Ang Matun-an Naton kay Jesus

Tuhoy sa Paglaum sang Patay

Di-magkubos sa tatlo ka tawo ang ginbanhaw ni Jesus, gani ginapakita sini nga may paglaum ang mga patay. (Lucas 7:11-17; 8:49-56; Juan 11:1-45) Agod mahangpan naton ang tuhoy sina, hibaluon anay naton ang ginhalinan sang kamatayon.

Ngaa Nagabalatian Kita kag Nagakapatay?

Nag-ayo ang mga tawo sang ginpatawad ni Jesus ang ila mga sala. Halimbawa, sang gindala ang paralisado nga tawo sa iya, si Jesus nagsiling: “‘Ano ang mas mahapos, ang magsiling, Ang imo mga sala ginapatawad, ukon ang magsiling, Bangon ka kag maglakat? Apang, agod mahibaluan ninyo nga ang Anak sang tawo may awtoridad sa duta sa pagpatawad sing mga sala​—’ nian nagsiling sia sa paralitiko: ‘Bangon ka, hakwata ang imo hiligdaan, kag magpauli sa imo puluy-an.’” (Mateo 9:2-6) Ginapakita sini nga ang sala amo ang rason kon ngaa nagabalatian kita kag nagakapatay. Napanubli naton ang sala gikan sa una nga tawo nga si Adan.​—Lucas 3:38; Roma 5:12.

Ngaa Napatay si Jesus?

Si Jesus wala sing sala, gani indi sia dapat mapatay. Apang, napatay sia para sa aton agod bayaran ang aton mga sala. Nagsiling sia nga ang iya dugo “ibubo para sa madamo sa kapatawaran sang mga sala.”​—Mateo 26:28.

Nagsiling man si Jesus: “Ang Anak sang tawo nagkari, indi agod alagdon, kundi agod mag-alagad kag ihatag ang iya kalag subong gawad nga kabaylo sang madamo.” (Mateo 20:28) Gintawag ni Jesus nga “gawad” ang bili nga iya ginbayad bangod ginhilway sini ang iban nga tawo gikan sa kamatayon. Nagsiling man si Jesus: “Nagkari ako agod makatigayon sila sang kabuhi kag matigayon nila ini sing bug-os.” (Juan 10:10) Agod mahangpan naton sing maathag ang paglaum sang mga patay, dapat hibaluon man naton kon ano ang ila kahimtangan.

 Ano ang Kahimtangan sang Patay?

Sang napatay ang abyan ni Jesus nga si Lazaro, ginpakita ni Jesus kon ano ang kahimtangan sang patay. Nagsiling sia sa iya mga disipulo: “‘Si Lazaro nga aton abyan nagapahuway, apang makadto ako [sa Betania] agod pukawon sia sa katulugon.’ . . . Naghunahuna sila nga naghambal sia tuhoy sa pagpahuway sa katulugon. Busa, sa amo nga tion, si Jesus nagsiling sa ila sing maathag: ‘Si Lazaro napatay.’” Gani, maathag nga ginpakita ni Jesus nga ang patay daw nagakatulog lang, buot silingon, wala sing hinalung-ong.​—Juan 11:1-14.

Apat ka adlaw na si Lazaro nga napatay sang ginbanhaw sia ni Jesus. Apang wala sing rekord sa Biblia nga may gin-istorya si Lazaro kon ano ang natabo sa iya sang napatay sia. Sadto nga tion, wala sing hinalung-ong kag wala sing nahibaluan si Lazaro.​—Manugwali 9:5, 10; Juan 11:17-44.

Ano ang Paglaum sang Patay?

Ang mga patay pagabanhawon kag may paglaum nga mabuhi sing walay katubtuban. Si Jesus nagsiling: “Magaabot ang tion nga ang tanan nga yara sa handumanan nga mga lulubngan makabati sang iya [ni Jesus] tingog kag magagua.”​—Juan 5:28, 29.

Ini nga paglaum nagapakita sang gugma sang Dios sa katawhan. Si Jesus nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”​—Juan 3:16; Bugna 21:4, 5.

Para sa dugang nga impormasyon, tan-awa ang kapitulo 6 sang libro nga Ano Gid Bala ang Ginatudlo Sang Biblia? *

[Footnote]