MAAGA sadto nga bahin sang tig-ilinit sang 1970. Ginabulong ako sa Valley Forge General Hospital, Phoenixville, Pennsylvania, sa Estados Unidos. Ginakuhaan ako sang blood pressure sang lalaki nga nars kada 30 minutos. Beinte anyos ako sadto nga ­soldado nga may malala nga balatian. Nagalalain ang nars, nga mas magulang sa akon sing pila ka tuig. Samtang naganubo ang akon blood pressure, nagsiling ako, “Wala ka pa gid siguro nakakita sang tawo nga napatay no?” Nagpalanglapsi sia kag nagsabat, “Wala pa gid.”

Sadto, ang akon palaabuton madulom. Pero ngaa naospital ako? Bueno, iistorya ko sa inyo ang akon kabuhi.

Nagmasakit ako sang nangin teknisyan ako sa oper­ating room sa tion sang inaway sa Vietnam. Gusto ko gid buligan ang mga nagamasakit kag napilasan kag tulumuron ko nga mangin manug-opera. Nag-abot ako sa Vietnam sang Hulyo 1969. Pareho sa iban nga bag-uhan, ginhatagan ako sing isa ka semana para maanad sa bag-o nga oras kag grabe nga init.

Pagreport ko gid sa ospital sa Mekong Delta, sa Dong Tam, madamo nga helikopter nga puno sang mga napilasan ang nag-abot. Palangga ko gid ang akon pungsod kag nanamian gid ako mag-obra, gani gusto ko dayon magbulig. Ginhanda ang mga napilasan kag gindala sa gamay nga mga container van nga naka-aircon nga ginhimo nga mga operating room. May manug-opera, manug-anestisya, kag mga nars didto nga nagaginutok kag nagahimo sang ila masarangan nga masalbar ang mga kabuhi. Natalupangdan ko nga wala na ginapapanaog sa mga helikopter ang dalagku kag itom nga mga bag. Ginsugiran ako nga nagaunod ato sang nagbululag nga mga parte sang lawas sang mga soldado nga nalukpan sa inaway. Amo yadto ang una ko nga eksperiensia sa inaway.

Sang pamatan-on pa ako, may nahibaluan na ako sa kamatuoran nga ginatudlo sang mga Saksi ni Jehova. Ang akon pinalangga nga iloy nagtuon sing Biblia upod sa mga Saksi, pero wala sia mag-uswag kag mabawtismuhan. Nanamian gid ako magpamati sa mga pagtuon sang akon iloy. Sadto man nga tion, nakalabay kami sang akon stepfather sa Kingdom Hall. Ginpamangkot ko sia, “Ano ’na?” Nagsabat sia, “Indi ka gid magpalapit sa sina nga mga  tawo!” Gintuman ko sia bangod palangga ko gid sia kag ginasaligan. Gani, wala na ako makaistorya sa mga Saksi ni Jehova.

Pagpauli ko halin sa Vietnam, nabatyagan ko nga kinahanglan ko ang Dios sa akon kabuhi. Nagkabalan na ang akon balatyagon bangod sa malain nga inagihan. Daw wala gid sing may nakahangop sang mga nagakatabo sa Vietnam. Nadumduman ko ang mga nagaprotesta nga nagtawag sa mga soldado sang U.S. nga mga manugpatay sang bata bangod sa mga report nga may ginpatay nga mga inosente nga kabataan sa inaway.

Para mabusog sa espirituwal, nagtambong ako sa lainlain nga relihion. Ginahigugma ko gid ang Dios, pero dismayado ako sa akon nakita sa mga relihion. Sang ulihi, nakatambong ako sa Kingdom Hall sang mga Saksi ni Jehova sa Delray Beach, Florida. Domingo sadto sang Pebrero 1971.

Pagsulod ko, manugtapos na ang pamulongpulong, gani nagpabilin ako asta sa pagtinuon sang Ang Lalantawan. Wala ko na madumduman kon ano nga topiko ang ginbinagbinag, pero nadumduman ko pa ang magagmay nga kabataan nga nagabukad sang ila mga Biblia para pangitaon ang mga teksto. Nagdayaw gid ako! Nagapamati lang ako kag nagapanilag. Sang manuggua na ako sa Kingdom Hall, ginpalapitan ako sang utod nga lalaki nga halos 80 anyos na. Sia amo si Jim Gardner. Ginduhol niya sa akon ang libro nga natig-uluhan Ang Kamatuoran nga Nagadul-ong sa Kabuhi nga Dayon kag nagsiling, “Palihug batuna ini.” Nagsugtanay kami nga makitaay sa Huebes sang aga para sa amon una nga pagtuon sa Biblia.

