Paano Ikaw Mangin Anak sang Dios?

MGA 30 ka tuig pagkatapos sang Inaway sa Korea, may programa ang Korean Broadcasting System nga buligan agod magkitaay liwat ang mga pamilya nga naghilayuay bangod sa inaway. Ang resulta? Kapin sa 11,000 ka tawo ang naghinaksanay kag naghinibiay sa tuman nga kalipay sang magkilitaay sila liwat sang ila mga pamilya. Ang Korea Times nagsiling: “Karon pa lang natabo sa Korea nga nagtululagay ang amo sini kadamo nga luha bangod sa kalipay.”

Si Cézar nga taga-Brazil ginbayad sa utang sang lapsag pa sia. Mga pulo ka tuig sang ulihi, nalipay gid sia sang makilala niya ang iya matuod nga iloy. Gani, ginbayaan niya ang manggaranon nga nag-ayop sa iya kag nag-upod sa iya iloy.

Makalilipay gid kon magkitaay liwat ang mga katapo sang pamilya nga naghilayuay! Ginasugiran kita sang Biblia kon paano ang mga tawo napahilayo gikan sa pamilya sang Dios kag kon paano sila karon nahiusa liwat. Paano ini natabo? Kag paano mo man maeksperiensiahan ini nga kalipay?

Napahilayo ang mga Anak sang Dios

Tuhoy sa aton Manunuga nga si Jehova nga Dios, ang manunulat sang Salmo nagsiling: “Sa imo yara ang tuburan sang kabuhi.” (Salmo 36:9) Si Jehova amo ang Amay sang mainunungon kag maalam nga mga tinuga. Ang espiritu nga mga anak sang Dios nga ginatawag anghel, amo ang iya pamilya sa langit, kag ang mga tawo, amo naman ang iya pamilya sa duta.

Subong sang ginsiling sang una nga artikulo, sang magrebelde si Adan, ang una nga tawo nga anak sang Dios, ang bug-os nga katawhan napahilayo sa ila mahigugmaon nga Amay kag Manunuga. (Lucas 3:38) Gani, nadula niya kag sang iya wala pa mabun-ag nga kabataan ang pribilehiyo nga mangin mga anak sang Dios. Paagi sa iya alagad nga si Moises, ginsilingan sila sang Dios kon ano ang resulta sang ila pagpakasala: ‘Nahimoan nila sia sing malaut, sila indi mga anak sang Dios, kasawayan nila ini.’ Ang “kasawayan,” ukon pagkamakasasala sang tawo, amo ang rason kon ngaa napahilayo sila sa Dios, nga balaan kag himpit sa tanan nga butang. (Deuteronomio 32:4, 5; Isaias 6:3) Gani,  daw subong nga ang mga tawo napahilayo sa ila amay.—Efeso 2:12.

Agod ipakita kon daw ano na kalayo ang tawo sa Dios, gintawag sang Biblia nga mga “kaaway” ang mga tawo nga indi bahin sang pamilya sang Dios. (Roma 5:8, 10) Gani, ang katawhan nag-antos sa idalom sang ila mapintas nga manuggahom nga si Satanas kag sa makamamatay nga epekto sang ila napanubli nga sala kag pagkadihimpit. (Roma 5:12; 1 Juan 5:19) Mahimo bala mangin bahin sang pamilya sang Dios ang makasasala nga mga tawo? Mahimo bala nga ang di-himpit nga mga tawo mangin himpit nga mga anak sang Dios, kaangay nanday Adan kag Eva antes sila magpakasala?

Pagtipon sa mga Anak nga Nagpalayo

Mahigugmaon nga naghimo si Jehova sing kahimusan agod makabenepisyo ang di-himpit nga mga tawo nga nagahigugma sa iya. (1 Corinto 2:9) Si apostol Pablo nagsiling: “Ang Dios paagi kay Cristo nagapasag-uli sang kalibutan sa iya kaugalingon, kag wala ginaisip sa ila ang ila mga paglapas.” (2 Corinto 5:19) Subong sang ginapakita sang una nga artikulo, ginpadala ni Jehova nga Dios si Jesucristo agod gawaron ang aton mga sala. (Mateo 20:28; Juan 3:16) Nagapasalamat gid si apostol Juan sa Dios amo nga nakasiling sia: “Tan-awa ninyo kon ano nga sahi sang gugma ang ginhatag sang Amay sa aton, agod tawgon kita nga mga anak sang Dios.” (1 Juan 3:1) Gani, kon mangin matinumanon ang katawhan kay Jehova mahimo sila mangin bahin liwat sang iya pamilya.

Nahiusa ang tanan nga tawo nga bahin sang pamilya sang Dios kay ginaatipan sila sang ila Amay sa langit. Apang, talupangda kon paano sila ginbahin sa duha ka grupo. Ang Biblia nagsiling: “Nahisuno ini sa iya [sang Dios] nahamut-an kag katuyuan tuhoy sa isa ka pagdumalahan sa katapusan sang gintalana nga mga tion, nga amo, agod tipunon liwat ang tanan nga butang kay Cristo, ang mga butang sa langit kag ang mga butang sa duta.” (Efeso 1:9, 10) Ngaa ginbahin sila sang Dios sa duha ka grupo?

