1-3. Paano nagbakod ang pagsalig ni Pablo kay Jehova? (Tan-awa ang piktyur sa umpisa sini nga artikulo.)

MAKATALAGAM ini nga tion para sa mga Cristiano sa Roma. Bangod ginpasibangdan ang mga sumulunod sang Cristo nga nagsunog sang siudad sang 64 C.E. kag ginsumbong nga naakig sa katawhan, mapintas sila nga ginhingabot. Kon Cristiano ka sadto, adlaw-adlaw mo nga atubangon ang posibilidad nga dakpon kag paantuson. Ang pila mo ka utod sa espirituwal mahimo nga gin­gusnit na sang mga sapat ukon ginlansangan sa usok kag ginsunog bilang suga kon gab-i.

² Mahimo nga amo sini ka makatalagam ang kahimtangan sang ginpriso liwat si apostol Pablo sa Roma. May mabulig bala sa iya nga mga Cristiano? Mahimo nga nabalaka primero si Pablo parte sa sini, kay nagsulat sia kay Timoteo: “Sa akon nahauna nga pagpangapin wala sing nagdampig sa akon, kundi tanan sila nagbiya sa akon—kabay nga indi sila manabat sa sini.” Pero ginbaton man ni Pablo nga may paglaum pa sia. Nagsulat sia: “Apang ang Ginuo nagtindog sa tupad ko kag nagpabakod sa akon.” Huo, ginhatagan ni Ginuong Jesus si Pablo sing kusog nga iya kinahanglan. Kag daw ano ka praktikal ini nga bulig? Talupangda ang resulta:  “Ginluwas ako sang Ginuo sa baba sang leon.”—2 Tim. 4:16, 17. *

³ Ang pagdumdom sini nga eksperiensia nagpalig-on kay Pablo, kag nagbulig sa iya nga magsalig nga pabakuron sia ni Jehova nga mabatas ang ginaatubang niya nga mga pagtilaw kag ang maabot pa. Ang matuod, nagsiling sia dayon: “Luwason ako sang Ginuo sa tanan nga kalautan.” (2 Tim. 4:18) Huo, natun-an ni Pablo nga kon indi sia mabuligan sang iya mga kauturan, buligan gid sia ni Jehova kag ni Jesus!

4, 5. (a) Sin-o ang makahatag pirme sing bulig nga kinahanglan mo? (b) Paano mo mapabakod ang imo kaangtanan kay Jehova?

⁴ Nagabatyag ka bala nga nagaisahanon kon kaisa sa pag-atubang sang mabudlay nga sitwasyon? Mahimo nga nadulaan ka sang trabaho, ginaipit ka sa eskwelahan, nagabalatian, ukon nagaeksperiensia sang iban pa nga kabudlayan. Mahimo nangayo ka sing bulig, pero wala mahatag sang iban ang bulig nga kinahanglan mo. Ang matuod, may pila ka problema nga indi masolbar sang tawo. Sa sini nga mga kahimtangan, ang laygay bala sang Biblia nga ‘magsalig kay Jehova’ wala sing pulos? (Hulu. 3:5, 6) Indi gid! Matuod gid nga nagabulig ang Dios, subong sang ginpakita sang madamo nga rekord sa Biblia.

⁵ Gani, sa baylo nga maglain ang buot kon indi makabulig ang tawo, tamda ini nga mga kahimtangan pareho sa pagtamod sang apostol—subong mga kahigayunan nga magsalig sing bug-os kay Jehova kag maeksperiensiahan mismo ang iya pagpalangga. Magapabakod ini sang imo pagsalig sa iya kag mangin mas matuod pa ang imo kaangtanan sa iya.

6. Ngaa isa gid ka hangkat nga magsalig kay Jehova kon may problema kita?

⁶ Mapangamuyo mo bala kay Jehova ang mabudlay nga problema kag pagkatapos sini magatawhay ang imo pamatyag, kay nahibaluan mo nga nahimo mo na ang imo masarangan kag sia na ang bahala sini? Huo! (Basaha ang Salmo 62:8; 1 Pedro 5:7.) Ang paghimo sini importante nga bahin sang pagpalambo sing kaangtanan kay Jehova. Pero isa gid ka hangkat ang pagsalig nga ihatag ni Jehova ang imo kinahanglanon. Ngaa? Ang isa ka rason mahimo amo nga kon kaisa wala dayon ginasabat ni Jehova ang imo pangamuyo.—Sal. 13:1, 2; 74:10; 89:46; 90:13; Hab. 1:2.

