1. Ngaa nakasiling si Pablo nga “ang Cristo amo ang gahom sang Dios”?

GINPAKITA ni Jehova ang iya gahom paagi kay Jesucristo sing dalayawon. Mabasa sa apat ka Ebanghelyo ang makapabakod sang pagtuo nga mga detalye sang pila ka milagro sang Cristo. Posible nga naghimo sia sang madamo pa nga milagro. (Mat. 9:35; Luc. 9:11) Makita gid ang gahom sang Dios kay Jesus. Gani, nakasiling gid si apostol Pablo parte sa iya: “Ang Cristo amo ang gahom sang Dios.” (1 Cor. 1:24) Pero ano ang epekto sang mga milagro ni Jesus sa aton kabuhi?

2. Ano ang matun-an naton sa mga milagro ni Jesus?

² Si apostol Pedro nagsiling nga si Jesus naghimo sing mga milagro, ukon “makatilingala nga mga butang.” (Binu. 2:22) Ang mga milagro nga ginhimo ni Jesus nagalaragway sang mas daku nga mga pagpakamaayo sa idalom sang iya paggahom bilang hari. Ginapakita sini ang mga milagro nga pagahimuon ni Jesus sa bug-os nga duta sa bag-ong kalibutan sang Dios! Paagi sa iya mga milagro, mahangpan naton ang personalidad niya kag sang iya Amay. Binagbinagon naton ang pila ka milagro ni Jesus kag ang epekto sini sa aton kabuhi subong kag sa palaabuton.

3. (a) Ngaa ginhimo ni Jesus ang iya una nga milagro? (b) Paano makita ang kaalwan ni Jesus sa Cana?

³ Sa isa ka punsion sa kasal sa Cana sa Galilea, ginhimo ni Jesus ang iya una nga milagro. Mahimo nga mas madamo ang bisita sangsa ginapaabot. Ano man ang kahimtangan, naubusan sila sang alak. Bisita man si Maria nga iloy ni Jesus. Ginpamalandungan gid niya sa malawig nga tion ang tanan nga tagna parte sa iya anak, kag nahibaluan niya nga pagatawgon ini nga “Anak sang Labing Mataas.” (Luc. 1:30-32; 2:52) Nagapati bala sia nga may gahom si Jesus nga wala pa niya mapakita? Sa Cana, maathag nga naluoy sanday Maria kag Jesus sa bag-o ginkasal kag indi nila gusto nga mahuy-an sila. Nahibaluan ni Jesus nga obligasyon ang pagpakita sing kaalwan. Gani milagruso niya nga ginhimo nga “maayo nga alak” ang mga 100 ka galon (380 ka litro) nga tubig. (Basaha ang Juan 2:3, 6-11.) Obligado bala si Jesus nga himuon ini nga milagro? Indi. Nagaulikid sia sa mga tawo kag ginailog niya ang kaalwan sang iya langitnon nga Amay.

4, 5. (a) Ano ang ginatudlo sa aton sang una nga milagro ni Jesus? (b) Ano ang ginatudlo sa aton sang milagro sa Cana parte sa palaabuton?

⁴ Milagruso nga nag-aman si Jesus sang madamo nga maayo nga alak para sa madamo nga tawo. Makita mo bala kon ano ang ginatudlo sa aton sini nga milagro? Bangod handa si Jesus maghimo sining dalayawon nga buhat, makasalig kita nga importante sa iya kag sa iya Amay ang balatyagon sang mga tawo. Indi dalok ang Amay kag ang Anak. Handurawa kon paano gamiton ni Jehova ang iya gahom sing maalwan sa bag-o nga kalibutan sa paghatag sing bugana nga sinalusalo “para sa tanan nga katawhan” sa bug-os nga duta.—Basaha ang Isaias 25:6.

⁵ Hunahunaa ini! Maabot ang tion nga iaman ang makatarunganon nga mga kinahanglanon kag handum—subong sang masustansia nga pagkaon kag nagakaigo nga balay—sang tanan nga tawo. Kabay pa nga malipay gid kita sa paghulat sa bugana kag maayo nga mga butang nga ihatag ni Jehova sa aton sa Paraiso sa duta.

