“Indi Mamitlang nga Ngalan”?

ANG Gateway Arch sa pangpang sang suba sa St. Louis, Missouri may kataason nga 192 metros. Amo ini ang pinakamataas sa dumaan nga mga tinukod sa Estados Unidos. Sa tupad sini nahamtang ang indi tanto kataas nga simbahan nga ginatawag Old Cathedral.

Ginlaragway sang isa ka balasahon nga ginbalhag sang simbahan nga The Story of the Old Cathedral ang desinyo sang ganhaan sini, nga nagasiling: “Natigib sa panulong sini ang dalagku nga Hebreo nga letra sang indi mamitlang nga ngalan sang Dios.” Subong sang makita sa retrato, bansada katama ang apat ka Hebreo nga letra יהוה (YHWH), ukon Tetragrammaton, nga nagarepresentar sa ngalan sang Dios.

Sang gintukod ang katedral sang 1834, napensaran sang mga pari sa St. Louis nga dapat ibutang sa bansada nga bahin ining apat ka Hebreo nga letra. Apang, ngaa ginapatihan nga ‘indi dapat pagmitlangon’ ukon “ihambal” ang ngalan sang Dios?

Ang New Catholic Encyclopedia nagpaathag kon ano ang natabo sang nagbalik ang mga Judiyo gikan sa pagkabihag sa Babilonia sang ikan-om nga siglo B.C.E. Nagsiling ini: “Ang ngalan nga Yahweh [Tetragrammaton nga ginsal-utan sing “a” kag “e”] ginkabig nga tuman ka sagrado nga indi puede ihambal sing matunog, amo nga gin-islan nila ini sing ADONAI [Ginuo] ukon ELOHIM [Dios]. . . . Bangod sini nalipatan na ang eksakto nga pagmitlang sang ngalan ni Yahweh.” Amo ini ang rason kon ngaa wala na ginahambal sang mga tawo ang ngalan sang Dios. Pagligad sang tion, nalipatan na ang eksakto nga pagmitlang sini kag sang ulihi wala na gid ini ginamitlang.

Bisan pa indi naton mapat-od ang eksakto nga pagmitlang sang ngalan sang Dios, ang importante amo nga nagasuod kita sa Dios kon ginatawag naton ang iya ngalan. Luyag mo bala nga tawgon ka lang sang imo mga abyan nga “mister” ukon “miss,” ukon mas luyag mo nga tawgon ka nila sa imo personal nga ngalan? Bisan pa kon nagahambal sila sing tuhay nga lenguahe kag indi eksakto ang pagmitlang sang imo ngalan, luyag mo gihapon nga tawgon ka nila sa imo personal nga ngalan, indi bala? Amo man sa Dios. Luyag man niya nga tawgon sia sa iya ngalan nga Jehova.

Sa Hiligaynon, kilala na ang ngalan nga “Jehova.” Agod mangin suod sa Dios, indi bala nagakaigo para sa tanan nga nagahigugma sa iya nga tawgon sia sa iya personal nga ngalan? Nagsiling ang Biblia: “Magpalapit kamo sa Dios, kag magapalapit sia sa inyo.”​—Santiago 4:8.