Lapnag nga Pagpati

“Pirme ako nagadamgo nga ginatagbong sa nagadabadaba nga impierno! Pagbugtaw ko nagasinggitan ako. Amo gani nga ginatinguhaan ko gid nga indi maghimo sing sala.”​—Arline.

NAGAPATI ka bala nga ang impierno isa ka duog nga gintigana agod paantuson ang mga makasasala? Amo sini ang ginapatihan sang madamo nga tawo. Halimbawa sang 2005, suno sa surbe sang isa ka iskolar sang University of St. Andrews sa Scotland, nagapati ang kapin sa 30 porsiento ka klero sa Scotland nga “paantuson sa hunahuna sing walay katapusan sa impierno” ang mga tawo nga wala ginakahamut-an sang Dios. Nagapati naman ang 20 porsiento, nga paantuson sa pisikal ang mga tawo nga yara sa impierno.

Sa madamo nga pungsod, lapnag ang pagpati sa impierno. Halimbawa, sa Estados Unidos, suno sa surbe sang Gallup sang 2007, mga 70 porsiento sang mga Amerikano ang nagapati sa sini. Bisan sa mga pungsod nga ang kalabanan indi relihioso, ang mga tawo nagapati gihapon sa impierno. Sang 2004, suno sa surbe sang Gallup, 42 porsiento sang mga taga-Canada kag 32 porsiento sang mga taga-Gran Britanya ang nagapati sa impierno.

Kon Ano ang Ginatudlo sang mga Klero

Madamo sang mga klero ang wala na nagatudlo nga ang impierno isa ka literal nga duog nga may kalayo diin ginapaantos ang mga tawo. Sa baylo, ginasakdag nila ang panudlo nga kaanggid sa ginsiling sang Catechism of the Catholic Church nga ginbalhag sang 1994. “Ang panguna nga silot sang impierno,” siling sining reperensia, “amo ang dayon nga pagkadula sang kahamuot sang Dios.”

Bisan pa amo sini ang ginatudlo sang mga klero, madamo gihapon ang nagapati nga ang impierno isa ka duog agod paantuson ang mga tawo sa mental ukon sa pisikal. Ang mga nagasakdag sa sini nga panudlo nagapangangkon nga napasad ini sa Biblia. Si R. Albert Mohler, presidente sang Southern Baptist Theological Seminary, nagsiling: “Amo ini ang ginatudlo sang Biblia.”

Ngaa Importante Kon Ano ang Imo Ginapatihan?

Kon ang impierno isa ka duog sang pag-antos, dapat lang nga mahadlok ka. Apang kon indi ini matuod, ang mga lider sang relihion nga nagatudlo sini amo ang balasulon kon maglibog ang hunahuna sang mga tawo kag mapunaw sa kahadlok sa impierno. Sa paghimo sini, ginapakahuy-an nila ang Dios.

Ano ang ginasiling sang Pulong sang Dios tuhoy sini? Ang masunod nga mga artikulo magagamit sing Katoliko kag Protestante nga badbad sang Biblia sa pagsabat sa tatlo ka pamangkot: (1) Ano gid ang nagakatabo kon mapatay ang isa? (2) Ano ang ginatudlo ni Jesus tuhoy sa impierno? (3) Ano ang epekto sa imo kon matun-an mo ang kamatuoran tuhoy sa impierno?