Nabasa mo na bala sing maayo ang ulihi nga mga gua sang Ang Lalantawan? Kon amo, tilawi kon masabat mo ang masunod nga mga pamangkot:

Kon mag-abot na ang katapusan, ano nga mga butang ang matapos?

Ang pila sa matapos amo ang napaslawan nga mga gobierno sang tawo, inaway kag inhustisya, mga relihion nga nagpaslaw sa Dios kag sa mga tawo, kag ang indi diosnon nga katawhan.—5/1, p. 3-5.

Sin-o si Gog sang Magog nga ginsambit sa libro sang Ezequiel?

Ang ngalan nga Gog sang Magog nagapatuhoy, indi kay Satanas, kundi sa paghimbon sang mga pungsod nga magatinguha sa pagpapas sa katawhan sang Dios pagkatapos nga magsugod ang dakung kapipit-an.—5/15, p. 29-30.

Ano ang anom ka kinaiya nga makabulig sa isa nga mangin malipayon bisan sa katigulangon?

Ang Biblia nagarekomendar nga dapat kita mangin (1) maugdang, (2) balanse, (3) positibo, (4) maalwan, (5) mainabyanon, kag (6) mapinasalamaton. Ang pagpakita sini nga mga kinaiya makabulig sa isa nga mangin malipayon bisan sa katigulangon.—6/1, p. 8-10.

Paano makita ang kaalwan ni Jesus sa iya mga milagro?

Sa kasal sa Cana, ginhimo ni Jesus nga alak ang mga 100 ka galon (380 ka litro) nga tubig. Isa pa ka bes, ginpakaon niya sing milagruso ang masobra 5,000 ka tawo. (Mat. 14:14-21; Juan 2:6-11) Gin-ilog niya sa sining mga higayon ang kaalwan sang iya Amay.—6/15, p. 4-5.

Ngaa makapat-od kita nga mapahamut-an naton ang Dios bisan pa indi kita himpit?

Sanday Job, Lot, kag David nakahimo sing sala. Pero luyag nila nga alagaron ang Dios, naghinulsol sila sa ila mga sala, kag ginbag-o ang ila paggawi. Ginkahamut-an sila sang Dios, kag amo man kita.—7/1, p. 12-13.

Ang kalaglagan bala sang Babilonia nga Daku magaresulta sa kamatayon sang tanan nga miembro anay sang butig nga mga relihion?

Indi. Ginapakita sang Zacarias 13:4-6 nga mahimo nga ang pila ka klero magabiya sang ila relihioso nga pagkabuhi kag magapanghiwala nga bahin sila sang butig nga relihion.—7/15, p. 15-16.

Ngaa nagpasugot si Barak nga makig-away kon maupod si Debora sa iya?

May pagtuo si Barak. Sa baylo nga mangayo kay Jehova sing dugang nga armas, luyag niya nga mag-upod sa iya ang tiglawas sang Dios nga si Debora para pabakuron sia kag ang iya mga tinawo. (Huk. 4:6-8; 5:7)—8/1, p. 13.

Ano ang pila ka butang nga mapamalandungan sang isa ka Cristiano?

Ang pila sini amo ang pagpanuga ni Jehova, balor sang iya Pulong, pribilehiyo sang pangamuyo, kag ang iya mahigugmaon nga aman sang gawad.—8/15, p. 10-13.

Paano maaplikar ang prinsipio nga maglikaw sa pagpakig-upod sa malain nga mga tawo kon nagadeyt?

Luyag naton nga magpakita sing kaayo sa mga indi tumuluo. Pero supak sa panuytoy sang Dios nga magdeyt sa indi dedikado sa iya kag wala nagasunod sa iya mga talaksan. (1 Cor. 15:33)—8/15, p. 25.

Ngaa nagluya ang pagtuo ni Pedro, pero paano niya ini napabakod liwat?

Nakalakat sa tubig si apostol Pedro pakadto kay Jesus bangod sa pagtuo. (Mat. 14:24-32) Pero sang nakita ni Pedro ang unos, hinadlukan sia. Dayon nagtulok sia liwat kay Jesus kag nagpabulig.—9/15, p. 16-17.

Ang Binuhatan 28:4 nagsiling nga ang mga tawo sa Malta naghunahuna nga manugpatay sing tawo si apostol Pablo. Ngaa?

Sang ginkagat sang dalitan nga man-ug si Pablo, mahimo nga sayop sila nga naghinakop nga ginsilutan sia sang diosa sang hustisya nga si Dike.—10/1, p. 9.

Ano ang natun-an naton sang natublag si Marta sa madamo nga hilikuton?

Masako sadto si Marta sa paghanda sang madamo nga pagkaon. Si Jesus nagsiling nga ginpili sang iya utod ang maayo nga bahin paagi sa pagpamati kay Jesus. Indi naton dapat pagtugutan nga matublag sang indi importante nga mga butang ang aton espirituwal nga mga hilikuton.—10/15, p. 18-20.