Mangin Suod sa Dios

“Nahibaluan Ko Gid ang Ila mga Pag-antos”

Exodo 3:1-10

“BALAAN, balaan, balaan ang GINOO.” (Isaias 6:3) Ining inspirado nga pinamulong nagapakita nga indi matupungan ang katinlo kag kaputli ni Jehova nga Dios. ‘Mabudlay bala sia palapitan bangod sang iya pagkabalaan?’ mahimo ipamangkot mo. ‘Ang isa bala ka makasasala kag di-himpit nga tawo kabalak-an sang amo sina ka balaan nga Dios?’ Usisaon naton ang makapalig-on nga ginsiling sang Dios kay Moises nga mabasa sa Exodo 3:1-10.

Isa ka adlaw, samtang nagabantay si Moises sang iya mga karnero, may nakita sia nga katingalahan. Ang isa ka kahoykahoy nagadabdab pero ‘wala nagakaupos.’ (Bersikulo 2) Sa iya katingala, nagpalapit sia agod mangusisa. Paagi sa isa ka anghel, nakighambal si Jehova kay Moises sa tunga sang kalayo: “Dili ka magpalapit diri; huksa ang imo mga sapin sa imo mga tiil, kay ang duug nga tindugan mo dutang balaan.” (Bersikulo 5) Hunahunaa, bangod ang nagadabdab nga kahoykahoy nagarepresentar sa presensia sang Dios, ang duta mismo nangin balaan man!

May rason gid ang Dios sa pagpakighambal kay Moises. Sia nagsiling: “Nakita ko ang kapipit-an sang akon katawohan nga yara sa Egipto, kag nabatian ko ang ila pagtuaw bangud sang ila mga agalon sa pangabudlay; nahibaluan ko ang ila mga kasubu [“nahibaluan ko gid ang ila mga pag-antos,” Maayong Balita nga Biblia].” (Bersikulo 7) Ang Dios indi bulag sa mga pag-antos sang iya katawhan, ukon wala makabati sa ila mga pangabay. Sa baylo, nabatyagan niya ang ila kasakit. Talupangda nga nagsiling ang Dios: “Nahibaluan ko gid ang ila mga pag-antos.” Parte sa tinaga nga “nahibaluan ko gid,’ ang isa ka libro nagsiling: “Ini nga ekspresyon nagapakita sang personal nga balatyagon, pagpalangga, kag kaluoy.” Ang mga ginsiling ni Jehova kay Moises nagapakita nga isa Sia ka mainulikdon kag mapinalanggaon gid nga Dios.

Ano ang himuon sang Dios? Wala lamang sia naluoy sa ila. Ang iya nakita kag nabatian nagpahulag sa iya. Gintuyo niya nga luwason ang iya katawhan pagua sa Egipto kag dal-on sila “sa duta nga nagailig sing gatas kag dugus.” (Bersikulo 8) Agod mahimo ini, ginsilingan sang Dios si Moises: ‘Paguaa ang akon katawohan . . . gikan sa Egipto.’ (Bersikulo 10) Gintuman gid ini ni Moises, gani sang 1513 B.C.E. ginpangunahan niya ang Israel pagua sa Egipto.

Wala nagbag-o si Jehova. Makasalig ang iya mga sumilimba karon nga nakita man niya ang ila mga kabudlayan kag ginapamatian niya ang ila pagpangabay sing bulig. Nahibaluan gid niya ang ila mga pag-antos. Pero wala lamang si Jehova nagabatyag sing kaluoy sa iya matutom nga mga alagad. Sa baylo, ginabuligan sila sang mapinalanggaon nga Dios “bangod nagaulikid sia” sa ila.—1 Pedro 5:7.

Ang kaluoy sang Dios nagahatag sa aton sing paglaum. Paagi sa iya bulig, kita nga di-himpit nga mga tawo mahimo mangin balaan kag kalahamut-an sa iya. (1 Pedro 1:15, 16) Ang isa ka Cristianong babayi nga may depresyon kag ginluyahan sing buot napalig-on gid sa naeksperiensiahan ni Moises sa may kahoykahoy. Nagsiling sia: “Kon mahimo ni Jehova nga balaan bisan ang higko, buot silingon may paglaum pa ako. Ini nga panghunahuna nakabulig gid sa akon.”

Gusto mo bala nga magtuon sing dugang pa parte sa balaan nga Dios nga si Jehova? Puede ka mangin suod sa iya, kay si Jehova ‘nakakilala sang aton kahimtangan, nagadumdum sia nga kita yab-ok.’—Salmo 103:14.