Ang Pagpangita sing mga Sayop Nagdul-ong sa Kamatuoran

Panugiron ni R. Stuart Marshall

“Wala kita nagaistorya sa mga Saksi ni Jehova,” siling sang Jesuita nga pari. “Nagagamit sila sang Biblia.” Nakibot gid ako sa iya ginsabat, bangod bag-o ko lang gid sia ginpangabay nga buligan ang akon asawa paagi sa pagpakita sing pila ka sayop sa panudlo sang mga Saksi ni Jehova. Nagdesisyon ako nga ako mismo ang magtuon sa Biblia upod sa mga Saksi agod mapakita ko sa akon asawa nga may sayop sa ila mga panudlo.

SA SINI nga tion, sa edad nga 43, paagi sa akon ikasarang sa pagpangatarungan kag ihibalo sa teolohiya gintinguhaan ko nga pamatud-an nga may sayop sa mga panudlo sang mga Saksi ni Jehova. Halin sa elementarya tubtob sa kolehiyo, nag-eskwela ako sa Katoliko nga eskwelahan. Bisan pa nga nakagradwar ako sa kurso tuhoy sa ekonomiya sang 1969 kag may subject nga pilosopiya kag teolohiya, wala gid namon natun-an ang Biblia.

Pagkagradwar ko, nagpakasal kami ni Patricia McGinn nga isa man ka Katoliko. Pareho kami nga nakaangkon sing doctorate degree sa Stanford University. Sang 1977, natawo ang amon anak nga si Stuart, kag nagpuyo kami sa Sacramento, California, U.S.A. Sa masunod nga 23 ka tuig, nagtrabaho ako sa Legislative Analyst’s Office (LAO) sa estado sang California, nga amo ang nagabinagbinag sa kon ano ang mangin epekto sa estado sang badyet para sa edukasyon. Nagabakabaka gid ako sa pagtrabaho kag nangin malipayon ang pagkabuhi. Nalipay gid ako sa pag-atipan sa amon bata samtang nagadaku sia. Ginasuportahan gid ako sang akon pinalangga nga asawa, kag ginasuportahan ko man sia.

Ang Beinte Singko Sentimos nga Sabat

Sang duha na ka tuig ang amon bata, nakakuha si Patricia sing Biblia halin sa mga Saksi ni Jehova kag nagtuon upod sa ila. Pagligad sing tatlo ka tuig, nabawtismuhan sia. Sa banta ko makitid ang pagtamod sang mga Saksi ni Jehova tuhoy sa mga kapiestahan kag pagpatughong sing dugo, apang kumbinsido man ako sa iban nila nga panudlo. Nakibot ako nga sang isa ka adlaw, sang 1987, napabutyag ko ang akon pagtamod sang ginpatawag ako agod ipaathag ang isa sa akon panugda sa tion sang pagsinapol sang mga nagahimo sing kasuguan tuhoy sa edukasyon sa amon estado.

Luyag makatipon sing pundo ang University of California agod madaug ang iban nga estado kag makuha ang seis bilyones dolyares nga proyekto sang gobierno. Ini nga proyekto amo ang pagpatindog sang tuman ka daku nga makinaryas nga gamiton sang mga sientipiko sa ila pagtuon. Wala ako magpasugot sa sini nga proyekto, nga nagapaathag nga wala ini sing daku nga mabulig sa ekonomiya sang estado. Nagsabat ang unibersidad paagi sa pagpatawag sang duha ka tawo nga nagdaug sing Nobel sa ila hinimuan sa physics agod  nga magpaathag sa atubang sang lehislatura. Ginpaathag sang kada isa sa ila ang ihibalo nga mahimo mahatag sini nga proyekto sa mga sientipiko. Ang isa nagsiling nga masabat sini ang mga pamangkot tuhoy sa ginhalinan sang uniberso. Nagsiling naman ang isa nga makabulig ini sa aton nga mahangpan ang ginsuguran sang kabuhi sa aton planeta.

Nagtulok sa akon ang tsirman sang komite.

“Sa banta mo, tuman bala ka mahal ang seis bilyones dolyares para masabat ini nga mga pamangkot?” pamangkot niya.

“Nagaugyon ako nga importante gid ini nga mga pamangkot,” sabat ko. “Apang, ang mga Saksi ni Jehova nagakadto sa balay kada Sabado sang aga kag nagatanyag sa akon sang magasin nga nagasabat sina nga pamangkot sa $0.25 nga donasyon lamang. Ambot lang kon ang seis bilyones dolyares nga sabat nga mahatag sini nga proyekto mas maayo pa sangsa ila $0.25 nga sabat.”

Nagkinadlaw ang tanan, lakip na ang mga dumalaug sang Nobel. Bisan pa gintugutan sang lehislatura ang pagtipon sing pundo para sa sini nga proyekto, wala sing may namatok sa akon punto.

