Ano Gid ang Nagakatabo Kon Mapatay ang Isa?

“Ang tanan nga kalag imortal, bisan ang kalag sang mga malauton . . . Ginasilutan sila sang indi mapalong nga kalayo apang wala sila nagakapatay, ang ila pag-antos wala sing katapusan.”​—Clement sang Alexandria, manunulat sang ikaduha kag ikatlo nga siglo C.E.

KAANGAY ni Clement, ang mga nagasakdag sa panudlo nga ang impierno isa ka duog sang pag-antos nagapati nga ang kalag sang tawo imortal ukon indi mapatay. Ginasakdag bala sang Biblia ini nga panudlo? Binagbinaga kon ano ang sabat sang Pulong sang Dios sa sining mga pamangkot.

May imortal bala nga kalag ang una nga tawo nga si Adan? Ang Katoliko nga badbad nga Ang Biblia, Philippine Bible Society nagsiling sang gintuga si Adan: “Ang GINOONG Dios naghimo sang tawo gikan sa yab-ok sang duta, kag naghuyup sa iya ilong sang ginhawa sang kabuhi; kag ang tawo nanginbuhi nga kalag.” (Genesis 2:7) Talupangda nga wala ini nagsiling nga ginhatagan si Adan sing kalag.

Ano ang natabo kay Adan sa tapos sia nakasala? Ginsilutan sia sang Dios, apang wala sia ginpaantos sa impierno sing walay katapusan. Sa baylo, ang badbad sang Katoliko nga Maayong Balita nga Biblia nagsiling: “Kinahanglan magpabalhas ka kag maga-obra sing tudo gid agod makapatubas sing pagkaon ang duta, tubtob magbalik ka sa duta sa diin ka maghalin, kay ginhimo ka halin sa duta, kag sa duta ikaw magabalik.” (Italiko amon; Genesis 3:19) Ining pinamulong sang Dios kay Adan wala nagapahangop nga may isa ka butang sa iya lawas nga nagapabilin nga buhi sang mapatay sia. Sang napatay si Adan, ang kalag nga amo mismo si Adan, napatay man.

May imortal bala nga kalag ang tawo? Ginsilingan sang Dios si manalagna Ezequiel: “Ang kalag nga nagapakasala mapatay.” (Ezequiel 18:4, Ang Biblia) Si apostol Pablo nagsulat: “Ang sala nagsulod sa kalibutan paagi sa isa ka tawo [si Adan], kag ang iya sala nagdala sing kamatayon. Gani, ang kamatayon nagaabot sa tanan nga mga tawo, kay ang tanan nga mga tawo nagpakasala.” (Roma 5:12, Maayong Balita) Kon ang tanan nga tawo nagapakasala,  nian rasonable lamang nga ang tanan nga kalag mapatay man.

May nahibaluan ukon nabatyagan pa bala ang kalag nga napatay? Ang Pulong sang Dios nagsiling: “Ang buhi nakahibalo nga mapatay gid sila, pero ang patay wala gid sing nahibaluan.” (Manugwali 9:5, MB) Ginalaragway sang Biblia kon ano ang nagakatabo sa isa kon mapatay sia sang ini magsiling: “Nagabalik sia sa yab-ok kon sia mapatay; sa sina gid nga adlaw madula ang ila mga ginabuko.” (Salmo 146:4, Biblia sang Katilingban sang mga Kristiano) Kon ang mga patay “wala gid sing nahibaluan” kag “madula ang ila mga ginabuko” paano nila mabatyagan kon paantuson sila sa impierno?

Ginpaanggid ni Jesucristo ang kamatayon sa pagtulog. * (Juan 11:11-14) Apang mahimo magsiling ang iban nga si Jesus nagtudlo man nga ang impierno mainit kag ang mga malauton itagbong sa nagadabadaba nga impierno. Binagbinagon naton kon ano gid ang ginsiling ni Jesus tuhoy sa impierno.

[Footnote]