Ang Biblia Nagapabag-o sang Kabuhi

Ano ang nagpabag-o sa miembro anay sang gang sang mga pamatan-on sa Mexico nga ginatawag Junior Satans nga mangin isa ka bunayag kag mapisan nga tawo? Ngaa gin-untatan sang madinalag-on nga negosyante sa Japan ang paghimakas nga malab-ot ang iya handum nga magmanggaranon pa gid, kag ano ang iya ginbatyag sang ulihi sang ginhimo niya ini nga mga pagbag-o? Ano ang nagpahulag sa manugbaligya sang armas sa Rusya nga untatan ang iya daku sing kita apang ilegal nga negosyo? Binagbinaga ang ila mga panaysayon.

MALIP-OT NGA IMPORMASYON

NGALAN: ADRIAN PEREZ

EDAD: 30

PUNGSOD: MEXICO

KABUHI SADTO: MIEMBRO SANG GANG

ANG AKON NAGLIGAD: Sang mga 13 anyos ako, nagsaylo ang amon pamilya sa Ecatepec de Morelos, Mexico State. Sadto nga tion, madamo didto ang mga pamatan-on nga delingkwente, nagapanghalit sang mga gamit sang iban, kag mga adik. Wala madugay, nagsugod man ako sa pagpahubog, pagpanghalit sang mga gamit sang iban, kag nangin imoral.

Sang ulihi, nagpauli kami sa San Vicente, sa banwa kon diin ako natawo. Apang, madamo sing mga adik didto. Kinaandan na nga makakita ka sing mga pamatan-on nga nagahuray-ad sa mga dalan. Nag-entra ako sa isa ka gang nga ginatawag Junior Satans. Nagapangawat kami kag pirme nagasinghot sing tiner ukon rugby. Indi ko na pirme madumduman kon paano ako nakapauli, kag kon kaisa nagakadulaan na lang ako sing animo sa dalan. Ang iban ko nga mga abyan ginbilanggo bangod sa pagpangawat kag pagpatay.

Apang bisan amo sina ang akon pagkabuhi, nagapati gihapon ako sa Dios. Agod magmulumag-an ang akon mga sala, nagaentra ako sa mga selebrasyon sa simbahan kaangay sang Via Crusis kon Semana Santa. Apang pagkatapos sini, nagapahubog kami bilang  selebrasyon sa amon pagpakigbahin sa Via Crusis kag upod man namon ang nagtungod sa papel ni Cristo.

KON PAANO GINBAG-O SANG BIBLIA ANG AKON KABUHI: Sang manug-20 anyos na ako, nagtuon ako sa Biblia upod sa mga Saksi ni Jehova. Nakahibalo ako nga wala sing direksion ang akon kabuhi kag kon padayunon ko ini, magalala pa gid ang akon kahimtangan. Napahulag ako sang ginsiling sa Galacia 6:8: “Sia nga nagasab-ug para sa iya unod magaani sang pagkamadinulunton gikan sa iya unod, apang sia nga nagasab-ug para sa espiritu magaani sang kabuhi nga walay katapusan gikan sa espiritu.” Narealisar ko nga kon gusto ko mangin maayo ang akon kabuhi, kinahanglan ko magsab-ug para sa akon palaabuton.

Sang nagatuon na ako sa Biblia, nahangpan ko nga si Jehova isa ka buhi nga Dios nga nagaulikid gid sa akon, kag handa sia magpatawad sa mga sayop ko sang una. Naeksperiensiahan ko mismo nga ginapamatian niya kag ginasabat ang mga pangamuyo.

Indi mahapos nga bag-uhon ang estilo sang akon kabuhi. Mabudlay gid magbiya sa amon grupo. May pila ka mga lugar nga indi ako makakadto ukon makaagi bisan pa nga indi na ako miembro sang gang. Kon kaisa, ginapanaguan ko ang akon anay mga abyan kay ginapangita nila ako kag ginapilit nga magbalik sa grupo.

