1, 2. Suno kay apostol Juan, paano kita gintudluan sang Dios nga higugmaon sia?

NAGAPATI ang kalabanan nga ang pinakaepektibo nga pagtudlo sang amay sa iya kabataan amo ang paagi sa iya halimbawa. Si apostol Juan nagsulat nga “nagahigugma kita, bangod [ang Dios] ang una nga naghigugma sa aton.” (1 Juan 4:19) Gani maathag nga si Jehova ang pinakamaayo nga halimbawa sa pagpakita sing gugma bilang amay kag nagabulig ini sa aton nga higugmaon man sia.

² Paano ang Dios “una nga naghigugma sa aton”? Si apostol Pablo nagsiling: “Ginpakita sang Dios ang iya gugma sa aton paagi sa pagtugot nga mapatay ang Cristo para sa aton samtang makasasala pa kita.” (Roma 5:8) Paagi sa paghimo sining daku nga sakripisyo—ang paghatag sang iya Anak bilang gawad sa mga nagatuo nga katawhan—ginpakita ni Jehova ang matuod nga kahulugan sang gugma. Ginpakita niya ini paagi sa paghatag nga may pagsakripisyo. Bangod sining daku nga kaayo sang Dios, posible naton mabaton ang iya gugma kag mahigugma man naton sia.—1 Juan 4:10.

3, 4. Paano naton dapat ipakita ang gugma sa Dios?

³ Ang gugma amo ang panguna nga kinaiya ni Jehova, gani ginsilingan ni Jesus ang namangkot sa iya nga ang pinakaimportante nga sugo sang Dios amo: “Higugmaa si Jehova nga imo Dios sa  bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Mar. 12:30) Suno sa ginsiling ni Jesus, ang una nga nadalahig sa aton gugma sa Dios amo ang aton tagipusuon. Wala nalipay si Jehova kon indi bug-os tagipusuon ang paghigugma sa iya. Pero talalupangdon nga ang gugma sa Dios nagadalahig man sang aton bug-os nga kalag, hunahuna, kag kusog. Buot silingon, ang matuod nga gugma sa Dios indi lamang balatyagon sang tagipusuon. Magluwas nga tinagipusuon, ang aton gugma sa Dios dapat nagalakip man sang aton tanan nga ikasarang sa espirituwal kag pisikal. Suno kay manalagna Miqueas, amo ini ang gusto ni Jehova nga ihatag naton.—Basaha ang Miqueas 6:8.

⁴ Paano naton mapakita nga ginahigugma gid naton ang aton langitnon nga Amay? Dapat higugmaon naton sia sing bug-os. Subong sang ginsiling ni Jesus, nagalakip ini sang aton tanan nga ikasarang sa pisikal, emosyonal, kag espirituwal. Sa nagligad nga artikulo, ginbinagbinag naton ang apat ka paagi nga ginpakita ni Jehova ang iya daku nga gugma sa iya mga anak. Binagbinagon naton karon kon paano naton mapakita kag mapadalom ang aton gugma kay Jehova sa paagi nga ginabaton kag ginakahamut-an niya.

⁵ Ano ang ginahimo mo kon makabaton ka sing regalo? Mahimo gid nga ginapabutyag mo ang imo apresasyon. Magluwas sa sini, ginagamit mo gid ang regalo kag wala ini ginabalewala. “Ang tagsa ka maayo nga dulot kag tagsa ka himpit nga regalo halin sa ibabaw,” sulat ni disipulo Santiago, “halin sa Amay sang langitnon nga mga kapawa nga wala nagabag-o kaangay sang pagbag-obag-o sang landong.” (Sant. 1:17) Pirme gid ginahatag ni Jehova ang aton kinahanglanon para mabuhi kag magmalipayon. Indi bala nga nagapahulag ini sa aton nga higugmaon man sia?

⁶ Ang mga Israelinhon gin-atipan ni Jehova sa sulod sang ginatos ka tuig kag ginpakamaayo sila sing bugana, sa materyal kag espirituwal. (Deut. 4:7, 8) Pero, padayon nila nga mabaton ang mga pagpakamaayo kon tumanon nila ang Kasuguan sang Dios, nga nagalakip sang regular nga paghalad kay Jehova sang “pinakamaayo nga una nga mga patubas” sang ila uma. (Ex. 23:19) Gani dapat ipakita sang mga Israelinhon nga ginapabaloran gid nila ang gugma kag mga pagpakamaayo ni Jehova.—Basaha ang Deuteronomio 8:7-11.