6. Para kay sin-o gin­gamit ni Jesus ang iya gahom nga magmilagro, kag paano naton sia mailog?

⁶ Sang ginsulay sang Yawa si Jesus nga himuon nga tinapay ang mga bato, nangindi ang Cristo nga gamiton ang iya gahom nga magmilagro para sa iya kaugalingon nga handum. (Mat. 4:2-4) Pero gin­gamit niya ini para ihatag ang mga kinahanglanon sang iban. Paano naton mailog ang kabalaka ni Jesus sa iban? Ginpalig-on niya ang mga alagad sang Dios nga ‘himuon nga kinabatasan ang paghatag sa iban.’ (Luc. 6:38) Makapakita bala kita sang kaalwan paagi sa pag-agda sa iban sa aton balay para magkaon kag magpalig-unay sa espirituwal? Makahatag bala kita sing tion pagkatapos sang miting sa pagbulig sa iban, pareho sang pagpamati sa isa ka utod nga nagapraktis sang iya bahin? Ano ang mahimo naton mabulig sa iban para mag-uswag sila sa ministeryo? Ginailog na ton si Jesus paagi sa maalwan nga paghatag sa iban sang materyal kag espirituwal nga mga butang suno sa aton masarangan.

7. Ano nga problema ang magapadayon samtang yara pa ini nga sistema sang mga butang?

⁷ Madugay na nga problema ang kaimulon. Nagsiling si Jehova sa Israel sang una nga pirme may mga imol sa duta. (Deut. 15:11) Tinuig sang ulihi, nagsiling si Jesus: “Ang mga imol kaupod ninyo pirme.” (Mat. 26:11) Buot silingon bala ni Jesus nga indi na gid madula ang mga imol sa duta? Indi, buot niya silingon nga may mga imol samtang yara pa ining malaut nga sistema sang mga butang. Gani, makapalig-on gid nga mahibaluan nga ginapakita sang mga milagro ni Jesus nga maabot ang mas maayo nga tion kon maggahom na ang Ginharian, diin ang tanan may madamo nga pagkaon kag mabusog!

8, 9. (a) Ngaa milagruso nga ginpakaon ni Jesus ang linibo ka tawo? (b) Ano ang ginabatyag mo sa milagruso nga pagpakaon sa linibo?

⁸ Nagsiling ang salmista kay Jehova: “Ginahumlad mo ang imo kamot kag ginahatag ang handum sang tagsa ka buhi nga butang.” (Sal. 145:16) Kaangay sang iya Amay, ‘ang Cristo, ang gahom sang Dios,’ pirme naghumlad sang iya kamot kag ginhatag ang handum sang iya mga sumulunod. Wala niya ini ginhimo para lang ipakita ang iya gahom kundi nabalaka gid sia sa iban. Binagbinagon naton ang Mateo 14:14-21. (Basaha.) Nagpalapit kay Jesus ang iya mga disipulo bangod sang problema sa pagkaon. Mahimo nga gutom na sila pero nabalaka man sila sa kadam-an nga gutom na gid kag nakapoy bangod sang pagsunod kay Jesus halin sa mga siudad. (Mat. 14:13) Ano ang iya himuon?

⁹ Ginpakaon ni Jesus ang mga 5,000 ka lalaki, kag mga babayi kag kabataan paagi sa lima ka tinapay kag duha ka isda! Indi bala natandog gid kita kon paano gingamit ni Jesus ang iya gahom nga magmilagro para maatipan sing maluluy-on ang mga pamilya, pati ang mga bata? “Nagkaon sila tanan kag nabusog.” Ginapakita sini nga bastante gid ang pagkaon. Wala lang sila ginpatilaw ni Jesus sang tinapay, kundi mainayuhon niya sila nga ginhatagan sang pagkaon nga magasustiner sa ila sa malawig nga paglakbay pauli. (Luc. 9:10-17) Napuno pa gani ang 12 ka alat sang sobra nga pagkaon!

