MAHIMO nakalabay ka na sa isa ka Kingdom Hall sang mga Saksi ni Jehova sa inyo lugar kag natingala ka kon ano ang ginahimo nila sa sulod. Nahibaluan mo bala nga ang tanan puede makatambong sa ila mga pagtilipon kada semana? Ginaabiabi gid ang mga bisita diri.

Apang, mahimo may mga pamangkot ikaw. Ngaa nagatipon ang mga Saksi ni Jehova? Ano ang ginahimo nila sa ila mga pagtilipon? Kag ano ang ginasiling sang mga bisita parte sa ila mga pagtilipon?

Halin pa sang dumaan nga panahon, nagatipon na ang mga tawo para magsimba kag magtuon parte sa Dios. Mga 3,500 ka tuig na ang nagligad, ginsugo ang mga Israelinhon: “Tipuna ang mga tawo—mga lalaki, mga babayi, mga kabataan, kag mga indi Israelinhon nga nagaestar sa inyo mga banwa—agod makapamati sila kag makatuon nga magtahod sa GINOO nga inyo Dios kag magtuman sing maayo sa tanan nga ginapatuman sa sini nga mga sugo.” (Deuteronomio 31:12, ANG PULONG SANG DIOS) Gani, sa Israel ang mga bata kag mga tigulang pareho nga gintudluan nga magsimba kag magtuman kay Jehova nga Dios.

Mga 1,500 ka tuig sang ulihi, sang naporma na ang Cristiano nga kongregasyon, ang pagtilipon importante gihapon nga bahin sang matuod nga pagsimba. Si apostol Pablo nagsulat: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa.” (Hebreo 10:24, 25) Subong halimbawa, ang relasyon sang kada miembro sang pamilya nagalig-on kon pirme sila nagainupdanay. Amo man sini ang nagakatabo sa mga luyag mag-alagad sa Dios. Ang ila gugma nagalig-on man kon nagatipon sila pirme para magsimba.

Nahisuno sa sining mga halimbawa sa Biblia, nagatipon man ang mga Saksi ni Jehova sa ila mga Kingdom Hall sing duha ka beses kada semana. Ang mga nagatambong sa sini nabuligan nga maapresyar, mahangpan kag maaplikar ang mga prinsipio sa Biblia. Ang programa sa sini nga pagtilipon halos palareho tanan sa bug-os nga kalibutan, kag ang kada programa may pinasahi nga katuyuan para sa pagsimba sa Dios. Antes kag pagkatapos sang pagtilipon, ‘nagabayluhanay sing pagpalig-on’ ang mga tumalambong paagi sa makapalig-on nga pag-istoryahanay. (Roma 1:12) Ano ang pila sining mga programa?

Ang una nga programa nga ginatambungan sang kalabanan nga tawo amo ang pamulongpulong sa Biblia nga gindesinyo para sa publiko, nga masami ginahiwat kon Domingo. Madamo nga beses nga naghatag si Jesucristo sing pamulongpulong publiko—lakip sa sini amo ang bantog nga Sermon sa Bukid. (Mateo 5:1; 7:28, 29) Si apostol Pablo nagpamulongpulong man sa mga taga-Atenas. (Binuhatan 17:22-34) Ini nga mga halimbawa ginsunod sang mga Saksi ni Jehova, amo nga sa ila pagtilipon may pamulongpulong sila nga ginahanda indi lamang para sa mga Saksi ni Jehova, kundi para man sa tanan, pati na sa mga una nga bes pa lang nakatambong.

Nagaumpisa ang miting paagi sa isa ka kanta gikan sa libro nga Mag-amba Sing mga Pagdayaw kay Jehova. * Ang tanan ginaagda nga magtindog kag magkanta. Sundan ini sang isa ka malip-ot nga pangamuyo, kag pagkatapos sini, ang isa ka kalipikado nga humalambal magahatag sing 30 minutos nga pamulongpulong. (Tan-awa ang kahon nga “ Mga Pamulongpulong para sa Publiko.”) Ang iya pamulongpulong ginabase gid sa Biblia. Ginaagda sang humalambal ang mga tagpalamati nga buksan ang ila Biblia kag sundan sia samtang nagabasa sang mga bersikulo. Gani, mahimo mo dalhon ang imo Biblia, ukon makapangayo ka sing Biblia sa isa sang mga Saksi ni Jehova antes magsugod ang miting.

