Ang Papel ni Maria sa Katuyuan sang Dios

ISA ka bes samtang nagaministeryo si Jesus, may isa ka babayi sa kadam-an nga naghambal sa mabaskog nga tingog: “Malipayon ang taguangkan nga nagdala sa imo kag ang mga suso nga imo ginsusuhan!” Kon luyag ni Jesus nga simbahon sang mga tawo ang iya iloy, amo ini kuntani ang pinakamaayo nga kahigayunan agod itudlo ini sa ila. Apang, nagsabat sia: “Indi, sa baylo, Malipayon ang mga nagapamati sa pulong sang Dios kag nagatuman sini!”—Lucas 11:27, 28.

Wala ginhatagan ni Jesus sing pinasahi nga kadungganan ang iya iloy kag wala man niya ginsugo ang iya mga sumulunod nga himuon ini. Paano abi gamiton ini nga paathag sang mga nagapadungog kag nagasimba kay Maria? Binagbinagon naton ang pila ka lapnag nga panudlo tuhoy sa iloy ni Jesus sa bulig sang Balaan nga Kasulatan.

“Ginpuno sang Grasia,” “Ginpakamaayo . . . sa Tanan nga Babayi”

Ginpahibalo sang anghel nga si Gabriel kay Maria ang iya mangin papel sa katuyuan sang Dios. Sa sina nga tion, gintamyaw sang anghel si Maria, nga nagasiling: “Maayong adlaw, ikaw nga nahamut-an sing daku, si Jehova kaupod mo.” (Lucas 1:28) Ang isa ka badbad nagasiling: “Magkalipay ka, ikaw nga ginpuno sang grasia, ang Ginuo yara sa imo.” Wala madugay, gintamyaw ni Elisabet si Maria sing: “Ginapakamaayo ka sa tanan nga babayi, kag ginapakamaayo ang bunga sang imo taguangkan!” (Lucas 1:42) Ginapakita bala sini nga mga panamyaw nga dapat simbahon si Maria?

Wala. Bisan pa ginlakip ini nga mga panamyaw sa pangadi sang mga Katoliko kay Maria, wala ginpakita sang Biblia nga dapat sia pangamuyuan. Ginsambit nanday Gabriel  kag Elisabet ang daku nga kadungganan ni Maria nga mangin iloy sang Mesias, pero wala sing may mabasa sa Kasulatan nga dapat kita mangamuyo kay Maria. Sa baylo, sang ang mga disipulo ni Jesus nagpatudlo sa iya kon paano mangamuyo, gintudluan niya sila nga ipatuhoy sa iya Amay ang ila pangamuyo. Gani, ang umpisa sang modelo nga pangamuyo ni Jesus nagasiling: “Amay namon nga yara sa langit.”—Mateo 6:9.

Isa sa mga Nagagahom

Ang isa pa ka lapnag nga panudlo tuhoy kay Maria amo nga sia karon “ang Rayna sang langit.” Indi gid mabasa sa Biblia nga ini nga titulo para kay Maria. Apang, ginasugiran kita sini nga may pinasahi sia nga papel sa pagginobierno sang Dios sa langit. Ano ang iya papel?

Nagsiling si Jesus nga ang pila sa iya mga disipulo magagahom kaupod niya sa iya Ginharian. (Lucas 22:28-30) Hatagan ni Jesus ining mga pinili sing awtoridad nga mag-alagad bilang “mga saserdote sa aton Dios, kag magagahom sila sa duta subong mga hari.” (Bugna 5:10) Paagi sa bulig sang Biblia, makahinakop kita nga si Maria nalakip sa mga ginhatagan sining dungganon nga pribilehiyo. Ngaa masiling naton ini?

Mahimo madumduman mo nga sang patay na si Jesus, si Maria “nagapadayon sa pagpangamuyo” upod sa mga disipulo kag mga utod ni Jesus. Mga 120 ka disipulo ang nagtipon sini nga okasyon, upod ang “pila ka babayi.” (Binuhatan 1:12-15) Samtang “ang adlaw sang kapiestahan sang Pentecostes nagapadayon,” siling sang Biblia, “nagtipon sila tanan sa isa ka duog” sang ginbubo sa ila ang balaan nga espiritu sang Dios, kag ginhatagan sila sang ikasarang nga makahambal sing iban nga mga lenguahe.—Binuhatan 2:1-4.

Si Maria isa sa mga babayi nga ginpakamaayo nga makabaton sadto sing balaan nga espiritu. Gani, masiling man nga lakip sia sa ginpili nga mangin bahin sang Ginharian ni Jesus sa langit. Wala sing duhaduha nga si Maria nagapungko na karon kaupod ni Jesus sa iya ginharian sa langit. (Roma 8:14-17) Binagbinaga ang pila sa pinasahi nga papel nga tungdan ni Maria kag sang iban pa nga gumalahom nga kaupod ni Jesus sa pagpatuman sang mga katuyuan sang Dios.

Kabulig sa Pag-aman sang mga Pagpakamaayo sang Dios

Ang tulun-an sang Bugna sa Biblia nagasiling nga 144,000 ang banhawon agod magpalangit kag mag-alagad kaupod ni Jesus subong mga saserdote, hukom, kag mga hari. (Bugna 14:1, 4; 20:4, 6) Subong mga saserdote, magabulig sila agod matigayon sang matinumanon nga mga tawo ang mga benepisyo sang halad ni Jesus. Paagi sa sini, makatigayon ang katawhan sing maayong kaangtanan sa Dios, kag mangin himpit sa pisikal kag moral. (Bugna 21:1-4) Daku gid nga pribilehiyo para sa tanan nga mainunungon nga mga sumilimba sang Dios nga maagom ini nga pagpakamaayo. *

Halin sadto kag tubtob subong, may bahin si Maria sa katumanan sang mga katuyuan ni Jehova. Maayo gid ilugon ang pagkamapainubuson, pagtuo, pagkamatinumanon, kag pagkadiosnon ni Maria subong isa ka iloy, kag labi na gid ang iya maayo nga halimbawa sa pagbatas sang mga kabudlayan. Takus gid sia nga tahuron bangod sang iya papel bilang iloy sang Mesias kag bilang isa sa magaaman sing walay katapusan nga pagpakamaayo sa katawhan.

Apang, ang pinakaimportante nga matun-an naton kay Maria kag sa iban pa matutom nga mga alagad sang Dios, amo nga nagaalagad sila kay Jehova kag indi sa iban nga dios. Si Maria kag ang iban pa nga kaupod ni Jesus nga nagagahom sa langit, nagabayaw sang ila tingog sa pagdayaw: “Ang kadayawan kag ang dungog kag ang himaya kag ang gahom mangin sa Isa nga nagalingkod sa trono [si Jehova nga Dios] kag sa Kordero [si Jesucristo] tubtob sa wala katubtuban.”—Bugna 5:13; 19:10.

[Nota]

[Blurb sa pahina 10]

Maayo gid ilugon ang pagkamapainubuson, pagtuo, kag pagkamatinumanon ni Maria