Sin-o ang Makahibalo sang Palaabuton?

“Ako amo ang Dios, . . . nga nagapahayag sang katapusan kutub sa ginsuguran kag kutub sa dumaan nga mga tion sang mga butang nga wala pa mahimo.”​—Isaias 46:9, 10.

BANGOD wala sing kapat-uran ang kahimtangan karon, ang mga eksperto sa pulitika, ekonomiya, kag katilingban sang tawo nagatuon sa mga hitabo karon kag sang nagligad agod hibaluon kon ano ang mahanabo sa palaabuton. Ang iban naman nagakadto sa manugpakot ukon espiritista. Apang ining mga tawo masami nga nagakapaslawan. Imposible gid bala mahibaluan kon ano ang mahanabo sa sining kalibutan, sa aton pamilya, kag sa kada isa sa aton? May makahibalo gid bala sang palaabuton?

Sa iya pinamulong kay propeta ukon manalagna Isaias nga ginsambit sa ibabaw, ginsugiran kita sang Labing Gamhanan nga Dios nga si Jehova nga may ikasarang sia nga mahibaluan ang palaabuton. Paagi kay Isaias, ginsugid sang Dios nga pagahilwayon ang dumaan nga Israel gikan sa pagkabihag sa Babilonia kag magabalik sila agod patindugon liwat ang Jerusalem kag ang templo sini. Daw ano ka sibu ining abanse nga impormasyon? Mga 200 ka tuig antes mahanabo ina, nagsiling si Isaias nga Ciro ang ngalan sang magalutos sa Babilonia. Dugang pa, sibu ang paglaragway ni Isaias kon ano ang pagahimuon ni Ciro​—palikawon niya ang tubig sa Suba Eufrates, nga amo ang nagaamlig sa siudad. Ginsugid man niya nga ang daku kaayo nga ganhaan sang siudad pabay-an nga bukas, amo nga mahapos ini nga nasulod ni Ciro.​—Isaias 44:24–45:7.

Kon ipaanggid sa Dios, wala gid sing ikasarang ang tawo nga mahibaluan ang palaabuton. “Dili ka magpabugal sang buwas,” sulat sang maalam nga si Hari Solomon, “kay wala ka makahibalo kon ano ang mapatubas sang adlaw.” (Hulubaton 27:1) Matuod gid ina bisan karon. Wala sing tawo nga makahibalo sang iya palaabuton. Ngaa tuhay ang Dios? Bangod nahangpan niya sing bug-os ang tanan niya nga tinuga, lakip na ang kinaiya kag huyog sang tawo. Kon gustuhon sang Dios, sarang niya hibaluon kon ano ang pagahimuon sang isa ka tawo ukon sang isa ka pungsod. Dugang pa, wala sing limitasyon ang iya ikasarang sa pagkontrol sang mga hitabo. Sang nagsugid sia paagi sa iya mga manalagna sang butang nga mahanabo, sia nangin Isa “nga nagapalig-on sang polong sang iya alagad, kag nagatuman sang laygay sang iya mga manugbalita.” (Isaias 44:26) Si Jehova nga Dios lamang ang makasiling sina.

Bisan pa nagkabuhi si Isaias sing kapin sa 700 ka tuig antes magkari si Jesus, ang Mesias, nasugid sing abanse ni Isaias ang tuhoy sa pagkari sang Mesias. Apang, sugod sang ika-18 nga siglo, ginduhaduhaan sang mga kritiko sang Biblia ang pagkamasaligan sang tulun-an ni Isaias. Ginpahayag nila nga ang ginsugid ni Isaias wala nagapahibalo sang mahanabo sa palaabuton kundi ginsulat lamang pagkatapos ini natabo. Matuod bala ina? Sang 1947, nakit-an ang isa ka kopya sang tulun-an ni Isaias upod sa iban pa nga dumaan nga mga linukot sa isa ka kuweba malapit sa Patay nga Dagat. Napat-od sang mga iskolar nga ining kopya ginsulat sing kapin sa isa ka gatos ka tuig antes natawo ang Mesias. Huo, ginasugid gid sang Biblia ang palaabuton!

 Si Isaias kag ang iban pa nga mga manunulat sang Biblia indi makasugid sang mga hitabo sa palaabuton sa ila lamang kaugalingon nga kaalam. Sa baylo, “nagpamulong [sila] gikan sa Dios samtang ginatuytuyan sila sang balaan nga espiritu.” (2 Pedro 1:21) Sa masunod nga mga artikulo, usisaon naton ang pila ka detalye sa kabuhi ni Jesus nga ginsugid sing abanse ni Isaias. Dayon, binagbinagon naton ang mga hitabo nga ginsiling ni Jesus kag sang iya mga disipulo nga mahanabo sa aton panahon kag sa palaabuton.