Sulat Gikan sa Nicaragua

“Pag-abot Mo sa Suba Coco, Liko sa Tuo”

“KINAHANGLAN mo ang four-wheel-drive nga salakyan, winch ukon gamit nga pangguyod kon maguot ang imo salakyan, kag reserba nga gasolina. Madamo ka gid sing maagyan nga madalom nga lunang. Pag-abot mo sa Suba Coco, liko sa tuo.”

Bisan pa sining ginsiling sang kaupod ko nga misyonero, nagaalang-alang gihapon ako. Apang, bangod matambong ako sa isa ka Cristiano nga pagtilipon nga hiwaton sa gamay nga banwa sang Wamblán, nga sakop sang naaminhan nga Nicaragua, naglakat gid ako sang Martes sang aga.

Kaagahon pa ako nagbiya, kag gindala ko ang akon daan apang mapag-on nga salakyan. Nag-agi ako sa sementado nga dalan sang Pan-American Highway. Pag-abot sa Jinotega, indi na sementado ang dalan, amo nga ginatawag ini sang mga tawo didto nga feo, ukon malaw-ay. Antes ako magbiya sa sini nga banwa, may natalupangdan ako nga duha ka tiendahan, ang ngalan sang isa Milagro sang Dios kag ang isa naman, Ang Pagkabanhaw.

Ang dalan likuon, taklaron, kag dulhugon. Tuman ka hinay sang akon pagpadalagan samtang nagapangalihid sa higad sang kabukiran. Naagyan ko ang isa ka malaba nga linaw nga nahamtang sa isa ka nalupyakan sa ibabaw sang bukid nga natabunan sing mga panganod. Bisan pa may panganod, nakita ko ang mga kahoy nga ginatubuan na sing mga orkidya kag sing nagabitay nga mga tanomtanom.

Sa isa ka kurbada nga tuman ka likuon, diutayan lang ako mabungguan sang nagaharahara nga bus. Nagabuga ini sing maitom nga aso, kag nagaalasik lang ang mga bato nga maagyan sini. Diri sa Nicaragua, makita mo gid sa atubangan sang bus ang mga bansag sang huroshuros nga mga drayber: Conqueror, Scorpion, Python, ukon Hunter.

Pagkaudto yara na ako sa Plain of Pantasma. Nalabayan ko ang isa ka balay nga human sa kahoy kag may matinlo nga ugsaran. Ang danyag daw kaangay sang mga laragway sa isa ka daan nga libro: Isa ka tigulang nga nagalingkod sa bangko, ido nga nagaluko sa idalom sang kahoy, kag duha ka kapon nga baka nga nagaguyod sang karo. Sa isa ka gamay nga banwa, nakita ko ang panong sang mga kabataan nga nagapagua sa eskwelahan. Samtang nagapakadto sila sa mayor nga dalan, daw mga balod sila sa dagat nga nagahampak sa baybayon bangod sa ila asul nga uniporme.

Nagatagiti ang init sang nagsampot ako sa Wiwilí, kag nakita ko sa una nga higayon ang Suba Coco. Ginasaklam sang suba ang malapad nga bahin sang banwa kag wala nagakahubas ang tubig sini. Bangod nadumduman ko ang ginsiling sa akon sang kaupod ko nga misyonero, nagpatuo ako kag nagbiyahe sa makatalagam nga 37 kilometros nga dalan pakadto sa Wamblán.

Nag-agi ako sa batuhon, batsihon, kag yab-ukon nga dalan. Gin-ubog man sang akon salakyan ang walo ukon siam ka suba. Samtang ginatinguhaan ko nga likawan ang madalom nga mga inagyan sang salakyan sa nagkigas nga lunang, nagatap-ok ang yab-ok  sa akon likod. Grabe gid ang yab-ok nga pamatyag ko daw ginakaon ko na ini. Sa katapusan, nakaabot gid man ako, kag yara sa ubos ang akon destinasyon, nga amo ang Wamblán nga isa ka nalupyakan nga may madabong nga kakahuyan.

