SA BANTA mo, mabudlay bala himuon kon ano ang husto? *— Kon huo ang imo sabat, madamo ang magaugyon sa imo. Bisan ang mga tigulang nabudlayan man sa paghimo sang husto. Tan-awon naton kon ngaa nabudlayan gid anay si Josias sa paghimo sing husto nga mga desisyon. Kilala mo bala sia?—

Si Josias anak sang hari sang Juda nga si Amon. Disiseis anyos lang si Amon sang natawo si Josias. Si Amon, malain katama nga tawo pareho sang iya Amay nga si Hari Manases sang una. Ang matuod, si Manases madamo nga tuig nga naggahom subong malain katama nga hari. Apang sang ulihi, ginbihag sia sang mga Asirianhon kag ginpriso sa isa ka malayo nga lugar sa Babilonia. Samtang yara sia sa prisuhan, nakitluoy si Manases kay Jehova nga patawaron sia, kag ginpatawad sia ni Jehova.

Sang ginbuy-an na si Manases, nagbalik sia sa Jerusalem kag naggahom liwat subong hari. Pagkatapos sini, gintadlong niya gilayon ang malain nga mga butang nga iya ginpanghimo kag ginbuligan ang mga tawo nga mag-alagad kay Jehova. Sigurado nga nasubuan gid sia sang makita niya nga wala ginsunod sang iya anak nga si Amon ang iya maayo nga halimbawa. Sa sini nga panahon natawo si Josias. Wala ginsugid sang Biblia kon daw ano ka suod si Manases kag ang iya apo nga si Josias. Pero, sa banta mo, indi ayhan nga ginbuligan ni Manases si Josias nga alagaron si Jehova?—

Sang anom pa lang ka tuig si Josias, napatay si Manases. Gani, ang amay ni Josias nga si Amon amo ang nangin hari. Pero duha lang ka tuig nga naggahom si Amon kay ginpatay sia sang iya mga alagad. Gani, si Josias amo ang nangin hari sang Juda sa edad nga walo ka tuig. (2 Cronica, kapitulo 33) Ano sa banta mo ang natabo pagkatapos sadto? Ginsunod bala ni Josias ang malain nga halimbawa sang iya amay nga si Amon, ukon ginsunod niya ang maayo nga halimbawa sang iya mahinulsulon nga lolo nga si Manases?—

Bisan bata pa si Josias, gusto gid niya nga mag-alagad kay Jehova. Sa amo, ginpamatian niya ang mga nagahigugma kay Jehova, sa baylo nga pamatian ang  mga abyan anay sang iya amay. Walo pa lang ka tuig si Josias, pero nahibaluan na niya nga dapat sia mamati sa mga tawo nga nagahigugma sa Dios. (2 Cronica 34:1, 2) Gusto mo bala mahibaluan kon sin-o anay ang naglaygay kay Josias kag nangin maayo nga mga halimbawa sa iya?—

Ang isa ka maayo nga halimbawa kay Josias amo si propeta Sofonias. Ayhan paryentihanay sila ni Josias, kay mahimo nga kaliwat si Sofonias sang mabuot nga amay ni Manases nga si Hari Ezequias. Sa temprano nga bahin sang paggahom ni Josias subong hari, ginsulat ni Sofonias ang tulun-an sa Biblia nga Sofonias. Ginsugid ni Sofonias ang malain nga matabo sa mga nagahimo sing malain, kag sigurado nga ginpamatian gid ni Josias ang iya mga paandam.

Ang isa pa ka maayo nga halimbawa kay Josias amo si Jeremias, nga mahimo nga kilala mo na. Si Jeremias isa man ka pamatan-on pareho ni Josias kag mahimo nga indi maglayuay ang ila puluy-an. Ginpasulat ni Jehova kay Jeremias ang tulun-an sa Biblia nga Jeremias. Sang napatay si Josias sa inaway, nagsulat si Jeremias sing isa ka pinasahi nga panalabiton agod ipabutyag ang iya daku nga kasubo. (2 Cronica 35:25) Mahimo nga ginpalig-on gid nila anay ang isa kag isa nga magpabilin nga matutom kay Jehova!

Ano sa banta mo ang natun-an naton kay Josias?— Kon ang imo amay wala man nagaalagad kay Jehova, may iban pa bala nga tawo nga makatudlo sa imo parte sa Dios? Basi ina nga tawo amo ang imo iloy, lola, lolo, ukon iban pa nga paryente. Ukon mahimo man makabulig sa imo ang isa ka alagad ni Jehova nga gintugutan sang imo iloy nga magtuon sing Biblia upod sa imo.

Dumduma nga bisan bata pa si Josias, nakahibalo na sia nga dapat lamang sia makig-abyan sa mga tawo nga nagaalagad kay Jehova. Kabay nga amo man sina ang himuon mo kay amo sina ang husto!