Si Jesus​—Ang Perpekto nga Huwaran nga Dapat Sundon

LUYAG mo bala nga mangin mas maayo kag mas malipayon nga tawo? Ginpaathag ni apostol Pedro kon paano. Sia nagsulat: “Si Cristo mismo nag-antos tungod sa inyo, nga nagabilin sa inyo sang huwaran agod sundon ninyo sing maayo ang iya mga tikang.” (1 Pedro 2:21) Sa pagkamatuod, bangod tumalagsahon ang kabuhi ni Jesucristo, madamo kita sing matun-an sa iya. Kon magtuon kita tuhoy kay Jesus kag magsunod sa iya pagkabuhi, mangin mas maayo kag mas malipayon gid kita nga tawo. Binagbinagon naton sing maayo ang mga kinaiya sining pinakabantog nga tawo kag tan-awon kon paano kita makabenepisyo sa iya halimbawa.

Si Jesus balanse sa iya pagkabuhi. Bisan pa nagsiling si Jesus nga ‘wala gid sing maunlan ang iya ulo,’ wala niya ginadingutan ang iya kaugalingon. (Mateo 8:20) Nagtambong sia sa mga sinalusalo. (Lucas 5:29) Ang una niya nga narekord nga milagro amo ang paghimo sing alak halin sa tubig sa isa ka punsion sa kasal, gani nagapakita ini nga luyag niya makig-upod sa iban. (Juan 2:1-11) Apang, maathag man nga ginpakita ni Jesus kon ano ang pinakaimportante sa iya. Sia nagsiling: “Ang akon kalan-on amo ang paghimo sa kabubut-on sang nagpadala sa akon kag ang pagtapos sa iya buluhaton.”​—Juan 4:34.

□ Nabinagbinag mo na bala kon paano mo mabalanse sa imo kabuhi ang pagtinguha sa materyal kag ang pagpakigsuod sa Dios?

Mahapos palapitan si Jesus. Ginalaragway sang Biblia si Jesus nga mapinalanggaon kag mainabyanon. Wala sia nasabaran kon magpalapit ang mga tawo sa iya tuhoy sa ila problema ukon kon may mabudlay sila nga mga pamangkot sa iya. Isa ka bes, sang nagdinaguso ang mga tawo sa iya, gintandog sang isa ka babayi, nga nagaantos sing malubha nga balatian sa sulod na sang 12 ka tuig, ang iya panapton nga nagalaum nga magaayo sia. Wala sia ginsikway ni Jesus bisan ginatamod  ini sang iban nga makahas nga buhat, kundi mainayuhon niya sia nga ginsilingan: “Anak, ang imo pagtuo nag-ayo sa imo.” (Marcos 5:25-34) Ang mga kabataan nanamian man mag-upod sa iya, kag wala sila nahadlok nga basi indi sila pagsapakon ni Jesus. (Marcos 10:13-16) Tampad kag mainabyanon gid si Jesus sa pagpakig-angot sa iya mga disipulo. Amo nga luyag gid nila makigsuod sa iya.​—Marcos 6:30-32.

□ Mahapos ka man bala palapitan sang iban?

Mahinuklugon sia kag maluluy-on. Ang isa sa pinakamaayo nga kinaiya ni Jesus amo nga ginabutang niya ang iya kaugalingon sa kahimtangan sang iban, nga ginabatyag ang ila mga balatyagon, kag ginabuligan sila. Nagsaysay si apostol Juan nga sang nakita ni Jesus nga nagahibi si Maria bangod napatay ang iya utod nga si Lazaro, “natandog gid ang tagipusuon ni Jesus kag nalisang sia” kag ‘nagtulo ang iya luha.’ Nahangpan gid sang mga nakakita ang daku nga gugma ni Jesus sa sini nga pamilya, kag wala gid niya ginkahuya nga ipakita ini. Ginpakita man niya ang daku nga kaluoy sang ginbanhaw niya ang iya abyan.​—Juan 11:33-44.

Sa isa naman ka hitabo, nakitluoy kay Jesus ang isa ka tawo nga may makangilil-ad nga aro nga nagasiling: “Ginuo, kon luyag mo gid, matinluan mo ako.” Makalilipay gid ang reaksion ni Jesus: “Gin-untay niya ang iya kamot kag gintandog sia, nga nagasiling: ‘Luyag ko. Mangin matinlo ka.’” (Mateo 8:2, 3) Wala nagpang-ayo si Jesus agod matuman lamang ang tagna. Luyag gid niya nga pahiran ang ila mga luha. Ang tanan niya nga ginhimo nahisuno sa iya pinakabantog nga pinamulong: “Subong man, ang luyag ninyo nga himuon sang mga tawo sa inyo, himua man ninyo ini sa ila.”​—Lucas 6:31.