Pagkasunod nga adlaw, alas 4:30 pa lang sa kaagahon, apang daw nakabugtaw na ang tanan. Bangod nakabugtaw ako sa wala patay nga panukturuok sang mga sulog, nagbangon ako kag naglakatlakat sa mayor nga dalan. Nagapangamyon sa palibot ang mga tortilya nga ginluto sa pugon nga mga bato.

Makita sa mga pader ang matahom nga mga danyag sang paraiso nga ginpinta sang pintor sa ila lugar. May mga karatula sa pulperías, ukon mga tiendahan, nga nagapasayod sang nanuhaytuhay nga softdrink. Ang mga poster nagapahanumdom sa mga tawo sa mga ginsaad sang nag-agi nga tatlo ka gobierno. May kongkreto nga kasilyas nga naatupan sing sin sa tupad sang mga balay.

Ginatamyaw ko ang mga tawo sing Adiós, kay amo ini ang panamyaw sang mga taga-Nicaragua. Nagayuhum ang mga tawo kag nagapakigsugilanon sa akon sing mainabyanon. Mabaskog ang amon tingog bangod magahod ang lapaklapak sang mga kabayo sa dalan.

Pagka-Biernes sang gab-i, nag-ilinabot ang mga pamilya para sa duha ka adlaw nga pagtilipon. Ang iban naglakat lang, ang iban nagsakay sa kabayo, ukon sa trak. Ang pila ka magagmay nga kabataan naglakat sing anom ka oras nga nagasandal sing plastik. Gintabok nila ang suba nga may mga land mine ukon bomba kag maisugon nga nag-ubog sa mga tubig bisan pa may mga alimatok. Ang iban nga naggikan pa sa malayo nagbalon sing diutay nga pagkaon​—kan-on nga ginsamuan sing tambok sang baboy. Ngaa nagkari sila?

Nagkari sila agod pabaskugon ang ila paglaum sa mas maayo nga palaabuton, pamatian ang pagpaathag sang Biblia, kag pahamut-an ang Dios.

Nag-abot na gid man ang Sabado. Naglingkod ang kapin sa 300 ka tumalambong sa mga bangko nga kahoy kag plastik sa sulod sang tinukod nga gin-atupan sing sin. Ginapatiti sang mga iloy ang ila mga lapsag. Nagainiwik ang mga baboy kag nagatinuruok ang mga talin sa kaingod nga uma.

Nag-init ang klima, kag sang ulihi halos indi na ini maagwanta. Apang, nagpamati gihapon sing maayo ang mga tumalambong sa laygay kag panuytoy nga ginahatag. Kon basahon gani ang teksto, ginasundan nila ini sa ila Biblia, nag-amba sila sing mga ambahanon nga ang tema napasad sa Biblia, kag matinahuron sila nga nagapamati sa mga pangamuyo para sa ila.

Pagkatapos sang programa, nagbuylog ako sa iban kag naghampang sing lagsanay upod sa mga kabataan. Nian, ginbinagbinag namon sing makadali ang ginsulat sang mga pamatan-on tuhoy sa programa. Ginpakita ko man sa ila ang mga laragway sang mga bituon kag mga galaksiya sa akon kompyuter. Nagayuhum ang mga kabataan, kag nalipay ang ila mga ginikanan.

Daw kadali lang sang tion, natapos ang pagtilipon, kag ang tanan mapauli na. Pagkaaga, nagpauli ako nga puno sing matahom nga handumanan kag gugma sa akon bag-o nga mga abyan. Luyag ko gid sila ilugon kag magtuon nga mangin kontento kag magsalig sa Dios.

[Mga piktyur sa pahina 17]

Malayo ang ginlakat sang mga pamilya agod makatambong sa Cristiano nga pagtilipon sa Wamblán