SANG nabawtismuhan si Anita * bilang isa ka Saksi ni Jehova, ginpamatukan gid sia sang iya bana. “Wala niya ako ginpatambong sa mga miting kag gindumilian niya ako bisan sa paghambal sang ngalan sang Dios,” siling ni Anita. “Ihambal ko lang ang ngalan ni Jehova, maakig na sia dayon.”

Nangin mabudlay man kay Anita ang pagtudlo sa iya kabataan parte kay Jehova. “Wala ginatugot ang pagsimba kay Jehova sa amon mismo balay. Indi ko puede tudluan ang akon kabataan kag indi ko sila madala sa mga miting.”

Makita sa eksperiensia ni Anita nga isa gid ka pagtilaw sa integridad sang Cristiano ang pagpamatok sang mga miembro sang pamilya. Amo man ang madugay nga pagbalatian, mapatyan sang bata ukon tiayon, ukon pagbiya sang isa ka miembro sang pamilya kay Jehova. Ano ang makabulig sa isa ka Cristiano nga magpabilin nga matutom kay Jehova?

Kon makaeksperiensia ka sini nga mga pagtilaw, ano ang himuon mo? Si apostol Pablo nagsiling: “Kinahanglan nga magbatas kamo.” (Heb. 10:36) Pero ano ang makabulig sa imo nga magbatas?

Ang isa sa panguna nga mga paagi nga makatigayon kita sing kabakod para mabatas ang mga pagtilaw amo ang pagpangamuyo kag pagsalig sa Dios. Binagbinaga ang isa ka halimbawa. May natabo nga trahedya sa pamilya ni Ana sang isa ka Lunes sang hapon. Hinali lang nga napatay ang iya bana nga kaupod niya sa 30 ka tuig. “Wala na sia kapauli halin sa iya obra,” siling ni Ana, “kag 52 anyos pa lang sia.”

Ano ang ginhimo ni Ana? Dapat na sia magtrabaho, kag nakabulig ini bangod kinahanglan sa sini ang pagkonsentrar, pero wala madula ang ginabatyag niya nga kasakit. Nagsiling sia: “Ginsugid ko kay Jehova ang akon nabatyagan kag nagpakiluoy sa iya nga buligan ako nga malandas ang akon grabe nga kasubo.” Ginsabat bala ni Jehova ang iya mga pangamuyo? Kumbinsido sia sa sini. Nagsiling sia: “Ang paghidait nga mahatag lang sang Dios naglugpay kag nagpakalma sa akon. Nagapati gid ako nga banhawon ni Jehova ang akon bana.”—Fil. 4:6, 7.

Ang “Manugpamati sang pangamuyo” nagapromisa nga ihatag niya sa iya mga alagad ang tanan nila nga kinahanglanon para makapabilin nga matutom sa iya. (Sal. 65:2) Indi bala makapabakod gid sang pagtuo ini nga pasalig? Indi bala nagabulig ini sa imo nga mahangpan nga makabatas man ikaw?

Ginabuligan ni Jehova ang iya katawhan paagi sa Cristianong kongregasyon. Halimbawa, sang ginhingabot ang kongregasyon sa Tesalonica, ginpalig-on sila ni Pablo nga ‘padayon nga palig-unon kag pabaskugon ang isa kag isa, subong sang ginahimo na nila.’ (1 Tes. 2:14; 5:11) Paagi sa pagtipon sing tingob sa gugma kag pagbuligay, nalampuwasan sang mga Cristiano sa Tesalonica ang pagtilaw sa ila pagtuo. Maayo gid nga halimbawa sa aton ang ila pagbatas kag may matun-an kita sa sini nga makabulig sa aton nga magbatas.

