Ang Ginapangabay sang Bug-os nga Kalibutan
Ang Ginapangabay sang Bug-os nga Kalibutan
HANDURAWA nga pareho ang ginapangabay sang minilyon ukon binilyon pa gani ka tawo. Ginapangabay nila sa labing mataas nga awtoridad sa uniberso nga ihatag ang isa ka espesipiko nga butang nga ginapangayo nila. Apang, pila lamang sa ila ang nakahibalo sang ila ginapangabay. Posible bala nga matabo ini? Ang matuod, amo sini ang nagakatabo adlaw-adlaw. Ano ang ginapangabay sini nga mga tawo? Ang pag-abot sang Ginharian sang Dios!
Suno sa isa ka pagbanabana, mga 37,000 ka relihion ang nagatawag sang ila kaugalingon nga Cristiano, kay suno sa ila si Jesucristo ang ila Lider. Kapin sa dos bilyones ang mga miembro sini nga mga relihion. Madamo gid sa ila ang nagapangadi sang masami ginatawag nga Amay Namon. Nahibaluan mo bala ini nga pangadi ukon pangamuyo? Gintudlo ini ni Jesus sa iya mga sumulunod, kag amo sini ang umpisa: “Amay namon nga yara sa langit, pakabalaanon ang imo ngalan. Magkari ang imo ginharian. Matuman ang imo kabubut-on sa duta, subong sang sa langit.”—Mateo 6:9, 10.
Sa sulod sang ginatos ka tuig, ginasulitsulit sang mga miembro sang Cristiandad ini nga mga tinaga sa ila simbahan. Hugot sa tagipusuon nga ginapangadi nila ini subong pamilya kag subong mga indibiduwal, sa maayo kag malain nga panahon. Bisan pa saulado ini sang madamo, wala sila makahangop kon ano gid ang buot silingon sini. Apang, indi lamang sila ang nagalaum kag nagapangamuyo sa pagkari sang Ginharian sang Dios.
Ginapangabay Man Ini sang Iban nga mga Relihion
Ang bantog nga pangadi sang mga Judiyo amo ang Kaddish. Bisan pa wala ini sing direkta nga kaangtanan sa kamatayon ukon kalisod, kinaandan na nga ginapangadi ini kon may Judiyo nga mamatyan. Amo sini ang ila pangadi: “Kabay nga tukuron [sang Dios] ang iya Ginharian sa imo panahon . . . sa madali gid.” * Ang isa pa ka pangadi sa dumaan nga sinagoga nagasambit sang paglaum sa Ginharian sang Mesias nga gikan sa panimalay ni David.
Naluyagan sang iban nga indi Cristiano ang ideya tuhoy sa Ginharian sang Dios. Suno sa The Times of India, ang isa ka lider sang relihion sa India sang ika-19 siglo nga interesado nga maghiusa ang Hindu, Muslim, kag Cristiano nga mga relihion, nagsiling: “Indi gid matuman ang matuod nga ginharian sang Dios kon indi maghiusa ang sidlangan kag katundan.” Kag ang prinsipal sa isa ka kolehiyo sang Islam sa Strathfield, Australia, nagsulat kasan-o lang sa isa ka peryodiko: “Kaangay sang tanan nga Muslim, nagapati ako [nga] mabalik si Jesus kag tukuron niya ang matuod nga Ginharian sang Dios.”
Indi maduhaduhaan nga binilyon karon ang nagalaum kag nagapangabay sa pag-abot sang Ginharian sang Dios. Apang binagbinaga ining makawiwili nga butang.
Mahimo gid nga nahibaluan ninyo nga ang mga Saksi ni Jehova, nga nagabalhag sini nga magasin, nagapamalaybalay sa inyo komunidad agod makighambal sa mga tawo tuhoy sa Biblia. Ginahimo namon ini karon sa bug-os nga kalibutan, sa 236 ka kadutaan kag sa kapin sa 400 ka lenguahe. Ang panguna nga tema sang amon pagbantala amo ang Ginharian sang Dios. Sa katunayan, talupangda nga ang bug-os nga titulo sini nga magasin amo Ang Lalantawan Nagabantala Sang Ginharian ni Jehova. Masami namon ginapamangkot ang mga tawo kon bala ginapangamuyo nila ini nga Ginharian. Madamo ang nagasabat sing huo. Apang, kon pamangkuton sila gani kon ano ini nga ginharian, ang kalabanan sa ila nagasabat sing “ambot,” ukon indi sila sigurado sa ila sabat.
Ngaa madamo ang nagapangabay sang butang nga indi nila mapaathag? Bangod bala masibod kag indi maathag ang ideya tuhoy sa Ginharian sang Dios? Indi. Maid-id nga ginapaathag sang Biblia kon ano ang Ginharian. Dugang pa, ang mensahe sang Biblia tuhoy sa Ginharian makahatag sa imo sing matuod nga paglaum walay sapayan sang magamo nga panahon karon. Tan-awon naton kon paano ginapaathag sang Biblia sa masunod nga artikulo ini nga paglaum. Nian, mahibaluan naton kon san-o sabton ang pangamuyo ni Jesus para sa pag-abot sang Ginharian.
[Footnote]
^ par. 6 Kaangay sang modelo nga pangamuyo nga ginhatag ni Jesus, ginapangabay man sa pangadi nga Kaddish ang pagpakabalaan sa ngalan sang Dios. Bisan pa ginabaisan kon bala ang pangadi nga Kaddish nagsugod sang panahon ni Cristo ukon antes sini, indi kita makibot kon nagaanggid ini sa modelo nga pangamuyo. Ang pangamuyo ni Jesus wala gintuyo nga mangin pinasahi. Ang tagsa ka pangabay nga ginasambit sa sini nga pangamuyo ginpasad sa Kasulatan nga matigayon sadto sang tanan nga Judiyo. Ginpalig-on ni Jesus ang iya kasimanwa nga mga Judiyo nga ipangamuyo ang mga butang nga dapat ginapangamuyo nila antes mag-abot si Jesus.