May trabaho ako sadto nga gab-i sang Domingo. Nagaobra ako sa emergency room sang isa ka pribado nga ospital sa Boca Raton, Florida. Sugod alas 11 sang gab-i asta alas 7 sang aga ang akon obra. Bangod malinong sadto nga gab-i, ginbasa ko ang Kamatuoran nga libro. Ginpalapitan ako sang senior nurse kag gin-agaw niya ang libro, dayon gintan-aw ang kober sini kag nagsinggit, “Indi ka magsiling nga maentra ka man sa ila!” Ginbawi ko ang akon Kamatuoran nga libro kag nagsiling, “Tunga pa lang sang libro ang akon nabasa, pero daw amo gid sina ang matabo!” Naghalin sia, kag natapos ko basa ang libro sina nga gab-i.

Sang una namon nga pagtuon sa Biblia ni Utod Gardner, ginpamangkot ko sia, “Ti, ano ang tun-an ta?” Nagsabat sia, “Ang libro nga ginhatag ko sa imo.” Nagsiling ako, “Tapos ko na ato basa.” Mainayuhon nga nagsabat si Utod Gardner, “Ti, binagbinagon naton ining una nga kapitulo.” Nakibot gid ako nga kadamo gali sang wala ko mahangpan. Ginpapangita niya sa akon ang mga teksto sa akon edisyon sang King James Version nga Biblia. Nakatuon na gid man ako parte sa matuod nga Dios nga si Jehova. Gintun-an namon ni Utod Gardner, nga ginatawag ko nga Jim, ang tatlo ka kapitulo sang Kamatuoran nga libro sadto nga aga. Kada Huebes sugod sadto, tatlo ka kapitulo ang ginatun-an namon. Nanamian gid ako sa amon mga pagtuon. Daku gid nga pribilehiyo para sa akon nga matudluan sang hinaplas nga utod nga personal nga nakilala si Charles T. Russell!

 Pagligad sang pila ka semana, naaprobahan ako nga mangin manugbantala sang maayong balita. Ginbuligan ako ni Jim sa akon mga kabudlayan, lakip na ang pagbantala sa mga balay. (Binu. 20:20) Ginaupdan niya ako asta sang ulihi nga nanamian na ako magbantala. Ginakabig ko gihapon ang pagministeryo nga isa ka daku nga pribilehiyo. Makalilipay gid nga mangin masigkamanugpangabudlay sang Dios!—1 Cor. 3:9.

Karon, sugiran ko kamo sang isa ka personal nga butang—ang akon una nga gugma kay Jehova. (Bug. 2:4) Ina nga gugma kay Jehova nakabulig sa akon nga malampuwasan ang masakit nga eksperiensia sa inaway kag iban pa nga pagtilaw.—Isa. 65:17.

Nadumduman ko ang pinasahi nga adlaw sang tigpamulak sang 1971. Bag-o lang ako sadto ginpahalin sa condominium nga ginpaistaran sa akon sang akon mga ginikanan. Indi gid gusto sang akon stepfather nga may Saksi sa iya mga propriedad! Diutay lang ang akon kuarta sadto. Ginasuelduhan ako sang ospital nga akon ginaubrahan kada duha ka semana, kag halos naubos ang akon sueldo kay nagbakal ako sing bayo para makapakigbahin sa ministeryo kag para marepresentar sing nagakaigo si Jehova. May sinuptan ako, pero ara sa bangko sa Michigan, diin ako nagdaku. Gani pila ka adlaw ako nga nag-istar sa akon salakyan. Nagapamarbas lang ako kag nagapanghilam-os sa kasilyas sang mga gasolinahan.

Isa ka adlaw sang nagaistar pa ako sa akon salakyan, nag-abot ako sa Kingdom Hall mga duha ka oras antes mag-abot ang grupo nga matipon para sa paggua sa latagon. Bag-o lang natapos ang akon obra sa ospital. Samtang nagapungko ako sa likod sang Kingdom Hall nga wala sing makakita sa akon, nadumduman ko ang Vietnam—ang baho  sang sunog nga mga bangkay kag ang mga dugo. Sa akon hunahuna, mabatian ko kag athag nga makita ang lamharon nga mga lalaki nga nagapakiluoy sa akon, “Mabuhi pa bala ako? Mabuhi pa bala ako?” Nakahibalo ako nga mapatay sila, pero ginlikawan ko nga ipakita ini sa ila kag gintinguhaan ko nga lugpayan sila. Samtang nagapungko ako, indi ko na maintiendihan ang akon ginabatyag.