Sa kalabanan nga mga kongregasyon sang mga Saksi ni Jehova, ang pamulongpulong sa Biblia ginasundan sang Pagtinuon sa Ang Lalantawan, nga amo ang isa ka oras nga pamangkot kag sabat nga pagbinagbinag sa isa ka topiko sa Biblia. Ginapalig-on sini nga programa ang mga tumalambong nga sundon ang halimbawa sang mga taga-Berea sang adlaw ni Pablo nga “nalangkag gid sila sa pagbaton sa pulong, nga ginausisa sing maayo ang Kasulatan.”—Binuhatan 17:11.

Nagaumpisa ang Pagtinuon sa Ang Lalantawan paagi sa isa ka kanta. Ang impormasyon nga binagbinagon kag ang mga pamangkot sang nagadumala makita sa tulun-an nga edisyon sini nga magasin. Makakuha ka sang isa ka kopya sang tulun-an nga edisyon sa isa sang mga Saksi ni Jehova. Ang mga topiko nga ginbinagbinag sining karon lang amo ang masunod: “Mga Ginikanan—Hanasa Sing Mahigugmaon ang Inyo mga Anak,” “Indi Magbalos Sang Malaut sa Malaut kay Bisan Sin-o,” kag “Kon Ngaa Malapit na Madula ang Tanan nga Pag-antos.” Bisan pa ini nga programa pamangkot kag sabat nga pagbinagbinag, ang pagpakigbahin sa sini boluntaryo. Masami nga ang mga nagasabat abanse na nga nakabasa kag nakabinagbinag sang artikulo nga pagatun-an kag sang mga bersikulo sa Biblia. Ginatapos ang miting paagi sa isa ka kanta kag pangamuyo.—Mateo 26:30; Efeso 5:19.

May isa pa gid ka miting nga ginahiwat ang mga Saksi ni Jehova kada semana sa ila Kingdom Hall. May tatlo ini ka programa kag nagalawig sing isa ka oras kag 45 minutos. Ang una nga programa amo ang 25 minutos nga Pagtinuon sang Kongregasyon sa Biblia. Nagabulig ini sa mga tumalambong nga mangin pamilyar pa gid sa ila Biblia, matadlong ang ila panghunahuna kag panimuot, kag mag-uswag subong mga sumulunod ni Cristo. (2 Timoteo 3:16, 17) Pareho sa  Pagtinuon sa Ang Lalantawan, pamangkot kag sabat man ini nga pagbinagbinag sa isa ka topiko sa Biblia. Boluntaryo ang pagsabat sa mga pamangkot. Ang ginatun-an diri amo ang isa ka libro ukon brosyur nga ginabalhag sang mga Saksi ni Jehova.

Ngaa ang mga literatura parte sa Biblia amo ang ginagamit sa miting? Sang panahon sang Biblia, ang pagbasa lamang sa Pulong sang Dios indi bastante. “Nagbasa sila . . . sing maathag; kag ginhatag nila ang kahologan, sa bagay nga mahangup sang katawohan ang pagbasa.” (Nehemias 8:8) Sining karon lang nga mga tuig, ang mga publikasyon nga nagabinagbinag sa mga tulun-an sang Isaias, Daniel, kag Bugna nakabulig sa mga nagtambong nga mahangpan ini nga mga tulun-an sa Biblia.

Ang Pagtinuon sang Kongregasyon sa Biblia ginasundan sang Teokratikong Eskwelahan Para sa Ministeryo. Ining 30 minutos nga programa gindesinyo para buligan ang mga Cristiano nga mapauswag ang ila “kalantip sa pagpanudlo.” (2 Timoteo 4:2) Halimbawa, napamangkot ka na bala sang imo bata ukon sang imo abyan parte sa Dios ukon sa Biblia nga nabudlayan ka sa pagsabat? Ang Teokratikong Eskwelahan Para sa Ministeryo makabulig sa imo kon paano sabton sing makapalig-on kag base sa Biblia ang mabudlay nga mga pamangkot. Sa amo, maeksperiensiahan man naton ang ginbatyag ni propeta Isaias, nga nagsiling: “Ang Ginoong DIOS naghatag sa akon sang dila sang mga ginaton-an, agud nga makahibalo ako magsakdag sa polong sa ginalapyo.”—Isaias 50:4.

Nagaumpisa ang Teokratikong Eskwelahan Para sa Ministeryo paagi sa isa ka pamulongpulong nga nabase sa isa ka bahin sang Biblia. Ini nga bahin sang Biblia ginapalig-on sa mga tumalambong nga basahon sing abanse sa sulod sang isa ka semana. Pagkatapos sang pamulongpulong, agdahon sang humalambal ang mga tumalambong nga maghatag sing malip-ot nga komento parte sa mapuslanon nga mga punto nga ila nabasa. Sa tapos sini, ang mga estudyante nga nakapalista sa sini nga eskwelahan magahatag sang mga presentasyon nga gin-asayn sa ila.

