Paumpaw sa Mapait nga Inagihan

Panugiron ni Eusebio Morcillo

Sang Septiembre 1993, nagduaw ako sa isa ka guardiado gid nga prisuhan. Adlaw yadto sang bawtismo sang isa ka priso, nga amo ang akon manghod nga si Mariví. Nagalantaw lamang ang mga priso kag mga opisyal samtang ginahimo ko ang pagbawtismo. Apang antes ko ipaathag kon ngaa yari kami diri, sugiran ko kamo anay sang amon inagihan.

NATAWO ako sa Espanya sang Mayo 5, 1954. Panganay ako sa walo ka mag-ulutod kag ikatlo si Mariví. Ginpadaku kami sang amon lola subong debotado nga mga Katoliko, kag nalipay ako nga dumdumon nga debotado ako sa Dios sang upod ko si Lola. Apang tuhay gid ang kahimtangan sa puluy-an upod sa akon mga ginikanan. Pirme ginasakit ni Tatay si Nanay kag pati man kami nga kabataan. Bahin na sang amon kabuhi ang kahadlok, kag nasakitan gid ako makita nga nagaantos si Nanay.

Sa eskwelahan, nadugangan pa gid ang akon kasakit. Ginabunggo sang manunudlo nga pari ang amon ulo sa dingding kon sala amon sabat. Ginaabusuhan sa sekso sang isa pa gid ka pari ang iya mga estudyante samtang nagarepaso sang ila asaynment. Dugang pa, indi ko mahangpan kag nahadlok ako sa panudlo sang mga Katoliko tuhoy sa kalayuhon nga impierno. Bangod sini amat-amat nga nadula ang akon pagtuo sa Dios.

Nasiod sa Walay Pasingadtuan nga Kabuhi

Bangod nga wala sing nagagiya sa akon sa husto nga paggawi nga ginakahamut-an sang Dios, nag-upod-upod ako sa imoral kag masingki nga mga tawo sa mga diskohan. Pirme lang may engkuentrohanay nga ang mga armas nga ginagamit amo ang sundang, kadena, baso kag bangko. Bisan pa wala ako mag-entra sa sini nga mga inaway, isa ka bes, naigo ako kag nadulaan sing animo.

Sang ulihi tinak-an na ako sa sini nga palibot kag nagpangita sing medyo malinonglinong nga diskohan. Apang, bisan sa sini nga mga duog ordinaryo na lang ang ilegal nga droga. Sa baylo nga maglinong ang akon hunahuna kag mangin malipayon, daw nagbuangbuang ako kag nangin nerbioso sang maggamit ako sing droga.

Bisan pa wala ako malipay sa sini nga sahi sang  pagkabuhi gin-engganyo ko gihapon ang akon manghod nga si José Luis kag ang suod ko nga abyan nga si Miguel. Upod sa iban pa nga mga pamatan-on sa Espanya, nasiod kami sa sining garok nga kalibutan. Bisan ano lang himuon ko agod may ibakal sing droga. Makahuluya gid ang akon pagkabuhi.

Ginluwas Ako ni Jehova

Sa sini nga tion, nagpakigsugilanon ako sa akon mga abyan tuhoy sa pagluntad sang Dios kag sa katuyuan sang kabuhi. Nagsugod ako sa pag-usisa tuhoy sa Dios paagi sa pagpangita sa iban nga makahangop sa akon. Natalupangdan ko nga tuhay si Francisco sa iban nga katrabaho ko. Daw malipayon sia, bunayag, kag mainayuhon, amo nga sia ang akon ginsugilanon. Isa ka Saksi ni Jehova si Francisco, kag ginhatagan niya ako sing kopya sang Ang Lalantawan nga may artikulo tuhoy sa droga.

Sa tapos mabasa ang artikulo, nangamuyo ako sa Dios: “Ginuo, nahibaluan ko nga nagaluntad ka, kag luyag ko makilala ka kag himuon ang imo kabubut-on. Buligi ako palihug!” Gingamit ni Francisco kag sang iban nga mga Saksi ang Biblia agod mapalig-on ako, kag ginhatagan ako nila sing pasad sa Biblia nga mga publikasyon para basahon. Narealisar ko nga ang ginaaman nila nga bulig sa akon amo ang ginpangayo ko sa Dios. Wala madugay ginapaambit ko na kay José Luis kag sa akon mga abyan ang tuhoy sa mga butang nga akon ginatun-an.

