Pamangkot sang Amon Bumalasa

Ginakuha Bala sang Dios ang mga Bata Para Mangin mga Anghel sa Langit?

Kon mapatay ang isa ka bata, mahimo paumpawan sang mga abyan ang napatyan nga pamilya paagi sa pagsiling, “Siguro nagakinahanglan ang Dios sing isa pa ka anghel sa langit.” Sa banta mo, matuod bala ini?

Kon matuod nga ginakuha sang Dios ang mga bata kay kinahanglan niya ang dugang pa nga mga anghel sa langit, ginapakita sini nga wala sia sing balatyagon kag mapintas. Pero, indi amo sini ang ginasiling sang Biblia. (Job 34:10) Indi gid pagkuhaon sang isa ka mapinalanggaon nga Amay ang bata sang iban para madugangan ang iya mga anak. Pero wala sing ginikanan nga mas mapinalanggaon pa sangsa kay Jehova, nga ang panguna nga kinaiya amo ang gugma. (1 Juan 4:8) Mahigugmaon gid sia, amo nga indi gid niya mahimo ina nga kapintas.

Pamangkuta ang imo kaugalingon, ‘Kinahanglan gid bala sang Dios ang dugang pa nga mga anghel sa langit?’ Suno sa Biblia ang tanan nga binuhatan sang Dios maayo kag kompleto. (Deuteronomio 32:4) Ang iya pagtuga sang minilyon ka anghel perpekto, kag wala na sing kulang. (Daniel 7:10) Nagsala bala ang Dios sa kadamuon sang mga anghel nga iya kinahanglan? Imposible! Wala gid nagasala ang Labing Gamhanan nga Dios. Matuod, may ginpili ang Dios nga pila ka tawo agod mangin espiritu kag mangin bahin sang iya Ginharian sa langit, pero indi sila mga bata kon mapatay sila.—Bugna 5:9, 10.

Ang isa pa ka rason kon ngaa wala ginakuha sang Dios ang mga bata para mangin anghel, amo nga indi ini suno sa orihinal nga katuyuan sang Dios sa mga bata. Sa hardin sang Eden, ginsilingan sang Dios si Adan kag Eva: “Magmabungahon kag magbuad, kag magtugub sang duta kag magpakaagalon sa iya.” (Genesis 1:28) Ang mga bata regalo sang Dios, kag gintuyo sang Dios nga magpanganak ang mga tawo para matuman ang iya orihinal nga katuyuan nga pun-on ang duta sang matarong nga pamilya sang tawo. Wala niya gintuyo nga kuhaon ang mga bata para mangin espiritu nga mga tinuga. Ang Biblia maathag nga nagasiling nga ang mga anak “panublion gikan sa GINOO.” (Salmo 127:3) Subong Dios sang gugma, bawion bala ni Jehova ang iya ginregalo sa mga ginikanan? Indi gid!

Kon ang bata gulpi lang mapatay, grabe gid nga kasubo, kasakit, kag kalisod ang resulta sini. Kon amo, ano ang paglaum sang nagakasubo nga mga ginikanan? Ang Biblia nagasaad nga ang minilyon nga napatay banhawon sang Dios sa isa ka paraiso nga duta. Handurawa nga ang mga bata nga mapagros na, makaupod liwat sang ila mga hinigugma. (Juan 5:28, 29) Kabubut-on sang Dios nga ang mga bata magdaku, magkalipay, kag magtuon parte sa iya kag sa iya katuyuan sa duta. Gani, ang mga bata nga napatay wala nangin mga anghel sa langit, kundi nagahulat sing pagkabanhaw sa isa ka paraiso nga duta. Sa sina nga tion, sa idalom sang mahigugmaon nga pag-atipan sang aton Manunuga, ang mga bata kag mga may edad makagalipay sa pagsimba kay Jehova nga Dios sing dayon.