Tuhay gid ini sang magtambong ako sa mga miting sang mga Saksi sa Kingdom Hall, mga maabiabihon sila kag mainabyanon. Nagdayaw gid ako sa kalig-on sang ila pagtuo kag nakita ko nga ginahimo gid nila ang ila ginatudlo. Kabaliskaran gid ini kon ipaanggid sa mga kaupod ko sang una.

MGA BENEPISYO NGA AKON NATIGAYON: Pulo na ka tuig ang nagligad sang nabawtismuhan ako subong isa sa mga Saksi ni Jehova. Ginapanikasugan ko gid nga iaplikar ang mga panudlo sa Biblia. Bangod sini, ginarespeto na ako sang akon pamilya. Kilala na nila ako karon nga mapisan kag nakabulig man ako sa ila pinansial nga mga kinahanglanon. Nagtuon si Nanay sa Biblia kag nangin isa man sa mga Saksi ni Jehova. Nagahimo man si Tatay sing mga pagbag-o sa iya estilo sa pagkabuhi. Kalabanan sa akon pamilya indi mga Saksi ni Jehova, apang sang nakita nila ang akon pagbag-o, kumbinsido sila nga makabulig ang Biblia agod mangin maayo ang kabuhi sang isa ka tawo.

MALIP-OT NGA IMPORMASYON

NGALAN: YAYOI NAGATANI

EDAD: 50

PUNGSOD: JAPAN

KABUHI SADTO: MADINALAG-ON NGA NEGOSYANTE

ANG AKON NAGLIGAD: Nagdaku ako sa isa ka gamay nga banwa nga mainabyanon ang mga pumuluyo. Si Tatay ang tag-iya sang daku nga balaligyaan sa banwa nga may pulo ka trabahador. Tambi lang sa amon balay ang amon balaligyaan, amo nga bisan masako pirme si Nanay kag si Tatay, wala man ako nasubuan.

 Ako ang kamagulangan sa amon tatlo ka mag-ulutod nga babayi. Sang bata pa ako, ginhanas na ako sa pagpalakat sang amon negosyo. Temprano pa ako namana. Naghalin ang akon bana sa iya obra sa bangko kag nagbulig sa negosyo sang amon pamilya. Nagasunodsunod lang ang amon tatlo ka kabataan. Si Nanay ang nagabantay sa ila kag nagaatipan sang balay, samtang ako naman ang nagaobra sa amon balaligyaan halin sa aga tubtob maggab-i. Bisan pa masako, may tion gihapon kami sa pagtipontipon subong pamilya.

Sang ulihi, amat-amat nga nagakaputo ang mga negosyo sa amon lugar, lakip na ang amon balaligyaan. Agod indi gid kami matam-an, nagbukas kami sing balaligyaan sang mga materyales para sa pagpakay-o kag pagpanami sang balay malapit sa haywey. Sang bisperas sang seremonya agod sugdan ang pagtukod sang amon balaligyaan, si Tatay, nga amo ang presidente sang amon kompanya, gin-istrok. Pukol na sia maghambal, gani ako ang nag-abaga sang responsibilidad sa pagpalakat sang amon bag-o nga negosyo. Ang akon naman bana amo ang nagatatap sang amon daan nga negosyo. Bangod sini, nangin tuman na kami kasako.

Nalipay gid ako bangod nangin madinalag-on ang amon bag-o nga negosyo. Apang bangod tuman ako kasako haluson ako makatulog. Bisan palangga ko ang akon mga kabataan, ang negosyo amo ang pirme ko ginahunahuna. Haluson ko na gani maistorya ang akon bana, kag kon mag-istoryahanay gid man kami, pirme lang kami nagabais. Tuman ako kahago sa obra, amo nga halos kada gab-i nagaupod ako sa akon mga abyan kag kasosyo sa negosyo agod mag-inom-inom. Ang akon kabuhi amo na lang ang magtrabaho, mag-inom, kag magtulog. Indi ko mahangpan kon ngaa bisan madamo ako sing kuarta indi ako malipayon.

