San-o Maabot ang Ginharian sang Dios?

“GINUO, ipasag-uli mo bala ang ginharian sa Israel sa sini nga tion?” (Binuhatan 1:6) Luyag gid mahibaluan sang mga apostoles kon san-o tukuron ni Jesus ang iya Ginharian. Sa karon, pagligad sang mga 2,000 ka tuig, luyag gihapon mahibaluan sang mga tawo: San-o maabot ang Ginharian sang Dios?

Sanglit ang tema sang ginbantala ni Jesus amo ang Ginharian, ayhan ginapaabot mo nga ginpaathag niya ini nga pamangkot. Kag amo matuod! Madamo nga beses nga naghambal sia tuhoy sa isa ka talalupangdon nga hut-ong sang tion nga gintawag niya nga iya “presensia.” (Mateo 24:37) Naangot gid ini nga presensia sa pagtukod sa Mesianiko nga Ginharian. Ano ining presensia? Binagbinagon naton ang apat ka kamatuoran nga ginasugid sang Biblia tuhoy sa presensia ni Cristo.

1. Ang presensia ni Cristo magasugod pagligad pa sang malawig nga tion sa tapos sia mapatay. Naghatag si Jesus sing isa ka ilustrasyon diin ginpaanggid niya ang iya kaugalingon sa isa ka tawo nga “naglakbay sa malayo nga kadutaan agod magtigayon sang ginharian.” (Lucas 19:12) Paano natuman ining matagnaon nga ilustrasyon? Si Jesus napatay kag ginbanhaw; nian, naglakbay sia padulong sa “malayo nga kadutaan,” buot silingon, sa langit. Subong sang gintagna ni Jesus sa kaanggid man sini nga ilustrasyon, ang iya pagbalik nga may gahom sa ginharian mahanabo “pagligad sang malawig nga tion.”—Mateo 25:19.

Mga pila ka tuig sa tapos makakayab si Jesus sa langit, nagsulat si apostol Pablo: “Ini nga tawo [si Jesus] nagdulot sang isa lang ka halad tungod sa mga sala sing wala katapusan kag naglingkod sa tuo sang Dios, nga sugod sadto nagahulat tubtob nga  ang iya mga kaaway mabutang nga palatungan sang iya mga tiil.” (Hebreo 10:12, 13) Gani, pag-abot ni Jesus sa langit, naghulat sia sing malawig nga tion. Natapos sang ulihi ini nga paghulat sang gintangdo ni Jehova nga Dios ang iya Anak nga amo ang mangin Hari sa madugay na ginsaad nga Mesianiko nga Ginharian. Sadto nagsugod ang presensia ni Cristo. Nakita bala sang mga tawo sa duta ining makakulunyag nga hitabo?

2. Indi makita sang mga tawo ini nga presensia. Indi bala nga ginsugid na ni Jesus kon ano ang mangin tanda sang iya presensia? (Mateo 24:3) Kon ang presensia ni Jesus makita man lang gali sang tawo, kinahanglan pa bala ang tanda? Subong ilustrasyon: Handurawa nga nagalakbay ka padulong sa dagat. Sa dalanon, mahimo makakita ka sing mga karatula nga nagahatag sa imo sing direksion, apang kon makalab-ot ka na sa higad sang baybay kag nagaatubang sa imo ang daw wala katapusan nga dagat, paabuton mo pa bala nga makakita ka sing karatula nga nagatudlo sa dagat kag may sulat nga “Dagat”? Siempre, indi na! Kinahanglan pa bala ang karatula kon nakita mo na ang ginapangita mo?

Ginlaragway ni Jesus ang tanda sang iya presensia, indi agod ipakita sa tawo ang butang nga makita nila, kundi agod mahantop nila ang butang nga matabo sa langit. Gani, nagsiling sia: “Ang ginharian sang Dios indi mag-abot nga madali matalupangdan.” (Lucas 17:20) Kon amo, paagi sa tanda, paano mahibaluan sang mga tawo sa duta nga nagsugod na ang presensia ni Cristo?