Isa ka adlaw, sang manugbiya na ako halin sa isa ka rock concert upod sa pila ka mga abyan, nagpain ako sa grupo. Ginlantaw ko sila nga daw subong nga wala ako sing labot sa ila, kag nakamarasmas ako kon daw ano kalain sang amon pagginawi bangod sa impluwensia sang droga. Sadto mismo nga tion, namat-od ako nga sikwayon ang amo nga pagkabuhi kag mangin isa sa mga Saksi ni Jehova.

Nangayo ako sing Biblia kay Francisco, kag ginhatagan niya ako sini upod ang libro nga Ang Kamatuoran nga Nagadul-ong sa Kabuhi nga Dayon. * Sang nabasahan ko ang saad sang Dios nga pahiran niya ang tagsa ka luha kag dulaon bisan pa ang kamatayon, wala gid ako magduhaduha nga nasapwan ko ang kamatuoran nga makahilway sa katawhan. (Juan 8:32; Bugna 21:4) Sang ulihi, nagtambong ako sa miting sa Kingdom Hall sang mga Saksi ni Jehova. Nagdayaw gid ako sa mainabyanon kag mainit nga pag-abiabi sa akon.

Nalangkag gid ako nga ipaambit sa iban ang akon eksperiensia sa Kingdom Hall, amo nga dalidali nga gintipon ko ang akon mga abyan kag si José Luis kag ginsugiran sila tuhoy sini. Pila ka adlaw sang ulihi, nagtambong kami tanan sa miting. Sa atubang sang ginapungkuan namon, may isa ka babayi nga nagapungko kag nagbalikid sa amon. Hilmunon gid nga nakibot sia sang makita kami nga mga hippie nga malagba sing buhok, kag wala na gid sia nagbulubalikid. Mahimo nasorpresa gid sia sang magbalik kami sa Kingdom Hall sang masunod nga semana, kay sa amo nga tion nakaamerikana na kami kag nakakurbata.

Wala madugay, ako kag si Miguel nagtambong sa sirkito nga asambleya sang mga Saksi ni Jehova. Wala pa gid kami makaeksperiensia nga mangin bahin sang matuod nga paghiliutod sang tanan nga sahi sang tawo. Kag makapakibot pa gid kay didto mismo ginhiwat ang asambleya diin kami nagtambong sang rock concert. Apang sa sini nga okasyon, tuhay gid ang palibot kag  makapaumpaw gid ang musika nga nabatian namon.

Kami tanan sa grupo nagsugod sa pagtuon sing Biblia. Mga walo ka bulan sang ulihi, sang Hulyo 26, 1974, nagpabawtismo kami ni Miguel. Lunsay kami 20 anyos. May apat pa sa amon grupo ang nabawtismuhan pagligad sang pila ka bulan. Ang paghanas gikan sa Biblia nagpahulag sa akon nga buligan ang akon mainantuson nga iloy sa iya hilikuton sa balay kag ipaambit sa iya ang akon bag-o nga pagtuo. Nagsuod kami ni Nanay. Ginhugod ko man ang akon tion sa pagbulig sa akon mga manghod.

Sang ulihi, si Nanay kag kami tanan nga mag-utod luwas sa isa lang namon ka utod nga lalaki nakatuon sang kamatuoran sang Biblia kag nagpabawtismo subong mga Saksi ni Jehova. Sang 1977, nagpakasal kami ni Soledad. Sia yadtong babayi nga nakibot sang makita niya kami sang una nga bes nga pagtambong namon sa Kingdom Hall. Pila ka bulan sang ulihi, lunsay nangin payunir kami, ang pagtawag sang mga Saksi ni Jehova sa bug-os tion nga mga manugbantala sang maayong balita.

