“Mangin Manug-ilog Kamo sa Dios”
Mangin Suod sa Dios
“Mangin Manug-ilog Kamo sa Dios”
MAINAYUHON. Maluluy-on. Mapinatawaron. Mahigugmaon. Sa karon, talagsa na lang kita makakita sang mga tawo nga may amo sini nga mga kinaiya. Kamusta sa imo bahin? Nabudlayan ka bala sa pagpakita sing maayo nga mga kinaiya bisan pa nagapanikasog ka nga mapalambo ini? Bangod sang pila ka kabangdanan, kaangay sang daw indi na mabag-o nga malain nga batasan, ukon bangod sang imo masakit nga mga inagihan, mahimo mangatarungan ka nga imposible nga mapalambo mo ang maayo nga mga kinaiya. Apang, ang aton Manunuga nakahibalo nga may ikasarang kita sa pagpalambo sing maayo nga mga kinaiya. Ining makapalig-on nga kamatuoran ginatudlo sang Biblia.
Ang Pulong sang Dios nagalaygay sa matuod nga mga Cristiano: “Busa, mangin manug-ilog kamo sa Dios, subong mga anak nga hinigugma.” (Efeso 5:1) Maathag sa sini nga pinamulong nga kumbinsido ang Dios nga ang iya mga sumilimba makapakita sing maayo nga mga kinaiya. Paano? Ang tawo gintuga ni Jehova nga Dios sa dagway nga kaangay sa Iya. (Genesis 1:26, 27) Buot silingon, ginhatagan sang Dios ang mga tawo sing mga kinaiya nga pareho sa iya. * Gani, sang ginpalig-on sang Biblia ang mga Cristiano nga ‘mangin manug-ilog sila sa Dios,’ daw pareho lang nga nagasiling sa ila si Jehova: ‘May pagsalig ako sa imo. Nahibaluan ko nga bisan indi ka perpekto, sarang mo mailog ang akon mga kinaiya, kag mapahamut-an ako.’
Ano ang pila ka kinaiya sang Dios nga puede naton mailog? Ang sabat mabasa naton sa kaupod sini nga mga bersikulo. Talupangda nga antes ginsambit ni Pablo ang pag-ilog sa Dios, ginsambit niya anay ang tinaga nga “busa.” Nagaangot ini sa ginasiling sang nauna nga bersikulo, nga nagasambit sang pagkamainayuhon, pagkamapinalanggaon nga may kaawa, kag pagkamapinatawaron. (Efeso 4:32; 5:1) Sa masunod nga bersikulo, pagkatapos sang laygay nga ilugon ang Dios, ginsiling dayon ni Pablo sa mga Cristiano nga dapat magkabuhi sila nga may masinakripisyuhon nga gugma para sa iban. (Efeso 5:2) Ang matuod, kon ginatinguhaan naton nga mangin mainayuhon, magpabutyag sing mapinalanggaon nga kaawa, magpatawad sa iban sing kinabubut-on, kag magpakita sing gugma, ginailog gid naton ang tuman ka dalayawon nga halimbawa sini—si Jehova nga Dios.
Ngaa kinahanglan gid nga mangin kaangay kita sang Dios? Talupangda ang makapakumbinsi nga pinamulong ni apostol Pablo: “Mangin manug-ilog kamo sa Dios, subong mga anak nga hinigugma.” Wala bala sini natandog ang imo balatyagon? Para kay Jehova, ang iya mga sumilimba kaangay sang mga bata nga ginahigugma gid niya. Pareho sang bata nga lalaki nga luyag mangin kaangay sa iya amay, ginatinguhaan man sang matuod nga mga Cristiano nga mangin kaangay sang ila Amay sa langit.
Wala ginapilit ni Jehova ang mga tawo nga ilugon sia. Sa baylo, ginhatagan niya kita sing kahilwayan sa pagdesisyon sa aton kaugalingon. Gani, depende sa imo kon ilugon mo ang Dios ukon indi. (Deuteronomio 30:19, 20) Apang, indi pagkalimti nga may ikasarang ka sa pagpakita sing diosnon nga mga kinaiya. Siempre pa, agod mailog ang Dios, kinahanglan mo anay tun-an kon ano sia nga sahi sang Dios. Makabulig ang Biblia agod matun-an mo ang tanan nga ginasiling sini tuhoy sa kinaiya kag dalanon sang Dios. Bangod sang iya indi matupungan nga personalidad, napahulag ang minilyon ka tawo nga ilugon sia.
[Footnote]
^ par. 5 Ginapakita sang Colosas 3:9, 10 nga ang larawan ukon dagway sang Dios nagapatuhoy sa iya mga kinaiya ukon personalidad. Ang mga luyag magpahamuot sa Dios ginasugo nga magpanapot sing “bag-o nga personalidad,” nga “ginabag-o suno sa larawan sang Isa [sang Dios] nga nagtuga sini.”