7. Ngaa kon kaisa wala dayon ginasabat ni Jehova ang aton mga pangamuyo?

⁷ Ngaa kon kaisa wala dayon ginasabat ni Jehova ang aton mga pangamuyo? Dumduma nga ginpaanggid niya ang aton kaangtanan sa iya pareho sa mag-amay. (Sal. 103:13) Indi makapaabot ang bata nga ihatag sang ginikanan ang tanan niya nga pangayuon ukon ihatag ini dayon. Ang pila ka gusto sang bata mahimo umalagi lang. Ang iban sini mahimo ihatag sa ulihi. Ang iban mahimo indi makapaayo sa bata ukon sa iban. Dugang pa, kon pasugtan sang ginikanan ang tanan nga ginapangayo sang bata, daw pareho lang nga nangin agalon ang bata kag ang ginikanan amo ang ulipon. Sing kaanggid, mahimo paligaron ni Jehova ang tion nga sabton ang aton mga pangamuyo kay para gid ini sa aton kaayuhan. Iya ini kinamatarong subong aton maalam nga Manunuga, mahigugmaon nga Agalon, kag langitnon nga Amay. Ang paghatag dayon sang tanan naton nga luyag makaguba sang aton nagakaigo nga kaangtanan sa iya.—Ipaanggid ang Isaias 29:16; 45:9.

8. Ano ang ginsaad ni Jehova parte sa aton personal nga mga limitasyon?

 ⁸ Ang isa pa ka rason amo nga nahibaluan gid ni Jehova ang aton mga limitasyon. (Sal. 103:14) Gani wala niya ginapaabot nga makasarang kita magbatas sa aton kaugalingon kundi nagatanyag sia sing bulig subong amay. Siempre, mahimo nga kon kaisa daw indi na kita makapadayon. Pero ginapasalig kita ni Jehova nga indi niya pagtugutan ang iya mga alagad nga mag-antos labaw sa ila masarangan. Huo, “magahimo man sia sang lulutsan.” (Basaha ang 1 Corinto 10:13.) Gani, may rason gid kita nga magsalig nga nahibaluan ni Jehova ang aton masarangan.

9. Ano ang aton himuon kon wala dayon ginasabat ang aton pangamuyo para sa bulig?

⁹ Kon wala dayon ginasabat ang aton pangamuyo para sa bulig, maghulat kita sa Isa nga nakahibalo kon san-o niya kita dapat buligan. Dumduma nga bisan sia nagapailob man, kay luyag gid niya nga buligan kita. “Si Jehova nagahulat sing mapailubon agod pakitaan kamo sing kahamuot, kag magatindog sia agod pakitaan kamo sing kaluoy. Kay si Jehova Dios sang hustisya. Malipayon ang tanan nga padayon nga nagalaum sa iya.”—Isa. 30:18.

10-12. (a) Paano nga mas mabudlay ang mga kahimtangan sang isa ka Cristiano nga nagaatipan sang nagamasakit nga miembro sang pamilya? (b) Paano ang pagsalig kay Jehova sa mabudlay nga mga kahimtangan makaapektar sa kaangtanan sang isa sa Dios? Iilustrar.

¹⁰ Kon nagaeksperiensia ka sang mabudlay katama nga problema, mahimo magabatyag ka pareho ni Pablo—nga yara ka na ukon malapit na gid “sa baba sang leon.” Amo ini ang mga tion nga ang pagsalig kay Jehova mabudlay gid—pero pinakaimportante. Halimbawa, ginaatipan mo ang imo pinalangga nga miembro sang pamilya bangod may malala sia nga balatian. Mahimo nangamuyo ka sing kaalam kag kusog. * Kon nahimo mo na ang imo masarangan, indi bala nga mapahamtang na ang imo buot kay nahibaluan mo nga nakita ni Jehova ang imo kahimtangan kag ihatag niya ang imo kinahanglanon para makabatas ka sing matutom?—Sal. 32:8.

¹¹ Pero mahimo nga indi amo sini ang imo nabatyagan. Mahimo nakabaton ka sing nagasumpakilay nga mga opinyon sang mga doktor. Ukon mahimo nga ang ginalauman mo nga mga paryente nga makapaumpaw sa imo amo pa ang nagapabudlay sang kahimtangan. Mangayo pirme kay Jehova sing kusog. Padayon nga mangin suod sa iya. (Basaha ang 1 Samuel 30:3, 6.) Kon mangin maayo na ang kahimtangan, magabakod pa gid ang imo kaangtanan sa iya.

¹² Amo gid sini ang natabo kay Linda * pagkatapos nga gin-atipan niya ang iya nagabalatian nga mga ginikanan sing pila ka tuig antes sila mapatay. “Sa sadto nga sitwasyon, daw wala na kami sing pasingadtuan sang akon bana kag utod. Daw wala kami sing mahimo. Pero kon dumdumon namon ang natabo, maathag nga gin-amanan kami ni Jehova. Ginpalig-on niya kami kag ginhatagan sang amon kinahanglanon, bisan pa nga daw mangampo na kami.”