3. Ang daku nga kagamo diri sa duta mangin tanda sang presensia ni Jesus. Nagsiling si Jesus nga ang mga tanda sa duta nga nagsugod na ang iya presensia subong Hari sa langit amo ang mga inaway, mga tiggulutom, mga linog, mga peste, kag pagkamalinapason. (Mateo 24:7-12; Lucas 21:10, 11) Ngaa subong sini? Ginapaathag sang Biblia nga si Satanas, “ang manuggahom sini nga kalibutan,” akig gid katama bangod nahibaluan niya nga malip-ot na lang ang iya tion sang nagsugod na ang presensia ni Cristo subong Hari. (Juan 12:31; Bugna 12:9, 12) Madamo ang kitaon nga mga ebidensia karon nga akig katama si Satanas kag nagsugod na ang presensia ni Cristo. Ang madamo kag lapnag sa kalibutan nga ebidensia sini ilabi na nga nakita sugod sang 1914, ang tuig nga suno sa mga istoryador nagbag-o gid ang lakat sang kalibutan.

Daw malain nga balita ini tanan, apang ang matuod, indi. Nagakahulugan ini nga nagagahom na karon sa langit ang Mesianiko nga Ginharian. Sa indi na lang madugay, ang paggahom sini nga gobierno magalakip man sa bug-os nga duta. Apang, paano mahibaluan sang mga tawo ini nga Ginharian agod batunon nila ang paggahom sini kag mangin mga sakop sini?

4. Ang bug-os kalibutan nga pagbantala sang mga Saksi ni Jehova isa ka tanda sang presensia ni Jesus. Nagsiling si Jesus nga ang iya presensia mangin subong sang “mga adlaw ni Noe.” * (Mateo 24:37-39) Indi lamang manunukod sing arka si Noe, isa man sia ka “manugbantala  sang pagkamatarong.” (2 Pedro 2:5) Ginpaandaman ni Noe ang mga tawo sadto nga magahukom ang Dios. Nagsiling si Jesus nga amo man ang himuon sang iya mga sumulunod sa tion sang iya presensia. Nagtagna sia: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”—Mateo 24:14.

Subong sang nabasa naton sa nagligad nga artikulo, laglagon sang Ginharian sang Dios ang tanan nga gobierno sang kalibutan karon. Ang pagbantala sang mga Saksi ni Jehova nagapahibalo sa mga tawo nga sa indi madugay magahikot na ining langitnon nga gobierno kag nagahatag ini sing kahigayunan sa tanan agod maluwas sila sa nagapakari nga kalaglagan kag mangin mga sakop sina nga Ginharian. Gani, ang importante nga pamangkot amo, Ano ang himuon mo?

Mangin Maayo nga Balita Bala para sa Imo ang Ginharian sang Dios?

Ang paglaum nga ginahatag sang mensahe nga ginbantala ni Jesus wala sing katulad. Sang magrebelde si Adan sang nagligad nga mga linibo ka tuig, nagdesisyon si Jehova nga Dios nga magtukod sing isa ka gobierno nga magatadlong sang mga butang kag ipasag-uli ang matutom nga mga tawo sa kahimtangan nga amo ang gintuyo sang Dios para sa ila sa ginsuguran—ang mabuhi sing dayon sa isa ka paraiso diri sa duta. Ano ang mas makakulunyag pa sa ihibalo nga ining madugay na ginsaad nga gobierno nagagahom na karon mismo sa langit? Indi ini imahinasyon lamang. Matuod gid ini!

Ang gintangdo sang Dios nga Hari nagagahom na karon sa tunga sang iya mga kaaway. (Salmo 110:2) Sa malaut nga kalibutan karon nga napain sa Dios, ginatuman sang Mesias ang handum sang Amay nga pangitaon ang tanan nga luyag makakilala gid sa Dios kag magsimba sa iya “sa espiritu kag kamatuoran.” (Juan 4:24) Ang paglaum nga mabuhi sing dayon sa idalom sang Ginharian sang Dios bukas sa tanan nga tawo walay sapayan sang ila rasa, edad, kag gindak-an. (Binuhatan 10:34, 35) Ginapalig-on namon ikaw nga batunon ang matahom nga kahigayunan nga ginatanyag sa imo. Hibalua karon kon ano ang Ginharian sang Dios, agod nga mabuhi ka sing dayon sa idalom sang matarong nga paggahom sini!—1 Juan 2:17.

[Footnote]

[Mga piktyur sa pahina 8, 9]

Ang malain nga mga balita nga mabatian naton kada adlaw nagapamatuod nga maabot na ang maayo nga mga butang

[Credit Line]

Antiaircraft gun: U.S. Army photo