Pamangkot sang Amon Bumalasa

Ngaa Wala Nagagamit sing Krus ang mga Saksi ni Jehova sa Ila Pagsimba?

Nagapati gid ang mga Saksi ni Jehova nga gintubos kita sang kamatayon ni Jesucristo amo nga mahimo naton maagom ang kabuhi nga walay katapusan kon magtuo kita sa iya. (Mateo 20:28; Juan 3:16) Apang, wala sila nagapati nga ginlansang si Jesus sa krus, nga sa masami makita sa mga laragway. Nagapati sila nga si Jesus napatay sa isa ka usok ukon poste kag indi sa krus.

Una nga gingamit ang krus sa Mesopotamia, mga duha ka libo ka tuig antes sang panahon ni Cristo. Makita man ini sa mga bato sa Scandinavia, nga gintigib mga 3,000 ka tuig antes pa natawo si Jesus. Gingamit sang mga pagano ang krus “subong simbulo sa madyik . . . nga isa ka anting-anting, kag nagahatag sing suerte,” siling sang Danes nga istoryador kag eksperto sa mga simbulo nga si Sven Tito Achen, sa iya libro nga Symbols Around Us. Gani indi katingalahan nga ang New Catholic Encyclopedia nag-ako: “Gingamit na ang krus sang mga pagano antes pa sang panahon ni Cristo, kag may kaangtanan ini sa mga butang sa kahawaan.” Apang, ngaa ginpili sang simbahan ang krus subong amo ang ila pinakabalaan nga simbulo?

Ginsambit ni W. E. Vine nga isa ka respetado nga Britaniko nga iskolar ang isa ka kamatuoran: “Sang mga tungatunga sang ikatlo nga siglo A.D. . . . ginbaton sang simbahan ang mga pagano . . . kag gintugutan sila nga padayon nga gamiton ang ila mga simbulo. Busa, padayon nila nga gingamit ang Tau ukon T, . . . nga ang bangday ginpaubos.”—Vine’s Expository Dictionary of Old and New Testament Words.

Dugang pa, si Vine nagsiling nga ang nombre nga “krus” kag ang berbo nga “ilansang sa krus” nagapatuhoy sa “usok ukon poste . . . tuhay gid sa ginatudlo sang simbahan nga duha ini ka kahoy nga nabangday.” Subong man, ang Oxford University’s Companion Bible nagsiling: “Napamatud-an . . . nga ang Ginuo ginlansang sa isa ka tindugon nga usok ukon poste, kag indi sa duha ka kahoy nga ginbangday sa kon ano man nga anggulo.” Maathag nga ginapakita nga ang paggamit sing simbulo nga krus naghalin sa isa ka tradisyon kag indi sa Biblia.

Ang ginsambit kaina nga istoryador nga si Achen nagsiling: “Sang duha ka siglo pagkatapos nga napatay si Jesus, daw ka imposible nga naggamit sing simbulo nga krus ang mga Cristiano.” Kay para sa ila, ang krus “nagarepresentar sa kamatayon kag kalautan, kaangay sang pagpugot sa ulo ukon silya elektrika sa sining ulihi nga mga henerasyon,” siling pa niya.

Bisan ano man ang simbulo nga gingamit sa paglansang kay Jesus, ang importante amo nga indi ini dapat pagsimbahon sang mga Cristiano. “Palagyo kamo gikan sa idolatriya,” siling sang Biblia. (1 Corinto 10:14) Ginsugiran kita ni Jesus kon paano makilala ang iya matuod nga mga sumulunod. Sia nagsiling: “Paagi sa sini ang tanan makahibalo nga kamo mga disipulo ko, kon nagahigugmaanay kamo.”—Juan 13:35.

Kaangay sang unang siglo nga mga Cristiano, ginasunod sang mga Saksi ni Jehova karon kon ano ang ginasiling sang Biblia kag indi ang mga tradisyon. (Roma 3:4; Colosas 2:8) Bangod sini, wala sila nagagamit sing krus sa pagsimba.

[Piktyur sa pahina 22]

Tinigib nga istatwa sang pagano nga hari sang asiria nga nagasuksok sang krus, mga 800 b.c.e.

[Credit Line]

Photograph taken by courtesy of the British Museum