Ang suod nga pagpakig-abyan naton sa mga miembro sang kongregasyon makabulig sa aton nga mapaambit “ang mga butang nga makapabakod sa isa kag isa.” (Roma 14:19) Importante gid ini sa tion sang kabudlayan. Naeksperiensiahan mismo ni Pablo ang madamo nga kabudlayan, kag ginhatagan sia ni Jehova sing kabakod nga magbatas. May mga tion nga ginpalig-on gid sia sang Dios paagi sa iya mga masigkatumuluo. Halimbawa, sang ginkamusta ni Pablo sa iya sulat ang mga miembro sang kongregasyon sa Colosas, nagsiling sia parte sa ila: “Nagahatag [sila] sing daku nga lugpay sa akon.” (Col. 4:10, 11) Bangod palangga nila si Pablo, ginlugpayan nila sia kag ginpabakod sang yara  sia sa kabudlayan. Mahimo nga may nabaton ka man nga pagpalig-on kag bulig sang mga miembro sang inyo kongregasyon.

May isa pa ka ginahalinan sang bulig nga ginhatag sang Dios sa sulod sang Cristianong kongregasyon—ang mga gulang. Ining hamtong sa espirituwal nga mga utod “kaangay sang palalipdan sa hangin, isa ka duog nga palanaguan sa unos, kaangay sang sapa nga nagailig sa desyerto, kaangay sang landong sang daku nga igang sa kigas nga duta.” (Isa. 32:2) Makapaumpaw gid nga pasalig! Nabaton mo na bala ining mahigugmaon nga aman? Ang pagpalig-on kag bulig sang mga gulang makabulig sa imo nga magbatas.

Siempre, indi makahimo sing milagro ang mga gulang. Indi sila perpekto kag “may mga kaluyahon pareho” sa aton. (Binu. 14:15) Pero daku ang mahimo sang ila pangamuyo para sa aton. (Sant. 5:14, 15) Ang isa ka utod nga lalaki sa Italya nga tinuig na nga nagabatas sang grabe nga balatian nagsiling: “Ang gugma kag pagpalangga sang mga kauturan kag ang ila pirme nga pagbisita nakabulig sa akon nga magbatas.” Makabenepisyo ka pa gid bala sa mahigugmaon nga aman ni Jehova nga mga gulang?

May iban pa kita nga mahimo para makabatas. Isa sini ang mangin regular sa aton espirituwal nga rutina. Binagbinaga ang halimbawa ni John nga 39 anyos kag may kanser. Nagsiling sia: “Pamatyag ko daw gindayaan ako kay bataon pa ako.” Tatlo pa lang ka tuig ang iya bata sadto. “Gani kinahanglan atipanon sang akon asawa indi lamang ang amon bata kundi pati ako, kag updan pa niya ako sa pagpadoktor,” siling ni John. Bangod sang iya pagpa-chemotherapy, nagapalangluya gid sia kag nagasululuka. Indi lang ina. Nagtagumatayon ang tatay ni John kag dapat man atipanon.

Paano nasarangan ni John kag sang iya pamilya ining mabudlay nga sitwasyon? “Bisan pa nagapalangluya ako, ginasiguro ko nga mangin regular ang amon espirituwal nga rutina,” siling niya. “Gintambungan namon ang tanan nga miting, nagpakigbahin kami sa ministeryo kada semana, kag regular ang amon pangpamilya nga pagsimba bisan sa tion nga mabudlay ini.” Nakita gid ni John nga dapat niya palig-unon ang iya espirituwalidad para mabatas ang bisan ano nga problema. May malaygay bala sia sa mga yara man sa mabudlay nga mga kahimtangan? Nagsiling sia: “Pagkatapos magtahaw ang imo una nga reaksion, madula ang imo mga kabalaka paagi sa kusog kag gugma ni Jehova. Pabaskugon ka ni Jehova, pareho sang ginhimo niya sa akon.”

Pat-od gid nga sa bulig sang Dios mabatas naton ang mabudlay nga mga pagtilaw kag mga problema—subong ukon sa palaabuton. Magpangamuyo kita kag magsalig kay Jehova, makig-abyan sa aton mga kauturan sa kongregasyon, mangayo sing bulig sa Cristianong mga gulang, kag mangin regular sa aton espirituwal nga rutina. Kon himuon naton ini, masunod naton ang ginsiling ni Pablo: “Kinahanglan nga magbatas kamo.”