Ginbuligan ang mga Biktima sang Bagyo sa Myanmar

SANG Mayo 2, 2008, ginwaswasan sang Bagyo Nargis ang Myanmar. Tuman ini kabaskog amo nga ginbalita ini dayon sa bilog nga kalibutan. Mga 140,000 ka tawo ang napatay ukon nadula pagkatapos naglambas ang mabaskog nga bagyo sa Irrawaddy Delta.

Pero maayo lang kay bisan madamo ang Saksi ni Jehova sa sina nga lugar, wala sing isa sa ila ang napatay. Naluwas sila kay ang kalabanan nagdangop sa ila mabakod nga mga Kingdom Hall. Sa isa ka lugar, 20 ka Saksi kag 80 ka pumuluyo ang nagsaka sa atop sang Kingdom Hall kag nagtener didto sing siam ka oras asta nga nagkulpa ang lima ka metros nga baha. Tanan sila naluwas. Pero makapasubo nga 300 ka pumuluyo sa sina nga lugar ang napatay. Sa madamo nga lugar, ang Kingdom Hall lang gid ang nabilin nga nagatindog.

Duha ka adlaw pagkatapos sang bagyo, ang opisina sang mga Saksi ni Jehova sa Yangon nagpadala sing mga boluntaryo para magbulig sa mga kongregasyon sa Bothingone, malapit sa gibwangan sang delta. Naagyan sini nga grupo ang mga duog nga may madamo sing nagkalaguba, may nagakaagnas nga mga bangkay, kag nagapanglambat nga mga kawatan. Pero nakalab-ot gid man sila sa Bothingone dala ang mga suplay sang bugas, noodles, tubig, kag mga kandila. Sila ang pinakauna nga boluntaryo nga nakalab-ot sa sina nga lugar. Sa tapos mapanagtag sang grupo ang ila dala nga mga suplay sa mga Saksi didto, nagpamulongpulong sila para palig-unon ang ila mga kauturan. Ginbilinan man nila ang mga Saksi sing mga Biblia kag mga literatura kay ang tanan nila nga pagkabutang nagkalaanod.

Ang panimuot sang mga Saksi nga nabiktima sang bagyo talalupangdon gid. Ang isa ka Saksi halin sa kongregasyon sa  Irrawaddy nga gin-agyan sang bagyo nagsiling: “Ang tanan namon nga pagkabutang wala na. Ang amon mga balay nagkalaguba. Ang tanan namon nga pananom wala na. Wala sing tubig nga mainom tungod sa baha. Pero indi pareho sa iban, ang mga kauturan wala gid nagapalibog sing todo. Nagasalig gid sila kay Jehova kag sa iya organisasyon. Kon silingon man kami nga magtener ukon magsaylo, sundon ini namon.”

Ang isa naman ka grupo sang 30 ka Saksi nga nadulaan sang tanan nila nga pagkabutang, malipayon nga nagkanta sing ambahanon sang mga Saksi samtang nagabiyahe sing 10 ka oras pakadto sa lugar nga puede nila anay mateneran kag may mga suplay sang pagkaon kag bayo. Antes sila makalab-ot didto, nabalitaan nila nga may sirkito nga asembleya sang mga Saksi ni Jehova sa malapit nga banwa. Nagtambong sila anay sa asembleya para mapalig-on sa Biblia kag makapakig-upod sa Cristianong mga kauturan.

Sa mga lugar nga naapektuhan sang bagyo, 35 ka balay sang mga Saksi ang naguba, 125 ang medyo nahalitan, kag 8 ka Kingdom Hall ang may diutay nga guba. Maayo lang kay gamay lang ang guba sang opisina sang mga Saksi sa sini nga lugar.

Sang primero, wala gid sing maagyan pakadto sa opisina sang mga Saksi kay nagkalatumba sa dalan ang dalagku nga mga kahoy. Mga pila lang ka oras sa tapos sang bagyo, sobra sa 30 ka miembro sa sini nga opisina ang nagbulig sa pagpanghawan sa dalagku nga mga kahoy bisan wala sing mga gamit. Nagdayaw gid ang mga tawo sa palibot kag daw indi makapati sa ila nakita. Wala magdugay, nag-abot ang grupo sang mga Saksi nga babayi nga may dala nga palamahawon nga prutas kag ilimnon para sa mga nagboluntaryo kag sa ila mga kaingod. Sang nakita ini sang isa ka reporter, namangkot sia, “Sin-o ini nga mga tawo kag ngaa kadasig gid sa ila mag-obra?” Sang ginsugiran sia nga mga Saksi sila, nakasiling sia, “Tani tanan nga tawo pareho ka mabinuligon sa mga Saksi ni Jehova!”