Nangamuyo ako samtang nagatululagay ang akon luha. (Sal. 56:8) Ginpamalandungan ko gid sing maayo ang paglaum nga pagkabanhaw. Natandog gid ako sini: Paagi sa pagkabanhaw, dulaon ni Jehova nga Dios ang tanan nga mapintas nga pagpamatay nga akon nakit-an kag kasakit nga akon nabatyagan kag sang iban. Buhion liwat ni Jehova yadtong lamharon nga mga lalaki, kag may kahigayunan sila nga matun-an ang kamatuoran parte sa iya. (Binu. 24:15) Sadto nga tion, ang akon tagipusuon napuno sang gugma kay Jehova nga nagtandog gid sang akon pinakasulod nga pagkatawo. Pinasahi gid yadto nga adlaw para sa akon asta subong. Sugod sadto, ginahimo ko ang akon masarangan, ilabi na sa mga pagtilaw kag kabudlayan, nga indi gid madula ang akon una nga gugma kay Jehova.

Sa inaway, malain gid ang ginahimo sang mga tawo. Pati man ako. Pero ang pagpamalandong sa duha sa akon paborito nga mga teksto nakabulig sa akon. Ang una amo ang Bugna 12:10, 11, nga nagasiling nga ang Yawa nadaug indi lamang paagi sa mensahe nga aton ginapanaksi kundi paagi man sa dugo sang Kordero. Ang ikaduha amo ang Galacia 2:20. Sa sina nga bersikulo nahibaluan ko nga si Cristo Jesus napatay “para sa akon.” Ginatan-aw ako ni Jehova paagi sa dugo ni Jesus, kag ginpatawad niya ako sa akon nahimo. Ang paghibalo sini nakabulig sa akon nga makatigayon sing matinlo nga konsiensia kag nagpahulag sa akon nga himuon ang akon masarangan nga buligan ang iban nga matun-an ang kamatuoran parte sa aton maluluy-on nga Dios, si Jehova!—Heb. 9:14.

Kon dumdumon ko ang akon kabuhi, nagapasalamat gid ako nga pirme ako ginaatipan ni Jehova. Halimbawa, sang adlaw nga nabal-an ni Jim nga sa salakyan ako nagaistar, ginkontak niya dayon ang utod nga babayi nga may boarding house. Nagapati gid ako nga gingamit ni Jehova si Jim kag ang utod para may dayunan ako. Kaayo gid ni Jehova! Ginaatipan gid niya ang iya matutom nga mga sumilimba.

Sang Mayo 1971, kinahanglan ko magkadto sa Michigan kay may dapat ako asikasuhon. Antes ako maghalin sa Delray Beach Congregation sa Florida, ginpuno ko sing mga literatura ang likod sang akon salakyan, dayon nagbiyahe pakadto sa aminhan sa Interstate 75. Wala pa ako makatungatunga sa akon pagbiyahe, wala na unod ang likod sang akon salakyan. Makugi ako nga nagbantala sang maayong balita sang Ginharian bisan diin. Nagahapit ako sa mga prisuhan kag ginahatagan ko sing mga tract bisan ang mga lalaki nga makadungan ko sa mga kasilyas sa mga palahuwayan. Asta karon, wala ako makahibalo kon bala may nagtubo sa sadtong gintanom nga mga binhi.—1 Cor. 3:6, 7.

Pero ginaako ko nga sang una ko nga natun-an ang kamatuoran, indi ako mataktikanhon sa pagpaambit sini ilabi na sa akon pamilya. Bangod nagadabdab gid ang akon una nga gugma kay Jehova, maisugon pero maparas ko ini nga ginbantala sa ila. Palangga ko gid ang akon mga utod nga lalaki nga sanday John kag Ron, kag ginpilit ko sa ila ang kamatuoran. Nangayo ako sang ulihi sing pasaylo sa ila. Pero, wala gid ako nagauntat sa pagpangamuyo nga batunon nila ang kamatuoran. Gintudluan na ako ni Jehova, kag nangin mas mataktikanhon ako sa pagbantala kag pagpanudlo.—Col. 4:6.

