Nahibaluan Mo Bala?

Paano ginatamod sang Dios ang pagpakigbahin sang mga Israelinhon sa astrolohiya?

Suno sa isa ka diksionaryo, ang astrolohiya amo ang “pagtuon sa hulag sang mga planeta, adlaw, kag mga bituon, kag ginapatihan nga ang mga hulag sini nagaimpluwensia sa kabuhi sang mga tawo.” Kada tuig kon maglibot ang duta sa adlaw, daw nagasaylo ang posisyon sang mga bituon bangod sa posisyon sang duta. Halin pa sang una, ginapanilagan ini sang mga tawo kag nagapati sila nga may daku ini nga kahulugan sa ila.

Ang astrolohiya mahimo nga naghalin sa mga taga-Babilonia, nga nagasimba sa mga bituon sadto. Nagsimba man sa sini ang mga Israelinhon sadto sang ginsikway nila ang matuod nga pagsimba. Sang tion ni Hari Josias sang Juda madamo na nga Israelinhon ang nagapakigbahin sa astrolohiya. Apang maathag ang pagtamod sang Dios. Suno sa Mosaikong Kasuguan nga ginsulat mga ginatos ka tuig na, patyon ang nagasimba sa mga bituon.—Deuteronomio 17:2-5.

Lakip sa mga pagbag-o nga ginhimo ni Hari Josias sang naggahom sia sa Juda amo ang pagdumili sang paghalad “sa adlaw, kag sa bulan, kag sa mga planeta, kag sa bug-os nga kasoldadosan sang langit.” Ginhimo ini sang hari bangod luyag niya nga ‘sundon [si Jehova] kag bantayan ang iya mga sugo.’ (2 Hari 23:3-5) Amo man sini ang dapat himuon sang mga tawo karon nga luyag simbahon ang Dios “sa espiritu kag kamatuoran.”—Juan 4:24.

Sin-o ang “mga Anak ni Zeus” nga ginsambit sa Binuhatan 28:11?

Suno sa Tulun-an sang Binuhatan sa Biblia, sang nagapakadto si apostol Pablo sa Roma, nagsakay sia sa Malta pa Puteoli sa sakayan nga may tinigib nga hitsura sang “Mga Anak ni Zeus.” (Binuhatan 28:11) Madamo nga marinero sang una kag manuglakbay ang nagagamit sini nga simbulo.

Suno sa Griego kag Romano nga mitolohiya, si Zeus (nga kilala man nga Jupiter) kag si Leda may kapid nga bata nga lalaki nga sanday Castor kag Pollux. Ining “Mga Anak ni Zeus” kilala gid nga eksperto nga mga marinero kag makontrol nila ang hangin kag ang balod. Gani, ginsimba sila subong mga dios nga nagahatag sing proteksion sa mga marinero. Kon may bagyo, ang mga nagalakbay nagahalad sa ila kag nagapangabay sing proteksion. Nagapati ang kalabanan nga ginapakita sining kapid nga dios ang ila gahom paagi sa kalayo ni St. Elmo, isa ka masanag nga kapawa nga makita kon kaisa sa palo sang sakayan kon may bagyo.

Madamo nga Griego kag Romano ang nagasimba kay Castor kag Pollux, kag may isa anay ka reperensia nga nagsiling nga ginasimba man sila sa distrito sa palibot sang Cyrene, sa North Africa. Ang sakayan nga ginsambit sa Binuhatan naghalin sa Alexandria, sa Egipto.

[Retrato sa pahina 9]

BATO HALIN SA BABILONIA NGA MAY LARAWAN NI HARI NAZIMARUTTASH KAG SANG MGA BITUON

[Retrato sa pahina 9]

DENARIO NGA MAY HITSURA SANG “MGA ANAK NI ZEUS,” 114-113 B.C.E.

[Picture Credit Lines sa pahina 9]

Stela: Réunion des Musées Nationaux/Art Resource, NY; coin: Courtesy Classical Numismatic Group, Inc./cngcoins.com