10. Ano ang matabo sa kaimulon sa indi madugay?

¹⁰ Bangod sang indi makatarunganon nga paggahom sang tawo subong, indi matigayon sang minilyon ang ila panguna nga mga kinahanglanon. Bisan pa may makaon ang pila naton ka kauturan, wala sila ‘mabusog.’ Pero malapit na magpuyo ang matinumanon nga katawhan sa kalibutan nga wala na sing korapsion kag kaimulon. Kon may gahom ka, indi bala nga ihatag mo ang mga kinahanglanon sang mga tawo? Masarangan ini himuon sang Labing Gamhanan nga Dios kag gusto gid niya ini himuon—sa indi madugay. Malapit na madula ang pag-antos!—Basaha ang Salmo 72:16.

11. Ngaa kumbinsido ka nga sa indi madugay gamiton sang Cristo ang iya gahom sa bug-os nga duta, kag ano ang gusto mo himuon bangod sini?

¹¹ Sang yari sa duta si Jesus, naghimo sia sang mga milagro sa gamay nga teritoryo sa sulod lang sang tatlo ka tuig kag tunga. (Mat. 15:24) Subong ginhimaya nga Hari, magasangkad ang iya teritoryo sa bug-os nga duta. (Sal. 72:8) Ginapasalig kita sang mga milagro ni Jesus nga gamiton niya ang iya awtoridad para sa aton kaayuhan kag gusto gid niya ini himuon. Indi kita makahimo sang mga milagro, pero masugid naton sing malipayon sa mga tawo ang ginasiling sang Pulong sang Dios. Ginagarantiyahan sang mga tagna sa Biblia ang mas maayo nga kahimtangan sa ulihi. Subong dedikado nga  mga Saksi ni Jehova nga nakahibalo sining hamili nga kamatuoran parte sa palaabuton, indi bala obligasyon naton nga isugid ini sa iban? (Roma 1:14, 15) Kabay nga ang pagpamalandong sa sini magpahulag sa aton nga isugid sa iban ang maayong balita sang Ginharian sang Dios.—Sal. 45:1; 49:3.

12. Ngaa makasalig kita nga nahangpan gid ni Jesus ang ekolohiya sang duta?

¹² Kaupod sang Dios ang iya bugtong nga Anak bilang “batid nga manugpangabudlay” sang gintuga niya ang duta kag ang yara sa sini. (Hulu. 8:22, 30, 31; Col. 1:15-17) Gani nahangpan gid ni Jesus ang ekolohiya sang duta. Nahibaluan niya kon paano gamiton kag kontrolon ang mga kinaugali nga manggad sang duta sing makatarunganon kag nagakaigo.

13, 14. Maghatag sing halimbawa kon paano makontrol sang Cristo ang kinaugali nga mga puersa.

¹³ Sang yari si Jesus sa duta, ginpakita niya nga sia “ang gahom sang Dios” paagi sa pagkontrol sa kinaugali nga mga puersa. Binagbinaga kon ano ang ginhimo ni Jesus sa unos nga nagbutang sa katalagman sang kabuhi sang iya mga disipulo. (Basaha ang Marcos 4:37-39.) Nagsiling ang isa ka iskolar sa Biblia: “Ang Griego nga tinaga [para sa “unos” sa Marcos 4:37] ginagamit para sa mabaskog gid nga unos ukon bagyo. Indi lang ini makaisa nga huyop sang mabaskog nga hangin . . . kundi isa ka bagyo nga may madulom nga mga gal-um kag nagawaswas nga hangin kag madamol nga ulan amo nga nagabalaliswa ang tanan.”

¹⁴ Imadyina ang natabo: Ginahampak sang mga balod ang sakayan, kag padayon nga nagasulod ang tubig sa sini. Pero wala sapayan sang gahod sang bagyo kag paglinggilinggi sang sakayan, tulog gihapon si Jesus bangod sa kakapoy. Kinahanglan niya magpahuway. Ginpukaw sang hinadlukan nga mga disipulo si Jesus kag nagsiling: “Mapatay na kita!” (Mat. 8:25) Nagbangon si Jesus kag ginsugo ang hangin kag dagat: “Hipos! Maglinong ka!” kag nagtinong ang nagahagunos nga hangin. (Mar. 4:39) Daw subong bala nga ginasugo ni Jesus ang hangin kag dagat nga maglinong. Ano dayon ang natabo? “Naglinong ini.” Daku gid nga gahom ang ginpakita ni Jesus!