KON PAANO GINBAG-O SANG BIBLIA ANG AKON KABUHI: Sang nagtuon na ako sa Biblia upod sa mga Saksi ni Jehova, tatlo ka bersikulo sa Biblia ang nagpahulag gid sa akon. Nagtulo ang akon luha sang nahangpan ko ang narekord sa Mateo 5:3: “Malipayon ang mga mahunahunaon sang ila espirituwal nga kinahanglanon, kay ila ang ginharian sang langit.” Amo ini ang rason kon ngaa bisan manggaranon ako kag ginadayaw sang akon mga kasosyo, daw may kulang sa gihapon ang akon kabuhi. Nakamarasmas ako nga ang paghibalo kag pagtigayon sang akon espirituwal nga kinahanglanon amo gali ang makahatag sa akon sing matuod nga kalipay.

Sadto nga tion, daku ang pag-usmod sang ekonomiya sang Japan, kag nakita ko sa akon mga abyan nga matuod ang ginsiling sa 1 Timoteo 6:9: “Ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga kailigbon, nga nagatugdang sang mga tawo sa kalaglagan kag kapahamakan.” Nakita ko man nga para gid sa akon ang mga pulong ni Jesus nga narekord sa Mateo 6:24, “indi kamo makapaulipon sa Dios kag sa Manggad,” gani nagdesisyon ako nga bag-uhon ang akon kabuhi.

Narealisar ko nga napabay-an ko na ang akon mga ginikanan, bana, kag kabataan. Indi na maayo ang akon batasan. Nangin arogante ako, kag kadali sa akon mainit kag mangakig. Abi ko sang una, imposible na nga mabag-o pa ang akon kabuhi kag mangin isa ka Cristiano. Apang, palangga ko gid ang akon mga kabataan. Natalupangdan ko nga kon ginaaplikar ko ang laygay sang Biblia para sa pamilya, maayo ang epekto sini sa ila. Nagahinguyang na ako sing mas madamo nga tion upod sa ila kag ginadala ko sila sa mga miting sa kongregasyon.

MGA BENEPISYO NGA AKON NATIGAYON: Malipayon gid ako bangod nahibaluan ko kon ano ang katuyuan sang kabuhi, nagaalagad ako sa Dios, kag ang akon pagkabuhi nagapahamuot sa iya. Wala ko na ginapabay-an ang akon pamilya para lang sa negosyo, gani natigayon ko liwat ang pagtahod sa kaugalingon.

Nakita ni Nanay nga nangin maayo ang akon kabuhi sang gin-aplikar ko ang mga prinsipio sa Biblia, gani napahulag man sia nga magtuon sa Biblia kag nangin isa man ka Cristiano. Nalipay gid ako kay wala nagpamatok si Tatay kag ang akon bana sa amon desisyon. Nakabulig gid ang Biblia agod mangin suod pa gid ako sa akon kabataan kag nangin malipayon ang amon pamilya.

MALIP-OT NGA IMPORMASYON

NGALAN: MIKHAIL ZUYEV

EDAD: 51

PUNGSOD: RUSYA

KABUHI SADTO: ILEGAL NGA MANUGBALIGYA SANG MGA ARMAS

 ANG AKON NAGLIGAD: Natawo ako sa Krasnogorsk, isa ka banwa nga napalibutan sang berde nga kahilamnan. Yara sa bagatnan nga bahin sini ang Moscow River. Sa katundan kag aminhan naman amo ang komunidad nga halos nalikop na sang kagulangan.