Nabuligan ang Isa nga Pinalangga

Ang akon manghod nga babayi nga si Mariví gin-abusuhan sa sekso sang bata pa sia, kag ining makangilidlis nga inagihan nag-apektar gid sa iya. Subong pamatan-on, nangin imoral ang iya pagkabuhi kag nadalahig sia sa droga, pagpangawat, kag prostitusyon. Sa edad nga 23, ginpriso sia, kag didto padayon sia sa iya balingag nga pagkabuhi.

Sadto man nga tion, nagaalagad ako subong manugtatap sang sirkito, nga nagaduaw sa mga kongregasyon sang mga Saksi ni Jehova. Sang 1989, gin-asayn kami ni Soledad sa duog malapit sa prisuhan ni Mariví. Bag-o lang ginkuha sang mga awtoridad ang iya anak nga lalaki, amo nga nahanusbo gid sia, kag wala na sing gana pa nga mabuhi. Isa ka adlaw ginbisitahan ko sia kag ginpanugda nga magtuon kami sing Biblia, kag nagpasugot sia. Pagligad sang isa ka bulan nga pagtuon, gin-untatan niya ang droga kag pagpanigarilyo. Nalipay gid ako nga makita nga ginhatagan sia ni Jehova sing kusog nga bag-uhon ang iya kabuhi.—Hebreo 4:12.

Wala madugay sugod sang nagtuon si Mariví, ginpaambit man niya sa iban nga priso kag mga opisyal ang iya natun-an nga kamatuoran sa Biblia. Bisan pa nga ginsaylosaylo sia sing prisuhan, padayon gihapon sia nga nagbantala. Sa isa gani ka prisuhan nagpanaksi sia sa tagsa ka selda. Sa sulod sang tinuig, naghiwat si Mariví sing mga pagtuon sa Biblia sa madamo nga priso sa nanuhaytuhay nga mga prisuhan.

Isa ka adlaw ginsugiran ako ni Mariví nga luyag na niya magdedikar sang iya kabuhi kay Jehova kag magpabawtismo. Apang wala sia gintugutan nga maggua sa prisuhan, kag wala man gintugutan ang bisan sin-o nga magsulod agod magbawtismo sa iya. Ginbatas niya ang apat pa ka tuig sa sulod sining garok nga kahimtangan sang prisuhan. Ano ang nagpabakod sang iya pagtuo? Sa amo man nga tion nga nagahiwat ang lokal nga kongregasyon sing miting, ginarepaso man niya ang pareho nga programa sa iya selda. May regular kag personal man sia nga pagtuon sing Biblia kag pagpangamuyo.

Sang ulihi, ginsaylo si Mariví sa isa ka guardiado gid nga prisuhan nga may swimming pool. Nagpati sia nga sa sining bag-o nga kahimtangan makapabawtismo na sia. Kag amo gid ang natabo, ginpahanugutan si Mariví. Amo kon ngaa yari ako diri sa sini nga tion nga nagahatag sing pamulongpulong para sa iya bawtismo. Kaupod niya ako sa sining pinakaimportante nga tion sang iya kabuhi.

Bangod sang pagkabuhi niya anay, natapikan si Mariví sang balatian nga AIDS. Apang, bangod sang iya maayo nga pagginawi nahilway sia sing mas temprano sang Marso 1994. Nagpuyo sia upod kay Nanay kag aktibo nga nag-alagad subong isa ka Cristiano tubtob sa iya kamatayon mga duha ka tuig sang ulihi.

 Paglandas sa Makahalalit nga Balatyagon

Sa akon bahin, wala ko man nalikawan ang resulta sang akon anay nga pagkabuhi. Ang kapintas ni Tatay kag ang akon estilo sang pagkabuhi sang pamatan-on ako nag-apektar sa akon personalidad. Sang may edad na ako, pirme ako ginakonsiensia kag wala sing salig sa kaugalingon. May tion nga napung-awan gid ako. Apang, daku gid ang nabulig sang Pulong sang Dios agod mabatuan ko ining makatulublag nga balatyagon. Sa sulod sang mga tinuig, ang pagpamalandong sa mga teksto subong sang Isaias 1:18 kag Salmo 103:8-13 ang pirme nga nakabulig sa akon kon ginakonsiensia ako.