15. Paano ginpakita sang Labing Gamhanan nga Dios nga makontrol niya ang kinaugali nga mga puersa?

¹⁵ Ang Ginhalinan sang gahom sang Cristo amo mismo si Jehova, gani makapati kita nga makontrol gid sang Labing Gamhanan nga Dios ang kinaugali nga mga puersa. Binagbinaga ang pila ka halimbawa. Antes sang Baha, nagsiling si Jehova: “Pito ka adlaw na lamang kag paulanan ko ang duta sa sulod sang 40 ka adlaw kag 40 ka gab-i.” (Gen. 7:4) Mabasa man naton sa Exodo 14:21: “Ginpahawa ni Jehova ang tubig sang dagat paagi sa mabaskog nga hangin halin sa sidlangan.” Kag mabasa naton sa Jonas 1:4: “Nagpadala si Jehova sing mabaskog nga hangin sa dagat. Mabaskog gid ang unos, gani daw maguba na ang barko.” Makapalig-on gid nga mahibaluan nga makontrol ni Jehova ang kinaugali nga mga puersa. Maathag nga mangin maayo gid ang palaabuton sang planeta nga Duta.

16. Ngaa makapalig-on mahibaluan nga ang aton Manunuga kag ang iya panganay nga Anak may gahom sa pagkontrol sa kinaugali nga mga puersa?

¹⁶ Makapalig-on gid hunahunaon ang makatilingala nga gahom sang aton Manunuga kag sang iya “batid nga manugpangabudlay.” Sa sulod sang 1,000 ka tuig, atipanon nila ang duta kag may kasiguruhan na ang tanan nga tawo. Wala na sang makahaladlok nga mga kalamidad. Indi na kita mahadlok nga mahalitan sang mga bagyo, tsunami, paglupok sang bulkan, ukon linog sa bag-o  nga kalibutan. Makalilipay gid hunahunaon ang tion nga indi na makapatay ukon makasamad ang kinaugali nga mga puersa kay “ang tolda sang Dios [mangin] yara sa mga tawo”! (Bug. 21:3, 4) Makasalig kita nga kontrolon sang Cristo paagi sa gahom sang Dios ang kinaugali nga mga puersa sa Milenyo.

17. Ano ang isa ka paagi nga mailog naton ang Dios kag ang Cristo subong?

¹⁷ Siempre, indi naton mapunggan ang mga kalamidad pareho nanday Jehova kag Jesus, pero may gahom man kita. Paano naton ini gamiton? Ang isa ka paagi amo ang pag-aplikar sang Hulubaton 3:27. (Basaha.) Kon nagaantos ang aton mga kauturan, malugpayan naton sila kag mabuligan sa pisikal, sa emosyonal, kag sa espirituwal. (Hulu. 17:17) Halimbawa, mabuligan naton sila pagkatapos sang kalamidad. Pagkatapos naguba sang bagyo ang balay sang isa ka balo nga babayi, talupangda ang ginsiling niya: “Nagapasalamat gid ako nga yara ako sa organisasyon ni Jehova, indi lang bangod sa pisikal nga bulig kundi sa espirituwal man.” Kag talupangda ang ginsiling sang isa ka utod nga dalaga nga nalugaw-an kag naligban sang nakita niya nga naguba ang iya balay bangod sang bagyo. Pagkatapos sia ginbuligan, nagsiling sia: “Daw indi ini mapatihan! Indi ko gid mapabutyag ang akon nabatyagan . . . Salamat, Jehova!” Nalipay kita nga bahin kita sang paghiliutod nga nagaulikid gid sa iban. Kag labaw sa sina, nalipay kita nga si Jehova kag si Jesucristo nagaulikid gid sa katawhan sang Dios.

18. Ngaa dalayawon ang motibo ni Jesus sa paghimo sang mga milagro?

¹⁸ Sa tion sang ministeryo ni Jesus, ginpakita niya nga sia gid “ang gahom sang Dios.” Pero ano ang motibo ni Jesus? Wala gid niya gingamit ang iya gahom para dayawon sang iban ukon para sa iya kaugalingon. Makita sa mga milagro ni Jesus nga palangga niya ang mga tawo. Makita naton ini sa masunod nga artikulo.