Sang bata pa ako, nanamian gid ako magsumbaganay kag maghampang sing mga armas. Pirme ako nagahanas sa pagpakig-away. Nagahimo man ako sing ilegal nga mga armas, bala, kag mga sundang. Sang ulihi, nangin negosyo ko na ini. Maayo ang akon pagpadalagan sang negosyo kag nangin mabakal gid ang akon mga armas sa mga kriminal.

KON PAANO GINBAG-O SANG BIBLIA ANG AKON KABUHI: Sang maaga nga bahin sang mga katuigan 1990, nakilala ko ang mga Saksi ni Jehova, apang sang umpisa wala ako salig sa ila kay kapalapamangkot sa ila.

Isa ka adlaw, ang isa sa ila nagbasa sa akon sing rekord sa Biblia sa Roma 14:12: “Ang kada isa sa aton manabat . . . sa Dios.” Nabalaka ako kon ano ayhan ang akon isiling sa Dios bangod nakita niya ang akon mga ginahimo. Gani, nagtuon ako tuhoy sa kon ano ang ginapatuman sang Dios sa akon.

Ginpanikasugan ko gid nga iaplikar ang ginasiling sang Colosas 3:5-10: “Patya ninyo ang mga bahin sang inyo lawas nga yara sa duta may kaangtanan sa pagpakighilawas, kahigkuan, kailigbon sa sekso, makahalalit nga handum, kag pagkamahamkunon, nga isa ka idolatriya. Bangod sini nga mga butang ang kasingkal sang Dios magaabot. . . . Isikway gid ninyo ini tanan, kasingkal, kaakig, kalainan, nagapakalain nga hambal, kag ang malaw-ay nga hambal indi maggua sa inyo baba. Indi kamo magbutig sa isa kag isa. Ubaha ninyo ang daan nga personalidad upod ang mga buhat sini, kag magpanapot kamo sang bag-o nga personalidad.”

Indi mahapos para sa akon ang paghimo sing mga pagbag-o sa akon kabuhi. Ang akon anay mga “kasosyo sa negosyo” padayon nga nagatanyag sa akon sing kuarta para baligyaan ko sila sang mga armas, kag nabudlayan gid ako kay kadali sa akon mangakig kon ginainsulto ako. Walay sapayan sini, ginpaguba ko ang akon talaguan sang armas. Sang natun-an ko ang tuhoy sa gugma nga ginpakita sang Dios kag ni Cristo sa akon, napahulag ako nga higugmaon man sila. Nangin maukod ako sa akon personal nga pagtuon, regular nga pagtambong sa mga miting sa kongregasyon, kag padayon nga pagpangamuyo sang bulig ni Jehova.

MGA BENEPISYO NGA AKON NATIGAYON: Paagi sa akon pagpanikasog kag sa bulig sang pareho ko nga mga Saksi ni Jehova, amat-amat ko nga nabag-o ang akon kabuhi kag nangin isa ka maayo nga tawo. Nalipay gid ako sang nahangpan ko nga si Jehova nga Dios nagaulikid gid sa tagsatagsa sa aton, bisan pa sa mga napatay na. (Binuhatan 24:15) Ginaapresyar ko gid ang katampad kag kabunayag sang mga Saksi ni Jehova. Nagapasalamat ako sa pag-ulikid nila sa akon kag nagadayaw gid ako sa ila katutom sa Dios.

Sang primero, nagapamatok ang pila ko ka mga abyan kag paryente sa akon bag-o nga relihion. Apang sang nahunahuna nila nga mas maayo pa nga mangin bahin ako sang isa ka relihion sangsa mangin miembro sang isa ka sindikato, wala na sila namatok pa. Malipayon gid ako bangod ang akon kabuhi nasentro na karon sa pagbulig sa iban nga makatuon tuhoy sa Dios sang paghidait kag indi na sa pagbaligya sing mga armas.

[Piktyur sa pahina 27]

Agod magmulumag-an ang akon mga sala, nagaentra ako sa mga seremonya sa simbahan

[Piktyur sa pahina 28]

Manggaranon ako apang indi malipayon