Naghimo dayon ang mga Saksi sing duha ka grupo sang mga komite sa duha ka bahin sang pungsod para magbulig sa mga ginbagyuhan. Ginatos ka boluntaryo ang nagbinuligay. Sa sulod lang sang pila ka adlaw, madamo nga mga balay ang ginpatindog para sa mga Saksi. Daw indi makapati ang kaingod sang isa ka Saksi sang mag-abot ang isa ka grupo sang mga boluntaryo para patindugan sing balay ang ila utod. Nagsiling pa gani ang isa ka kaingod: “Ginpatindugan sia ’ya sang balay sang iya mga upod sa simbahan. Ang mga kaupod ko ’ya nga mga Budhista wala gid nagbulig sa akon. Tani nag-Saksi na lang ako sang gin-istorya niya ako parte sa Biblia!”

Sang gin-usisa sang isa ka grupo sang mga boluntaryo ang balay sang isa ka Saksi nga pamilya sa Thanlyn nga halos marumpag na, nagdayaw gid ining mga boluntaryo sang ginsilingan sila: “Indi kamo magkabalaka sa amon. Okey lang kami di! Maistaran pa man ang amon balay. Ang iban gani nga mga Saksi wala na gid ya sing balay. Sila to anay ang buligi ninyo!”

Sa isa ka lugar sa Yangon, may pila ka tawo nga nagdangop sa isa ka simbahan. Pero nakakandado ini kag wala sing may makasulod. Naakig gid ang mga tawo kag gusto nila gub-on ang puertahan. Pero, ang mga Saksi ni Jehova madamo sing ginbuligan nga tawo nga magdangop sa mga Kingdom Hall sang nagabagyo. Halimbawa, sa isa ka Kingdom Hall sa Dala, ginbuligan sang isa ka mag-asawa nga Saksi ang 20 ka makaluluoy nga kaingod nga nagapangita sing madangpan. Pagkaaga, wala na sila tanan sing balay kag gutom gid sila. Maayo lang kay may nadalawat ang bana nga bastante para sa ila tanan.

May isa ka pamilya sa Yangon nga indi tanan nga miembro mga Saksi ni Jehova. Pagkatapos sang bagyo, tanan sila pati ang mga indi Saksi nagtambong sa miting sa Kingdom Hall. Ngaa? Ang isa sa ila nagsiling: “Nagpromisa ang amon simbahan nga kadtuan kami nila pagkatapos sang bagyo, pero wala gid sing may nag-abot  kundi kamo lang nga mga Saksi. Ginhatagan ninyo kami sing pagkaon kag tubig. Indi kamo pareho sang iban nga relihion!” Nanamian gid ang pila ka miembro sang pamilya nga indi mga Saksi sa pagtinuon sa artikulo sang Lalantawan nga “Si Jehova Nagapamati sang Aton Pagpangabay sing Bulig” kag nagkomento pa gani sila.

Ang isa ka babayi nga nagatuon sa Biblia upod sa mga Saksi ni Jehova nagtambong sa miting, isa ka semana pagkatapos sang bagyo. Natabuan man nga ginbasa ang sulat halin sa opisina sang mga Saksi nga nagasiling kon paano ginbuligan ang mga biktima sang bagyo kag ginsugid ang mga eksperiensia sang mga nakalampuwas. Samtang ginabasa ang sulat, naghibi sia. Nagdayaw gid sia kag nalipay sa iya nabatian nga nakontak na ang tanan nga Saksi kag wala sila tanan maano. Pagkatapos, ginhatagan sia sang iya mga kinahanglanon kag ginpatindugan sing tent sa tupad sang iya balay. Nabatyagan gid niya ang pagpalangga sang mga Saksi sa iya.

Nagsiling si Jesus: “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:35) Ginpadaku man ni disipulo Santiago nga ang matuod nga pagtuo may binuhatan. (Santiago 2:14-17) Ginahimo ini sang mga Saksi ni Jehova kag ginatinguhaan gid nila nga ipakita ini nga gugma paagi sa pagbulig sa mga nagakinahanglan.

[Blurb sa pahina 11]

Suno sa Biblia ang matuod nga pagtuo may maayo nga binuhatan