Gin-asayn sa mga estudyante ang pagbasa sa Biblia sa plataporma ukon ang pagdemonstrar kon paano magtudlo sa iban nga tawo sang isa ka topiko base sa Biblia. Pagkatapos mapresentar ang  kada asaynment, ginahatagan sing komendasyon sang isa ka eksperiensiado nga manuglaygay ang estudyante sa maayo niya nga nahimo. Ang komento sang manuglaygay nabase sa libro nga Magbenepisyo sa Pagpanudlo Sang Teokratikong Eskwelahan Para sa Ministeryo. Pagkatapos sang programa, mahimo niya hatagan sing pribado nga panugda ang estudyante kon ano pa ang iya pauswagon.

Ining programa gindesinyo para buligan indi lamang ang mga estudyante kundi ang tanan man nga tumalambong nga luyag mag-uswag sa ila ikasarang sa pagbasa, paghambal, kag pagtudlo. Pagkatapos sang Teokratikong Eskwelahan Para sa Ministeryo, magasugod ang Miting sa Serbisyo paagi sa isa ka kanta nga nabase sa Biblia.

Ang katapusan nga bahin sang programa amo ang Miting sa Serbisyo. Paagi sa mga pamulongpulong, mga demonstrasyon, mga interbyu, kag pagpakigbahin sang tumalambong, makatuon ang mga nagtambong kon paano itudlo sing epektibo ang kamatuoran sa Biblia. Antes ginpalakat ni Jesus ang iya mga disipulo para magbantala, gintipon niya anay sila kag ginhatagan sing detalyado nga mga instruksion. (Lucas 10:1-16) Sang handa na sila sa pag-ebanghelyo nga hilikuton, nalipay sila sa ila makawiwili nga mga eksperiensia. Sang ulihi, nagbalik kag nagreport kay Jesus ang iya mga disipulo. (Lucas 10:17) Masami nga nagasugiray ang mga disipulo sang ila mga eksperiensia.—Binuhatan 4:23; 15:4.

Ang 35 minutos nga programa para sa Miting sa Serbisyo makita sa bulanan nga balasahon nga natig-uluhan Ang Aton Ministeryo sa Ginharian. Ang mga topiko nga ginbinagbinag sining karon lang amo ang: “Pagsimba kay Jehova Subong Pamilya,” “Kon Ngaa Nagabalikbalik Kita,” kag “Iluga si Cristo sa Inyo Pagministeryo.” Matapos ang programa paagi sa isa ka kanta, kag ang isa ka miembro sang kongregasyon gin-asayn nga maghatag sing katapusan nga pangamuyo.

Ang mga kongregasyon nagaabiabi gid sa tanan. Halimbawa, si Andrew madamo sing nabatian nga negatibo nga mga istorya parte sa mga Saksi ni Jehova. Apang sa una niya nga pagtambong sa pagtilipon, nakibot sia sa maayo gid nga pag-abiabi sa iya. “Kanami gid bala didto,” panugiron ni Andrew. “Nakibot gid ako kay mainabyanon gali ang mga tawo didto kag interesado gid sila sa akon.” Si Ashel, nga isa ka tin-edyer sa Canada, nag-ugyon sa sini. “Makawiwili gid ang pagtilipon! Madamo ako sing natun-an.”

Si José nga taga-Brazil, kilala sa ila komunidad nga abusador. Wala sapayan sina, gin-agda sia nga magtambong sa isa ka pagtilipon sa Kingdom Hall sa ila lugar. “Gin-abiabi ako sing maayo sa Kingdom Hall, bisan pa nahibaluan nila ang akon batasan sang una,” siling niya. Si Atsushi nga taga-Japan, naghinumdom: “Ginaako ko nga sang una ko nga pagtambong sa pagtilipon sang mga Saksi ni Jehova, indi ako komportable. Apang nakita ko nga maayo sila nga mga tawo. Ginatinguhaan gid nila nga mangin komportable ako.”

Subong sang ginapakita sang nasambit nga mga komento, ang pagtambong sa mga miting sa Kingdom Hall isa gid ka makalilipay nga eksperiensia. Makatuon ka parte sa Dios, kag paagi sa instruksion gikan sa Biblia nga mabatian mo didto, tudluan ka ni Jehova ‘para sa imo kaayuhan.’—Isaias 48:17, Maayong Balita nga Biblia.

Ang mga pagtilipon sang mga Saksi ni Jehova wala sing bayad, kag wala sing pagpangolekta nga ginahimo. Luyag mo bala magtambong sa isa ka miting sa Kingdom Hall sa inyo lugar? Ginaabiabi gid ikaw.