Ang Pag-abot sang Mesias

MADUGAY na nga ginapaabot sang mga Judiyo ang Mesias bangod nabasahan nila ang tuhoy sa iya sa sinulatan ni Isaias kag sa iban pa nga mga manalagna. Ang matuod, sang panahon ni Jesus, madamo nga mga Judiyo ang nagahunahuna nga malapit na mag-abot ang Mesias. (Lucas 3:15) Talalupangdon gid nga ang Biblia nagasugid sing abanse sang mga detalye tuhoy sa kabuhi sang Mesias. Wala sing tawo nga makasugid sing abanse sinang mga hitabo ukon makapahanabo sang mga butang nga maeksperiensiahan ni Jesus.

Mga Detalye Tuhoy sa Pagkatawo sang Mesias. Ginsugid ni Isaias nga ang Mesias, ukon Cristo, ibun-ag sang isa ka ulay. Sa tapos malaragway ang milagruso nga hitabo sa pagkatawo ni Jesus, si apostol Mateo nagsulat: “Ini tanan natabo agod matuman ang pinamulong ni Jehova paagi sa iya manalagna, nga nagasiling: ‘Yari karon! Ang isa ka ulay magabusong kag magabun-ag sang anak nga lalaki.’” (Mateo 1:22, 23; Isaias 7:14) Ginsugid man ni Isaias nga ang Cristo mangin kaliwat ni David,  nga espesipiko nga nagsambit kay Jesse, ang amay ni David. Huo, si Jesus nangin kaliwat gid ni David. (Mateo 1:6, 16; Lucas 3:23, 31, 32) Gani, antes natawo si Jesus, ginsugiran sang anghel nga si Gabriel ang iloy ni Jesus nga si Maria: “Ihatag sa iya ni Jehova nga Dios ang trono ni David nga iya amay.”​—Lucas 1:32, 33; Isaias 11:1-5, 10; Roma 15:12.

Mga Detalye Tuhoy sa Kabuhi sang Mesias. Sa sinagoga sa Nazaret, ang hamtong nga si Jesus nagbasa sing mabaskog sang mga hitabo nga ginsugid sing abanse ni Isaias nga nagalakip sining pinamulong: “Ang espiritu ni Jehova yari sa akon, bangod ginhaplas niya ako sa pagpahayag sing maayong balita sa mga imol.” Gin-aplikar ni Jesus ining pinamulong sa iya kaugalingon sang nagsiling sia: “Karon ining kasulatan nga bag-o lang ninyo nabatian natuman.” (Lucas 4:17-21; Isaias 61:1, 2) Nagsugid man si Isaias nga si Jesus makig-angot sing mainayuhon, maluluy-on, kag indi magapabugal kon ayuhon niya ang iban. Si Mateo nagsulat: “Madamo man ang nagsunod sa iya, kag gin-ayo niya sila tanan, apang nagtugon gid sia sa ila nga indi sia pag-ipanugidsugid; agod matuman ang pinamulong paagi kay Isaias nga manalagna . . . ‘Indi sia makigbais, ukon magsinggit . . . Indi niya pagbalion ang tabun-ak nga nahapay.’”​—Mateo 8:16, 17; 12:10-21; Isaias 42:1-4; 53:4, 5.

Mga Detalye Tuhoy sa Pag-antos sang Mesias. Ginsugid ni Isaias nga indi pagbatunon sang madamo sa Israel ang Mesias, sa baylo mangin “bato [sia] nga kasandaran” sa ila. (1 Pedro 2:6-8; Isaias 8:14, 15) Kag ang matuod, bisan pa naghimo si Jesus sing madamo nga milagro, ang katawhan “wala . . . magtuo sa iya, agod matuman ang pulong nga ginsiling ni Isaias nga manalagna: ‘Jehova, sin-o ang nagtuo sa butang nga amon nabatian?’” (Juan 12:37, 38; Isaias 53:1) Wala nagtuo ang mga Judiyo kay Jesus subong Mesias bangod sa sayop nga pagpati sang kadam-an nga hilwayon sila gilayon sang Mesias gikan sa paggahom sang mga Romano kag ipasag-uli ang ginharian ni David sa duta. Bangod nag-antos kag napatay si Jesus, halos tanan nga Judiyo indi magpati nga sia ang Mesias. Apang, ang matuod, ginsugid sing abanse ni Isaias nga ang Mesias makaeksperiensia sing mga pag-antos antes mangin Hari.