⁷ Kamusta kita? Bisan wala ginapatuman sa aton ang literal nga paghalad subong, nagakaigo lamang nga ipakita naton ang aton gugma sa Dios paagi sa pagpadungog sa iya nga ginagamit ang aton “hamili nga mga butang.” (Hulu. 3:9) Paano? Siempre, magamit naton ang aton materyal nga mga butang sa pagsakdag sang hilikuton sang Ginharian sa aton lugar kag sa bilog nga kalibutan. Maayo gid ini nga paagi nga mapakita naton ang aton gugma kay Jehova, manggaranon man kita ukon imol. (2 Cor. 8:12) Pero may iban pa nga paagi nga mapakita naton kay Jehova nga ginahigugma naton sia.

8, 9. Paano ang pagsalig naton sa ginpromisa ni Jehova naangot sa aton gugma sa iya? Maghatag sing halimbawa.

⁸ Ginpahanumdom ni Jesus ang iya mga sumulunod nga indi magkabalaka parte sa ila pagkaon kag panapton kundi padayon nga unahon ang pagpangita sa Ginharian. Nagsiling sia nga nahibaluan sang Amay kon ano gid ang aton kinahanglanon. (Mat. 6:31-33) Ang aton pagsalig sa sini nga promisa nagapakita  kon daw ano kadalom ang aton gugma kay Jehova bangod ang gugma naangot sa pagsalig. Indi naton mahigugma ang isa kon wala kita sing pagsalig sa iya. (Sal. 143:8) Gani mahimo naton pamangkuton ang aton kaugalingon: ‘Ang akon bala nga mga tulumuron kag pagkabuhi nagapakita nga ginahigugma ko gid si Jehova? Ginapakita bala sang paggawi ko sa kada adlaw nga nagasalig ako sa ikasarang niya sa pag-aman sang akon mga kinahanglanon?’

⁹ Ginpakita sang Cristiano nga si Mike ini nga gugma kag pagsalig. Handum gid niya sang bata pa sia nga alagaron ang Dios sa iban nga pungsod. Bisan sang nangasawa sia kag may duha na ka bata, wala gihapon madula ang iya handum. Napalig-on sia sang madamo nga artikulo kag report parte sa pag-alagad diin mas daku ang kinahanglanon, gani nagdesisyon sila sang iya pamilya nga pasimplehon ang ila kabuhi. Ginbaligya nila ang ila balay kag nagsaylo sa apartment. Dayon ginpagamay niya ang iya negosyo sa pagpaninlo kag natun-an niya nga padalaganon ini paagi sa Internet bisan didto sia sa iban nga pungsod. Nagsaylo ang pamilya ni Mike, kag pagligad sang duha ka tuig nga pag-alagad nila sing malipayon sa iban nga pungsod, sia nagsiling: “Naeksperiensiahan namon nga matuod gid ang ginsiling ni Jesus sa Mateo 6:33.”

10. Pareho sang natabo kay Hari David, ano ang resulta kon pamalandungan naton ang kamatuoran parte kay Jehova?

¹⁰ Sang nagligad nga mga 3,000 ka tuig, napahulag si Hari David bangod sang nakita niya sa kalangitan. Sia nagsulat: “Ang kalangitan nagapahayag sang himaya sang Dios; ang kahawaan nagasugid sang iya mga binuhatan.” Ginpamalandungan man niya ang kaalam sa Kasuguan sang Dios, kag nagsiling: “Ang kasuguan ni Jehova himpit, nga nagapasag-uli sang kusog. Ang pahanumdom ni Jehova masaligan, nga nagahatag sing kaalam sa tawo nga kulang sing kinaalam.” Ano ang resulta sang iya pagpamalandong? Si David nagpadayon: “Kabay nga ang akon ginahambal kag ginapamalandungan mangin kalahamut-an sa imo, O Jehova, nga akon Igang kag akon Manunubos.” Maathag nga ginpalangga ni David ang Dios kag nangin suod sia sa iya.—Sal. 19:1, 7, 14.

11. Bilang pagpakita sang gugma sa Dios, ano ang himuon naton sa bugana nga ihibalo parte sa kamatuoran sa Kasulatan nga ginaaman niya subong? (Tan-awa ang piktyur sa umpisa sini nga artikulo.)

