1, 2. Suno sa Kasulatan, daw ano ka importante ang gugma?

ANG gugma amo ang panguna nga kinaiya ni Jehova nga Dios. (1 Juan 4:16) Ang una niya nga gintuga amo si Jesus, nga sa sulod sang malawig nga tion nangin kaupod niya sa langit kag nakatuon sang iya mahigugmaon nga mga dalanon. (Col. 1:15) Ginpakita ni Jesus ini nga gugma sa bilog niya nga kabuhi, lakip na sang ari sia sa duta. Gani, makasalig kita nga ang paggahom ni Jehova kag ni Jesus padayon nga mangin mahigugmaon.

² Sang ginpamangkot si Jesus kon ano ang pinakaimportante nga sugo sa Kasuguan, nagsabat sia: “‘Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang nahauna kag pinakaimportante nga sugo. Ang ikaduha, nga kaangay man sini, amo ini: ‘Higugmaa ang imo isigkatawo subong sang imo kaugalingon.’”—Mat. 22:37-39.

3. Sin-o ang aton “isigkatawo”?

³ Talupangda nga nagsiling si Jesus nga ang paghigugma sa isigkatawo ikaduha lang sa paghigugma kay Jehova. Ginapakita sini nga importante gid ang gugma sa tanan naton nga kaangtanan. Pero sin-o ang aton “isigkatawo”? Kon minyo kita, ang aton tiayon amo ang aton pinakamalapit nga isigkatawo. Malapit man sa  aton ang mga bahin sang Cristianong kongregasyon, ang aton mga masigkasumilimba sa matuod nga Dios. Mga isigkatawo man naton ang mga makilala naton sa ministeryo. Paano mapakita sang mga nagasimba kay Jehova kag nagasunod sa mga panudlo sang iya Anak ang gugma sa isigkatawo?

4. Ngaa puede magmadinalag-on ang pag-asawahay bisan indi perpekto ang tawo?

⁴ Ginhimo ni Jehova ang una nga pag-asawahay sang gintuga niya sanday Adan kag Eva kag ginhiusa sila. Katuyuan niya nga mangin malipayon sila kag nahiusa, kag pun-on nila ang duta sang ila mga kaliwat. (Gen. 1:27, 28) Pero, ang pagrebelde sa pagkasoberano ni Jehova may malain nga epekto sa una nga pag-asawahay kag nagresulta ini sa sala kag kamatayon sang tanan nga katawhan. (Roma 5:12) Pero ginasugiran kita sang Kasulatan kon paano magmadinalag-on ang pag-asawahay. Nagaunod ini sing pinakamaayo nga laygay bangod naghalin ini kay Jehova, ang Tagtukod sang pag-asawahay.—Basaha ang 2 Timoteo 3:16, 17.

5. Daw ano ka importante ang gugma sa pag-asawahay?

⁵ Ginapakita sang Pulong sang Dios nga ang gugma—ang pagbatyag sang suod nga kaangtanan ukon pagpalangga—importante gid sa mga tawo para magmalipayon ang ila kaangtanan sa isa kag isa. Matuod gid ini sa pag-asawahay. Nagsiling si apostol Pablo sa kongregasyon: “Ang gugma mapinasensiahon kag mainayuhon. Ang gugma indi mahisaon. Wala ini nagapabugal, wala ini nagapahambog, wala ini nagagawi sing indi nagakaigo, wala ini nagapangita sang kaugalingon nga kaayuhan. Indi ini maakigon. Wala ini nagaisip sang kahalitan. Wala ini nagakalipay sa kalautan, kundi sa kamatuoran. Nagaantos ini sang tanan nga butang, nagapati sang tanan nga butang, nagalaum sang tanan nga butang, nagabatas sang tanan nga butang. Ang gugma wala sing katapusan.” (1 Cor. 13:4-8) Ang pagpamalandong kag pag-aplikar sini pat-od gid nga magadugang sa kalipay sang mag-asawa.

6, 7. (a) Ano ang ginasiling sang Biblia parte sa pagkaulo? (b) Paano dapat pakig-angutan sang Cristianong bana ang iya asawa?

