Ang Pagpangita sing mga Sabat

“Pagkatapos naton matilawan ang mga luho sa kabuhi nga wala sa kinaandan nga tawo subong sang aircon, CD player, kag bag-o nga modelo sang salakyan, nagapamangkot gihapon kita kon ano gid ang katuyuan sang kabuhi. Ngaa amo sini ang kabuhi? Ano gid bala ang katuyuan sini?”​—⁠David G. Myers, propesor sang sikolohiya sa Hope College, Holland, Michigan, E.⁠U.⁠A.

ANO ang imo sabat sa mga pamangkot sini nga propesor? Ayhan mahimo maghunahuna ang iban nga indi na kinahanglan nga hibaluon pa ang mga sabat sa sini. Apang, kon indi naton paghibaluon ang mga sabat, daw subong nga wala mo ginasapak ang gamay nga bato nga nagsuok sa imo sapatos, makapadayon ka sa paglakat, apang indi ka komportable.

Kon nagapamangkot ka kon ano ang katuyuan sang kabuhi, wala ka nagaisahanon. Pagkatapos nga naghinguyang sing daku gid nga tion sa pagpangusisa tuhoy sa mga prinsipio ukon pagtamod sang tawo, nasapwan sang World Values Survey, nga madamo nga tawo sa nagkalainlain nga pungsod ang nagapalibog kon ano gid ang “kahulugan kag katuyuan sang kabuhi.”

Agod matigayon mo ang matuod nga kalinong sa hunahuna, kinahanglan mo hibaluon ang mga sabat sa tatlo ka importante nga mga pamangkot.

Diin kita naghalin?

Ano ang katuyuan sang kabuhi?

Ano ang palaabuton?

Diin mo matigayon ang masaligan nga mga sabat sa sining importante nga mga pamangkot? Sa baylo nga maghaumhaum ukon magsalig sa panghunahuna sang maalam nga mga tawo, ang masunod nga mga pahina magahatag sing mga sabat gikan sa Pulong sang Dios, ang Biblia. Palihug basaha ini sa imo Biblia kag tan-awa kon ano ang ginasiling sini.