¹¹ Pagpakamaayo gid nga madamo kita subong sing nahibaluan parte sa mga tinuga ni Jehova kag sa katumanan sang iya katuyuan. Ginapasanyog sang kalibutan ang mataas nga edukasyon kag dugang pa nga pagtuon sa unibersidad. Pero makita sa eksperiensia sang madamo nga sa masami, nagakadula ang pagtuo kag gugma sang isa sa Dios kon ginapanikasugan niya ini nga mga butang. Pero ginapalig-on kita sang Biblia nga higugmaon indi lamang ang ihibalo, kundi pati man ang kaalam kag paghangop. Buot silingon, gamiton naton ang ihibalo nga ginhatag sang Dios sa aton para makabenepisyo kita kag ang iban. (Hulu. 4:5-7) ‘Kabubut-on sang Dios nga ang tanan nga sahi sang tawo maluwas kag makadangat sa sibu nga ihibalo tuhoy sa kamatuoran.’ (1 Tim. 2:4) Mapakita naton ang aton gugma kay Jehova kon panikasugan naton nga isugid sa tanan ang maayong balita sang Ginharian kag buligan sila nga mahangpan ang dalayawon nga katuyuan sang Dios para sa katawhan.—Basaha ang Salmo 66:16, 17.

12. Paano gin-apresyar sang isa ka pamatan-on ang espirituwal nga mga aman ni Jehova?

¹² Bisan ang mga pamatan-on makapakita sang ila gugma kay Jehova paagi sa pag-apresyar sang iya espirituwal nga mga aman. Si Shannon nagsiling nga sang 11 anyos sia, nagtambong sila sang iya utod nga babayi nga 10 anyos sa “Diosnon nga Debosyon” Distrito  nga Kombension upod sa ila mga ginikanan. Sa isa ka bahin sang programa, ginpapungko ang mga pamatan-on sa pinasahi nga lugar. Daw ginakulbaan sia pero nagpungko sia didto. Dayon nalipay gid sia sang ginhatagan ang kada isa sa ila sing matahom nga libro nga natig-uluhan Questions Young People Ask—Answers That Work. Ano ang epekto sini sa balatyagon ni Shannon kay Jehova nga Dios? Sia nagsiling: “Didto ko narealisar nga matuod gid si Jehova kag palangga gid niya ako.” Si Shannon nagdugang: “Nalipay gid kami kay ang aton gamhanan nga Dios, si Jehova, naghatag sa amon sining matahom kag himpit nga mga regalo!”

13, 14. Paano ang aton reaksion sa laygay ni Jehova nagapakita sang aton gugma sa iya?

¹³ “Ang ginahigugma ni Jehova ginasabdong niya, subong sang ginahimo sang amay sa anak nga nahamut-an niya,” pahanumdom sa aton sang Biblia. (Hulu. 3:12) Pero ano dapat ang aton reaksion sa sini? Matuod gid ang ginsulat ni apostol Pablo: “Sa umpisa wala sing disiplina nga makalilipay, kundi masakit.” Para kay Pablo, importante gid ang disiplina, kay nagdugang sia: “Apang sa ulihi nagapatubas ini sang mahidaiton nga bunga sang pagkamatarong sa mga nahanas sa sini.” (Heb. 12:11) Kon ginahigugma naton si Jehova, indi naton pagbalewalaon ang iya laygay ukon indi kita maghinakit sa sini. Mahimo mabudlay ini para sa iban. Pero mabuligan gid kita sang aton gugma sa Dios.

¹⁴ Sang tion ni Malaquias, madamo nga Judiyo ang wala nag-apresyar sa laygay sang Dios. Nahibaluan nila ang Kasuguan parte sa paghalad pero nangin pabaya sila amo nga kinahanglan sila sabdungon ni Jehova. (Basaha ang Malaquias 1:12, 13.) Daw ano ka serioso ang ila kahimtangan? Pamatii ang ginsiling ni Jehova: “Pakamalauton ko kamo, kag pakamalauton ko ang mga pagpakamaayo sa inyo. Huo, ginpakamalaut ko ang mga pagpakamaayo sa inyo, bangod wala ninyo . . . ginhuptan sa inyo tagipusuon [ang akon sugo].” (Mal. 2:1, 2) Maathag nga malain gid ang resulta kon nangin batasan na naton ukon hungod naton nga ginabalewala ang mahigugmaon nga laygay ni Jehova.