⁶ Bangod sa prinsipio sang pagkaulo sa tanan nga kahimusan sang Dios, importante gid ang gugma. Si Pablo nagpaathag: “Luyag ko nga mahibaluan ninyo nga ang Cristo amo ang ulo sang tagsa ka lalaki; ang lalaki amo ang ulo sang babayi; ang Dios amo ang ulo  sang Cristo.” (1 Cor. 11:3) Pero ang pagkaulo wala nagapahangop nga ikaw na lang tanan ang matuman. Halimbawa, ginagamit ni Jehova ang iya pagkaulo sa Cristo sa mainayuhon nga paagi, gani nagapasakop si Jesus sa iya. Ginaapresyar niya ang pagkamahigugmaon sang Dios bilang ulo, kay sia nagsiling: “Ginahigugma ko ang Amay.” (Juan 14:31) Pat-od gid nga indi amo sini ang batyagon ni Jesus kon nangin matigdas ukon dominante si Jehova sa iya pinalangga nga Anak.

⁷ Bisan pa ang bana amo ang ulo sang iya asawa, ang Biblia nagsiling nga dapat niya ‘padunggan’ ang iya asawa. (1 Ped. 3:7) Ang isa ka paagi nga mapadunggan sang mga bana ang ila asawa amo ang paghunahuna sang ila mga kinahanglanon kag pagpasugot sa ila mga gusto sa pila ka butang. Ang Pulong sang Dios nagasiling: “Mga bana, padayon nga higugmaa ang inyo asawa, subong nga ang Cristo naghigugma man sang kongregasyon kag naghatag sang iya kaugalingon tungod sa sini.” (Efe. 5:25) Huo, bisan gani ang kabuhi ni Jesus ginhatag niya para sa iya mga sumulunod. Kon ilugon sang bana ang pagkamahigugmaon ni Jesus bilang ulo, mas mahapos para sa asawa ang paghigugma, pagtahod, kag pagpasakop sa iya.—Basaha ang Tito 2:3-5.

8. Paano dapat tamdon sang mga sumilimba ni Jehova ang pareho nila nga mga Cristiano?

⁸ Sa bilog nga duta, minilyon ang nagasimba kay Jehova kag nagapanaksi parte sa iya ngalan kag katuyuan. Paano dapat tamdon sang tagsa ka sumilimba ni Jehova ang pareho nila nga mga Saksi? Ang Pulong sang Dios nagsabat: “Himuon naton ang maayo sa tanan, ilabi na sa aton mga masigkatumuluo.” (Gal. 6:10; basaha ang Roma 12:10.) Si apostol Pedro nagsulat: “Bangod sa inyo pagkamatinumanon sa kamatuoran ginpaputli ninyo ang inyo kaugalingon, amo nga may utudnon kamo nga pagpalangga nga indi salimpapaw. Gani karon, maghigugmaanay kamo sing hanuot halin sa tagipusuon.” Ginsilingan man ni Pedro ang iya mga masigkatumuluo: “Labaw sa tanan, maghigugmaanay kamo sing tudok.”—1 Ped. 1:22; 4:8.

9, 10. Ngaa nahiusa ang katawhan sang Dios?

⁹ Bangod may tudok kita nga gugma sa pareho naton nga mga alagad ni Jehova, pinasahi gid ang aton bug-os kalibutan nga organisasyon. Dugang pa, bangod ginahigugma naton si Jehova kag ginatuman naton ang iya mga sugo, ginabuligan niya kita paagi sa pinakagamhanan nga puersa sa uniberso, ang iya balaan nga espiritu, ukon aktibo nga puersa. Ginabuligan kita sini nga mahiusa bilang matuod nga mag-ululutod sa bilog nga kalibutan.—Basaha ang 1 Juan 4:20, 21.

¹⁰ Ginpadaku ni Pablo nga kinahanglan maghigugmaanay ang mga Cristiano sang nagsulat sia: “Isuksok ninyo ang mapinalanggaon nga kaawa, kaayo, pagkamapainubuson, kalulo, kag pagkamapinasensiahon. Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo. Apang dugang pa sa sining tanan, isuksok ninyo ang gugma, kay amo ini ang himpit nga higot sang paghiusa.” (Col. 3:12-14) Nagapasalamat gid kita nga ang gugma—“ang himpit nga higot sang paghiusa”—makita sa tunga naton bisan pa lainlain ang aton gindak-an ukon ginhalinan nga pungsod!

11. Paano ang gugma kag paghiusa nagapakilala sang organisasyon ni Jehova?

¹¹ Ang matuod nga gugma kag paghiusa sang mga alagad ni Jehova ang nagapakilala nga sila ang matuod nga relihion, kay si Jesus nagsiling: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:34, 35) Kag si apostol Juan nagsulat: “Ang mga anak sang Dios kag ang mga anak sang Yawa makilala paagi sa  sini: Ang bisan sin-o nga wala nagapadayon sa paghimo sing pagkamatarong kag wala nagahigugma sa iya utod indi halin sa Dios. Kay amo ini ang mensahe nga nabatian ninyo halin sa ginsuguran, nga dapat naton higugmaon ang isa kag isa.” (1 Juan 3:10, 11) Ang gugma sang mga Saksi ni Jehova nga nagaresulta sa ila tumalagsahon nga paghiusa nagapakita nga matuod sila nga mga sumulunod sang Cristo, kag sila ang ginagamit sang Dios para matuman ang iya katuyuan nga ibantala ang maayong balita sang Ginharian sa bug-os nga duta.—Mat. 24:14.