Ang matuod, ang pagbahin ni Jehova sa iya mga kaanakan sa duha ka grupo nakaamot sa paghiusa sang iya pamilya. Ngaa? Tuman kadaku sang pamilya sang Dios nga mahimo ini mapaanggid sa isa ka pungsod. Agod mangin mahim-ong ang isa ka pungsod, kinahanglan may pila ka tawo nga maggahom kag maghimo sing kasuguan. Siempre pa, ang panguluhan lamang sang Dios ang makapaluntad sang matuod nga paghidait kag indi ang gobierno sang tawo. Ang una nga grupo, amo “ang mga butang sa langit,” ukon mga anak nga ginpili ni Jehova nga maggahom sa iya panguluhan, ukon Ginharian sa langit. ‘Magagahom sila subong mga hari sa duta.’—Bugna 5:10.

Mga Anak sang Dios sa Duta

Ginatipon man ni Jehova “ang mga butang sa duta,” nga amo ang minilyon ka tawo sa bug-os nga duta agod nga mangin mga anak niya sa ulihi. Subong isa ka Amay, ginatudluan niya sila nga mangin mahigugmaon agod nga bisan pa naghalin sila sa lainlain nga pungsod magahiusa sila. Bisan gani ang mga tawo nga masingki, maiyaiyahon, imoral kag malinapason gin-agda man niya nga magbalik sa iya.—2 Corinto 5:20.

Apang, ano ang matabo sa mga tawo nga indi magbaton sa pangagda sang Dios? Pagasilutan sila ni Jehova agod mahuptan ang paghidait sang iya pamilya. Ang Biblia nagasiling nga may “adlaw sang paghukom kag sang paglaglag sa di-diosnon nga mga tawo.” (2 Pedro 3:7) Laglagon sang Dios ang mga nagarebelde sa iya. Daw ano ini nga paumpaw sa mga matinumanon sa Dios!—Salmo 37:10, 11.

Sa tapos sini, magaluntad ang isa ka libo ka tuig nga paghidait, kag ang mga tawo nga magabaton sang pangagda sang Dios amat-amat nga mangin himpit, kaangay sang kahimtangan sang una nanday Adan kag Eva. Bisan ang mga patay pagabanhawon. (Juan 5:28, 29; Bugna 20:6; 21:3, 4) Nian matuman ang saad sang Dios: “Ang [mga tawo] mismo pagahilwayon man gikan sa pagkaulipon sa pagkamadinulunton kag maagom ang mahimayaon nga  kahilwayan sang mga anak sang Dios.”—Roma 8:21.

Magbalik Ka sa Imo Amay

Si Cézar kag ang linibo ka mga Koreano nga ginsambit sa umpisa sini nga artikulo kinahanglan nga may himuon agod nga magkitaay sila liwat sang ila mga pamilya. Dapat mag-entra sa programa ang mga Koreano kag dapat naman bayaan ni Cézar ang mga nag-ayop sa iya. Sing kaanggid, dapat may himuon ka man agod makabalik ka sa imo Amay nga si Jehova nga Dios kag mangin bahin sang iya pamilya. Ano ang dapat mo himuon?

Dapat mo tun-an ang iya Pulong, ang Biblia para magbakod ang imo pagtuo sa iya kag sa iya mga saad. Kon himuon mo ini, marealisar mo nga ang tanan nga ginapahimo sa imo sang Dios para gid sa imo kaayuhan. Kinahanglan mo man batunon ang pagtudlo kag pagdisiplina sang Dios kay ang Biblia nagsiling sa mga Cristiano: “Ang Dios nagapakig-angot sa inyo subong sa mga anak. Sanglit sin-o nga anak ang wala ginadisiplina sang amay?”—Hebreo 12:7.

Kon himuon mo ini magabag-o gid ang imo bug-os nga kabuhi. Ang Biblia nagsiling: “Magbag-o kamo sa puersa nga nagapahikot sa inyo hunahuna, kag magsuklob sang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon.” (Efeso 4:23, 24) Nian sunda ang ginsiling ni apostol Pedro: “Subong matinumanon nga mga anak, untati ninyo ang pagpauyon suno sa mga kailigbon nga yara anay sa inyo sang wala pa kamo sing nahibaluan.”—1 Pedro 1:14.

Pangitaa ang Imo Matuod nga Pamilya

Sang nakilala ni Cézar ang iya iloy, nalipay gid sia nga mahibaluan nga may magulang pa gali sia nga lalaki kag babayi. Sing kaanggid, kon mangin suod ka sa imo Amay sa langit, malipay ka nga mahibaluan nga madamo ka man sing mga utod sa Cristianong kongregasyon. Sa pagpakig-upod mo sa ila, mabatyagan mo nga mas suod ka pa sa ila sangsa matuod mo nga mga utod.—Binuhatan 28:14, 15; Hebreo 10:24, 25.

Ginaagda ka nga magbalik sa imo matuod nga Amay kag mga utod. Maeksperiensiahan mo ang daku nga kalipay nga nabatyagan ni Cézar kag sang linibo ka Koreano sang nagkitaay sila liwat sang ila mga pamilya.

[Piktyur sa pahina 8]

Sang 19 anyos si Cézar upod sa iya iloy

[Piktyur sa pahina 10]

Maghimo sing paagi agod mangin suod ka sa Dios