Daku man nga bulig ang pagpangamuyo kay Jehova kon ginabatyag ko nga daw wala na gid ako sing pulos. Nagahilibion ako nga nagapangamuyo kay Jehova. Walay sapayan sini, ang mga pulong nga narekord sa 1 Juan 3:19, 20 nagpabakod sa akon: “Paagi sini mahibaluan naton nga kita iya sang kamatuoran, kag mapasalig naton ang aton tagipusuon sa atubangan niya tuhoy sa bisan ano nga ginapakamalaut kita sang aton tagipusuon, bangod ang Dios labaw pa sa aton tagipusuon kag nakahibalo sang tanan nga butang.”

Bangod nagdangop ako sa Dios nga may “boong kag mahinulsulon” nga tagipusuon, narealisar ko nga indi man gid gali ako malain. Ginapasalig sang Biblia ang tanan nga nagapangita kay Jehova nga wala niya ginatamay ang bisan sin-o nga sinsero nga nagahinulsol sa iya daan nga pagginawi kag nagahimo sang iya kabubut-on.—Salmo 51:17.

Kon nagapangduhaduha ako, ginatinguhaan ko nga mangin positibo paagi sa paghunahuna sang sagrado nga mga butang nga ginsambit sa Filipos 4:8. Ginsaulo ko ang Salmo 23 kag ang Sermon sa Bukid. Kon magsugod na ako sa paghunahuna sing negatibo nga mga butang, ginasambit ko sa akon kaugalingon ini nga mga Kasulatan. Ang pagdula sining negatibo nga mga butang sa akon hunahuna nakabulig gid sa tion nga indi ako makatulog.

Ang isa pa ka bulig amo ang komendasyon gikan sa akon asawa kag iban pa hamtong nga mga Cristiano. Bisan pa nga sa primero mabudlay para sa akon nga batunon ang ila mga pagpalig-on, ang Biblia nagpahangop sa akon nga ang gugma “ginapatihan ang tanan nga butang.” (1 Corinto 13:7) Kag siempre pa, amat-amat ko nga natun-an nga batunon ang akon mga kaluyahon kag mga limitasyon.

Ang isa ka benepisyo sang akon pagpakigbato sa sining makahalalit nga mga balatyagon amo nga nangin mahinuklugon ako sa akon mga masigkatumuluo samtang ginaduaw ko sila. Ako kag ang akon asawa lunsay naghinguyang sing halos 30 ka tuig subong bug-os tion nga mga ministro sang maayong balita. Ang kalipay nga natigayon ko sa pag-alagad sa iban nagbulig sa akon nga indi tanto maapektuhan sang makahalalit nga balatyagon kag sang akon mapait nga inagihan.

Karon, kon balikdon ko ang nagligad kag isipon ang tanan nga pagpakamaayo ni Jehova para sa akon, labi pa gid ako nga nagabatyag kaangay sang salmista: “Pakamaayoha ang GINOO, . . . nga nagapatawad sang tanan mo nga kalautan, nga nagaayo sang tanan mo nga balatian, nga nagatubus sang imo kabuhi sa kalaglagan, nga nagapurungpurung sa imo sing malig-on nga paghigugma kag malolot nga mga kalooy.”—Salmo 103:1-4.

[Footnote]

[Blurb sa pahina 30]

Pirme ako ginakonsiensia kag wala sing salig sa kaugalingon. Apang, daku gid ang nabulig sang Pulong sang Dios agod mabatuan ko ining makatulublag nga balatyagon

[Piktyur sa pahina 27]

Ang akon utod nga si José Luis kag abyan nga si Miguel lunsay nag-ilog sang akon malain kag maayo nga halimbawa

[Piktyur sa pahina 28, 29]

Ang pamilya Morcillo sang 1973

[Piktyur sa pahina 29]

Si Mariví subong isa ka priso

[Piktyur sa pahina 30]

Upod sa akon asawa, si Soledad