12, 13. Ano ang ginahimo subong sang “daku nga kadam-an,” kag ano ang maeksperiensiahan nila sa indi madugay?

¹² Ang kalabanan nga alagad ni Jehova bahin sang “daku nga kadam-an . . . Halin sila sa tanan nga pungsod kag tribo kag katawhan kag hambal.” “Nagatindog [sila] sa atubangan sang trono [sang Dios] kag sa atubangan sang Kordero [nga si Jesucristo].” Sin-o sila? “Sila amo ang naggua halin sa dakung kapipit-an. Ginlabhan nila ang ila malaba nga panapton kag ginpaputi ini sa dugo sang Kordero,” kay nagtuo sila sa halad gawad ni Jesus. Ginahigugma sang nagadamo nga miembro sang “daku nga kadam-an” si Jehova kag ang iya Anak kag “nagahimo sila sang sagrado nga pag-alagad sa [Dios] sa adlaw kag gab-i.”—Bug. 7:9, 14, 15.

¹³ Sa indi madugay, laglagon sang Dios ining malaut nga kalibutan sa “dakung kapipit-an.” (Mat. 24:21; basaha ang Jeremias 25:32, 33.) Pero bangod ginahigugma ni Jehova ang iya mga alagad, tipigan niya sila bilang isa ka grupo kag tuytuyan sila pasulod sa iya bag-ong kalibutan. Subong sang gintagna sang nagligad nga halos 2,000 ka tuig, “pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.” Gusto mo man bala mag-istar sa Paraiso kon ‘ang mga butang sang una magtaliwan na’?—Bug. 21:4.

14. Daw ano na kadamo ang daku nga kadam-an?

¹⁴ Sang nagsugod ang katapusan nga mga adlaw sang 1914, pila pa lamang ka libo ang mga alagad ni Jehova sa bilog nga kalibutan. Bangod sa gugma sang pila pa lang ka nagkalabilin nga hinaplas sa ila isigkatawo kag sa bulig sang espiritu sang Dios, nagpadayon sila sa pagbantala sang Ginharian. Gani, natipon subong ang daku nga kadam-an nga may dutan-on nga paglaum. May ara na mga 8,000,000 ka Saksi sa sobra sa 115,400 ka kongregasyon sa bilog nga duta, kag padayon pa kita nga nagadamo. Halimbawa, sobra sa 275,500 ka bag-o nga Saksi ang nabawtismuhan sang 2014 nga tuig sang pag-alagad, buot silingon mga 5,300 ang nabawtismuhan kada semana.

15. Daw ano kasangkad subong ang pagbantala sang Ginharian?

¹⁵ Talalupangdon man ang kasangkaron sang pagbantala. Ang aton nabase sa Biblia nga mga literatura ginahimo subong sa sobra sa 700 ka lenguahe. Ang magasin nga Ang Lalantawan amo ang pinakamadamo nga napanagtag sa bilog nga kalibutan. Sobra sa 52,000,000 ka bilog sini ang ginaimprinta kada bulan, kag ginabalhag ini sa 247 ka lenguahe. Sobra sa 200,000,000 ka libro nga Ano Gid ang Ginatudlo sang Biblia? nga ginagamit sa pagtuon sang Biblia ang naimprinta sa sobra sa 250 ka lenguahe.

16. Ano ang rason sang pag-uswag sa espirituwal sang dutan-on nga bahin sang organisasyon ni Jehova?

¹⁶ Dalayawon ang pag-uswag subong bangod sa aton pagtuo sa Dios kag bug-os nga pagbaton sa Biblia—ang Pulong ni Jehova nga milagruso niya nga ginpasulat. (1 Tes. 2:13) Talalupangdon gid ang pag-uswag sa espirituwal sang katawhan ni Jehova bisan pa ginadumtan sila kag ginapamatukan ni Satanas, ang “dios sini nga sistema sang mga butang.”—2 Cor. 4:4.

17, 18. Ano dapat ang panimuot sang mga alagad sang Dios sa mga indi tumuluo?