□ Makita man bala sa imo mga buhat nga may kaluoy ka sa iban?

Si Jesus mahinangpanon kag mahinantupon. Bisan pa perpekto si Jesus, wala gid sia nagpaabot nga mangin perpekto man ang iban ukon nagbatyag nga mas maayo sia sangsa ila. Wala man sia nagpanghikot nga may kakulang sing paghangop. Sang isa ka bes, ginpakita sang “isa ka babayi nga kilala sa siudad subong makasasala” ang iya pagtuo kag pag-apresyar paagi sa paghinaw sa mga tiil ni Jesus sang iya luha. Gintugutan sia ni Jesus nga himuon ini, kag nakibot gid ang nag-agda sa iya nga nagpakamalaut sa babayi. Wala ginkondenar ni Jesus ang babayi bangod sang iya mga sala kay nahibaluan niya nga sinsero gid sia. Sa baylo nagsiling sia: “Ang imo pagtuo nagluwas sa imo; lakat ka sa paghidait.” Bangod nangin mapinalanggaon si Jesus, mahimo gid nga napahulag ini nga babayi nga biyaan ang iya anay pagkabuhi.​—Lucas 7:37-50.

□ Pirme mo man bala ginaapresyar ang iban kag wala sila ginapakamalaut?

Matinahuron sia kag wala sing pinasulabi. Ayhan bangod nagasahuay kag mahimo nga paryentihanay sila, palangga gid ni Jesus ang  iya disipulo nga si Juan. * Apang, wala niya sia ginpasulabi, ukon ginpaboran sangsa iban nga disipulo. (Juan 13:23) Sa pagkamatuod, sang nangabay si Juan kag ang iya utod nga si Santiago sing pinakamaayo nga posisyon sa Ginharian sang Dios, si Jesus nagsabat: “Ining paglingkod sa akon tuo ukon sa akon wala indi ako ang magahatag.”​—Marcos 10:35-40.

Si Jesus matinahuron pirme sa iban. Wala sia sing pinasulabi, indi kaangay sang mga tawo sang yari sia sa duta. Halimbawa, pirme ginatamod nga kubos ang mga babayi sangsa mga lalaki. Apang, ginatahod gid ni Jesus ang mga babayi. Ang una niya nga ginsugiran nga sia ang Mesias amo ang isa ka babayi nga indi Judiyo kundi Samaritana, ang mga tawo nga ginapakanubo kag wala gani ginasapak sang mga Judiyo. (Juan 4:7-26) Sa mga babayi man una nga nagpakita si Jesus sang ginbanhaw sia.​—Mateo 28:9, 10.

□ Wala ka bala sing pinasulabi sa pagpakig-angot sa mga tawo nga may tuhay nga rasa, lenguahe, nasyonalidad, lalaki man ukon babayi?

Responsable sia nga anak kag utod. Posible nga napatay si Jose sang pamatan-on pa si Jesus. Mahimo gid nga ginsuportahan ni Jesus ang iya iloy kag mga manghod paagi sa pagpamanday. (Marcos 6:3) Sang madali na sia mapatay, gintugyan niya ang iya iloy kay Juan nga disipulo niya.​—Juan 19:26, 27.

□ Mailog mo man bala si Jesus paagi sa pagtuman sang imo mga responsibilidad sa pamilya?

Si Jesus matuod nga abyan. Subong isa ka abyan, dalayawon gid si Jesus. Ngaa? Wala niya ginsikway ang iya mga abyan bangod nakasala sila, bisan sulitsulit pa sila nga nakahimo sini. Wala pirme ginahimo sang iya mga disipulo kon ano ang iya luyag. Apang, paagi sa pagtan-aw sa ila maayo nga mga kinaiya sa baylo nga duhaduhaan sila, ginpamatud-an ni Jesus nga matuod sia nga abyan nila. (Marcos 9:33-35; Lucas 22:24-27) Wala man niya ginapilit ang iya mga pagtamod sa ila, kundi gintugutan niya sila nga ipabutyag ang ila mga pagtamod.​—Mateo 16:13-15.

