Mangin Suod sa Dios

Ginapabaloran Kita sang Dios

Lucas 12:6, 7

“GINAPAKAMALAUT kita sang aton tagipusuon.” Ginapakita sini nga mga tinaga gikan sa Biblia nga kon kaisa, mahimo sobra gid ang pagpakamalaut sang aton tagipusuon sa aton kaugalingon. Sa pagkamatuod, mahimo nga pirme naton mabatyagan nga indi kita nagakabagay sa gugma kag pag-atipan sang Dios. Apang, ang Biblia nagapasalig sa aton: “Ang Dios labaw pa sa aton tagipusuon kag nakahibalo sang tanan nga butang.” (1 Juan 3:19, 20) Bisan pa kilala naton ang aton kaugalingon, mas kilala kita sang Dios. Ang iya pagtamod sa aton mahimo nga tuhay gid sa pagtamod naton sa aton kaugalingon. Kon amo, ano bala ang aton balor kay Jehova nga Dios, nga mas nakakilala sa aton? Mahibaluan naton ang sabat sa isa ka makatalandog nga ilustrasyon ni Jesus sa duha ka magkatuhay nga kahimtangan.

Isa ka bes, nagsiling si Jesus nga “ginabaligya ang duha ka maya sa bili nga isa ka sensilyo nga diutay sing balor.” (Mateo 10:29, 31) Sa Lucas 12:6, 7, nagsiling man si Jesus: “Ang lima ka maya ginabaligya sa duha ka sensilyo nga diutay sing balor, indi bala? Apang wala sing isa sa ila ang malipatan sang Dios. . . . Indi kamo magkahadlok; mas importante pa kamo sangsa madamo nga maya.” Ining simple kag makatalandog nga ilustrasyon nagatudlo sa aton kon paano ginatamod ni Jehova ang mga nagasimba sa iya.

Ang maya isa sa pinakabarato sa mga pispis nga ginakaon. Posible nga nakita ni Jesus ang imol nga mga babayi​—ayhan pati na ang iya iloy—​nga nagabakal sa merkado sining gamay nga pispis agod makaon sang ila pamilya. Ang duha ka maya mabakal sa balor nga isa ka sensilyo sang mga Romano, nga wala pa duha ka pesos sa aton kuarta karon. Ini nga mga pispis baratuhon gid, kay sa duha ka sensilyo, indi lang apat ang mabakal kundi lima ka maya. Ang ikalima paaman na lang.

Si Jesus nagpaathag nga wala sing isa ka maya nga “malipatan sang Dios” ukon “mahulog sa duta nga indi mahibaluan” sang Amay. (Mateo 10:29) Natalupangdan ni Jehova kon may nahulog nga maya sa duta, ayhan bangod nasamaran ini ukon naghugpa agod mangita sing matuka. Ining daw indi salapakon nga mga pispis gintuga ni Jehova kag ginabantayan gid niya. Ang matuod, ginapabaloran sila ni Jehova kay hamili sila kag buhi nga mga tinuga. Ano ang aton matun-an sa ilustrasyon ni Jesus?

Sang nagpanudlo si Jesus, pirme sia naggamit sing mga pagpaanggid. Gintudlo niya kon paano ini maaplikar sa mas importante nga mga butang. Halimbawa, si Jesus nagsiling man: “Ang mga uwak wala nagasab-ug sang binhi ukon nagaani, kag wala sila sing kamalig ukon tambubo, apang ginapakaon sila sang Dios. Indi bala mas importante pa kamo sangsa mga pispis?” (Lucas 12:24) Gani, mahangpan na naton karon ang ginsiling ni Jesus tuhoy sa mga maya: Kon ginaatipan gani ni Jehova ining gamay nga mga pispis, labi na gid ang iya pag-atipan sa mga tawo nga nagahigugma kag nagasimba sa iya!

May matun-an pa gid kita sa ginsiling ni Jesus. Indi kita dapat magbatyag nga wala sing pulos, amo nga wala na kita ginadumdom kag ginaatipan sang Dios nga “labaw pa sa aton tagipusuon.” Makapaumpaw gid mahibaluan nga makita sang aton Manunuga ang balor nga wala naton makita sa aton kaugalingon.

[Credit Line sang piktyur sa pahina 9]

Sparrows: © ARCO/​D. Usher/​age fotostock