¹⁷ Ano dapat ang panimuot sang mga alagad ni Jehova sa mga wala nagasimba sa lamang matuod nga Dios? Sa aton pagbantala, lainlain ang reaksion sang mga tawo—ang iban nagapamati pero ang iban nagapangakig. Pero ano man ang ila reaksion, ginapakita sang Pulong sang Dios kon ano ang dapat himuon sang iya mga alagad. Nagasiling ini: “Maghambal kamo pirme sing mainayuhon, nga daw gintimplahan sing asin, agod mahibaluan ninyo kon paano sabton ang kada isa.” (Col. 4:6) Kon nagapangapin kita sa atubangan sang tanan nga nagapangayo sa aton sang pangatarungan parte sa aton paglaum, ginahimo naton ini “nga may kalulo kag tudok nga pagtahod” bangod ginahigugma naton ang aton isigkatawo.—1 Ped. 3:15.

¹⁸ Ginahigugma gihapon naton ang aton isigkatawo bisan pa wala ginabaton sang akig nga tagbalay ang aton mensahe. Ginailog naton si Jesus: “Sang ginainsulto sia, wala sia magbalos. Sang nagaantos sia, wala sia magpamahog, kundi ginsalig niya ang iya kaugalingon sa Isa [si Jehova] nga nagahukom sing matarong.” (1 Ped. 2:23) Kaupod man naton ang mga kauturan ukon ang iban, ginapakita naton ang pagkamapainubuson kag ginaaplikar naton ini nga laygay: “Indi magbalos sang kahalitan sa kahalitan ukon sang insulto sa insulto. Sa baylo, magbalos kamo sing pagpakamaayo.”—1 Ped. 3:8, 9.

19. Ano nga prinsipio ang gintudlo ni Jesus parte sa mga nagapamatok?

¹⁹ Bangod mapainubuson ang katawhan ni Jehova, ginatuman nila ang importante nga prinsipio nga gintudlo ni Jesus. Sa iya Sermon sa Bukid, nagsiling sia: “Nabatian ninyo nga ginsiling sang una: ‘Higugmaa ang imo isigkatawo kag dumti ang imo kaaway.’ Apang, nagasiling ako sa inyo: Padayon nga higugmaa ang inyo mga kaaway kag padayon nga ipangamuyo ang mga nagahingabot sa inyo, agod mangin anak kamo sang inyo Amay nga yara sa langit, kay ginapabutlak niya ang iya adlaw sa mga malauton kag sa mga maayo. Ginahatagan niya sing ulan ang mga matarong kag mga indi matarong.” (Mat. 5:43-45) Gani bilang mga alagad sang Dios, dapat naton tun-an nga ‘higugmaon ang aton mga kaaway,’ bisan ano pa ang ila panimuot sa aton.

20. Ngaa magapangibabaw sa bag-ong kalibutan ang gugma sa Dios kag sa isigkatawo? (Tan-awa ang piktyur sa umpisa sini nga artikulo.)

²⁰ Sa tanan nga bahin sang kabuhi sang katawhan ni Jehova, dapat nila ipakita nga ginahigugma nila si Jehova kag ang ila isigkatawo paagi sa ila panimuot kag mga buhat. Halimbawa, bisan pa wala ginabaton sang pila ang mensahe sang Ginharian, ginapakita gihapon naton sa ila ang gugma sa isigkatawo kon kinahanglan nila ang bulig. Si apostol Pablo nagsulat: “Dapat wala kamo sing bisan ano nga utang kay bisan sin-o, luwas lang sa utang nga maghigugmaanay kamo; kay sia nga nagahigugma sa iya isigkatawo nakatuman sa kasuguan. Kay ang mga sugo, ‘Indi ka magpanghilahi, indi ka magpatay, indi ka magpangawat, indi ka maghamkon,’ kag ang tanan iban pa nga sugo natingob sa sini nga sugo: ‘Higugmaa ang imo isigkatawo subong sang imo kaugalingon.’ Ang tawo nga may gugma wala nagahimo sing malain sa iya isigkatawo; gani ang gugma amo ang katumanan sang kasuguan.” (Roma 13:8-10) Bilang mga Saksi ni Jehova, ginapakita naton ang matuod nga gugma bisan pa nabahinbahin, masingki, kag malaut ining kalibutan nga ginakontrol ni Satanas. (1 Juan 5:19) Pat-od gid nga sa bag-ong kalibutan, ang gugma amo na ang magapangibabaw sa tanan nga hilikuton sa duta kon madula na si Satanas, ang mga demonyo, kag ang nagrebelde nga mga tawo. Mangin pagpakamaayo gid kon ang tanan nga pumuluyo sang duta nagahigugma sa Dios kag sa ila isigkatawo!