Luha sa Panit nga Suludlan

ANG pamatan-on nga lalaki nangin isa ka laaslaas. Nagahilibion sia bangod sa daku nga problema kag nagpakitluoy sa iya Dios nga si Jehova nga pakitaan sia sing kaayo kag kaluoy: “Isulod ang akon mga luha sa imo panit nga suludlan.” (Salmo 56:8, NW) Ina nga lalaki amo si David, nga sang ulihi nangin isa ka hari sang Israel. Apang, ano ining panit nga suludlan nga ginpatuhuyan niya, kag ano ang buot silingon sang pagsulod sang Dios sang aton mga luha sa sini nga suludlan?

Si David pamilyar gid sa mga panit nga suludlan. Sang una, ginagamit ini nga suludlan sang tubig, lana, alak, kag mantikilya pa gani. Ang mga manlulugayaw sa Sahara, subong sang mga Tuareg, nagagamit gihapon sing panit nga mga suludlan nga human sa panit sang kanding ukon karnero. Ini nga mga suludlan mahimo sudlan sing madamo nga tubig, depende sa kadakuon sang sapat. Ang panit nga mga suludlan makapabugnaw gihapon sang tubig bisan sa nagatagiti nga init sa desyerto. Sang una, ginakarga ini sang mga asno ukon kamelyo. Apang sa karon, makita mo ini nga nagasab-it sa atubangan sang pangtarag nga salakyan!

Ang makatalandog nga pinamulong ni David tuhoy sa panit nga suludlan mahimo man magpalig-on sa aton. Paano? Bueno, ginapaathag sang Biblia nga ginakontrol ni Satanas ining kalibutan, kag may ‘daku sia nga kaakig’ sa aton panahon. Subong resulta, ang kalibutan karon puno sing problema. (Bugna 12:12) Amo sina ang rason kon ngaa madamo karon ang kaangay ni David nga nagaatubang man sing kasubo, palaligban sa kabuhi, kag balatian ukon kasablagan sa lawas​—ilabi na gid yadtong mga nagaalagad sa Dios. Amo bala sina ang nabatyagan mo? Bisan “nagahibi” ining matutom sa Dios nga mga tawo, malig-on gihapon sila nga nagaalagad sa Dios. (Salmo 126:6) Makasalig sila nga nakita sang ila Amay sa langit indi lamang ang mga pagtilaw nga ila ginaatubang kundi pati man ang kasakit nga epekto sining mga pagtilaw. Nahangpan gid niya ang mga kapiutan sang iya mga alagad, kag ginadumdom niya ang ila mga luha kag pag-antos, nga daw subong bala nga ginatipon niya ini sa iya panit nga suludlan.