Mga Biktima sang Kasingki Nagdaug

SANG Mayo 3, 2007, ang Korte Para sa Kinamatarong sang Tawo sa Europa sa Strasbourg, Pransia, nagdesisyon pabor sa mga Saksi ni Jehova sa Republika sang Georgia. Napamatud-an sang Korte nga ang mga Saksi wala sing kaluoy nga ginpintasan kag gintapakan ang ila kinamatarong nga makasimba sing hilway. Ginsaway man sang Korte ang anay panguluhan sang Georgia sa pagkunsinti sa mga kriminal. Ngaa amo sini ang desisyon sang Korte?

Sang Oktubre 17, 1999 nagatuon sing Biblia ang mga 120 ka Saksi ni Jehova sa Gldani sa Tbilisi, ang kapital sang Georgia. Apang, hinali lang sila nga gingubat sang isa ka guban nga ang lider-lider, amo si Vasili Mkalavishvili, isa ka Ortodokso nga ginpahalin sa pagkapari. May dala sila nga mga batuta kag salsalon nga mga krus kag mapintas nila nga ginpangbakol ang mga Saksi. Madamo sing nagkalapilasan, kag ang iban yara sa kritikal nga kahimtangan. Ang isa gani ka babayi nasamad gid ang iya mata kag mga 16 ka tawo ang kinahanglan nga ipabulong. Sang magdangop ang mga Saksi sa estasyon sang pulis ginsilingan sila sang hepe nga kulang pa ang ginhimo sa ila! Sang gingubat kag ginbakol ang mga Saksi, gin-video ini sang isa ka miembro sang guban kag sang ulihi ginpagua sa mga estasyon sang telebisyon, gani nakita gid kon sin-o ang mga kriminal. *

Nagpasaka sing kaso ang mga Saksi apang ginbalewala ini. Ang imbestigador nga nagauyat sini nga kaso nagsiling nga indi mahimo nga indi niya pag-apinan ang guban kay Ortodokso man sia. Bangod wala sing ginhimo nga aksion ang mga pulis sa sini nga insidente nangisog pa gid ining relihioso nga mga panatiko nga gubaton ang mga Saksi. Gani, ang kaangay sini nga insidente nagdamo sa kapin sa isa ka gatos.

Sang Hunyo 29, 2001 ginpasaka sang mga Saksi ni Jehova ang kaso sa Korte Para sa Kinamatarong sang Tawo sa Europa. * Sa desisyon nga ginpagua sang Korte sang Mayo 3, 2007, detalyado nga ginlaragway ang pagpamintas sang mga kriminal kag ginpakamalaut sang Korte ang mga opisyales sang Georgia sa pagpabaya nila. Ang Korte nagsiling: ‘Obligasyon sang mga opisyales sang Georgia nga usisaon gilayon ini nga insidente.’ “Madula ang pagsalig sang publiko sa Estado kay wala nila ginpadapat ang hustisya kag ginpabay-an lamang nila ang pagpamintas,” siling sang pamatbat.

Ang Korte naghinakop: “Sang Oktubre 17, 1999, madamo nga mga Saksi ni Jehova ang ginpintasan sa nahauna nga tion. Sang magpasaka sing kaso ang mga biktima, ginpabay-an lamang ini sang panguluhan gani nangisog pa gid ining mga kriminal kag nagdamo pa gid ang mga kaso sang pagpamintas sa bug-os nga pungsod bangod sa relihion.”

Nagdaug ang mga Saksi ni Jehova sa kaso. Ginbayaran sang panguluhan sang Georgia ang kagastuhanan sa pagpasaka sang kaso kag ang mga Saksi sa Gldani bangod sa halit nga ginhimo sa ila. Nalipay gid ang mga Saksi ni Jehova sa Georgia kay halos nauntat na ang pagpamintas sa ila kag nagapasalamat man sila sa desisyon sang Korte kay hilway na sila nga makatipon. Sa sulod sang mga tinion nga ginhingabot sila, nabatyagan gid sang mga Saksi ni Jehova ang pagtuytoy kag pag-amlig sang ila Amay sa langit nga si Jehova nga Dios amo nga nagapasalamat gid sila sa Iya.—Salmo 23:4.

[Mga footnote]