Nahibaluan Mo Bala?

Pila ang bili sang duha ka sensilyo sang balo nga babayi?

Kapin sa 2,000 ka tuig ang nagligad, ang mga Judiyo nagabayad sing “duha ka drakma” kada tuig para sa buhis sa templo, katumbas ini sang duha ka adlaw nga sueldo. (Mateo 17:24) Apang, nagsiling si Jesus nga ang duha ka maya nagabili sing “isa ka sensilyo nga diutay sing balor,” nga katumbas sang 45 minutos nga sueldo. Sa pagkamatuod, ang lima ka maya mahimo gani mabakal sa duha lamang ka sensilyo, ukon katumbas sang isa ka oras kag tunga nga sueldo.—Mateo 10:29; Lucas 12:6.

Mas manubo pa sa sini ang nakita ni Jesus nga gin-amot sang imol nga balo para sa templo. Ining duha ka sensilyo, ukon duha ka lepta, amo ang pinakanubo sing balor nga sensilyo nga saway nga ginagamit sadto sa Israel. Mas manubo pa sa 12 minutos lamang nga sueldo kon ibase sa kinaandan nga 12 oras nga obra sa isa ka adlaw.

Ginpabilihan ni Jesucristo sing labi ang amot nga ginhatag sang balo sangsa mas dalagku nga amot nga ginhatag sang iban bangod “sobra na ang ila manggad.” Ngaa? Ginpakita sang rekord nga may yara sia “duha ka gamay nga sensilyo,” nga mahimo kuntani nga isa lang ang ginhulog niya kag ang isa para sa iya mga kinahanglanon. Apang, ginhatag niya ang “tanan nga yara sa iya, ang iya bug-os nga palangabuhian.”—Marcos 12:41-44; Lucas 21:2-4, Maayong Balita.

San-o si Saulo nakilala sa ngalan nga Pablo?

Natawo si apostol Pablo nga isa ka Hebreo apang pumuluyo sia sang Roma. (Binuhatan 22:27, 28; Filipos 3:5) Gani, mahimo nga kutob sang pagkabata gingamit na niya ang iya Hebreo nga ngalan nga Saulo kag Romano nga ngalan nga Pablo. Kag mahimo nga ang iban nga paryente ni Pablo may yara man Romano kag Griego nga mga ngalan. (Roma 16:7, 21) Dugang pa, kinaandan na para sa mga Judiyo sadto nga tion, ilabi na gid sa mga pungsod sa palibot sang Israel, nga may yara duha ka ngalan.—Binuhatan 12:12; 13:1.

Kapin sa napulo ka tuig pagkatapos nga nangin Cristiano, ining apostol mas nakilal-an sa iya Hebreo nga ngalan nga Saulo. (Binuhatan 13:1, 2) Apang, sang mga tuig 47 ukon 48 sang una siya nga naglakbay bilang misyonero, gingamit niya ang iya Romano nga ngalan nga Pablo, kay mahimo naghunahuna sia nga mas mangin epektibo sia sa pagsugid sang maayong balita sang Dios sa di-Judiyo nga mga tawo. (Binuhatan 9:15; 13:9; Galacia 2:7, 8) Mahimo man nga gingamit niya ang ngalan nga Pablo bangod ang Griego nga pagmitlang sang iya Hebreo nga ngalan nga Saulo, kaanggid gid sa Griego nga tinaga nga may malain nga kahulugan. Ano man ang rason kon ngaa gin-islan ang iya ngalan, ginpakita ni Pablo nga handa sia mangin ‘tanan nga butang sa tanan nga sahi sang mga tawo, agod maluwas niya sa bisan ano man nga paagi ang iban.’—1 Corinto 9:22.

[Piktyur sa pahina 12]

Aktuwal nga kadakuon sang lepton