Sa pagligad sang tion, natalupangdan ko nga kinahanglan ko atipanon ang problema sa balay. Pagkatapos sang anom ka tuig nga pagpakig-istorya kay Patricia tuhoy sa Biblia kag sa mga Saksi ni Jehova, naglain ang akon buot sang nagdesisyon sia nga luyag niya maghinguyang sing mas madamo nga tion sa pagwali. Nagapahangop ini nga buhinan niya ang iya trabaho sa unibersidad. Indi ko mahangpan kon paano ang isa ka normal kag maalam nga tawo makahimo sina nga desisyon, kag daw wala na ako sing mahimo agod magbag-o ang iya hunahuna.

Nangayo ako sing bulig sa mga eksperto, sa mga tawo nga mas madamo sing ihibalo sa Biblia sangsa akon, nga sa banta ko makabulig sa akon agod ipakita sa iya ang wala napasad sa Biblia nga panudlo sang mga Saksi ni Jehova. Kon mapamatud-an ko lang nga sayop ang bisan isa sa ila mga panudlo, mahimo na mapangduhaduhaan ang iban nila nga doktrina. Amo lamang ini ang kinahanglan ko agod makumbinsi ang akon maalam nga asawa. Nakigkita ako sa Jesuita nga pari sa amon anay ginatambungan nga simbahan. Ang amon sugilanon natapos sa pag-istoryahanay nga ginsambit sa umpisa sini nga artikulo. Sang nangindi ang pari sa pagsugilanon sa akon asawa, nagdesisyon ako nga bisan pa medyo madugay, ako mismo ang mangita sing sayop kag ipakita ini kay Patricia.

Ang Akon Pagpangita sing mga Sayop

Samtang nagatuon ako sa Biblia upod sa mga Saksi, nagdayaw gid ako sa mga tagna nga narekord sa sini. Nabasahan ko sa tulun-an ni propeta Isaias ang detalye tuhoy sa pagkapukan sang Babilonia nga ginsulat halos 200 ka tuig antes matabo,  nagsambit pa gani ini kay Ciro subong amo ang manugdaug kag nagpaathag sang taktika sa pagpalikaw sang tubig sa Suba Eufrates agod malutos ang Babilonia. (Isaias 44:27–45:4) Sang una, natun-an ko sa amon klase sa estratehiya sang militar ang tuhoy sa pagkapukan sang Babilonia. Natun-an ko man nga detalyado nga gintagna ni propeta Daniel ang tuhoy sa gamhanan nga hari sang Gresya nga ang iya ginharian bahinon sa apat ka mas kubos nga mga ginharian pagkatapos sang iya kamatayon. Gintagna niya ini kapin sa 200 ka tuig antes natabo. (Daniel 8:21, 22) Nadumduman ko ini nga katunayan tuhoy kay Alejandro Daku sa amon pagtuon sa kasaysayan. Paagi sa akon personal nga pagpanalawsaw sa mga reperensia, kumbinsido gid ako nga ginsulat ini nga mga tulun-an sa Biblia antes pa natabo ang ila mga gintagna.

Samtang nagapadayon ako sa pagtuon upod sa mga Saksi, mas nangin kumbinsido ako nga ang Biblia Pulong sang Dios, butang nga wala ko natun-an sa tinuig ko nga pag-eskwela sa teolohiya sang Katoliko. Ano ang akon himuon sa sini nga ihibalo? Nagdesisyon ako nga idedikar ang akon kabuhi kay Jehova kag nangin isa sa iya mga Saksi. (Isaias 43:10) Nabawtismuhan ako sang 1991, pagligad lamang sang duha ka tuig, sugod sang akon pagpakigsugilanon sa pari. Pagkadason nga tuig nabawtismuhan man ang amon bata.

Bangod sini, nagbag-o ang mga tulumuron sang amon pamilya. Ang akon una nga ginhimo pagkatapos sang akon bawtismo amo ang pagpangita sing paagi agod sa pagligad sing lima ka tuig ang akon asawa mahimo na makauntat sa pagtudlo sa unibersidad sa edad nga 50. Luyag niya mangin payunir nga ministro, nga sa sadto nga tion nagahinguyang sing 1,000 ka oras kada tuig, ukon mga 83 ka oras kada bulan, agod mabuligan ang iban nga makatuon sang mga kamatuoran sa Biblia. Sang 1994, ginbuhinan niya ang iya iskedyul sa trabaho agod makapayunir. Ang akon una nga mga tulumuron amo ang pagpauswag sang akon pamaagi sa pagwali, pagbulig sa hilikuton sa amon kongregasyon, kag pagboluntaryo sa pagkwenta sang mga galastuhon sa pagpatindog sang mga Kingdom Hall sa amon lugar.

