Kon ang Isa ka Hinigugma Mapatay

Sang Martes, Hulyo 17, 2007, mga alas siete sang gab-i, ang isa ka depasahero nga eroplano naglapaw sa hulugpaan sang pinakamasako nga erport sa sentro sang São Paulo, Brazil. Nagtabok ang eroplano sa mayor nga dalan kag nagbunggo sa bodega sang mga kargamento. Mga 200 ka tawo ang napatay sa amo nga aksidente.

INING ginakabig nga pinakadaku nga aksidente sa eroplano sa Brazil indi gid malimtan sang mga namatyan sing hinigugma. Isa sa ila amo si Claudete. Nabalitaan niya sa TV nga naaksidente ang eroplano. Nakasakay didto ang iya anak nga si Renato, 26 anyos pa lang kag nagaplano nga mapakasal sa Oktubre. Dalidali nga gintawgan sia ni Claudete sa iya cell phone, apang wala sing may nagsabat. Gani, nag-uy-oy sa salog si Claudete kag nagtalangison.

Napatay ang nobyo ni Antje sang naaksidente ini sa salakyan sang Enero 1986. Sang nabalitaan niya ang natabo, nakibot gid sia. “Sang primero, indi gid ako makapati. Sa pamatyag ko daw isa ini ka malain nga damgo. Nagpalangurog ako kag napun-uran nga daw may nagsumbag sa akon tiyan.” Tatlo ka tuig nga nag-antos si Antje sang depresyon. Bisan pa 20 ka tuig na ang nagligad sang matabo ang aksidente, nagapalangurog gihapon sia kon madumduman niya ang natabo.

Indi malaragway sang mga tinaga ang sobra nga pagbatyag sing kakibot, di-makapati, palaminhod, kag pagkawalay paglaum subong resulta sinang grabe kag wala ginapaabot nga pagkadula. Apang, bisan ginapaabot mo pa gani ang kamatayon sang isa ka hinigugma, ayhan bangod sang iya madugay na nga balatian, magabatyag ka gihapon sing tuman nga kasubo. Wala sing bisan sin-o ang handa sa kamatayon sang isa ka hinigugma. Ang iloy ni Nanci napatay sang 2002 bangod sang madugay na nga balatian. Apang, sang adlaw nga napatay ang iya iloy, naglumpagi sia sa salog sang ospital kag indi makahibalo kon ano ang himuon. Daw wala na sing pulos ang kabuhi para sa iya. Lima na ka tuig ang nagligad, apang nagahilibion gihapon sia kon madumduman niya ang iya iloy.

“Ang kamatayon sang isa ka hinigugma indi gid malimtan, apang sa ulihi maandan na lang ini,” siling ni Dr. Holly G. Prigerson. Kon napatay ang imo hinigugma, ginapaabot man ukon wala, mahimo mamangkot ka: ‘Normal lamang bala nga magkasubo? Paano ko malandas ang kasubo bangod sa kamatayon sang isa ka hinigugma? Makita ko pa bala sia liwat?’ Ang masunod nga artikulo magasabat sa sini kag ayhan sa iban mo pa nga mga pamangkot.

[Credit Line sang piktyur sa pahina 3]

EVERTON DE FREITAS/​AFP/​Getty Images