Kaangay sa Bata nga Israelinhon sang Una

ANG pamilya Sales nagapuyo sa Praia Grande, Brazil. Duha ka semana antes ang Memoryal ukon anibersaryo sang kamatayon ni Jesus, ang tanan nga miembro sini nga pamilya, naghimo sing listahan sang ila mga imbitahon sa sini nga okasyon. Ginhatagan nila sing isa ka imbitasyon ang seis anyos nga si Abigayl, kag ginpamangkot sia kon sin-o ang gusto niya nga agdahon.

“Ang tawo nga pirme nagayuhom sa akon,” sabat niya.

“Sin-o sia?” pamangkot sang iya mga ginikanan.

“Ang tawo bala nga naka-wheelchair,” sabat niya.

Pagligad sang apat ka adlaw, gintudlo ni Abigayl sa iya mga ginikanan ang tawo nga ginatumod niya. Walter ang ngalan sang tawo, kag nagaistar sia malapit sa Kingdom Hall. Mga 15 ka tuig na ang nagligad, sang 28 pa lang ang edad sining tawo, naaksidente sia kag naparalisar ang katunga sang iya lawas. Manggaranon sia amo nga may duha sia ka bodyguard. Sang gintugutan si Abigayl nga makasugilanon kay Walter, ginpaathag sang iya mga ginikanan kay Walter nga luyag sang ila bata nga hatagan sia sing imbitasyon.

Sa tapos nga mahambal ni Abigayl ang iya tuyo, nagsiling pa gid sia: “Ang iban sa amon Kingdom Hall madamo sing imbitasyon, pero isa lang ang akon. Gani, ikaw lang ang gin-imbitar ko. Kon indi ka magkadto, wala ako sing bisita. Pero kon makadto ka, malipay gid ako, kag labi nga malipay si Jehova nga Dios.”

Sa adlaw sang Memoryal, ang mga Saksi lakip si Abigayl, nagpaninlo sa Kingdom Hall bilang paghanda para sa Memoryal sina nga gab-i. Sina nga hapon, nag-agi si Walter kag sang nakita niya si Abigayl, ginpadulog niya ang iya salakyan. Nagbukas ang bintana sang iya salakyan, kag ginpamangkot niya si Abigayl kon ano ang ginahimo sini. Nagsabat sia nga ginatinluan nila ang tilipunan para sa iya pagtambong.

Pagkagab-i, indi gid mahim-os si Abigayl. Nagsugod na ang pamulongpulong, kag nagalaawlaaw sia gihapon kon bala nag-abot na si Walter. Nian, nag-abot sia upod ang iya mga bodyguard. Daw indi mabakal ang yuhom ni Abigayl. Pagkatapos sang pamulongpulong, nagsiling si Walter nga nagapakadto na sia sa iban nga siudad, apang bangod kay Abigayl nagbag-o ang iya pensar amo nga nagbalik sia kag nagtambong sa Memoryal. Nagsiling pa sia: “Para gid sa akon ang pamulongpulong.” Nagpangabay sia sing Biblia, kag nagsugod sa pagtuon kag pagtambong sa mga pagtinipon sang mga Saksi.

Sa pihak nga bahin, nagsiling ang manghod nga babayi ni Walter nga luyag niya makita si Abigayl, kay pirme ini ginasambit sang iya magulang. Pagkitaay nila, nalipay gid sia nga mahibaluan nga mabuot si Abigayl. “Nahibaluan ko na karon kon ngaa malipayon gid ang akon magulang,” siling niya.

Padayon nga nagatuon sing Biblia kag nagatambong sa mga pagtilipon si Walter. Nagakomento pa gani sia kag ginasugid man niya sa iban ang iya natun-an. Pat-od gid nga madumduman naton kay Abigayl ang Israelinhon nga bata sang una nga nagbulig kay Naaman agod makilala niya ang matuod nga Dios, nga si Jehova.​—2 Hari 5:2-14.