Pirme ko gid ginadumdom ang akon gugma kay Jehova, pero wala ko man ginakalipatan ang iban ko pa nga gugma. Ang masunod ko nga ginahigugma amo ang akon pinalangga nga asawa, si Susan. Nahibaluan ko nga kinahanglan ko sing kaupod nga makabulig sa akon nga mahimo ang mga hilikuton sa Ginharian. Malig-on kag espirituwal nga babayi si Susan. Maathag pa sa akon sang ginbisita ko sia sang naganobyahanay pa lang kami. Nagapungko sia sa atubangan nga terasa sang balay sang iya mga ginikanan sa Cranston, Rhode Island. Nagabasa sia sang Ang Lalantawan kag Biblia. Nagdayaw gid ako sang ginatan-aw niya sa Biblia ang mga teksto sa isa sa sekondaryo nga mga artikulo. Nakahunahuna ako, ‘Espirituwal gid ini nga babayi!’ Nagpakasal kami sang Disiembre 1971, kag nagapasalamat gid ako nga sugod sadto, nangin kaupod ko sia kag padayon niya ako nga ginasuportahan. Ang naapresyar ko gid sa iya amo nga palangga niya ako, pero mas palangga niya si Jehova.

Ginpakamaayo kami ni Susan sang duha ka bata nga lalaki nga sanday Jes­se kag ­Paul. Nangin kaupod man nila si Jehova sa ila pagdaku. (1 Sam. 3:19) Bangod nanindugan sila sa kamatuoran, napadunggan gid nila kami ni Susan. Padayon sila nga nagaalagad kay Jehova bangod ginadumdom nila ang ila una nga gugma sa iya. Ang tagsa sa ila yara sa bug-os tion nga pag-alagad sing sobra na sa 20 ka tuig. Nagdayaw man ako sa akon mga umagad nga sanday Ste­phanie kag ­Racquel, kag ginakabig ko na sila nga akon kabataan. Nakapangasawa ang akon duha ka bata sing espirituwal nga mga babayi  nga nagahigugma kay Jehova nga Dios sa bug-os nila nga tagipusuon kag kalag.—Efe. 6:6.

Pagkatapos ako mabawtismuhan, nag-alagad ako sing 16 ka tuig sa Rhode Island, kag nakatigayon ako didto sing hamili nga mga abyan. Madamo gid ako sing maayo nga madumduman sa mga gulang nga nakaupod ko sa pag-alagad. Dugang pa, nagapasalamat man ako sa mga nagalakbay nga manugtatap, nga tuman kadamo kon hinambitan, nga may maayo nga impluwensia sa akon. Daku gid nga pribilehiyo nga makaupod ang mga lalaki nga padayon nga nahuptan ang ila una nga gugma kay Jehova! Sang 1987, nagsaylo kami sa North Carolina para makaalagad diin may mas daku nga kinahanglanon, kag didto kami nakatigayon sing dugang nga mga abyan. *

Sang Agosto 2002, ginbaton namon ni Susan ang imbitasyon nga mangin bahin sang pamilya Bethel sa Patterson sa Estados Unidos. Nagapangalagad ako sa Service Department, samtang si Susan nagabulig sa Laundry. Nanamian gid sia mag-obra didto! Dayon sang Agosto 2005, ginhatagan ako sing pribilehiyo nga mangin miembro sang Nagadumala nga Hubon. Napaubos gid ako sini nga asaynment. Daw nahalawhaw gid ang akon asawa sa pagpamensar sang amon mangin responsibilidad, obra, kag mga kinahanglanon nga pagbiyahe. Nabudlayan gid si Susan sa pagbiyahe sa eroplano, pero nagabiyahe kami pirme! Nagsiling si Susan nga nakabulig sa iya ang mahigugmaon nga laygay sang mga asawa sang iban nga miembro sang Nagadumala nga Hubon nga mangin determinado sa pagsuporta sa akon tubtob posible. Nahimo gid niya ini, kag bangod sini palangga ko gid sia.

Sa akon opisina, napalibutan ako sang mga piktyur nga importante gid sa akon! Ginapahanumdom ako sini kon daw ano kanami sang akon kabuhi. Madamo na ako sing nabaton nga dalayawon nga padya bangod ginhimo ko ang akon bug-os nga masarangan para madumdom ang akon una nga gugma kay Jehova!