Suno sa tulun-an ni Isaias, ang Mesias magasiling: “Ginataya ko ang akon likod sa mga manughanut . . . Wala ko pagtagoa ang akon nawung sa kahuya kag sa pagdupla.” Ginreport ni Mateo ang natabo sang ginbista si Jesus: “Ginduplaan nila sia sa nawong kag ginsumbag sia. Gintampa sia sang iban.” (Isaias 50:6; Mateo 26:67) “Ginsakit sia, apang wala sia magtikab sang iya baba,” sulat ni Isaias. Gani, sang ginpamangkot sia ni Pilato tuhoy sa panumbungon sang mga Judiyo, “wala [si Jesus] magsabat sa iya, wala, bisan isa lang ka tinaga, amo nga natingala gid ang gobernador.”​—Isaias 53:7; Mateo 27:12-14; Binuhatan 8:28, 32-35.

Mga Detalye Tuhoy sa Kamatayon sang Mesias. Ang mga ginsugid ni Isaias natuman man sa kamatayon ni Jesus kag sa mga natabo pagkatapos sini. Nagsiling si Isaias: “Ginhimo nila ang iya lulubngan upud sa malauton kag upud sa manggaranon nga tawo sa iya kamatayon.” (Isaias 53:9) Daw imposible ini matabo. Apang, paano ini natuman? Antes napatay si Jesus, ginlansang nila sia sa usok nga nahamtang sa tunga sang duha ka kawatan. (Mateo 27:38) Apang sang ulihi, ginbutang sang manggaranon nga si Jose nga taga-Arimatea ang bangkay ni Jesus sa iya bag-o nga lulubngan nga ginguhab sa igang. (Mateo 27:57-60) Sa katapusan, natuman ang isa sa pinakaimportante nga mga butang nga ginsugid ni Isaias tuhoy sa kamatayon ni Jesus: “Ang akon matarung nga alagad, magapakamatarung sing  madamu; kag sia magabatas sang mga kalautan nila.” Huo, ang kamatayon ni Jesus nag-aman sing gawad agod nga matubos ang matutom nga katawhan gikan sa sala.​—Isaias 53:8, 11; Roma 4:25.

Ginsugid sing Abanse Apang May Pat-od nga Katumanan

Agod mapakilala ang Mesias suno sa ginasiling sang Kasulatan, ginpatuhuyan sang mga apostoles kag ni Jesus mismo ang tulun-an sang Isaias sangsa iban nga tulun-an sa Biblia. Apang, indi lamang ang tulun-an ni Isaias ang nagasugid tuhoy sa palaabuton. Ginsugid man sing abanse sang madamo nga tulun-an sa Hebreong Kasulatan ang tuhoy kay Jesus, sa iya Ginharian, kag sa maayong butang nga pagahimuon sang Ginharian. * (Binuhatan 28:23; Bugna 19:10) Paano naton mapat-od nga matuman ini? Ginsilingan ni Jesus ang iya Judiyo nga mga tagpalamati: “Indi kamo maghunahuna nga nagkari ako sa pagdula sa Kasuguan ukon sa pinamulong sang mga manalagna [nga amo ang Hebreong Kasulatan]. Nagkari ako, indi sa pagdula, kundi sa pagtuman; kay sa pagkamatuod nagasiling ako sa inyo nga mauna pa nga madula ang langit kag duta sangsa madula ang pinakamagamay nga letra ukon kudlit gikan sa Kasuguan tubtob matuman ang tanan nga butang.”​—Mateo 5:17, 18.

Ginpatalupangod man ni Jesus ang mga ginasiling sang Kasulatan nga nagakatuman sa palibot niya kag ang mga butang nga mahanabo pa sa palaabuton. (Daniel 9:27; Mateo 15:7-9; 24:15) Dugang pa, ginsugid ni Jesus kag sang iya mga disipulo ang mga hitabo nga mahanabo sa tapos sang ila panahon, lakip na ang madamo nga hitabo nga nagakatuman sa karon. Ang masunod nga artikulo magabinagbinag sa sini kag sa iban pa nga ginasiling sang Biblia nga mahanabo sa palaabuton.

[Footnote]

[Piktyur sa pahina 4]

“Ang isa ka ulay . . . magabun-ag sang anak nga lalaki”

[Piktyur sa pahina 5]

“Wala ko pagtagoa ang akon nawung sa kahuya”