13. Paano ang pagsalig kay Jehova nakabulig sa isa ka utod nga babayi sa sunodsunod nga mga problema?

¹³ Ang bug-os nga pagsalig kay Jehova makabulig man kon nagaatubang kita sang trahedya. Sang nagpasaka sing diborsio ang indi Saksi nga bana ni Rhon­da, nahibaluan man nga ang iya manghod may lupus, isa ka grabe nga balatian. Pila ka bulan sang ulihi, napatay ang iya bayaw nga babayi. Sang na batyagan ni Rhon­da nga daw naulian na sia sa sining makapasubo nga mga kahimtangan, nagregular payunir sia. Wala magdugay, napatay ang iya iloy. Ano ang nakabulig kay Rhon­da nga maatubang ini tanan? Sia nagpaathag: “Nagapakigkomunikar ako kay Jehova kada adlaw, bisan sa magagmay nga mga desisyon. Nangin matuod sia sa akon. Gintudluan ako sini nga magsalig sa iya sa baylo nga sa akon kaugalingon ukon sa iban nga tawo. Kag ang bulig nga ginhatag niya sa akon matuod—naaman ang akon tanan nga kinahanglanon. Gani naeksperiensiahan ko nga magpangabudlay upod kay Jehova.”

14. Paano makabulig sa imo si Jehova kon ang imo paryente gin-disfellowship?

¹⁴ Binagbinaga pa ang isa ka sitwasyon. Ibutang ta nga ang imo pinalangga nga paryente na-disfellowship. Suno sa imo natun-an sa Biblia, nahibaluan mo kon paano sia pakig-angutan. (1 Cor. 5:11; 2 Juan 10) Pero kon kaisa ang pagsuportar sa sini nga desisyon daw kabudlay ukon daw imposible pa gani. * Makasalig ka bala nga hatagan ka sang imo Amay sa langit sing kabakod nga matuman ang mga panuytoy sang Biblia parte sa pag-disfellowship? Nakita mo bala ang kahigayunan nga pabakuron ang imo kaangtanan kay Jehova paagi sa pagpakigsuod sa iya?

15. Ngaa ginlapas ni Adan ang sugo ni Jehova sa Eden?

¹⁵ Parte sa sini, dumduma ang una nga tawo nga si Adan. Nagpati bala sia nga puede niya malapas si Jehova pero makapadayon sia sa pagkabuhi? Wala, kay ginsugiran kita sang Kasulatan nga si Adan “wala madaya.” (1 Tim. 2:14) Ti ngaa naglapas sia? Ang  handum ni Adan sa iya asawa nga si Eva amo ang nagpahulag sa iya nga kan-on ang bunga nga ginhatag niya sa iya. Namati sia sa tingog sang iya asawa sa baylo nga sa iya Dios, si Jehova.—Gen. 3:6, 17.

16. Kay sin-o kita dapat may pinakamabakod nga gugma, kag ngaa?

¹⁶ Ginapahangop bala sini nga indi dapat mabakod ang aton gugma sa aton mga paryente? Siempre indi! Pero ang pinakamabakod nga gugma naton dapat kay Jehova. (Basaha ang Mateo 22:37, 38.) Para gid ini sa kaayuhan sang aton mga paryente, nagaalagad man sila subong kay Jehova ukon wala. Gani padayon nga pabakura ang imo gugma kay Jehova kag ang imo pagsalig sa iya. Kag kon ginatublag ka gid sang ginahimo sang imo na-disfellowship nga paryente, mangamuyo sing hanuot kay Jehova. * (Roma 12:12; Fil. 4:6, 7) Gamita ining makapasubo nga kahimtangan nga mapabakod ang imo kaangtanan kay Jehova. Magabulig ini sa imo nga magsalig kay Jehova para sa pinakamaayo nga resulta.

17. Kon mangin masako kita sa pagbantala sang Ginharian, paano naton mapakita nga nagasalig kita kay Jehova?

¹⁷ Ngaa ginluwas si Pablo “sa baba sang leon”? Sia nagsiling: “Agod paagi sa akon matuman sing bug-os ang pagbantala kag mabatian ini sang tanan nga pungsod.” (2 Tim. 4:17) Kaangay ni Pablo, samtang masako kita sa pagbantala, nagasalig kita nga pat-uron ni Jehova nga ang iban pa nga importante nga mga butang “idugang” sa aton. (Mat. 6:33) Subong mga manugbantala sang Ginharian, ‘gintugyanan kita sang maayong balita,’ kag ginakabig kita ni Jehova nga “mga masigkamanugpangabudlay.” (1 Tes. 2:4; 1 Cor. 3:9) Kon mangin masako kita tubtob sa aton masarangan sa hilikuton sang Dios, mangin mas mahapos sa aton ang paghulat sing kaumpawan.

18. Paano naton mapabakod ang aton pagsalig kay Jehova kag ang aton kaangtanan sa iya?

¹⁸ Gani, pabakuron naton sa karon ang aton kaangtanan sa Dios. Kon may mga kahimtangan nga nagakabalaka kita, gamita ini para mangin suod ka pa gid kay Jehova. Huo, kon mangin maukod kita sa Pulong sang Dios, padayon nga nagapangamuyo, kag kon magpabilin kita nga masako sa espirituwal nga mga hilikuton, makasalig kita nga buligan gid kita ni Jehova nga malampuwasan ang aton sitwasyon subong kag sa palaabuton.