Kon kaisa, makahigayon ako sa pagsugid tuhoy sa Biblia sa akon ginaubrahan. Ang bag-o nga budget analyst sa LAO isa gali ka Saksi nga madugay na nga nagluya sa iya pagpati. Bangod ini sa iya pagpangduhaduha sa Biblia. Nalipay ako sa pagbulig sa iya nga makapanumbalik sa iya maayo nga kaangtanan kay Jehova. Gani, nagpauli sia sa ila lugar kag nagpayunir.

Sang 1995, nagtambong ako sa pinasahi nga sinapol sang mga manughimo sing kasuguan tuhoy sa edukasyon para sa pagpanalawsaw nga gastuhan sang gobierno. Ginpamangkot sang tsirman sang komite ang representante sang gobierno kon ano na ang natabo sa nagligad nga proyekto. Bilang sabat, nagsiling ang representante nga ginhatag yadto nga proyekto sa estado sang Texas apang wala ini natapos bangod sa tatlo ka rason. Una, nagsaka ang bili sang proyekto halin sa seis bilyones pakadto sa nuebe bilyones dolyares antes pa ini masugdan. Ikaduha, luyag gamiton sang gobierno ang pundo para sa lain nga proyekto, ilabi na sa giyera sa Iraq sang 1991. Ikatlo, natukiban nila nga masapwan ang sabat tuhoy sa mga pamangkot sa kabuhi sa mga Saksi ni Jehova sa donasyon nga $0.25 lamang! Ginapakita sini nga ang akon ginhambal ginsulitsulit sang madamo nga tawo kag ginsulit naman sa sini nga sinapol.

Sang nagkinadlaw ang tanan, nagtulok sa akon ang pila ka miembro sang komite. Ginpahibalo ko sila nga nagasiling, “Mahimo na ninyo karon mahibaluan ang sabat sing libre kon basahon ninyo ang amon mga balasahon.”

Ang Masako kag Malipayon nga Kabuhi

Sang nagretiro na ang akon asawa, nagplano kami kon ano ang akon himuon pagligad sing lima ka tuig. Nagpulupamangkot ako sa iban nga ahensia kon puede ako magtrabaho sing part-time bangod luyag ko nga maghinguyang sing mas madamo nga tion sa pagtudlo sa iban tuhoy sa mga kamatuoran sa Biblia. Wala ko ginpaabot nga tugutan ako sang LAO nga buhinan ang akon tion sa pagtrabaho. Gani sang 1998, nangin payunir man ako nga ministro.

Isa ka aga, sang nagahanda kami sang akon asawa nga malakat sa pagwali, nakabaton ako sing tawag gikan sa sanga talatapan sang mga Saksi ni Jehova sa Brooklyn, New York, U.S.A. Ginpamangkot nila ako kon interesado ako sa pagtrabaho sa isa ka proyekto sa Brooklyn. Ginbaton ko gilayon  ang ila tanyag, amo nga nakatrabaho kami sa ulong talatapan sang mga Saksi sing 18 ka bulan. Bangod sini, temprano pa ako nagretiro sa akon obra sa estado sang California agod matapos ini nga proyekto. Pagkatapos sini, nagboluntaryo kami sa pagpatindog sing dalagku nga tilipunan sang mga Saksi ni Jehova sa Fairfield, California. Ginbaligya namon ang amon balay sa Sacramento kag nagsaylo sa gamay nga apartment sa Palo Alto. Ang akon temprano nga pagretiro nagresulta sa madamo nga pagpakamaayo. Nakatrabaho kami sa mga proyekto sang sanga talatapan sang mga Saksi ni Jehova sa Nigeria, Bagatnan nga Aprika, Canada, Britanya, kag Alemanya.

Kaangay sang mga Saksi nga nagbulig sa amon, nalipay man kami subong sang akon asawa sa pagbulig sa iban nga makatuon sing mga kamatuoran sa Biblia. Nagbatyag gid ako nga ang edukasyon gikan kay Jehova amo ang labing makapaladya sa tanan nga edukasyon nga natigayon ko. Pinakamaayo ini sa bisan ano man nga programa sa edukasyon diri sa duta. Ginahanas ni Jehova ang iya mga Saksi sa pagtudlo sing kamatuoran sa Biblia sa paagi nga nagatandog sa hunahuna kag tagipusuon. Amo ini ang nagpahulag sa akon nga magpadayon sa pagtuon. Nagapasalamat gid kami sang akon asawa sa amon kabuhi karon kag sa pribilehiyo nga maggamit ang amon ineskwelahan sa pag-alagad sa Soberano sang uniberso nga si Jehova nga Dios.

[Blurb sa pahina 27]

Samtang nagatuon ako sa Biblia upod sa mga Saksi, nagdayaw gid ako sa mga tagna nga narekord sa sini

[Piktyur sa pahina 27]

Sa adlaw sang amon kasal ni Patricia

[Piktyur sa pahina 29]

Nalipay kami sa pagbulig sa iban nga matun-an ang mga kamatuoran sa Biblia