig. Dayon nagpauli kami sa Inglaterra para magbulig sa konstruksion sa London Bethel. Bangod sang akon eksperiensia sa pagpanguma, ginpangabay ako nga magbulig sa uma sang Bethel sadto. Sa karon, nagapayunir kami sa aminhan-katundan sang Inglaterra.

Gwen: Ang una namon nga gindedikaran, nga amo ang baley, makalilipay pero umalagi lang. Ang ikaduha kag pinakaimportante namon nga gindedikaran, nga amo si Jehova, nagahatag sa amon sing daku kag wala katapusan nga kalipay. Partner kami gihapon, pero indi na sa saot kundi sa pagbantala. Ang pagbulig sa madamo nga tawo nga makatuon sang hamili kag nagaluwas-kabuhi nga kamatuoran nagahatag sa amon sing wala tupong nga kalipay. Ini nga “mga sulat nga nagadayaw sa amon” mas maayo sangsa kabantugan nga matigayon namon sa kalibutan. (2 Cor. 3:1, 2) Kon wala namon nasapwan ang kamatuoran, mahimo nga ang nabilin sa amon handumanan na lang, ang daan nga mga retrato, kag mga programa sa teatro halin sa amon propesyon.

David: Ang pag-alagad kay Jehova may daku nga epekto sa amon kabuhi. Nakabulig ini sa akon nga mangin maayo nga bana kag amay. Ginasugiran kita sang Biblia nga si Miriam, si Hari David, kag ang iban pa nagpabutyag sang ila kalipay paagi sa pagsaot. Pareho sa madamo, nagahandum man kami nga magsaot tungod sa kalipay sa bag-o nga kalibutan ni Jehova.—Ex. 15:20; 2 Sam. 6:14.