15. Ano nga batasan subong sa kalibutan ang dapat naton likawan?

 ¹⁵ Ang mga tawo subong bugalon kag maiyaiyahon, amo nga indi nila gusto ang laygay kag disiplina. Ang iban gani napilitan lang sa pagbaton sini. Pero ginalaygayan ang mga Cristiano nga ‘untatan na ang pagpadihon sa mga dalanon sang katawhan sini nga sistema sang mga butang.’ Dapat naton hangpon kag sundon ang “himpit nga kabubut-on sang Dios.” (Roma 12:2) Paagi sa organisasyon ni Jehova, ginahatagan niya kita sing kinahanglanon nga laygay sa madamo nga bahin sang aton kabuhi. Halimbawa, ginalaygayan niya kita parte sa aton paggawi sa tuhay nga sekso, sa aton mga kaupdanan, kag sa aton mga kalingawan. Kon handa kita sa pagbaton kag sa pag-aplikar sini nga panuytoy, ginapakita naton nga ginapasalamatan gid naton si Jehova kag ginahigugma gid naton sia.—Juan 14:31; Roma 6:17.

16, 17. (a) Ngaa dapat naton hunahunaon ang kabubut-on ni Jehova kon nagadesisyon? (b) Ano ang ginhimo sang mga Israelinhon nga nagapakita nga wala sila sing gugma kag pagsalig kay Jehova?

¹⁶ Kon nahadlok ang mga bata, nagakadto sila dayon sa ila mga ginikanan. Samtang nagadaku sila, amat-amat nila nga matun-an ang pagsalig sa ila kaugalingon kag paghimo sang mga desisyon. Bahin ini sang ila paghamtong. Pero ang mga suod sa ila mga ginikanan mahimo mangayo gihapon sang opinyon kag laygay sang ila mga ginikanan antes magdesisyon. Amo man sini sa espirituwal. Gin-amanan kita ni Jehova sang iya espiritu, nga nagahatag sa aton “sang handum kag kusog nga himuon kon ano ang iya nahamut-an.” Gani kon magdesisyon kita nga wala anay ginahunahuna ang iya kabubut-on, nagapakita lang ini nga wala kita sing gugma kag pagsalig sa iya.—Fil. 2:13.

¹⁷ Sang tion ni Samuel, napierde sang mga Filistinhon ang Israel sa inaway. Kinahanglan gid sang katawhan sang Dios ang bulig kag pag-amlig. Ano ang ginhimo nila? “Kuhaon naton sa Shilo ang kaban sang katipan ni Jehova, agod yara ini sa aton kag maluwas kita sa kamot sang aton mga kaaway,” siling nila. Ano ang resulta? “Madamo gid ang napatay; 30,000 ka soldado ang napatay sa Israel. Naagaw man ang Kaban sang Dios.” (1 Sam. 4:2-4, 10, 11) Sang gindala sang mga Israelinhon ang Kaban, daw ginapakita nga nagapangayo sila sing bulig kay Jehova. Pero ang matuod, wala nila ginapangayo ang panuytoy ni Jehova kundi ginasunod nila ang ila kaugalingon nga panghunahuna, gani malain gid ang resulta.—Basaha ang Hulubaton 14:12.

18. Ano ang ginatudlo sang Biblia sa imo parte sa pagsalig kay Jehova?

¹⁸ Ginpakita sang salmista ang husto nga panimuot sang nagsulat sia: “Maghulat sa Dios, kay dayawon ko sia subong akon Daku nga Manluluwas. Dios ko, nagakasubo gid ako. Gani nadumduman ko ikaw.” (Sal. 42:5, 6) Ginahigugma gid niya si Jehova! May amo ka man bala sini nga gugma kag pagsalig sa aton langitnon nga Amay? Bisan pa huo ang imo sabat, mahimo mo pa gid pabakuron ang imo pagsalig sa iya suno sa ginsiling sang Biblia sa aton: “Magsalig ka kay Jehova sa bug-os mo nga tagipusuon, kag indi ka magsalig sa imo kaugalingon nga paghangop. Hunahunaa sia sa tanan mo nga dalanon, kag tadlungon niya ang imo mga banas.”—Hulu. 3:5, 6.

19. Paano mo mapakita ang imo gugma kay Jehova?

¹⁹ Una kita nga ginhigugma ni Jehova, gani ginpakita niya sa aton kon paano naton sia higugmaon. Pirme naton dumdumon ang iya maayo gid nga halimbawa. Kag padayon naton nga ipakita ang aton gugma sa iya ‘sa aton bug-os nga tagipusuon kag sa aton bug-os nga kalag kag sa aton bug-os nga hunahuna kag sa aton bug-os nga kusog.’—Mar. 12:30.