Labaw sa tanan, ginahigugma gid ni Jesus ang iya mga abyan. (Juan 13:1) Sa ano nga kasangkaron? Sia nagsiling: “Wala sing isa nga may gugma nga daku pa sa sini, nga ihatag sang isa ang iya kalag para sa iya mga abyan.” (Juan 15:13) May mahatag pa bala nga mas bilidhon ang isa ka abyan sangsa sa iya kabuhi?

□ Mangin abyan ka pa bala gihapon bisan ginapaakig ukon ginasaklaw ka sang iban?

Sia maisugon kag responsable nga tawo. Si Jesus indi maluya ukon makaluluoy subong sang paglaragway sang iban. Ginalaragway sia sang Ebanghelyo nga makusog kag mapagsik nga tawo. Duha ka beses nga gintabog ni Jesus gikan sa templo ang mga negosyante kag ginpamaliskad ang ila mga baligya. (Marcos 11:15-17; Juan 2:14-17) Sang gindakop sang isa ka guban “si Jesus nga Nazaretnon,” maisog sia nga nagpakilala agod maproteksionan ang iya mga disipulo kag malig-on nga nagsiling: “Ako amo sia. Gani, kon ako ang inyo ginapangita, palakta sila.” (Juan 18:4-9) Indi katingalahan nga sang nakita ni Poncio Pilato ang kaisog ni Jesus sang gindakop sia kag gintamay, sia nagsiling: “Tan-awa! Ang tawo!”​—Juan 19:4, 5.

□ Determinado ka bala kag maisugon sa paghimo sang mga butang nga dapat mo buhaton?

Ini kag ang iban pa nga mga kinaiya amo ang rason kon ngaa si Jesus amo ang perpekto nga huwaran para sa aton. Kon sundon naton ang iya paggawi, mangin mas maayo kag mas malipayon kita nga tawo. Amo ini ang rason kon ngaa ginpalig-on ni Pedro ang mga Cristiano nga sundon sing maayo ang mga tikang ni Jesus. Ginapanikasugan mo bala nga himuon ini sa bug-os mo nga masarangan?

Indi Lamang Isa ka Huwaran nga Dapat Sundon

Apang, si Jesus indi lamang isa ka huwaran nga dapat sundon. Nagsiling sia: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Luwas sa pagpanaksi sa kamatuoran tuhoy sa Dios, nga amo ang nagbukas sang kahigayunan nga mangin suod sa Iya, nag-aman si Jesus  sing paagi agod matigayon sang mga matutom ang kabuhi.​—Juan 3:16.

Tuhoy sa sini nga rason kon ngaa nagkari si Jesus sa duta, sia nagsiling: “Ang Anak sang tawo nagkari, indi agod alagdon, kundi agod mag-alagad kag ihatag ang iya kalag subong gawad nga kabaylo sang madamo.” (Mateo 20:28) Paagi sa paghalad sang iya kabuhi, nagpahamtang si Jesus sing sadsaran agod matigayon sang mga tawo ang kabuhi nga dayon. Ano ang himuon naton subong indibiduwal agod makabenepisyo sa sina nga aman? Si Jesus nagpaathag: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

Gani, ang pagkuha sing ihibalo tuhoy kay Jesus, pag-ilog sa iya pagkabuhi, kag pagtuo sa iya kamatayon subong halad, kinahanglanon agod matigayon ang kabuhi nga walay katapusan. Ginaagda kamo namon nga tun-an ang tuburan sini nga ihibalo, ang Biblia, kag tinguhaan nga iaplikar ang ginasiling sini, kaangay sang ginhimo ni Jesus. *

Ang dalayawon nga pagkabuhi ni Jesus nagatudlo sa aton kon paano kita dapat magkabuhi. Ang iya kamatayon magahilway sa aton sa sala kag kamatayon. (Roma 6:23) Makaluluoy gid ang aton kahimtangan kon wala ang daku nga impluwensia ni Jesucristo! Indi pagtuguti ang paghingamo kag kabalaka sa kabuhi nga magpugong sa imo nga tun-an kag sundon sing maayo ang halimbawa ni Jesucristo, ang pinakabantog nga tawo nga nagkabuhi.

[Mga footnote]

[Kahon/Mga piktyur sa pahina 7]

▪ Si Jesus matinahuron sa tanan kag wala sing pinasulabi

▪ Sia matuod nga abyan tubtob sa kamatayon

▪ Sia maisugon

Ginapanikasugan mo bala nga sundon sing maayo ang mga tikang ni Jesus?

[Mga piktyur sa pahina 5]

Si Jesus balanse sa iya pagkabuhi . . .

mahapos palapitan . . .

maluluy-on